Сайрам ауданының спортшысы халықаралық аренада тағы бір мәрте ел мерейін үстем етті. Солтүстік Кипр Түрік Республикасында өткен дәстүрлі садақ атудан IV дүниежүзілік «Фетих» кубогы халықаралық турнирінде жерлесіміз Махамбет Сатбаев алтын медаль иеленіп, Қазақстанның көк Туын биікке көтерді. «Фетих» кубогы – дәстүрлі садақ атуды ұлттық құндылық әрі мәдени мұра ретінде дәріптейтін әлемдік деңгейдегі беделді жарыстардың бірі. Халықаралық дода биыл да жоғары деңгейде ұйымдастырылып, оған бірнеше мемлекеттен келген үздік мергендер қатысты. Атап айтқанда, Кипр, Түркия, Косово, Ресей, Түрікменстан, Қазақстан және Қырғызстан елдерінен келген 202 спортшы өзара бақ сынады.

Қазақстан құрамасының сапында өнер көрсеткен жерлесіміз Махамбет Сатбаев – дәстүрлі садақ атуды кәсіби деңгейде дамытып жүрген білікті спортшы әрі жаттықтырушы. Ол бүгінде «Сайрам ұлттық спорт клубы» коммуналдық мемлекеттік мекемесінің дәстүрлі садақ ату бөлімінде жас спортшыларды жаттықтырып, ұлттық спорттың өркендеуіне өз үлесін қосып келеді.Жарыс барысында сайрамдық садақшы 30 метрлік Қазақ жамбы нысанасы бойынша бақ сынап, өзінің мергендік шеберлігін жоғары деңгейде көрсетті. Ол дәлдік пен сабырлылықты ұштастыра отырып, қарсыластарының бәрінен басым түсіп, жарыстың алтын жүлдесіне қол жеткізді.

Бұл нәтиже Махамбет Сатбаевтың ұзақ жылғы еңбегі мен тынымсыз дайындығының жемісі екені сөзсіз. Дәстүрлі садақ атуда спортшыдан тек нысанаға дәл көздеу ғана емес, жоғары шоғырлану, төзімділік, ішкі сабыр және тұрақты дайындық талап етіледі. Халықаралық деңгейдегі бәсекеде осындай қасиеттерді толық таныта алған жерлесіміз ел құрамасының сапында жоғары нәтиже көрсетті.

Спортшының жеңісі Сайрам ауданында ұлттық спорт түрлерін дамыту бағытында атқарылып жатқан жұмыстардың нәтижесін де айқын көрсетеді. Соңғы жылдары қазақ күресі, асық ату, тоғызқұмалақ, дәстүрлі садақ ату секілді ұлттық спорт түрлеріне деген қызығушылық артып келеді. Ауданда спорт секцияларының жұмысы жолға қойылып, балалар мен жасөспірімдерді ұлттық спортқа тартуға ерекше көңіл бөлінуде.

Ұлттық спорт – халқымыздың тарихы мен мәдениетін, салт-дәстүрін кейінгі ұрпаққа жеткізудің маңызды құралдарының бірі. Оның ішінде дәстүрлі садақ атудың өзіндік орны бар. Қазақ халқының жауынгерлік тарихымен тығыз байланысты бұл өнер бүгінде заманауи спорт түрі ретінде қайта жаңғырып, халықаралық жарыстарда кеңінен насихатталып келеді. Махамбет Сатбаевтың халықаралық додадағы жеңісі де осы үрдістің жарқын көрінісі. Ол ұлттық спорттың тек елімізде ғана емес, әлемдік аренада да бәсекеге қабілетті екенін дәлелдеді. Әсіресе Қазақ жамбы нысанасы бойынша алтын медаль алуы – ұлттық спорттың ерекшелігін халықаралық деңгейде танытатын маңызды жетістік.

Жеңіс тұғырынан орын алған жерлесіміздің жетістігі Сайрам ауданындағы жас спортшыларға да үлкен үлгі болары анық. Бүгінде ұлттық спортқа қызығушылық танытқан жастардың қатары көбейіп келеді. Осындай халықаралық жетістіктер олардың спортқа деген ынтасын арттырып, жаңа жеңістерге ұмтылуына жол ашады. Сайрамдық спортшының алтын медалі – жеке жетістікпен қатар, ел спортының абыройын асқақтатқан маңызды нәтиже. Халықаралық додада Қазақстанның намысын абыроймен қорғаған Махамбет Сатбаев ұлттық спорттың көкжиегін кеңейтіп, туған жерінің мерейін үстем етті.

