Полицейлер жергілікті тұрғыннан 2 қару мен 100-ден астам оқты тәркіледі.
Түркістан облысы ПД Криминалдық полиция қызметкерлері мен Созақ ауданының полицейлері жергілікті тұрғынның үйінен еш жерде тіркелмеген 2 қару мен оқ-дәрілер тапты.
Нақтырақ айтсақ, қылмыстың алдын алу бағытында қызметте жүрген полицейлер, жергілікті тұрғынның бірі өз үйінде қару-жарақ заттарын заңсыз сақтайтынын анықтады. Жедел-іздестіру шаралары барысында полиция қызметкерлері Созақ ауданының тұрғынын анықтап, оның үйіне тінту жұмыстарын жүргізді.
Нәтижесінде күдіктінің үйінен заң талаптарына сай келмейтін 1 дана ойық ұңғылы қару мен 1 дана 12 калибрлі тегіс ұңғылы мылтық тәркіледі. Сондай-ақ 100-ден астам оқ пен 6 дана атылған оқ алынды. Тәртіп сақшылары күдіктіні оқиғаның барлық мән-жайын анықтау үшін полицияға жеткізді.
Аталған жайт ҚР ҚК-нің 287-бабы «Қаруды, оқ-дәрiлердi, жарылғыш заттарды және жарылыс құрылғыларын заңсыз иемдену, беру, өткiзу, сақтау, тасымалдау немесе алып жүру» бойынша тіркелді. Қазіргі уақытта аталған жайтқа байланысты сотқа дейінгі тергеу амалдары жүргізілуде. Сараптамалар тағайындалды.
Полицейлер «мемлекеттен қайтарымсыз грант әперемін» деп 7 тұрғынды алдаған жас қызды ұстады,-деп хабарлайды ТАQ.KZ тілшісі Түркістан облысы ПД баспасөз қызметіне сілтеме жасап.
Түлкібас аудандық полиция бөліміне Қарағашты, Шұқырбұлақ, Түлкібас ауылдарының бірнеше тұрғыны шағым түсірген. Жәбірленушілер өз арыздарында өткен жылы «кәсіп ашуға қайтарымсыз жәрдемақы алып беремін» деп сендірген таныс қызға алданғандарын жеткізді. Алаяқтың сөзіне сенген тұрғындар әрқайсысы 100 000 мен 1 700 000 теңге көлемінде ақша берген. Аталған 7 жәбірленуші сезіктіге жалпы 7,5 миллион теңге берген.
Осы ақпарат бойынша ауыл тұрғындарының ақшасын алып, уәдесін орындамаған күдіктіні ұстау мақсатында, түлкібастық полицейлер жедел іске кірісті.
Нәтижесінде күдікті жас қыздың жүрген жері анықталып, ол Алматы қаласындағы жалдамалы пәтерлердің бірінен ұсталды.
Анықталғандай, ол жалған уәде беріп, алған ақшаны өз қажеттілігіне жұмсаған. Қазіргі таңда жас қыз қамауға алынды. Тәртіп сақшылары оның басқа да осыған ұқсас қылмыстарға қатыстылығын анықтауда.
Тергеу ҚР ҚК-нің 190-бабы (Алаяқтық) бойынша жүргізілуде.
Ерлі-зайыпты Дубайда некеге тұрған. Неке елшілікте, содан кейін ҚР аумағындағы АХАТ органында тіркеліпті. Тіпті олар бірге тұрған кезеңде ортақ балалары дүниеге келген. Ер адам әйелі жасырын некеге тұрғанын Дубайдан Грузияға көшкенде білген, — деп хабарлайды TAQ.KZ тілшісі Tengrinews.kz сайтына сілтеме жасап. Бұл ақпаратты Астана қаласы сотының баспасөз қызметі растаған.
Одан кейін отбасы Грузияға қоныс аударып, онда олар сол елде тұруға рұқсат алған. Алайда, құжаттарды алған кезде ер адам жұбайы жеті жыл бұрын Тбилиси қаласында Грузия азаматымен некеге тұрғанын біледі.
Ер адам осы жағдайға байланысты зайыбының некеде тұрғаны туралы ештеңе білмейтінін айтып сотқа жүгінген. Сот 2018 жылы Қазақстан Республикасының Дубай қаласындағы Бас консулдығында жұбайлар арасында тіркелген некені жарамсыз деп таныды.
