Түркістан облысы әкімі Нұралхан Көшеровтің Сауран ауданына жұмыс сапары аясында жаңа өндірістік аймақтардың құрылысымен танысты. Инфрақұрылыммен қамтылған индустриалды алаңдар кәсіпкерлікті дамытып қана қоймай, жергілікті халықты жұмыспен қамтуға да зор мүмкіндік туғызып отыр. 2024–2026 жылдар аралығында Сауран ауданында 5 бірдей өндірістік аймақ құрылуда. Атап айтқанда, Қарашық, Иассы, Жүйнек, Шорнақ және Үшқайық ауылдық округтерінде 55 гектарға жуық жер бөлініп, 115 жобаны орналастыру көзделген. Қазірдің өзінде 60 кәсіпкермен меморандум түзілсе, олардың 30-ы құрылыс жұмыстарын бастап кеткен. Облыс басшысы Нұралхан Көшеровтің айтуынша, бұл бастама тек кәсіпкерлікті дамытумен шектелмейді, сонымен бірге өңір халқы үшін тұрақты табыс көзіне айналады.

– Өндірістік аймақтар – инвестиция тарту, кәсіпкерлік белсенділікті арттыру және еңбек нарығын қолдаудың тиімді құралы. Біз кәсіпкерлерге қажетті инфрақұрылым жасап беріп, олардың өнімдерін бір орталықта шоғырландыру арқылы нарыққа шығуын жеңілдетеміз. Бұл – Түркістан облысы экономикасының болашағына салынған инвестиция, – деді Нұралхан Көшеров.

Сапар аясында облыс әкімі алдымен Еңбекші Дихан ауылындағы «Иассы» индустриалды аймағына барды. Мұнда 9 гектар аумаққа 24 жоба орналаспақ. Қазіргі таңда 16 кәсіпкер жобасын бастап кеткен. Аталған аймақта жиһаз, тігін, жол белгілері, бояу, қағаз, пластик, жартылай дайын тағам өнімдері және құрылыс материалдарын өндіретін цехтар іске қосылады. Жалпы инвестиция көлемі – 6,3 млрд теңге, ал ашылатын жұмыс орындары – 600-ден асады.

10 гектар жерге орналасқан Қарашық өндірістік аймағында 20 жоба жүзеге аспақ. Қазірдің өзінде 12 кәсіпкер құрылысқа кірісті. Бұл аймақта есік-терезе, желдеткіш құбырлар, резеңке жабын, пластикалық ыдыс, тігін және жиһаз цехтары ашылады. Жобалардың жалпы құны – 4,5 млрд теңге, жұмыс орындары – 170. Жүйнек ауылдық округінде орналасқан «MinPromKaz» ЖШС құрғақ құрылыс қоспаларын өндіруге маманданған. 5 гектар аумақта құрылыс-монтаждау жұмыстары жүріп жатыр. Кәсіпорын іске қосылған соң жылына 300 тонна өнім өндіріп, 300 адамды тұрақты жұмыспен қамтиды.

Ал «ASIA BREND» және «DIVALUX» атты жиһаз кәсіпорындары өз өнімдерін тек ішкі нарыққа ғана емес, еліміздің әр аймағына жөнелтуде. Қазіргі таңда бұл кәсіпорындарда 150-ге жуық адам жұмыс істейді. Материалдар Түркиядан жеткізіледі, ал жұмысшылар жергілікті жерде оқытылып, біліктілігін арттыруда. Шорнақ ауылында 8 гектарға индустриалды аймақ құрылып, жиһаз цехтары салынады. Үшқайықта 18 гектарға 37 жоба жүзеге асырылады. Бұл жобалар 2025–2030 жылдар аралығына жоспарланған. Ауыл шаруашылығы саласы бойынша да инвестициялық жобалар қатар жүріп жатыр.

Сауран ауданындағы өндірістік аймақтар – аймақтағы кәсіпкерлікті жаңа деңгейге көтеріп, Түркістан облысының экономикалық картасында жаңа белеске жол ашуда. Жобалардың іске асуы тек қана инвестиция тартуға емес, жергілікті халықтың әлеуметтік жағдайын жақсартуға, жұмыспен қамтылуына және өңірлік өзін-өзі қамту әлеуетінің артуына ықпал етуде.

Қазіргі қоғамда цифрлық технологияның қарқынды дамуына байланысты интернет желісінде жасалатын қылмыстардың түрі де көбеюде. Әсіресе, интернет алаяқтық деректері күн сайын артып келеді. Осыған орай Ордабасы ауданының полицейлері интернет алаяқтықтың алдын алу бойынша тұрғындарға түсіндірме жұмыстарын жүргізді.

