Жуырда Түркия мемлекетінің Анталья қаласында өткен халықаралық “Robotex Turkiye 2024 ” робототехника сайысы өтті.
Айтулы сында Түркістан облысы, Шардара ауданының Мәулен Қалмырза атындағы №3 мамандандырылған мектеп-интернатының “Shardara team” робототехника командасы Азияның түкпір-түкпірінен келген 34 команданың арасында өткен білім бәйгесінде “Lego Sumo” категориясы бойынша ІІІ орынды қанжығасына байлады.
Информатика пәнінің мұғалімі Маржан Саудабаеваның баптайтын команда Испанияда өтетін жарысқа жолдама алды.
«Таза Қазақстан» республикалық экологиялық акциясының «Жасыл аймақ» апталығы аясында бүгін Сауран ауданы әкімдігінің аумағы көгалдандырылды. Аймаққа арнайы топырақ пен органикалық тыңайтқыш көмегімен көпжылдық 400 дана роза және 8500 дана бегоня, циния, ганцания және бархитца секілді гүл түрлері отырғызылды.
Экоакцияның үшінші «Жасыл аймақ» апталығында аудан аумағында көгалдандыру жұмыстарымен қатар, тазалық, әктеу-сырлау жұмыстары жүргізіліп жатыр. Іс-шарада түрлі-түсті гүлдерден бөлек, талдар да отырғызылды. Аймақты жасыл желекке ораған «Таза Қазақстан» экоакциясы бұл жұмыстарға айрықша серпін беріп, абаттандыру және көгалдандыру жұмыстары қарқынды жүргізіліп жатыр.
Айта кетейік, экоакция басталған күннен бүгінге дейін Сауран ауданындағы 117 көше бойлары тазаланып, 24 саябақ пен аллеяда қалпына келтіру жұмыстары жүргізілді. Екі мыңға жуық ретсіз өскен бұталар қырқылып, талдардың түптері әктелді. Жалпы ұзындығы 42,7 шақырым аяқжолдар тазаланып, саябақтар және скверлер ретке келтірілді. Көпірлердің, өзендердің, каналдар мен бұлақтардың 11,3 шақырым арналары мен 32,1 шақырым ирригация жүйелері тазаланды. Сонымен қатар 4700-ге жуық көшет отырғызылып, 597,5 тонна қоқыс шығарылды.
Түркістан облысы, Ордабасы ауданы, Бадам елді мекеніндегі Дербес ауылының тұрғындарының қуанышында шек жоқ. Ауылда заманауи үлгідегі фельдшерлік-акушерлік бекет пайдалануға берілді. Енді тұрғындар ем іздеп, аудан орталығына бармай, дертіне шипаны Дербес фельдшерлік-акушерлік бекетінен табады. Аталған нысанның құрылысы 2023 жылы басталған.
Фельдшерлік-акушерлік бекетте фильтр, әйелдер бөлмесі, егу бөлмесі, емшара бөлмесі, қабылдау бөлмесі бар.
Нысанның ашылу салтанатына аудан әкімі Азат Оралбаев, аудандық мәслихаттың төрағасы Бақдәулет Жұмабеков, ардагерлер кеңесінің төрағасы Бостандық Жәкей, Облыстық денсаулық сақтау басқармасының бөлім басшысы Баласағұн Асым, аудандық аурухананың басшысы Болатхан Салыбекұлы қатысты.
«Құрметті ауыл тұрғындары! Сіздерді барлық жағдайы жасалған, заманауи үлгідегі бекеттің ашылуымен шын жүректен құттықтаймын. Медициналық нысан ауылдағы екі мыңнан астам тұрғынға сапалы, тиімді медициналық көмек көрсетеді деп сенемін. Денсаулығына жиі шағымданатын тұрғындар үшін бұл үлкен қуаныш», деді аудан әкімі Азат Оралбаев.
Жалпы, ауданда 51 емдеу мекемесі бар болса, оның 38-і – ФАП. 2023 жылы 5 ФАП пайдалануға берілсе, биыл 2-еуі ел игілігіне табысталмақ.