Алдағы уақытта да жерлесіміздің жаңа белестерді бағындырып, халықаралық жарыстарда Қазақстанның көк туын көкке көтере беруіне тілектеспіз. Оның бүгінгі жеңісі – табандылық пен еңбектің, ұлттық спортқа деген адалдық пен кәсіби шеберліктің жарқын жемісі.

Түркістан облысы, Сайрам ауданында қазақ күресінен ересектер арасындағы «Түркістан Барысы» облыстық іріктеу турнирі жоғары деңгейде ұйымдастырылып, өз мәресіне жетті. Ұлттық спортты ұлықтап, ел арасында қазақ күресін кеңінен насихаттауды мақсат еткен дәстүрлі дода Қарасу ауылындағы Жаңақұрылыс аумағында орналасқан Қарасу спорт кешенінде өтті. Облыстық турнирге Түркістан облысының аудан-қалаларынан 90 келіден жоғары салмақ дәрежесінде үздік нәтиже көрсеткен 26 балуан қатысып, «Түркістан Барысы» атағы үшін боз кілемде бақ сынады. Бірнеше кезеңге созылған белдесулер барысында спортшылар өздерінің күш-қайратын, әдіс-тәсіл шеберлігін және төзімділігін танытып, жанкүйерлерге тартысқа толы бәсеке сыйлады.

Қазақ күресі – халқымыздың ұлттық болмысымен біте қайнасқан спорт түрлерінің бірі. Сондықтан мұндай жарыстардың ұйымдастырылуы жас ұрпақ арасында ұлттық спортқа деген қызығушылықты арттырып қана қоймай, тәжірибелі балуандардың шеберлігін шыңдауға да мүмкіндік береді. Облыстық деңгейдегі іріктеу додасы үздік спортшылардың басын қосып, олардың республикалық жарыстар алдындағы дайындығын пысықтауға жол ашты.

Жарыстың салтанатты ашылу рәсіміне Сайрам ауданының әкімі Мадияр Оразалиев пен Түркістан облыстық дене шынықтыру және спорт басқармасының басшысы Ғалымжан Худияров қатысты. Құттықтау сөзінде азаматтар балуандарға сәттілік тілеп, ұлттық спортты дамыту, бұқаралық спортты кеңінен насихаттау бағытында атқарылып жатқан жұмыстардың маңыздылығына тоқталды. Сонымен қатар, спортшыларға қолдау көрсетіп, қазақ күресінің дамуына үлес қосып жүрген жаттықтырушылар мен мамандарға алғыс білдірілді. Боз кілемдегі бәсеке барысында әр балуан жеңіске жету жолында бар күшін салды. Белдесулердің жоғары қарқынмен өтуі спортшылардың дайындық деңгейінің жоғары екенін көрсетті. Әсіресе, жарыстың шешуші кезеңдеріндегі кездесулер көрермендердің ерекше қызығушылығын тудырды.

Жарыс қорытындысы бойынша Сауран ауданының балуаны Әбдуғани Бибарыс жүлделі үшінші орынға ие болды. Ал финалдық белдесуде Шардара ауданының өкілі Қайсар Шамшидинов пен Сарыағаш ауданының балуаны Мейіржан Әбдімәліков күш сынасты. Шешуші сәтте Қайсар Шамшидинов қарсыласынан басым түсіп, «Түркістан Барысы – 2026» атағының жеңімпазы атанды. Жеңімпазға чемпиондық белбеумен қатар 500 мың теңге көлеміндегі сертификат табысталды. Екінші орын иегері Мейіржан Әбдімәліков 300 мың теңгелік сертификатпен марапатталса, үшінші орын алған Әбдуғани Бибарысқа 200 мың теңге көлеміндегі сертификат берілді. Жүлдегерлердің еңбегі мен жарыс барысында көрсеткен шеберлігі жоғары бағаланды.