Әйел Астана қаласы сотына апелляциялық шағыммен жүгінген. Апелляциялық сатыдағы сот үкімді өзгеріссіз қалдырды.
Ақтау қаласының әкіміне қатысты 50 АЕК мөлшерінде, яғни 172 500 теңге айыппұл салынды. Әкім ақшалай өндіріп алуды 5 күн ішінде төлеуі және сот шешімін 10 күн ішінде орындауы қажет, деп хабарлайды BAQ.KZ сайтына сілтеме жасап TAQ.KZ тілшісі.
Әкімге қомақты айыппұл заңды күшіне енген сот шешімін уақытылы орындамағаны үшін салынғаны белгілі болды.
Маңғыстау облыстық ауданаралық сотының шешімімен шаһардағы кәсіпкердің Ақтау қаласы әкіміне қатысты талап-арызы қанағаттандырылған. Өйткені жергілікті әкімдік оған жер учаскесінің нысаналы мақсатын өзгертуден бас тартқан екен. Бұл әрекетін сот заңсыз деп таныды. Талапты орындауға 1 ай мерзім белгіленді.
«Бірақ осы уақытқа дейін сот шешімі орындалмай, жеткілікті уақыт өтсе де қала әкімі әкімшілік акті қабылдауға ешқандай шара қолданбаған. Әкімшілік кодекстің талаптарына сәйкес, сот шешімдерін орындау соттың бақылауында және оларды орындаудан жалтару ақшалай 50 АЕК өндіріп алуға әкеп соғады,»- делінеді Маңғыстау облыстық ауданаралық сотының хабарламасында.
Балалардың TikTok-та отыру уақыты шектеледі, — деп хабарлайды BAQ.KZ сайтына сілтеме жасап ТАQ.KZ тілшісі
Ал ұзағырақ отырғысы келсе ата-анасының келісімі болуы қажет. TikTok әкімшілігі әлеуметтік желінің денсаулыққа әсері туралы ғылымда ортақ пікір жоқ екенін айтты.
Алдағы аптада 18 жасқа толмаған пайдаланушылар желіні тек 60 минут пайдалана алады.
Бір сағаттан кейін әлеуметтік желіні пайдалануды жалғастыру үшін кіру кодын енгізу керек. Егер пайдаланушы 13 жасқа толмаған болса, TikTok қолданбасының уақытын созу үшін ата-ананың рұқсатын, яғни кіру кодын енгізуі керек. Бұл жағдайда әлеуметтік желі қосымша 30 минут береді.
Үкімет инватакси қызметіне мобильдік қосымша арқылы тапсырыс беруді жолға қоймақшы. Премьер-Министр Әлихан Смайылов Сенат депуататтарының сауалына берген жауабында осындай мәлімет айтты.
«Бүгінгі таңда мүгедектігі бар адамдардың ұсыныстарын ескере отырып, инватакси қызметін Әлеуметтік қызметтер порталы арқылы көрсететін ілкі жобаны іске қосуға бағытталған жұмыстар жүргізіліп жатыр. Ілкі жоба аясында әр қызмет алушы инватаксиге Әлеуметтік қызметтер порталында тіркелген жеткізушінің мобильдік қосымшасы арқылы тапсырыс бере алады», — деп жазды Үкімет басшысы.
Сондай-ақ биыл инватакси қызметіне жергілікті бюджеттерден 3,5 млрд теңге бөлу көзделіп отыр.
Президент Қасым-Жомарт Тоқаев 2025 жылға дейін республикалық мәдениет және архив ісі ұйымдары қызметкерлерінің еңбекақысын 100%-ға көтеру туралы тапсырмасы аясында биыл 1 қаңтардан сала мамандарының айлығы орта есеппен тағы 22%-ға артты. Бұл туралы Мәдениет және спорт министрлігінің баспасөз қызметі хабарлады.
Соңғы екі жылда 64 мыңға жуық мәдениет және архив ісі қызметкерлерінің еңбекақысы орта есеппен 45%-ға көтерілді.
«2023 жылдың қаңтарынан барлық санаттағы қызметкерлердің айлығы өскенін атап өту керек. Бұл басшылар мен жетекшілер, негізгі персоналмен қатар, еден жуушы, күзетші, вахтер секілді жұмыскерлердің де еңбекақысы көтерілді», деді Мәдениет және спорт вице-министрі Н. Дәуешов.
