Отырар ауданы – тарих пен тағылым тоғысқан, ел бірлігі мен қоғамдық келісімнің берік үлгісі қалыптасқан қасиетті өңір. Ұлы Жібек жолының бойында орналасқан бұл өлке ежелден түрлі мәдениеттер мен өркениеттердің тоғысқан мекені ретінде танылған. Сондықтан Отырар жерінде бейбіт өмір сүру, татулық пен өзара түсіністік – ғасырлар бойы қалыптасқан өмір салтына айналған. Бүгінгі таңда Отырар ауданының халқы бір мақсатқа жұмылған, ортақ жауапкершілікті терең сезінетін ынтымақты қауым болып отыр. Ауданда әртүрлі этнос өкілдері өмір сүріп, барлығы бір шаңырақтың астындағыдай тату-тәтті тіршілік етуде. Ұлтына, тіліне, дініне қарамастан, барша тұрғынды біріктіретін ортақ құндылықтар бар. Олар – туған жерге деген сүйіспеншілік, еңбекқорлық, бейбіт өмірге ұмтылыс және болашақ ұрпақ алдындағы жауапкершілік.

Отырар ауданындағы бірлік пен ынтымақтың негізінде қазақ халқының дәстүрлі құндылықтары жатыр. Үлкенге құрмет, кішіге ізет, қонақжайлық пен кеңпейілділік – аудан халқының күнделікті өмірінен айқын көрініс табады. Бұл құндылықтар өзге этнос өкілдерімен өзара үйлесім тауып, ортақ қоғамдық мәдениетті қалыптастырған. Ауданда қоғамдық келісім мен татулықты нығайтуда мәдени-рухани іс-шаралардың маңызы ерекше. Мемлекеттік және ұлттық мерекелер, мәдени фестивальдер, концерттер, көрмелер мен спорттық жарыстар халықты ортақ алаңға жинап, достық пен ынтымақты бекемдей түседі. Мұндай шаралар адамдар арасындағы сенімді арттырып, өзара түсіністікті нығайтады. Сонымен қатар, Отырар ауданында бірлік пен ынтымақты сақтауда қоғамдық институттардың рөлі зор.

Қазақстан халқы Ассамблеясының қағидаттары, қоғамдық кеңестер, ақсақалдар мен аналар кеңестерінің өнегелі қызметі қоғамдағы тұрақтылықты қамтамасыз етуге бағытталған. Ақсақалдардың ақылы мен өмірлік тәжірибесі, аналардың тәрбиелік өнегесі – жас ұрпақты адамгершілікке, елжандылыққа тәрбиелеудің берік негізі. Бірлік пен ынтымақ еңбек саласында да айқын көрініс табады. Ауыл шаруашылығы, білім беру, мәдениет, денсаулық сақтау, әлеуметтік салада әртүрлі ұлт өкілдері иық тірестіре еңбек етіп, ауданның әлеуметтік-экономикалық дамуына өз үлестерін қосуда. Ортақ еңбек – ортақ жауапкершілік пен өзара сенімді қалыптастырып, қоғамды одан әрі біріктіре түседі.

Отырар ауданындағы бейбітшілік пен келісім – тек бүгінгі күннің жетістігі емес, бұл – болашаққа бағытталған берік негіз. Тұрақтылық пен татулық сақталған жерде даму болады, ал даму бар жерде халықтың тұрмыс сапасы артады. Сондықтан аудан тұрғындары үшін бірлік пен ынтымақ – ең қастерлі құндылықтардың бірі. Биыл Отырар ауданы өзінің құрылғанына 90 жыл толуын зор қуанышпен атап өтті. Бұл – аудан тарихындағы маңызды белес, өткенге тағзым жасап, бүгінгі жетістіктерді саралап, болашаққа нық қадам жасауға мүмкіндік беретін мерейлі кезең. Тоқсан жыл – бір ғана уақыт өлшемі емес, бұл – қажырлы еңбекке, елдікке, бірлік пен ынтымаққа толы шежірелі тарих.