Түркістан облысының әкімі Дархан Сатыбалды, облыстық мәслихат төрағасы Нұралы Әбішов Шардара ауданына арнайы жұмыс сапарымен барды. Аудандағы шаруа қожалықтары мен кәсіпкерлік нысандарын аралады. Жергілікті кәсіпкерлермен жүздесіп, оларға мемлекеттік бағдарламалар беретін мүмкіндіктер туралы айтты. Алдымен ауданда тамшылатып суару әдісін пайдаланып, жүгері егуге ниет білдірген түрік инвесторларымен кездесті. Инвесторлармен зауыт ашу мәселесі талқыланды.
Осы ретте Түркістан облысының әкімі Дархан Сатыбалды 2024 жылғы 19 сәуірде Шардара ауданы тұрғындарымен кездесті. Өткен жылы атқарылған жұмыстарды баяндап, алдағы жоспарларға тоқталды. Халықпен кездесуден соң өңір басшысы облыстық мәслихат төрағасымен және жауапты басқарма, бөлім басшыларымен бірге жеке қабылдау өткізді. Мәселені қалай шешу керектігін айтып, жолдары мен жүйесін түсіндірді. Тұрғындардың жекелеген сұрақтарына жауап берді.
Сапар аясында, Жаушықұм ауылдық округінде орналасқан «Тұрар» шаруа қожалығында болып, қожалықтың тамшылатып суару әдісін пайдалану бойынша жұмысымен де танысты. Сонымен қатар, Шардара қаласындағы және Алатау батыр ауылдық округіндегі «Шебер» мүгедектер қоғамы» қоғамдық бірлестігінің тігін фабрикасымен ауданға қарасты Ұзыната ауылдық округінде орналасқан тұрақты тұқымбаққа арнайы келіп, атқарылып жатқан жұмыстарымен танысты. 15 гектар тәлімбақта 2 млн 300 түп көшет өндірілуде.
Түркістан облысының әкімі Дархан Сатыбалды кәсіпорындардың санын арттыру керектігін айтып, жаңа жұмыс орындарын ашу арқылы халықтың әлеуметтік осал топтары мен жастардың әлеуметтік жағдайын көтеру қажеттігін тапсырды. Кәсіпкерлермен кездескен өңір басшысы аудан әкімі мен басқарма басшыларына тапсырмалар жүктеді. Жергілікті кәсіпкерлерді қолдауды күшейтуді тапсырды.
Адам өмірін құтқару-жоғары және жауапты миссия. Қазіргі таңда апатты жағдайға тап болғанда, адамға қол ұшын созу кез-келгеннің қолынан келе бермесі анық. Осыған орай, өзгенің өмірін сақтау үшін, өз жанын шүберекке түйіп қызмет етіп жүрген азаматтарымыздың жұмысымен танысу үшін, бүгін Түркістан облыстық мәслихат төрағасы Н.Әбішов бастаған облыстық мәслихат депутаттары, облыстық Төтенше жағдайлар департаментіне барды. Мақсаты өңірдің ТЖД техникалық дайындығын көру.
Халық қалаулылары Сүлеймен Арыстанов, Қалыйма Жантөреева, Бекарыс Шойбеков заманауи техникалармен жабдықталған мекеменің жаңа ғимаратын аралап, жұмысымен танысты. Депутаттарға алдымен, №39 мамандандырылған өрт сөндіру бөлімінің алдында өрт сөндіру автокөліктері мен авариялық құтқару жабдықтары таныстырылды.
Аралаудан кейін, дағдарыс орталығында Департамент аппаратының басқарма, бөлім бастықтарымен арнайы кездесу өтті.
Облыста жалпы саны 40 өрт сөндіру депосы бар. Мекемеге қосымша нормаға сәйкес тағы да 31 өрт сөндіру депосы қажет етіледі.
Қазіргі таңға Түркістан облысы Төтенше жағдайлар департаментінің құрылымдық бөліністері мен ведомствалық бағынысты мекемелерімен қоса штат саны 1632 қызметкерді құрайды. Сонымен қатар, 203 өрт сөндіру техникамен меншіктелген.
