Түркістан облысы мәслихатының төрағасы Нұралы Әбішов ақ жаулықты әжелер мен алтын құрсақты аналарды үйіне барып құттықтады.

Бүгінде, Түркістан қаласында тұратын ардақты әжелер мен аяулы аналар – Бибісара Тойғараеваның, Зәуре Момбекованың, Жанар Альчинбаева мен Қаламқас Арыстанова өз әулеттің берекесі мен ұйытқысына айналып отыр.

Мәслихат төрағасы кездесуде қазақ халқы ежелден әйел қауымын ерекше құрметтегенін айта отырып, өзінің жылы лебізін білдірді. Сондай-ақ, осындай батыр апаларымыз бен аналарымыздың көп болып, жас қыз-келіншектердің үлгі алу қажеттігін айтып өтті.

Салт-дәстүріміз бен тілімізді, мәдениетімізді ұл-қыздарымыздың бойына сіңіріп, ұрпақ тәрбиелеудегі ерен еңбектеріне, шексіз мейірімділіктеріне алғысын білдірген Нұралы Әбішов көпбалалы аналарға мерекелік сыйлығын да табыс етті.

Өз кезегінде, ардақты әжелеріміз бен көп балалы аналар мәслихат төрағасының арнайы құттықтап келгеніне ризашылықтарын білдіріп, Түркістанды өркендету бағытындағы жұмыстарына сәттілік тіледі.

Айта кетерлігі, Бибісара Тойғараева – тыл еңбегінің ардагері, 98 жаста. Түркістан қаласының тұрғыны. 10 баланың анасы.
Зәуре Момбекованың жасы 96-да. 7 баланың анасы, 25 немере, 80 шөбере, 32 шөпшек тәрбиелеп отыр.

Қаламқас Арыстанова жас көпбалалы ана. Жолдасымен 9 баланы тәрбиелеп отыр. Аспазшы. Жанар Альчинбаева да 9 баланың анасы. Бүгінде мейірбике болып жұмыс жасайды.

Осы уақытқа дейін мәселесін айтып талай есікке барған Қабылсай ауылы тұрғындарының мәселесі өз шешімін тапты. Елді мекен халқының талап-тілегіне назар аударып, дер кезінде орындалуына ықпал жасаған Түркістан облысы мәслихатының төрағасы Нұралы Әбішов пен облыс мәслихатының депутаты Ержан Қосмамбетов. Яғни, халық қалаулылары бұған дейін өңірге қарасты қала, аудандарды аралап сайлаушылар алдында кездесулерін өткізген болатын. Нәтижесінде депутаттар тұрғындардан түскен арыз-шағымдар бойынша нақты жұмыстар атқарып келеді.

Солардың бірі Арыс қаласына қарасты Қабылсай елді мекенінің мәселесі. Нақтырақ айтсақ, кестеге сәйкес Арыс қаласында сайлаушылармен жүздескен мәслихат төрағасы Н.Әбішов пен мәслихат депутаты Е.Қосмамбетовке жұртшылық екі жылға жуықтаған тас жол бойындағы жарық шамдардың іске қосылмай, тұрғындар қараңғыда қиналып отырғанын айтқан болатын. Арада ұзақ уақыт өтпей Қабылсайлықтардың мәселесі шешімін тапты. Депутаттар талап-тілекті басты назарға алып, оның дер кезінде орындалуына ықпал жасады.

— « Бұл ауылдағы негізгі көшенің бірі. Осы жолдың бойында мектеп бар. Әсіресе, қыс мезгілінде мектепке баратын балалар үшін қараңғы көшелер қолайсыздық тудыратын еді. Жолдың бойы жарқырап қалды.Осы күнге дейін әкімдікке де, басқа да жауаптыларға барып жарық қосуды сұрадық. Араға ұзақ уақыт салып, Нұралы Әбішов пен Ержан Қосмамбетовтың қабылдауына барған кезде ғана бұл мәселе шешімін тапты. Ауыл халқы атынан шексіз алғыс айтамыз»,-деді ауыл тұрғыны Е.Жақсылықұлы.

Айта кетейік, Қабылсай ауылында 600 ден аса халқы бар. 100 – ге жуық отбасы тұратын ауыл көшесі енді жарқырап тұр. Жарық шамдары орнатылған тас жолдан қала тұрғындары Арыс- Монтай бағытына қатынайды. Арыс қаласы облыстық маңызы бар КХ-92 «Арыс –Монтайтас» автокөлік жолы, Арыс қаласы, Монтайтас ауыл округі, Қабылсай елді мекенінің тұсына Түркістан облысының жолаушылар көлігі және автомобиль жолдары басқармасы тарапынан 67 дана жарық шамдар орнатылып, Арыс қаласы әкімдігінің теңгеріміне берілген.

Бүгінде, ел игілігі үшін жасалған жұмыс, арыстықтар үшін игі іс болып есте қалды.

Ауыл аймақтарда жүзеге асырылып жатқан жобалар мен нысандар жергілікті халықтың игілігі үшін салынады. Яғни, оның сапасы сол тұрғындар үшін маңызды.
Түркістан облыстық мәслихатың депутаты Төрегелді Қалмұратов Сайрам ауданының халқымен кездесуде осылай деп мәлімдеді.
Халық қалаулысы өз сөзінде, ауылдың белсенділері мен елдімекендердің тұрғындарын барлық бақылау жұмыстарына қатыстыру керек екенін айтты.