Турнирдің басты ерекшелігі – оның тек жүлде сарапқа салынған жарыс емес, республикалық деңгейдегі маңызды бәсекеге іріктеу кезеңі болуында. Облыстық додада бірінші және екінші орын алған Қайсар Шамшидинов пен Мейіржан Әбдімәліков Түркістан облысының намысын республикалық «Қазақстан Барысы» турнирінде қорғайтын болады.

Осылайша, Сайрам ауданында өткен «Түркістан Барысы – 2026» облыстық іріктеу турнирі ұлттық спорттың мерейін асырып, үздік балуандарды анықтады. Жарыста топ жарған спортшылардың ендігі мақсаты – республикалық додада Түркістан облысының абыройын асқақтатып, жоғары нәтиже көрсету.

Қазақ күресінің дамуына бағытталған мұндай жарыстар ұлттық спорттың бұқаралық сипат алуына, жас балуандардың спортқа қызығушылығын арттыруға және салауатты өмір салтын қалыптастыруға үлкен ықпал етеді. Сайрам ауданында ұйымдастырылған облыстық турнир де осы бағыттағы жұмыстардың жүйелі түрде жалғасып келе жатқанын көрсетті.

Түркістан облысының әкімі Нұралхан Көшеров аудан аумағындағы туристік орындардың санын арттырып, туризм саласының әлеуетін тиімді пайдалану және жаңа туристік бағыттарды қалыптастыру бойынша нақты тапсырмалар берген болатын. Осы тапсырмаларды жүзеге асыру мақсатында ауданда табиғи нысандардың мүмкіндігін зерделеу, туристер үшін тартымды жаңа демалыс орындарын қалыптастыру бағытындағы жұмыстар жүйелі түрде жүргізілуде.

Осыған сәйкес, бүгін тиісті сала мамандары және әріптестермен бірге Ақсу өзеніне барып, мұнда рафтинг спортын дамыту мүмкіндіктері қарастырылып, алғашқы сынақ жұмыстары жүргізілді. Негізгі мақсат – өзеннің табиғи ерекшеліктерін жан-жақты зерделеп, белсенді демалыс пен экстремалды туризм бағыттарын дамытуға қаншалықты қолайлы екенін анықтау.

Ақсу өзені – табиғи ландшафты, суының ағысы және айналасындағы көрікті табиғатымен ерекшеленетін нысандардың бірі. Мұндай табиғи мүмкіндіктерді дұрыс әрі қауіпсіз пайдалану арқылы туристерге жаңа форматтағы демалыс түрлерін ұсынуға болады. Соның бірі – соңғы жылдары әлемнің көптеген елдерінде және еліміздің бірқатар өңірлерінде дамып келе жатқан рафтинг спорты.

Рафтинг – тау өзендері мен ағысы бар су арналары арқылы арнайы үрлемелі қайықтармен жүзуді қамтитын белсенді спорт түрі. Бұл бағыт спортпен қатар, туристерге ерекше әсер сыйлайтын демалыс түрі ретінде де үлкен қызығушылыққа ие. Әсіресе табиғи көріністермен үйлескен жағдайда рафтинг жаңа туристік өнім қалыптастыруға мүмкіндік береді. Сынақ барысында Ақсу өзенінің бағыты мен су ағысының ерекшеліктері зерделеніп, рафтинг бағытын ұйымдастыруға болатын учаскелерге назар аударылды. Сонымен қатар қауіпсіздік талаптары, суға түсу және шығу орындарын ұйымдастыру, туристердің қозғалыс бағыты, қажетті жабдықтарды орналастыру, мамандардың қызмет көрсетуі секілді маңызды мәселелер қаралды.

Мұндай жобаны іске асыруда ең басты басымдық – адам қауіпсіздігі. Сондықтан рафтинг бағытын ашу туралы шешім қабылданған жағдайда, алдымен өзеннің гидрологиялық ерекшеліктері кәсіби мамандар тарапынан толық зерттеліп, қауіп деңгейі бағалануы қажет. Туристерді қажетті қорғаныс құралдарымен қамтамасыз ету, тәжірибелі нұсқаушыларды тарту, алғашқы медициналық көмек көрсету мүмкіндігін қарастыру және төтенше жағдай кезінде жедел әрекет ету жүйесін қалыптастыру да маңызды.