Жалпы, 2024 жылдың 3 айында Түркістан облысының аумағында 141 төтенше жағдай орын алған. Зардап шеккендер саны 34 адамды құраса, қайтыс болғандар саны — 8. Материалдық шығыны 261 млн. 420 мың теңгені құрады. «112» шұғыл қызметінің телефондарына азаматтардан 56959 және «101» нөміріне 27 909 қоңырау келіп түскен.
2023 жылы лизингтік бағдарлама бойынша жергілікті бюджеттен жалпы соммасы 2 млрд. 569 млн. 837 мың 250 теңгеге 25 бірлік өрт техникасын сатып алынған.
Құтқарушы қызметкерлермен өткен жиында, облыстық ТЖД бастығы Асқар Даулетбайұлы, депутаттарға 2024 жылдың 1-тоқсанында атқарылған жұмыстардың барысын баян етті. Мекеме жұмыстарының нәтижесіне тоқталды. Өз сөзінде, бүгінгі таңда химиялық қауіпті объектілерде апат орын алған жағдайда, химиялық зақымдану төнуі мүмкін аумақта тұратын халықтың 83,3% жеткілікті жеке қорғаныс құралдарының қоры сақталған.
Азаматтық қорғаныс саласы есептік кезеңде облыс аумағында тұрғындарды жер сілкінісі кезіндегі іс-әрекеттерді үйрету мақсатында әртүрлі деңгейде 8 556 оқу-жаттығу мен жаттығулар өткізілген.
Облыс бойынша өрт қауіпсіздік саласында 48 124 объект бақылауда тұр. Көктемгі су тасқынын алдын алу мақсатында су шаруашылық мекемелерімен бірлесіп, гидротехникалық құрылыстардың су режиміне күнделікті мониторинг жүргізілуде,- деп атап өтті.
Кездесуде су қоймаларындағы адам өлімінің негізгі себебі – бұл ережелерді сақтамау, шомылуға бейімделмеген жерлерге суға түсу, балаларды қараусыз қалдыру және алкогольдік сусындарды ішу. Себептер мен мәселе белгілі, сондықтан түсіндіру жұмыстарын белсенді жүргізу керек,-деп атап өтті Нұралы Әлмаханұлы. Сонымен қатар, шомылу маусымының жақындап келе жатқандығын ескерсек судағы қайғылы оқиғаларды, өрт жағдайларын болдырмау үшін, қаламыздағы БАҚ өкілдерімен тығыз байланыс орнатып, ескерту шараларын жүргізу қажет. Иә,бүгінде төтенше жағдайлар қызметкерінің беделі жоғары. Бұл жауапты, қиын мамандық. Игеру кез-келген адамның қолынан келмейтіні анық. Сіздердің абыройлы қызметтеріңіз, бұл құтқарылған адам өмірімен өлшенеді ,- деген мәслихат төрағасы құтқарушылардың алдағы қызметіне сәттілік тіледі.
Айта кету керек, Профилактикалық мақсатта ТЖД мамандары күнделікті өмірде өрт қауіпсіздігі ережелерін түсіндіре отырып, азаматтарды отпен жұмыс істеу кезінде қауіптен сақтандырып, жеке сектор бойынша рейдтерге шығады.
Құтқарушылар өрт қауіпсіздігі ережелерінің сақталуын тексереді, тұрғындармен әңгімелеседі, тұрғын үйді өртке қарсы жабдықтаудағы кемшіліктерді анықтайды.
Кездесу соңында департамент бастығы жұмыс барысымен танысуға ниет білдіріп келген депутаттарға ризашылығын білдіріп, алғысын айтты.
Құрметті тұрғын! Сіз де өрт қауіпсіздігінің қарапайым ережелерін сақтаңыз! Есіңізде болсын, өртті сөндіруден гөрі алдын-алу оңай. Өрт болған жағдайда дереу 101 нөміріне қоңырау шалыңыз!
Өздеріңіз білетіндей, еліміздің Абай, Ақмола, Ақтөбе, Атырау, Батыс Қазақстан, Қарағанды, Қостанай, Павлодар, Солтүстік Қазақстан және Ұлытау облыстарының халқы су тасқынынан зардап шегіп, қиындыққа тап болды.
Осы орайда, осы өңірлердегі қалыптасқан жағдай және қабылданып отырған шаралар туралы Мемлекет Басшысы Қасым-Жомарт Кемелұлы Тоқаев халыққа өзінің Үндеуін жариялады.