“Президент айтқандай, Әділетті Қазақстан құру бастамасын шын мәнінде жүзеге асыру үшін, билік өкілдері де ашықтықты қамтамасыз ету қажет. Әрбір жобаға қоғамның бақылауын, ауыл белсенділерінің қатысуын қамтамасыз еткен дұрыс. Ауыл әкімі бір бөлек, ауыл биі мен тұрғындар бір бөлек болмауы тиіс. Дауласудың басты себептері де осындайдан басталады” — деді халық қалаулысы Төрегелді Қалмұратов

Айта кетейік, Түркістан облыстық мәслихат депутаттары халықпен кездеулер өткізіп, атқарылған жұмыстардың есебін беріп жатыр. Сонымен қатар, аудан-қала тұрғындарына алдағы жоспарларды баяндауда. Кезекті кездесуде мандат иелері Сұлтан Көшенов, Бекжан Айтқұлов, Сайдірасулхан Ералиев, Нұржан Жамалбеков және Төрегелді Қалмұратов Сайрам ауданының халқымен есеп беру кездесуін өткізді. Халық қалаулылары Сайрамның қордаланған мәселелеріне мән беріп, проблемаларын тыңдады.

Бірінші сөз Түркістан облыстық мәслихатының депутаты Сұлтан Бахытұлы Көшеновке беріледі. Облыстық мәслихаттың кәсіпкерлік, құрылыс, инфрақұрылымды дамыту, жер қатынастары және табиғатты пайдалану мәселелері жөніндегі тұрақты комиссиясының төрағасы, жиынға қатысушыларға облыстық мәслихатының 2023 жылы атқарылған жұмыстары бойынша есебін баяндады.

Баяндамадан кейін қатысушылар сұрақ-жауап, ұсыныс-пікір білдірді. Нақтырақ айтқанда, Қарақұрт ауылында қоқыс полигоны, Жібек жолы ауылында интернет жүйесінің жоқтығы және Ақдала ауылында СВА салу қажеттігі айтылды. Сонымен қатар, Сайрам ауданына қарасты жолдарды жөндеу және жарық орнату бойынша да тұрғындар шағым білдірді. Жалпы бұл күні ауданның инфрақұрылым, интернет және ауыз су мәселесін айтып келушілер қатары көп болды.

Жиын соңында депутаттар айтылған барлық ұсыныстарды назарға алатындарын айтып, алдағы уақытта арнайы комиссия құрып проблемасы бар елді мекендерге бару керек деп келісті.
Айта кетейік, есеп беру кездесуден кейін депутаттар тұрғындарды жеке мәселесі бойынша қабылдау өткізіп, арыз-шағымдарын тыңдады.

Созақ ауданында жалпы өнеркәсіп көлемі жыл санап артып келеді. Тиісінше кәсіпорындардың ашылуы, жергілікті тұрғындардың жұмыспен қамтылуына, ауылдардың әлеуетін арттыруға септігін тигізуде. Одан бөлек республикалық және облыстық бюджеттен бөлінген қаражаттарға халықтың игілігіне қажетті нысандар салынып жатыр. Ал, осындай жобалардың жүзеге асуына Созақ ауданынан облыстық мәслихаттың депутаттығына сайланған депутаттар Мағауия Тұрысбеков пен Бегімбет Байғараев ықпал жасауда. Елдің сенімі мен үмітін арқалаған халық қалаулылары аудандағы өзекті мәселелердің шешімін қарастыру бағытында билікке бұқараның талап-тілегін жеткізіп, оның орындалуын басты назарға алып жүр.

Міне, осындай істердің есебін беру үшін қос депутат Созақ ауданының тұрғындарымен кездесіп, 2023 жылдың қорытындысы бойынша атқарылған жұмыстар туралы және 2024 жылдың жоспарлары бойынша баяндап берді.

Қазіргі таңда, Түркістан облысы бюджетінің жалпы көлемі 1 триллион 353 миллиард құрайды. Ал,  Созақ ауданына 2024 жылы 21 нысанға 6 миллиард 808 миллион теңге бөлінген. Бұл, өткен жылмен салыстырғанда 1 миллиард теңгеге артық. Яғни, депутаттардың ықпалымен Созақ ауданына өткен жылдан да көп қаржы қарастырылып отыр.

Сондай-ақ, халық қалаулысы Мағауия Тұрысбеков Созақ ауданына 5 жаңа тракторды тарту етті. Мандат иесі бұл тартуын сайлаушылармен кездесу барысында мәлімдеді.

“Бүгінде облыс әкімі Дархан Амангелдіұлы өңірдегі тазалық, абаттандыру жұмыстарына баса көңіл бөліп отыр. Бұл халық үшін өте маңызды. Себебі барлық тірлік тазалықтан басталады. Сондықтан , аталған тракторлар аудан тазалығы мен өзге де қажетті салаларға қызмет ететін болады”,-деді Мағауия Сексенбайұлы.

Қайырымдылық — асыл қасиет.  Мағауия Тұрысбеков өткен жылы аудандағы бір отбасыға демеушілік жасап, баспана салып берген болатын. Бұл игі үрдісті халық қалаулысы биыл да жалғастырмақ ниетте екен.

Жиын соңында қос депутат тұрғындардың өтініштері мен ұсыныс-пікірлерін тыңдап, сұрақтарына жауап берді. Тұрғындар тарапынан көтерілген елді мекендердің мәселелері, депутаттар тарапынан назарға алынды. Жалпы, аудан халқы атқарылған жұмыстарға оң бағасын беріп, алдағы істеріне сәттілік тіледі.