Сонымен қатар туристік бағыттың тұрақты жұмыс істеуі үшін тиісті инфрақұрылым қажет. Атап айтқанда, келушілерге арналған автотұрақ, демалыс орындары, санитарлық тораптар, қауіпсіздік бекеттері, ақпараттық тақтайшалар және басқа да қажетті нысандар кезең-кезеңімен қарастырылуы тиіс. Табиғи аумақтың экологиялық жағдайын сақтау да жобаның негізгі талаптарының бірі болады.

Ақсу өзенінде рафтингті дамыту ауданның туристік әлеуетін арттырумен қатар, жергілікті тұрғындар үшін жаңа жұмыс орындарын ашуға, қызмет көрсету саласын жандандыруға және шағын кәсіпкерлікті дамытуға мүмкіндік береді. Туристер санының артуы қоғамдық тамақтану, көлік қызметі, қонақүй және демалыс орындары, гид қызметі, қолөнер және басқа да сервистік бағыттарға оң әсерін тигізуі мүмкін. Бүгінде туризм тек демалыс саласы ғана емес, өңір экономикасының дамуына ықпал ететін маңызды бағыттардың біріне айналып отыр. Сондықтан ауданның табиғи және тарихи-мәдени нысандарын туристік айналымға енгізу – экономикалық тұрғыдан да, ауданның танымалдығын арттыру тұрғысынан да маңызды.

Алдағы уақытта Ақсу өзеніндегі рафтинг бағытын дамыту мәселесі тиісті мамандармен бірлесіп жан-жақты зерделеніп, жобаның техникалық, қауіпсіздік және инфрақұрылымдық талаптары пысықталатын болады. Сынақ нәтижелері негізінде нақты ұсыныстар әзірленіп, жобаны кезең-кезеңімен жүзеге асыру мүмкіндігі қарастырылады.

Жаңа туристік бағыттарды қалыптастыру арқылы ауданның табиғи әлеуетін тиімді пайдаланып қана қоймай, тұрғындарға да, сырттан келетін қонақтарға да сапалы әрі мазмұнды демалыс ұйымдастыруға мүмкіндік туады. Ақсу өзеніндегі рафтинг жобасы осы бағыттағы жұмыстардың бір бөлігі ретінде аудан туризмін жаңа деңгейге көтеруге серпін беретін перспективалы бастамалардың бірі болуы мүмкін.

@ МАДИЯР ОРАЗАЛИЕВ – Сайрам ауданының әкімі.

Сайрам ауданында бұқаралық спортты дамыту, салауатты өмір салтын қалыптастыру және жастар мен азаматтарды зиянды әдеттерден аулақ болуға шақыру бағытында маңызды іс-шара ұйымдастырылды. Ақсукент ауылындағы «Белсенді ұзақ өмір» орталығында «Спорт есірткіге қарсы!» ұранымен көру қабілеті бұзылған азаматтар арасында Сайрам ауданының ашық біріншілігі өтті.

Аталған спорттық дода ең алдымен мүмкіндігі шектеулі азаматтардың спортпен тұрақты айналысуына жағдай жасау, олардың қоғамдық ортадағы белсенділігін арттыру және салауатты өмір салтын кеңінен насихаттау мақсатында өткізілді. Сонымен қатар жарыстың негізгі идеясы – спортты есірткі және өзге де зиянды әдеттерге қарсы тиімді құрал ретінде таныту. Себебі спортпен шұғылдану адамның денсаулығын нығайтып қана қоймай, ерік-жігерін шыңдап, тәртіпке, жауапкершілікке және мақсатқа ұмтылуға тәрбиелейді.

Ашық біріншілікке Сайрам ауданымен қатар Төлеби, Түлкібас және Қазығұрт аудандарынан спортшылар арнайы қатысып, өзара бақ сынады. Жалпы жарысқа 50 спортшы қатысып, бірнеше спорт түрі бойынша шеберліктерін ортаға салды. Қатысушылар шахмат, дойбы, тоғызқұмалақ, қол күресі және арқан тарту секілді спорт түрлерінен сынға түсті.