Мемлекет басшысы биылғы су тасқыны көлемі жағынан соңғы 80 жылдан бергі ең ірі табиғи апат екенін атап өтті.
Сонымен қатар, Президент бір ел, бір халық болып жұмылып, бұл апатты міндетті түрде еңсеретінімізді, суға кеткен үйлер қалпына келтірілетінін, қиын-қыстау кезде бір жағадан бас, бір жеңнен қол шығару айрықша маңызды екенін жеткізді.
Әрине, осынау сын сағатта Президентіміздің бұл сөздері отандастарымыздың болашаққа деген сенімін арттырып, ерік-жігерін ынталандыра түсті деп ойлаймын.
Бүгінде Мемлекет Басшысының тікелей бақылауымен Республикалық штаб жұмыс жасауда. Үкімет тарапынан су тасқынының салдарын жоюға барлық қажетті шаралар қабылданып, тиісті жұмыстар атқарылуда. Сондай-ақ, барлық өңірлер зардап шеккен тұрғындарға барынша көмектерін беруде.
Қазіргі таңда Түркістан облысының әкімі Сатыбалды Дархан Амангелдіұлы бастаған тиісті құрылымдар мен облыстық, қалалық, аудандық мәслихат депутаттары, “AMANAT” партиясы және өзге де партиялар, облыстық Атамекен кәсіпкерлер палатасы, кәсіпкерлер, қоғамдық ұйымдар, Қазақстан халқы ассамблеясы, жастар мен еріктілер, қарапайым тұрғындар да зардап шеккен өңірлерге қаржылай және гуманитарлық көмектерін жолдауда.
Бүгінде Түркістан өңірінен 23 фура жүк көлігі, 7 – газель және 10 Альфард көлігі жалпы Түркістан өңірінен барлығы 561 тонна гуманитарлық көмек жөнелтілді. Материалдық көмектен бөлек, қол көмек үшін, 1 автобус, 9 жеңіл көлікпен өңірдің ерікті жастары апат аймақтарына барды. Бұдан өзге, құрылыс жұмыстарын жасау үшін самосвал, погрузчик сияқты 105 техника көмекке жөнелтілді. Сонымен қатар, облыстық және аудандық, қалалық мәслихат депутаттары тарапынан барлығы 37 млн теңге қаржы жиналды. Оның ішінде, облыстық мәслихат депутаттарынан – 27 млн және аудан, қала мәслихат депутаттарынан 11 млн теңге қаражат жиналды.
Осы орайда, су тасқынынан зардап шеккен тұрғындарға көмек жолдауға атсалысқан облысымыздың барлық аудандары мен қалаларының халқына, барлық мекемелерге және елді ауызбіршілік пен ынтымаққа шақырған қазыналы қарттарымыз бен өнегелі өрендерімізге алғысымды білдіремін.
Облыс әкімінің қолдауымен біздің өңірімізден алдағы уақытта да көмек көрсету жұмыстары бірізді жүргізіле беретін болады.
Ия, жағдай өте күрделі. Дегенмен біз барлығымыз жұмылып, бұл қиындықтан да шығамыз. Түркістан өңірінде орын алған Арыстағы жарылыс, Мақтааралдағы су тасқынын да ел болып еңсердік. Сондықтан, бұл күндер де жаман түстей артта қалып, мемлекет тарапынан қабылданып жатқан шаралар өз нәтижесін берері сөзсіз.
Құрметті түркістандықтар!
Баршаңызға қолдарыңыздан келгенше көмек беріп жатқандарыңыз үшін шынайы алғысымды білдіремін. Осындай қиын кезеңде отандастарымызға қолдау көрсетуіміз аса маңызды.
«Бірлік бар жерде тірлік бар» деген аталы сөз бар. Сол себептен де, сын сағатта халқымызға тән биік парасаттылық пен даналығымызды көрсетіп, барлығымыз жұдырықтай жұмылып, зардап шеккен халыққа көмегімізді аямайық!