Мәдениет және спорт министрлігі сала мамандарының айлығын одан әрі ұлғайтуға бастамашы болады. Мәселен, шығармашылық жоғары оқу орындарындағы концертмейстерлердің еңбекақысын көтеру жоспарда бар. Ол үшін заңнамалық актілерге тиісті өзгерістер енгізу бойынша белсенді жұмыс жүріп жатыр. Сондай-ақ «Ұлттық» мәртебесі бар мәдениет ұйымдары қызметкерлерінің еңбекақысы екі есеге жуық өсті. Бүгінде елімізде осы санатқа жататын 5 ұйым бар. Министрлік алдағы уақытта аталған нысандардың тізімін кеңейтуді жоспарлап отыр.
Биыл көктемде 18 мыңнан астам ер азамат әскерге шақырылады. Бұл туралы ҚР Қарулы Күштері Бас штабы ұйымдастыру-жұмылдыру жұмыстары департаментінің бастығы Бауыржан Артықов мәлімдеді,-деп хабарлайды TAQ.KZ тілшісі.
Әскер қатарына 18-27 жас аралығындағы ер азаматтар қарулы күштерге және басқа да әскери құрылымдарға шақырылады. Бұл шаралар 1 шілдеге дейін жалғасады.
Қарулы күштерге – 7 мыңнан астам адам;
Ұлттық ұланға – 6 мыңнан астам адам;
Ұлттық қауіпсіздік комитетінің шекара қызметіне – 3 мыңнан астам адам;
Төтенше жағдайлар министрлігіне – 300-ден астам адам;
Мемлекеттік күзет қызметіне – 80-нен астам адам;
«Әскерге шақырылуға тиісті ер азаматтарды хабардар ету дербес шақырту қағазын жолдау арқылы жүзеге асырылады. Шақырту қағазы олардың тұрғылықты мекенжайына немесе жұмыс орнына жеткізіледі. Осы жұмыс автоматтандыру мақсатында 2021 жылдан бастап әскерге шақырушыларды SMS-хабарлама жолдау арқылы да хабардар ету де жүргізілуде», — деді Бауыржан Артықов
Ал, әскерден босатылатын санаттарға студенттер; педагогтар; бір және одан көп баласы бар ер адамдар жатады.
Еске сала кетейік, Қазақстанда әскерден жалтарғаны үшін қылмыстық және әкімшілік жауапкершілік қарастырылған.
Бестөбедегі шахтада заңсыз алтын іздеуші көз жұмды деп хабарлайды Stan.kz ақпарат агенттігіне сілтеме жасап ТAQ.KZ тілшісі.
27 ақпанда Степногорск полициясына «Центральная» шахтасының 520 көкжиегінде 1993 жылғы ер адамның көз жұмғаны туралы хабарлама келіп түскен.
Қазіргі таңда мұны Ақмола полициясы тергеп жатыр екен.
«Бір топ ер адам алтынды заңсыз өндіру үшін шахтаның төменгі көкжиегіне түскені анықталған. Кеннің құлауы нәтижесінде ер адам жарақат алды. Үш алтын іздеуші жұмысшының денесін алып шықты», – деп хабарлады полиция.
ҚР ҚК 269-1-бабының 3-бөлігі бойынша «Қорғалатын объектіге заңсыз кіру» бойынша сотқа дейінгі тергеу басталды.
Естеріңізге салсақ, бұған дейін қаңтар айында Бестөбе кенішінің жұмыс істемейтін шахтасының аумағынан заңсыз алтын іздеушінің мәйіті табылғаны хабарланған болатын.
Қазақстанда жастар саясаты жөніндегі заң күшіне енді, деп хабарлайды Ақпарат және қоғамдық даму министрлігі.
Бұл заңға сәйкес кешеден бастап Қазақстанда жастардың жасы 35 жасқа дейін ұлғайтылды.
Яғни жастардың үлесі 3,7 млн-нан 6 млн-ға дейін көбейді.
Енді 35 жасқа дейінгі азаматтар жас отбасыларға арналған жеңілдіктерге, жеңілдетілген несие алу және басқа игіліктерге ие болады.
Сонымен қатар, жастардың даму индексі, уақытша жұмысқа орналаспаған жастар (NEET санатындағы жастар), жастармен жұмыс жөніндегі маман және жастардың еңбек жасағы ұғымдары ресми түрде қолданылады.
