Құрметті Түркістан облысының
тұрғындары мен қонақтары!

Баршаңызды жадыраған жаздың хабаршысындай болған мамыр айының айтулы мерекелерімен құттықтаймын!
Алғашқы күндегі «Қазақстан халқының бірлігі күні» — әрбір қазақстандық үшін Отанға деген сүйіспеншілік пен патриоттық сезімнің, жалпы ұлттық келісімнің мерекесі. «Бірлік болмай тірлік болмас» деген бабаларымыз. Берекені көздеген ел мерекелі тірлік жасаудан жалықпаған. «Береке бастауы бірлік, ел іші тату тірлік» қағидасын ұстанған байтақ даламыздағы әрбір азамат үшін бұл мейрамның орны ерек.
Бұл ретте мерекенің мақсаты – еліміздегі түрлі ұлт пен дін өкілдерінің бір-біріне деген сый-құрметін арттырып, татулықты, бірлікті, ортақ құндылықтарды насихаттау екенін де айта кетуіміз қажет. Иә, биылғы еліміздің соның ішінде су басқан аймақтардың күрделі кезеңді бастан өткеріп жатқаны белгілі. Осындай сындарлы сәтте біздің отандастарымыз бір жеңнен қол, бір жағадан бас шығарып ынтымақ пен бірліктің шынайы үлгісін көрсетуде. Осы орайда, алдағы күндерден тек жақсылық тілей отырып, баршаңызды айтулы мерекемен құттықтаймын. Отбасыларыңызға амандық пен шаттық, бақыт-береке және елімізді өркендету жолындағы еңбектеріңізге мол табыс тілеймін!
Сонымен бірге, осындай ынтымақ пен бірлігіміздің шынайы үлгісіндей Ұлы Жеңіс күні де әрбір қазақстандық үшін орны бөлек мереке. Олай дейтінім, сұрапыл соғыс адамзаттың жүрегіне өшпес жара салды. Ауылда қалған ақ жаулықты аналар, егде тартқан қариялар мен бала-шаға зуылдаған оқ пен лапылдаған от-жалынның арасында жүрген бауырына, әкесіне, ағасына сеп болсын деп, бар күш қайратын жұмсады. Тылдағы әрбір күн соғысқа тең еді. Адамзат тарихындағы ең ауыр қантөгіс соғыстың аяқталғанына 79 жыл толыпты. Зарықтырып жеткен Жеңіс күнінің қадірі бәріміз үшін тым қымбат. Ардагер көрген зұлматты біз көрген жоқпыз, сол үшін оны құрметтеу асыл парызымыз! Сондықтан да жыл сайын мамыр айының 9 жұлдызында сол сұрапыл соғыстағы Жеңіс күні айрықша атап өтіледі. Және ол жалпыға бірдей халықтық мереке болғанымен, бұл күні әсіресе, кешегі соғыста Жеңіс үшін қолдарына қару алып, майданның алдыңғы шебінде қанқұйлы жаумен шайқасқа түскен соғыс ардагерлеріне көрсетілер құрмет айрықша.
Бүгінгі ұрпақ аға буын — ардагерлер танытқан қаһармандық пен қайсарлықтан үлгі алып, бой түзейді. Осынау ерлікке толы күн тарихымыздың мәңгілік ұмытылмас парағы болып қала бермек.
Ендеше, баршаңыздың дендеріңізге саулық, шаңырақтарыңызға шаттық, бақ пен береке тілеймін!

Түркістан облыстық мәслихатының депутаты
Алмас САЛИМОВ!

Бүгін, 1 мамыр Қазақстан Халқының бірлігі күні мерекесі қарсаңында Қазығұрт ауданы Сарапхана ауыл округінде орналасқан «Мәңгілік Ел» саябағында тазалық акциясы болып өтті. “Өнегелі ұрпақ” деп аталатын сенбілік жұмыстарына Түркістан облыстық мәслихатының төрағасы Н.Әбішев, Қазығұрт ауданының әкімі А.Исмайлов, облыстық мәслихат депуттары Н.Әжіметов мен Н.Аширов қатысты.

