Жаңа Конституция жобасын түсіндіруге арналған «Әділетті және Прогрессивті Қазақстанның Халықтық Конституциясы үшін!» Жалпыұлттық коалициясы өкілдерінің кезекті кездесуі Отырар ауданы, Шәуілдір ауылындағы мәдениет үйінде өтті. Басқосуда Ата заңда көзделген жаңашылдықтар мен оның ел дамуы үшін стратегиялық маңызы жан-жақты талқыланды.
Кездесуде жаңа Конституция жобасының негізгі мақсаты – Әділетті Қазақстан қалыптастыру, мемлекеттік басқару жүйесінің тиімділігін арттыру және азаматтардың әл-ауқатын жақсартуға бағытталған құқықтық негіз қалыптастыру екені атап өтілді. Коалиция мүшесі Еркеғали Таңатаров Конституция жобасындағы бірқатар маңызды ерекшеліктерге тоқталды.
«- Жаңа Ата заңда әлеуметтік мемлекеттің рөлін күшейту және азаматтардың әлеуметтік қорғалу деңгейін арттыруға мүмкіндік беретін құқықтық нормалар бекітілетін болады. Білім, ғылым және адами капиталды дамытуға басымдық беріліп, экологияны қорғау және «Таза Қазақстан» қағидатын орнықтыру, өңірлердің теңгерімді дамуына құқықтық негіз қалыптастыру көзделген. Сондай-ақ конституциялық өзерістер мемлекеттік шешімдер қабылдау үдерісіндегі ашықтық пен қоғаммен кері байланысты күшейтуге серпін береді»- деді Еркеғали Таңатаров.
Спикерлер жаңа Ата заңның басты ұстанымы – адам мен оның әл-ауқаты мемлекет саясатының өзегіне айналуы тиіс екенін атап өтті. Бұл ретте жиынға қатысушылар жаңа Конституция жобасы елдің тұрақты дамуына, қоғамдық келісімді нығайтуға және болашақ ұрпақ үшін берік құқықтық негіз қалыптастыруға қызмет ететініне сенім білдірді. Жиын соңында тұрғындар алдағы референдумның маңызына тоқталып, ел болашағына қатысты маңызды шешім қабылдауда азаматтық белсенділік танытуға дайын екендіктерін жеткізді