Отырар ауданы – сан ғасырлық өркениет ошағының мұрагері. Тарихи Отырар қаласының рухани жалғасы болып табылатын аудан өткен 90 жыл ішінде талай сындарлы кезеңдерді бастан өткеріп, бүгінгі күнге дейін дамудың даңғыл жолына түсті. Осы уақыт аралығында ауданның әлеуметтік-экономикалық, мәдени және рухани өмірінде айтарлықтай өзгерістер орын алды. Мұның барлығы – ел бірлігінің, халық ынтымағының жемісі. Отырар ауданының басты байлығы – оның берекелі бірлігі мен татулығы. Ауданда түрлі этнос өкілдері бір шаңырақ астында тату-тәтті өмір сүріп келеді. Ұлтына, тіліне, дініне қарамастан, барша тұрғынды ортақ мақсат – туған жерді дамыту, елдің тыныштығын сақтау біріктіреді. Бұл – Қазақстандағы ұлтаралық келісім саясатының нақты көрінісі.

90 жылдық мерейтой – тек мереке ғана емес, бірлік пен ынтымақты тағы бір мәрте айқындаған тағылымды кезең болды. Мерейтой аясында ұйымдастырылған мәдени-рухани, ғылыми-танымдық және спорттық іс-шаралар аудан халқын ортақ қуанышқа ұйыстырып, елдік рухты асқақтатты. Ұрпақтар сабақтастығы, үлкенге құрмет, кішіге ізет секілді ұлттық құндылықтар кеңінен дәріптелді. Отырардағы бірлік пен ынтымақтың негізінде қазақ халқының дәстүрлі құндылықтары жатыр. Қонақжайлық, кеңпейілділік, сабырлылық пен татулық – аудан халқының өмір салтына айналған. Бұл құндылықтар өзге этнос өкілдерімен өзара үйлесім тауып, ортақ қоғамдық мәдениетті қалыптастырды.

Ауданның дамуына әр салада еңбек етіп жүрген азаматтардың үлесі зор. Ауыл шаруашылығы, білім беру, мәдениет, денсаулық сақтау салаларында қызмет ететін жандар ұлтқа бөлінбей, бір мақсат жолында еңбек етуде. Ортақ еңбек – ортақ жауапкершілікті қалыптастырып, қоғамды одан әрі ұйыстыра түседі. «Бірлік бар жерде – береке, ынтымақ бар жерде – ырыс» деген халық даналығы Отырар жұртының өмірлік ұстанымына айналған.

@Айдар Сейдазым – Халықаралық «Алаш» әдеби сыйлығының иегері, Қазақстан Жазушылар Одағының Түркістан облысындағы өкілі, Ақын

Құмкент ауылында заманауи талаптарға сай салынған жабық үлгідегі кіші футбол алаңының құрылысы аяқталып, ел игілігіне ұсынылды. Жаңа спорт алаңы барлық стандарттарға сай жабдықталған. Мұнда ойыншыларға арналған киім ауыстыратын бөлмелер, жарықтандыру жүйесі, жасанды төсеніш төселген футбол алаңы, қауіпсіздік қоршаулары қарастырылған. Нысан аумағы толықтай асфальтталып, көгалдандыру жұмыстары жүргізілді.

Айта кетейік, биылғы жылы Құмкент ауылдық округінде 5 балалар ойын алаңшасы мен 1 ересектерге арналған шынығу алаңы салынды. Жыл соңына дейін округке қарасты Қызылкөл елді мекенінде 2 ойын алаңшасының құрылысы аяқталып, пайдалануға берілмек. Сонымен қатар Шу, Тасты, Жуантөбе, Жартытөбе ауылдарында да дәл осындай спорт нысандары бой көтеруде. Жақын күнде бұл нысандар да ел игілігіне табысталады.

Бұл күні тұрғындар қос бірдей қуаныштың куәсі болды. Алдымен жабық үлгідегі кіші футбол алаңының ашылу салтанаты өтіп, одан кейін «Белсенді ұзақ өмір және тең қоғам» орталығы ресми түрде есігін айқара ашты. Шараға аудан әкімі Мұхит Тұрысбеков арнайы қатысып, жаңа орталықтың жұмысымен танысты.