Жарыстың әр кезеңі тартысты өтіп, спортшылар жеңіске деген жігерін танытты. Интеллектуалдық спорт түрлерінен өткен шахмат, дойбы және тоғызқұмалақ сайыстарында қатысушылар өздерінің ойлау қабілеті мен тактикалық шеберлігін көрсетті. Әр жүріс пен әр шешімнің маңызы зор болғандықтан, спортшылар асықпай ойланып, қарсыласының келесі қадамын алдын ала болжауға тырысты. Бұл сайыстар қатысушылардың тек спорттық қабілетін ғана емес, сабырлылығы мен жинақылығын да байқатты. Ал қол күресі мен арқан тарту жарыстары спортшылардың күш-қуатын, төзімділігін және командалық рухын сынады. Әсіресе арқан тарту бәсекесінде командалар бір-біріне қолдау көрсетіп, ұйымшылдықтың маңызын көрсетті. Жарыс барысында спортшылардың бір-бірін жігерлендіріп, жеңіске жетуге ұмтылғаны ерекше байқалды.

Іс-шараға қатысушылар үшін мұндай жарыстардың маңызы зор. Өйткені мүмкіндігі шектеулі азаматтардың спорттық әлеуетін дамыту – қоғамдағы инклюзивті ортаны қалыптастырудың маңызды бағыттарының бірі. Әрбір азаматтың дене шынықтырумен және спортпен айналысуына мүмкіндік болуы оның өмір сапасын арттыруға оң әсер етеді. Спорттық жарыстар арқылы азаматтар жаңа орта тауып, өзара тәжірибе алмасып, достық қарым-қатынас орнатады.

«Спорт есірткіге қарсы!» деген ұранның өзі қоғамға маңызды ой салады. Яғни адамның бос уақытын тиімді ұйымдастыру, спортпен шұғылдану және пайдалы істерге белсенді араласу – зиянды әдеттердің алдын алудың тиімді жолдарының бірі. Сондықтан мұндай жарыстарды тек спорттық бәсеке ретінде ғана емес, тәрбиелік және әлеуметтік маңызы бар шара ретінде бағалауға болады. Сайрам ауданында бұқаралық спортты дамытуға бағытталған мұндай іс-шаралардың өткізілуі аудан тұрғындарының спортқа деген қызығушылығын арттыруға мүмкіндік береді. Әсіресе ерекше қажеттіліктері бар азаматтардың спорттық ортаға тартылуы – қоғамның барлық мүшесіне бірдей мүмкіндік қалыптастыру жолындағы маңызды қадам.

Жарыс барысында спортшылар өздерінің дайындық деңгейін көрсетіп қана қоймай, жеңіске деген жігерін, табандылығын және белсенділігін танытты. Қатысушылар үшін басты мақсат тек жүлделі орынға ие болу емес, спорттық ортада өз мүмкіндіктерін сынау, жаңа достар табу және салауатты өмір салтын насихаттауға үлес қосу болды. Бүгінде спорт тек кәсіби спортшылардың ғана емес, жалпы қоғамның өмір салтына айналуы қажет. Дене белсенділігін арттыру, қозғалысты көбейту, салауатты тамақтану, зиянды әдеттерден бас тарту – дені сау қоғам қалыптастырудың негізгі алғышарттарының бірі. Осы тұрғыдан алғанда, спорттық жарыстардың қоғамдық маңызы өте жоғары.

Мүмкіндігі шектеулі азаматтардың арасында ұйымдастырылатын спорттық шаралар олардың әлеуетін көрсетуге, өздерін қоғамның белсенді мүшесі ретінде сезінуге және жаңа белестерді бағындыруға жігер береді. Спорттағы әрбір жетістік адамның өзіне деген сенімін арттырып, жаңа мақсаттарға ұмтылуына жол ашады.

Сайрам ауданындағы ашық біріншілік те осы мақсаттарды тоғыстырған тағылымды шара болды. Шахмат пен дойбыдағы ой ұшқырлығы, тоғызқұмалақтағы есеп пен стратегия, қол күресіндегі күш пен төзімділік, арқан тартудағы ауызбіршілік – жарысқа қатысқан азаматтардың жан-жақты қабілетін көрсетті. Шара соңында спортшылардың еңбегі бағаланып, үздік нәтиже көрсеткен қатысушылар марапатталды. Дегенмен мұндай жарыстың басты жеңісі – жүлде емес, азаматтардың спортқа деген қызығушылығын арттыру, олардың белсенді өмір салтын ұстануына жағдай жасау және қоғамда өзара қолдау мен ынтымақтастықты қалыптастыру.