«Таза Қазақстан» экологиялық акциясы барысында ұйымдастырылған сенбілікте саябақ ішіне гүл отырғызылып, ағаш көшеттердің түптерін қопсыту, ақтау және шөптерін ору секілді жұмыстар атқарылды.

Облыстық мәслихат төрағасы Нұралы Әлмаханұлы барша өңір тұрғындарын республикалық акцияға белсене қатысуға шақырды. Әр бір ел тұрғыны өз ауласынан бастап, туған жерімізге жанашырлық танытып тазалық жұмыстарын жасайық. Аталмыш акция тоқтаусыз жалғасатын болады. Таза Қазақстан-таза қаладан, ал таза қала-таза ауылдан басталады. Демек, әрбір азамат шараға өз үлесін қосып, жұмыла атсалысуымыз тиіс,- деді.

Айта кетейік, Мемлекет басшысы Қасым-Жомарт Кемелұлының тапсырмасымен басталған сенбілік жұмыстарына бүгінде халық қалаулылары белсенді бой көрсетіп келеді. Жер-жерде депутаттар сайлаушыларымен бірге тазалық жұмыстарын жасап, өскелең ұрпақты игі іске жұдырықтай жұмылуға шақыруда.

Құрметті тұрғындар!
Сізді де аталмыш сенбілікке өз үлесіңізді қосуға шақырамыз! Таза өңір — ол біздің жер!

Қала әкімі Жандос Тасовтың қолдауымен Кентау қаласында бірнеше күнге созылған, қаланың табиғаты мен көрікті аймақтарын бала бейнесі арқылы көрсететін фотожоба ұйымдастырылды.

«Сен, ерекшесің» фотосессиясы — мүмкіндігі шектеулі балаларға арналған тең қоғамды дәріптейтін медиа жоба . Фото жобасының авторы — Әсел Бимырзаева.

Игі шараға қаладағы ерекше 15-ке жуық балалар қатысты. Түркістан, Шымкенттің фотогрофтары арқылы балаларды Кентау қаласының табиғаты алуан жерлері мен қала орталықтарында түсірілім жасатты. Әр бағытта түрліше киініп, әсем суреттер жасаған балалардың қуанышында шек жоқ. Олар тек түсірілім жасап қана қоймай, ата-аналарымен бірге табиғат аясында демалыс ұйымдастырылды.

Аталған жобаның қорытынды шарасына қатысқан қала әкімі Жандос Тасов барша ата-аналар мен белсенділік танытқан балаларға, жоба авторына алғысын білдірді. Барлық қатысушы балалар қала әкімінің алғыс хатымен марапатталып, сыйлықтар табысталды.

Одан бөлек, қалалық «Ақсақалдар алқасының» төрағасы М.Молжигитов, «Ардагерлер кеңесінің» төраға орынбасары М.Юлдашев мағынасы терең шараның Кентау қаласында ұйымдастырылғанына алғыс білдіріп, көпке ойсалар тағлымды жоба екенін атап өтті.

Балаларға қуаныш сыйлап, қоғамда өздерін еркін сезінуіне серпін берген, осындай шараның ұйымдастырылуына атсалысқан азаматтарға ата-аналар тарапынан алғыстар айтылды. Жиынға қаланың зиялы қауым өкілдері, маслихат депутаттары мен қала жастары қатысып, ерекше сезімге бөленді.

«Таза Қазақстан» акциясының «Жасыл аймақ» апталығының аяғында Түркістанда ауқымды экологиялық іс-шара өтті. Тарихи шаһар кезекті рет жасыл желекпен толықтырылды. Түркістан облысының әкімі Дархан Сатыбалды «Жібек жолы» саябағында көпшілікпен бірге көшет егіп, тұрғындарды экобелсенді болуға шақырды.