«Әлеуметтік қолдау бағытындағы жұмыстар аудан дамуының басым бағыттарының бірі. Жаңа орталық ардагерлердің өмір сапасын жақсартып қана қоймай, белсенді әрі мәнді өмір сүруіне жағдай жасайды. Осындағы ауыл ақсақалдары мен ақ жаулықты әжелеріміз бейнетінің зейнетін көрер шақта қажетті қызметтерді жақыннан, қолжетімді түрде ала алады. Біздің мақсатымыз аға буынға құрмет көрсетіп, тәжірибесін қоғам өмірімен байланыстыру. Сондықтан бұл орталық тек қызмет көрсететін орын емес, ауылдың бірлігі, жылылығы мен қамқорлықтың ортасына айнады деп сенеміз», — деді аудан басшысы.

Аудандық ардагерлер кеңесінің төрағасы Қабылбек Еспенбетов орталықтың әлеуметтік маңызын атап өтіп, ардагерлерге жасалған жағдайға ризашылығын білдірді. Сондай-ақ ауданның Құрметті азаматы, ауыл қариясы Серікбай Байқұтиев биыл Құмкентте атқарылған ауқымды жұмыстар үшін ауыл тұрғындары атынан алғыс айтты. Жаңа орталықта 10 адам тұрақты жұмыспен қамтылды. Бұл нысан зейнет жастағы ардагерлерге және 18 жастан асқан ерекше қажеттілігі бар азаматтарға арналған. Бір мезетте 30 адамға дейін қызмет көрсетуге мүмкіндік бар. Сонымен бірге Қызылкөл елді мекенінің қариялары да осы орталықтың қызметін пайдалана алады.

Орталықта тұз шахтасы, психологиялық терапия бөлмесі, дене шынықтыру залы, оқу және демалыс бөлмелері, массаж кабинеті, бильярд және шахмат ойындарына арналған орындар мен шәй ішіп, еркін демалуға арналған асүй жабдықтары қарастырылған.Жиын соңында тұрғындар жаңа орталықтың ішін аралап, көрсетілетін қызмет түрлерімен танысты және өз ризашылықтарын жеткізді.

Айта кетейік, биыл дәл осындай орталық аудан орталығынан бөлек, Созақ ауылында да ашылды. Бұл жұмыстар әлеуметтік саланың әлеуетін арттырып, ардагерлерге көрсетілетін қызметтің қолжетімділігін кеңейтіп келеді.

Ш. Қалдаяқов атындағы облыстық филармониясының, «Жұбановтар әуені» байқауының жеңімпазы «Сүгір» атындағы қазақ-ұлт аспаптар оркестрінің сүйемелдеуімен естіні еске алған әсерлі кеш өтті.

Кештің ерекше тұсы 80-90 жылдары танымалдығы артқан ретро, хит әуендер шырқалды.

Әйгілі Досмұқасан, ABBA, Modern Talking, В. Цой, Ю. Шатунов сынды отандық және әлемдік танымал әртістер мен топтардың, әлемге танымал кинофильмдердің саундтрегі филармония әншілерінің орындауында көрерменнің ыстық ықыласына бөленді.

Ұлттық аспаптың дәрежесін көтерген концерттік жоба өнерсүйер қауымның өтінішімен келер жылы да жалғасын табатын болады.

Түркістан қаласында Ұлттық домбыра күніне орай «Домбыра – дастан» атты мерекелік іс-шара өтті. Түркістан облыстық мәдениет басқармасы басшысының орынбасары Ержан Исатаев құттықтау сөз сөйлеп, домбыраның ұлт руханиятындағы маңызына тоқталды.

– Ұлттық мұраны ұлықтайтын бүгінгі шараның руханиятты дамытуға қосар үлесі мол. Домбыра – ұлттық аспап қана емес, елдің болмысын, жан-дүниесін айшықтайтын ұлы мұра. Осы құндылығымызды қастерлеп, жанын серік еткен барлық қатысушыларға алғысымды білдіремін, – деді Ержан Ибадуллаұлы.