Алдағы уақытта да осындай спорттық іс-шаралардың тұрақты ұйымдастырылуы маңызды. Себебі спорт арқылы адамдардың денсаулығын нығайтып қана қоймай, жас ұрпаққа дұрыс бағыт-бағдар беруге, зиянды әдеттердің алдын алуға және қоғамдағы белсенді азаматтардың қатарын арттыруға болады. Сайрам ауданында өткен бұл жарыс қатысушыларға көтеріңкі көңіл күй сыйлап қана қоймай, спорттың шекара мен мүмкіндікке қарамай, адамдарды біріктіретін қуатты күш екенін көрсетті. 50 спортшының басын қосқан додада өзара сыйластық, достық және бәсекелестік қатар өрбіді.

Бүгін VIII Халықтар ойынының финалдық кезеңінде Самат Әкімбекұлы Рысбеков басқаратын Түркістан облысының «Тұран» спорт клубының қыздар командасы тартысқа толы финалдық кездесуде Павлодар облысының командасын 3:2 есебімен жеңіп, жарыстың чемпионы атанды!

Бұл жеңістің маңызы ерекше. Түркістан облысы құрылғанына 8 жыл болған уақыт ішінде Халықтар ойыны тарихында алғаш рет волейболдан қыздар командасы топ жарып, алтын медальді иеленді. Еліміздің түпкір-түпкірінен келген 20 командамен үздік ойын көрсетті.

Жанкештілік пен табандылықтың, ұйымшылдық пен кәсіби дайындықтың арқасында келген бұл жеңіс – бүкіл Түркістан өңірінің ортақ мақтанышы. Команда мүшелерін, жаттықтырушылар құрамын және жанкүйерлерді тарихи жетістікпен құттықтаймыз!

Түркістанның көк туы биікте желбірей берсін!

#Тұран #ТүркістанОблысы #ХалықтарОйыны #Волейбол #Чемпион #ТарихиЖеңіс

Сайрам ауданының Жібек жолы ауылында облыстық және республикалық деңгейдегі жарыстардың жеңімпазы, спортта өзіндік із қалдырған Құдайбергенов Нұрсұлтан Жұмабайұлын еске алуға арналған 2013-2014 жылы туған жасөспірімдер арасындағы бокстан республикалық турнирдің ашылу салтанаты өтті. Жас спортшылардың басын қосқан дүбірлі додаға еліміздің әр өңірінен 150-ге жуық жас былғары қолғап шебері қатысып отыр. Жарысты «Ақсу жекпе-жек спорт клубы» коммуналдық мемлекеттік мекемесі ұйымдастырып, жасөспірімдерге өз шеберліктерін сынауға, тәжірибе жинақтауға және өзге өңірлерден келген спортшылармен күш сынасуға мүмкіндік беруде.

Республикалық турнир 16 салмақ дәрежесі бойынша ұйымдастырылуда. Үш күнге жоспарланған жарыс барысында қатысушылар бірнеше кезеңнен өтіп, әр салмақта жеңімпаздар мен жүлдегерлер анықталады. Жарыс кезінде спортшылардың техникалық дайындығы, жылдамдығы, төзімділігі мен тактикалық шеберлігі сынға түседі. Турнирдің негізгі мақсаты – жасөспірімдер арасында боксты кеңінен насихаттап, спорттың осы түріне қызығушылық танытатын балалардың қатарын арттыру. Сонымен бірге жас спортшылардың жарыс тәжірибесін молайтып, олардың республикалық деңгейдегі бәсекелерге бейімделуіне жағдай жасау көзделген.

Мұндай ауқымды жарыстардың Сайрам ауданында өтуі өңірдегі бұқаралық және кәсіби спортты дамытуға да оң ықпал етеді. Әсіресе жасөспірімдердің бос уақытын тиімді өткізіп, спортпен тұрақты айналысуына мүмкіндік береді. Бокс секілді тәртіп пен табандылықты талап ететін спорт түрі өскелең ұрпақтың бойында жігер, жауапкершілік, еңбекқорлық және жеңіске деген ұмтылыс қасиеттерін қалыптастыруға ықпал етеді.