Түркістан облыстық мәслихатының төрағасы
Нұралы Әбішов
Түркістан облысының барлық аймақтарында «Таза Қазақстан» республикалық акциясы аясында 10 сәуір күні бастау алған «Таза өлке – Түркістан» науқанына түлкібастық мемлекеттік мекеме қызметкерлері де өз үлестерін қосты.
500 астам қызметкер білек сыбана көше бойының тазалағы мен ағаш түптерін әктеу сынды жұмыстар атқарды.
Тазалық акциясы барысында 9 шақырым көше мен күре жол бойы тазартылып, одан шыққан күл-қоқыс ауыр техника күшімен арнайы қоқыс полегонына тасымалдануда.
Сауран ауданында «Таза Қазақстан» республикалық акциясының «Таза өлке» апталығы аясында тазалық сақтамаған тұрғындарға айыпұл салынып, рейдтік шаралар жүргізілді.
Тазалық жоқ жерде құт-береке де болмайды. Әр саналы азамат өзі тұратын жерді таза, көрікті болуына үлес қосуы керек.
Сауран ауданындп жыл сайын көктем мезгілі келісімен сенбiлiктер ұйымдастырылып, күл-қоқысты тазарту жұмыстары жүйелі жүргізіліп келеді. Аудан аумағын тазалау, тұрмыстық қалдықтарды, қоқыстарды шығару және бейқисап өскен шөптерді ретке келтіру жұмыстары да тұрақты жүргізуде.
Ауылдарды таза ұстау жағына келгенде, кемшін тұстар да жоқ емес. Мәселен, ауылды аралап көрсеңіз, әр жерде тау-тау үйілген иесіз күл-қоқыстарды көресіз. Ауылдың сұрқын қашырған бұл қоқыстар өздігінен жиналған жоқ, әрине. Ал, оны тазартуға келгенде тұрғындар дәрменсіздік танытады. Ол жұмысты жергілікті атқарушы биліктің мойнына арта салады. Шынында, ауыл бәріне ортақ. Сондықтан да бұл мәселеге бәріміз де жауаптымыз деп түсінген абзал.
Қазақстан халқы Ассамблеясының Түркістан облысындағы этномәдени бірлестіктері су тасқынынан зардап шеккен өңірлердің тұрғындарына белсене көмек көрсетуде. Осы орайда, Қазақстан халқы Ассамблеясының «Жүректен жүрекке» акциясы аясында Түлкібас аудандық өзбек этномәдени бірлестігі қайырымдылық шарасына өз үлестерін қосты.
Аудандық өзбек этномәдени бірлестігінің бастамасымен және Рысқұлов ауылдық округі, Азаттық елдімекеніндегі тұрғындардың атсалысуымен 1 жүк көлігіне тиелген 28 тонна гуманитарлық көмек бүгін Ақтөбе облысына жөнелтілді. Аталған жүк көлігінде азық-түлік, санитарлық тазалыққа және құрылысқа қажетті заттар бар.
Түлкібас — тұмса табиғаты көз тартарлық, әсем өлке. Жасыл желегі алып таулармен жалғаса жатқан Жер Анасы да ешбір өлкеге тең келе алмайтындай құнарлы, сұлу. Ал, әдемі өлкенің ажарын кіргізіп әсем ететін де, келбетін қашырып сұрықсыз ететін де тазалық екені бәрімізге аян.
Осыған орай республикалық «Таза Қазақстан» акциясының «Таза өлке» апталығы аясында аудан әкімі Нұржан Ізтілеуовтың тапсырмасына сәйкес, елді мекендердегі арық-атыз, аула, көшені тазартып, қоқыс-қалдықты шығару жұмыстары ауданның 15 ауылдық округ, кентте жүргізіліп, акцияға белсенді 200 волонтер, 250 жастар, жалпы 450 адам қатысты. Жалпы тазалық жұмыстары барысында 30 тонна күл қоқыс шығарылды. Әр азамат ауласын, көшесін қоқыстардан тазартса бүкіл аудан гүлденеді, тазарады. Өлкеге жаңа леп пен ажар енетіні сөзсіз. Сондықтан тазалықты сақтап, ағаш егіп, әрбір тұрғын өз ауласына гүл, ағаштар отырғызу әр азаматтың борышы екендігі тұрғындар арасында түсіндірілді.