Кеш барысында Сүгір Әлиұлының «Ыңғай төк», Абай Желдібаевтың «Ерке сылқым», Зейнеп Аласьяның «Ертұғрыл», Құрманғазының «Айжанқыз», «Адай», «Балбырауын» сияқты ұлттық күйлері орындалып, көрерменнің зор қошеметіне бөленді. «Тұмар», «Алқоңыр», «Түркістан» ансамбльдері мен мемлекеттік шығармашылық тапсырыс аясында ашылған үйірмелердің шәкірттері өз орындаушылық шеберлігімен көзге түсті. Сондай-ақ, «Фараб», «Самғау» би ансамбльдерінің билері сахнаның көркін аша түсті. «Жайсаң дала», «Ақжелең», «Тұлғаларға туынды» сынды шығармалар ұлттық мұраның ұлағатын сездірді.

Кеш соңында барлық өнерпаздар мен домбыра үйірмелерінің оқушылары қалың көрерменмен бірге «Балбырауын» күйін орындады. Айта кетейік, Түркістан облысында «Ұлттық домбыра күні» мерекесіне орай бірқатар шара өтті. Атап айтқанда, Түркістан қаласында «Тұран даласының күйлері» қалалық күйішілер байқауы, «Достық» үйінде «Үкілі домбыра» фестивалі ұйымдастырылды. Сондай-ақ, «Фараб» кітапханасында дәстүрлі «Күй құдіреті» республикалық күйшілер байқауы ұйымдастырылып, республиканың әр аймағынан келген 25 өнерпаз бақ сынады. Аудан-қалаларда 100-ге тарта мәдени-көпшілік шаралар ұйымдастырылды.

Ән мен рухтың тоғысқан мекені – Тұран төрі тағы да жаһан жұртының назарында. Киелі шаһарда халықаралық «Voice of Turan – 2025»қазақ әндері фестивалі басталды. Фестиваль қатысушылары еліміздің танымал өнер шеберлерімен бірге қазақ әндерін орындады. Түркістанның қолтаңбасына айналған фестивальге облыс әкімі Нұралхан Көшеров, Португалияның Қазақстандағы елшілігінің сенімді өкілі Жозе Атаиде Амарал және шетелден келген өзге де меймандар қатысты.

«Керуен сарай» кешенінде өткен шара қала тұрғындары мен қонақтарына мерекелік көңіл-күй сыйлады. Әлемнің әр қиырынан келген әншілер қазақ тілінде ән шырқады. Өңір таланттарының сахналық көрінісі, өнерпаздардың ән шашуы кешке сән берді. Конкурс қатысушылары таныстырған бейнеролик көрсетілді. Биылғы ән додасына Қырғызстан, Өзбекстан, Әзербайжан, Татарстан, Башқұртсан, Түркия, Тыва, Португалия, Румыния, Италия, Оңтүстік Африка, Сан-Марино, Куба, Эквадор, Болгария, Тунис және Индонезия елдерінен кәсіби әншілер қатысып жатыр.

Түркістан облысы әкімдігінің қолдауымен биыл алтыншы рет ұйымдастырылып отырған бұл жоба жаңа сипатта ұйымдастырылды. Ашық аспан астында әуезді ән шырқалып, рухани үндестік тоғысты. Фестивальдің бас продюсері – Мейіржан Алиакбаров.

Түркістан облыстық мәдениет басқармасы, Облыстық мәдениет және халық шығармашылығы орталығының ұйымдастыруымен өткізіліп жатқан фестиваль мақсаты – қазақстандық авторлардың үздік шығармаларын, қазақ тілін насихаттау. Сонымен қатар Түркі әлімнің рухани астанасы – киелі Түркістанды таныта түсу.

Айта кетейік, 21 маусым күні фестиваль қатысушылары қазақ әндерін орындаудан бақ сынайды. Сонымен қатар еліміздің танымал эстрада жұлдыздары өнер көрсетеді. Қатысушылардың өнерін кәсіби қазылар алқасы бағалайды. Қазылар алқасы құрамында Мейрамбек Беспаев, Сәкен Майғазиев, Маржан Арапбаева, Мөлдір Әуелбекова, Мархаба Саби, Әли Оқапов, Бағлан Омаров, Ерген Айтымбетов бар. Фестиваль қонақтары ретінде Қазыбек Құрайыш, «Меломен» тобы, Ғазизхан Шекербеков және португалиялық әнші Лара Алейшо өнер көрсетеді.