Жарыс барысында жас спортшылар тек жеңіс үшін ғана емес, өзара тәжірибе алмасып, жаңа достық қарым-қатынас орнатуға да мүмкіндік алады. Әр жекпе-жек қатысушылар үшін үлкен тәжірибе мектебі болмақ. Бұл додада өнер көрсеткен жас боксшылардың арасынан болашақта ел намысын халықаралық ареналарда қорғайтын спортшылар шығатынына сенім мол.

Сонымен қатар турнирдің тағылымдық мәні де ерекше. Спортта жетістікке жеткен Нұрсұлтан Жұмабайұлының есімін ұлықтау арқылы кейінгі буынға өнеге көрсету, оның спорттағы жолын жас ұрпаққа таныту мақсат етілген. Еске алу жарысы – спорт саңлақтарының еңбегін бағалап, олардың есімін ел жадында сақтаудың жарқын үлгісі.

Үш күнге созылатын республикалық турнирдің қорытындысы бойынша үздік нәтиже көрсеткен спортшылар арнайы марапаттарға ие болады. Жеңімпаздар мен жүлдегерлерге дипломдар мен медальдар табысталып, олардың спорттағы жетістіктері атап өтіледі.

Жібек жолы ауылында өтіп жатқан бұл бәсекенің жас спортшылар үшін маңызы зор. Себебі әрбір жекпе-жек – тәжірибе, әрбір жеңіс – үлкен мақсатқа бастайтын қадам. Ал осындай жарыстардың тұрақты ұйымдастырылуы Сайрам ауданында спорттың дамуына серпін беріп, болашақ чемпиондарды тәрбиелеуге берік негіз қалыптастырады.

17 жастағы қазақстандық теннисші Заңғар Нұрланұлы жасөспірімдер арасындағы Франция ашық чемпионатының алғашқы айналымынан сүрінбей өтті.

Старттық матчта отандасымыз ұлыбританиялық Марк Чебанмен (ITF жасөспірімдер рейтингінде 36-орын) шеберлік байқасты. Кездесу барысын толықтай бақылауда ұстаған Заңғар 6:3, 6:4 есебімен екі сетте сенімді жеңіске жетті. Корттағы тартысты бәсеке 1 сағат 37 минутқа созылды.

Осы табысының арқасында Нұрланұлы Париждегі Үлкен дулыға турнирінің 1/16 финалына жолдама алды. Жасөспірімдер арасындағы доданың келесі кезеңінде түркістандық теннисші Мотохару Абе (Жапония) – Агасси Рашер (АҚШ) матчының жеңімпазымен кездеседі.

Түркістан қаласында Саяси қуғын-сүргін құрбандарын еске алу күніне және жаңа жабық футбол алаңының ашылуына орай жасөспірімдер арасында кіші футболдан «БАЛАЛАР ФУТБОЛ ЛИГАСЫ» атты ауқымды спорттық іс-шара өтті.

Ш.Ниязов көшесінде орналасқан жаңа жабық футбол алаңында ұйымдастырылған турнирге 2013–2014 және 2015–2016 жылы туған жасөспірімдер қатысып, өзара бақ сынасты.

Жалпы саны 24 командадан құралған 350-ге жуық жас спортшы қатысып, жоғары деңгейдегі ойын өрнегін көрсетті.

Іс-шараның ашылу салтанаты ұлттық бимен және концерттік бағдарламамен басталды. Сонымен қатар, қала әкімінің орынбасары Аманжол Бақытжанұлы, Түркістан қалалық мәслихатының төрағасы Сәрсенбаев Ғаппар Амантайұлы және ардагер спортшылар жас футболшыларға сәттілік тілеп, құттықтау сөз сөйледі.

Турнир аясында жаңа жабық футбол алаңының ашылуына арналған алғашқы символикалық доп соғу рәсімі ұйымдастырылды.

Спорттық іс-шара жасөспірімдер арасында салауатты өмір салтын насихаттауға, бұқаралық спортты дамытуға және балалар футболын қолдауға бағытталды.