Яғни жедел уәкілдер Халыққа қызмет көрсету орталығында тұрғындармен кездесу өткізіп, «Интернет алаяқтықтан сақ болыңыз!» тақырыбында ақпарат берді. Азаматтарға тақырыпқа сай фотосуреттер таратылып, ақпараттық тақтайшаларға ескерту парақтары ілінді.

Айта кетейік, қазіргі таңда азаматтардың ақшасын алдау жолымен заңсыз иемдену – қылмыстардың ең көп тараған түрі. Аталған қылмыс түрімен күресу елімізде және бүкіл әлемде өзекті мәселелердің бірі болып тұр. Мемлекет басшысы Қазақстан халқына жолдауында алаяқтық қылмыстарға қарсы нақты шаралар қабылдау керек екенін атап өткен болатын. Осы мақсатта елімізде түрлі іс-шаралар ұйымдастырылып, халыққа насихат жұмыстары да жүргізіліп келеді.

Бүгінде аймақта интернет алаяқтықтың үш түрі кеңінен таралған. Яғни, өзін банк қызметкері ретінде таныстырады, интернет-дүкендердің атын жамылып алаяқтық жасайды, жалған инвестициялық жобаларға қатыстыру арқылы азаматтарды қаржысынан айырады. Алаяқтар көбіне микроқаржы ұйымдары арқылы несие рәсімдейді. Қала берді, әлеуметтік желілер арқылы заңсыз ұтыс ойнатып, халықты құрығына түсіретіндер де бар. Бүгінгі таңда, әлеуметтік желіде бәрі ашық. Халық жарнама, тауарлар мен қызметтерді көп қарайды. Алаяқтар осы жағдайды ұтымды пайдаланады. Сауатты сөйлеп, адамды шатастырады. Сондықтан, полицейлер белгісіз номер қоңырау шалса құпиясөзді, картаның нөмірін, операцияны растау SMS-ін ешкімге айтпауға шақырады.

Жетісай аудандық полиция бөлімінде қызметкерлердің рухани-адамгершілік бағыттағы көзқарасын нығайту мақсатында идеологиялық сабақ ұйымдастырылды.Жиынның мақсаты құқық қорғау және арнайы органдарға деген сенімді арттыру және тәртіп сақшылары мен тұрғындар арасындағы қарым-қатынасты нығайту, сондай-ақ заң үстемдігін түсіндіре отырып, қоғамды кез келген заң және тәртіп бұзушылыққа қарсы қалыптастыруды насихаттау болды.

« – Заң мен тәртіп деген түсінікті тереңінен түсіну үшін рухани адамгершіліктің болуы маңызды. Мемлекет басшысы заңның үстемдігі дегеніміз тек шара көру емес, халыққа нақты заңнамаларды түсіндіре отырып, жақсы қарым-қатынасты қалыптастыру екенін атап өткен болатын. Яғни қоғамды тәртіп бұзушылықтан аулақ болуға шақыру бағытында полицейлердің қызметі маңызды екенін атап өткен жөн. Тәртіп сақшысы қоғамның айнасы іспетті. Полицейлердің әрбір іс-әрекеттері өзгелерге үлгі болуы керек. Заңды сақтау қаталдықпен ғана жүзеге асырылмайды. Кейбір мәселелерде түсіністік таныту, адамгершілік пен ауызбіршілікті ұстану елдің ынтымағы мен бірлігіне әсер ететінін ұмытпаған абзал. Құқық қорғау органдарының қызметкерлері сауатты әрі білікті болса, азаматтардың оған деген сенімі де арта түседі. Екі ара түсініспеушіліктің көбі, дау-дамайға ұласып, кейде мемлекеттік органдарға, полицейлерге сын пікірлердің туындауына дейін сақтырып жатады. Сондықтан арнайы органдарға сенімді арттыру үшін тәртіп сақшылары біліктілікпен қатар, рухани бай түсінікте болуы маңызды.» – деді Жетісай аудандық полция бөлімінің басшылық құрамы.

Дәріс кезінде тәртіп сақшыларына ел бірлігі, отансүйгіштік және қызметтік міндеттерді адал атқару арқылы халық сенімін ақтау сынды тақырыптар кеңінен түсіндірілді. Мұндай шаралар полиция қызметкерлерінің кәсіби және тұлғалық дамуына оң әсерін тигізері сөзсіз.