– Мемлекет басшысы Қасым-Жомарт Кемелұлы «Таза Қазақстан» акциясы науқандық емес, тұрақты дағдыға айналатын бастама екенін айтты. Біз өңірімізде көгалдандыру, абаттандыру және тазалық жұмыстарын тұрақты түрде жалғастырамыз. Қоршаған ортаны таза ұстау, экологияны жақсартуға үлес қосу – бәріміздің парызымыз. Бүгін отырғызған көшеттеріміз жайқалып өсіп, жазда тұрғындар мен қонақтарға сая бола берсін, – деді Дархан Сатыбалды.

Экоакцияға Түркістан қаласының әкімі Нұрбол Тұрашбеков, қалалық мәслихат депутаттары, медицина мен білім мекемелері, полиция және төтенше жағдай қызметі өкілдері, құқық қорғау органдарының қызметкерлері қатысты. Сонымен бірге «Шапағат» қоғамдық бірлестігінің мүшелері, оқушылар, студенттер, жергілікті футболшылар, құрылысшылар, тазалыққа жауапты мекеме жұмысшылары, Халыққа қызмет көрсету орталығы мен «Қазақстан темір жолы» мекемесінің өкілдері де белсене атсалысты. Саябақ аумағына 100-ден аса ағаш көшеті отырғызылды.

Түркістан облысында «Таза Қазақстан» акциясы өте жоғары деңгейде жалғасып жатыр. Үш апта көлемінде мыңдаған көшет отырғызылып, елді мекендер мен көшелер тазаланды. «Киелі мекен» апталығында қасиетті орындар мен ескерткіштер маңы тазаланып, туристік нысандардың ажары ашыла түсті.

Елімізде өтіп жатқан жалпыхалықтық сенбілік аясында ауыл-аймақты көгалдандыру мақсатында аудан аумағындағы республикалық, облыстық маңызы бар жол бойларына, елді мекендердің кіре берістеріне аудан әкімдігінің ұйытқы болуымен 680 түп шырша, арша, қарағаш, ерен(яссень) ағаштарының көшеттері егілді.

Жалпы биылғы көктемде аудан аумағында 29 590 дана сәнді, жеміс және тағы басқа ағаштарының көшеттері егілсе, соның 4600 данасы ауыл тұрғындары және демеушілер есебінен “Таза Қазақстан” науқаны аясында отырғызылып отыр.

Осылайша, Түлкібас ауданында көгалдандыру мақсатында мемлекет және аудан жанашырлары тарапынан ауқымды жұмыстар атқарылып келеді.

Бүгін ауа-райының қолайсыздығына қарамастан жалпыхалықтық сенбілікке ат салысқан жандар туған жер жанашырлары екенін аңғартты.

Ауылдардың инфрақұрылымы мен әлеуметтік жағдайын жаңғыртып, қазақстандықтардың жергілікті жерде жұмыспен қамтылуына қатысты идеологияны қалыптастыруға арналған «Ауыл – Ел бесігі» жобасының жүзеге асып келе жатқанына 5 жыл болды. Бұл жоба Түркістан облысында сәтті жүзеге асырылуда.

Ауылдардың жағдайын жақсартып, ауыл халқының тұрмыс деңгейін көтеру үшін қолға алынған жоба Төлеби ауданында кеңінен жүзеге асып келеді. Елді мекендерде әлеуметтік және инженерлік инфрақұрылымдар жетілдірілуде. Бұл жоба биыл да жалғасын тауып, 723 млн теңгеге 11 нысанның құрылысы жүргізілуде.
Биыл ауданда бірде — бір мәдениет ошағы жоқ Киелітас ауылдық округінде 146 орындықты Мәдениет үйі мен Көксәйек ауылдық округінде спорт кешенінің құрылысы аяқталып, пайдалануға беру жоспарлануда.

Сондай-ақ 8 елді мекенге электр желілері жүргізіліп, трансформатор орнатылады. Жалпы, ұзындығы 7,5 шақырымды құрайтын 5 көшенің жолын орташа жөндеуге 159,1 млн теңге қарастырылды.

Айта кетерлігі, 2023 жылы «Ауыл – Ел бесігі» жобасы аясында Момынай елді мекенінде Мәдениет үйінің, Бірінші Мамыр елді мекенінде заманауи үлгідегі спорттық-сауықтыру кешенінің және футбол алаңшасының құрылысы аяқталып, пайдалануға берілді.

2024 жылы Түркістан облысында жалпы 1 038 870 түп түрлі тал көшетін отырғызу жоспарланған. Оның 522 935 данасы — көктем айларында егілсе, күз айларында — 515 935 дана көшет егілмек. Мемлекет басшысы Қасым-Жомарт Тоқаевтың «Жаңа жағдайдағы Қазақстан: іс-қимыл кезеңі» атты Жолдауы аясында 2021-2025 жылдар аралығында облыста 1,5 миллион көшет отырғызу көзделген.

Сонымен қатар, облыс әкімінің тапсырмасына сәйкес, «Түркістан облысының елді-мекендерін көгалдандырудың 2022-2024 жылдарға арналған іс-шара жоспары» бекітілген. Аталған іс-шара аясында өңірдегі 852 елді мекеннің шамамен 90% көгалдандыру үшін 4 млн-нан астам көшет егу жоспарланған. Бұл жайында Түркістан облысының табиғи ресурстар және табиғат пайдалануды реттеу басқармасының басшысы Қайрат Абдуәлиев брифингте мәлімдеді.

Сондай-ақ, басқарма басшысы республикалық «Таза Қазақстан» экоакциясының «Жасыл аймақ» апталығы аясында біршама жұмыстардың атқарылатынын жеткізді.

-«Жасыл аймақ» апталығында атқарылатын жұмыстар негізінен елді мекендерді тазалау, әктеу, сырлау, көшет егу, ағаш бұталау, түптерін қопсыту, суару жүйелерін реттеу, қоршауларын қалпына келтіру бағытында жүргізіледі. Бір күнде бір гектар орман — ауадан 120-280 келі көмірқышқыл газын сіңіріп, 180-200 келі оттегін шығарады. Тіпті бір ағаш — 3 адамның тыныс алуына жеткілікті оттегін бөледі. Жүргізіліп жатқан көшет егу жұмыстары өңіріміздің экологиясын жақсарту, тұрғындардың денсаулығын түзеу бағытында үлкен маңыздылыққа ие-, деді Қайрат Амангелдіұлы.

Сонымен қатар, өткен «Киелі мекен» апталығының қорытындысын Түркістан облыстық энергетика және тұрғын үй-коммуналдық шаруашылық басқармасы басшысының орынбасары Жанәділ Айтбеков баяндады.

-15-20 сәуір аралығында өткен апталық кезінде облыс көлемінде 22 мыңнан астам азамат атсалысып, 496 техника тартылды. Жалпы 226 көлемді іс-шаралар өтті. Нәтижесінде облыстағы 1 410 көшенің бойлары тазаланып, 7 816 дана ағаш отырғызылды. 16 508 дана ағаш әктеліп, 40 024 шаршы метр аяқжолдар тазаланды. Сондай-ақ, 346 саябақ пен скверлер, 244 балалар және спорт алаңшалары ретке келтірілді. 176 шақырым көпір, өзен-каналдар мен бұлақтардың арналары, 517 көпқабатты тұрғын үй аумақтары мен аулалары, жертөлелері тазаланды»- деді.

Жуырда Түркия мемлекетінің Анталья қаласында өткен халықаралық “Robotex Turkiye 2024 ” робототехника сайысы өтті.

Айтулы сында Түркістан облысы, Шардара ауданының Мәулен Қалмырза атындағы №3 мамандандырылған мектеп-интернатының “Shardara team” робототехника командасы Азияның түкпір-түкпірінен келген 34 команданың арасында өткен білім бәйгесінде “Lego Sumo” категориясы бойынша ІІІ орынды қанжығасына байлады.

Информатика пәнінің мұғалімі Маржан Саудабаеваның баптайтын команда Испанияда өтетін жарысқа жолдама алды.