Архив рубрики: Ақпарат

Ақпарат, Қоғам, Экология

ТҮРКІСТАН: АУЫЛ ШАРУАШЫЛЫҒЫ ҒЫЛЫМДАРЫ АКАДЕМИЯСЫНЫҢ ОРТАЛЫҒЫ АШЫЛДЫ

Оставить комментарий
Түркістанда Қазақстан Республикасы Ауыл шаруашылығы ғылымдары Академиясының «Ясауи білім тарату орталығы» ашылды. Бұл орталық облыстың 5 жылдығына арналған «Экологиялық жағдайды жасыл желектерді дамыту жолымен жақсарту және ауыл шаруашылығы дамуындағы мәселелер» атты халықаралық ғылыми-тәжірибелік конференция аясында ашылып отыр. Шараға Түркістан облысы әкімінің орынбасары Ермек Кенжеханұлы, еліміздің және Өзбекстан, Қырғызстан, Үндістан мен Пәкістан елдерінің белгілі ғалымдары қатысты.
Дөңгелек үстелде осы саладағы бірқатар өзекті мәселелер талқыланды. ҚР Ауыл шаруашылығы ғылымдары академиясының президенті, ҚР ҰҒА академигі Тілектес Есполов өз сөзінде академияның бүгінгі мақсаты ғылыми бағыттағы әлеуетті біріктіріп, оны қолдау және координациялау арқылы озық отандық инновацияларды өндіріске енгізіп, АӨК тиімділігін арттыру, кәсіпкерлердің біліктілігі мен технологиялық мүмкіндіктерін дамыту жолдарын жеткізді.
Жиын барысында Қазақстан Республикасы Ауыл шаруашылығы ғылымдары академиясы мен Қ.А.Ясауи атындағы Халықаралық қазақ-түрік университеті арасында ынтымақтастық туралы меморандумға қол қойылды. Сондай-ақ университет ректоры Жанар Темірбекова оқу ордасының жұмысымен таныстырды.
Осы жаңадан ашылған орталықтың директоры қызметіне Битөре Жұмақанов тағайындалды. Орталықтың лентасын облыс әкімінің орынбасары Ермек Кенжеханұлы мен ҚР Ауыл шаруашылығы ғылымдары академиясының президенті, ҚР ҰҒА академигі Тілектес Есполов, Қожа Ахмет Ясауи атындағы Халықаралық қазақ-түрік университетінің ректоры Жанар Темірбекова қиды. Білім тарату орталығының басты мақсаты – жетекші әлем елдерінің тәжірибесін ескере отырып, отандық озық білім мен технологиялардың өндіріске жедел жетуіне ықпал жасау мақсатында қажетті ғылыми жаңалықтарды көпшілікке жеткізіп, ауыл шаруашылығы саласындығы ақпараттарды дер кезінде насихаттап отыру.
Конференция қонақтары Түркістанның «Жасыл белдеу» нысандарын аралап, атқарылып жатқан жұмыстармен танысты. Олар Түркістанды жасыл желекке орау бойынша қажырлы еңбекке оң бағаларын беріп, еңбекті дамыту үшін өзара тәжірибе алмасып, ой-пікірлерімен бөлісті. Климаты құрғақ Түркістанда жасыл желекті жетілдірудің аса қиындығын тілге тиек етті. Сондай-ақ конференция қонақтары жаңарған шаһардың көрікті жерлерін тамашалап, алған әсерімен бөлісті.
Ертең тәжірибелі ғалымдар Түркістан облыстық табиғи ресурстар және табиғат пайдалануды реттеу басқармасының ұйымдастыруымен өтетін «Облыстағы экологиялық жағдайды жасыл желектерді дамыту жолымен жақсарту және ауыл шаруашылығы дамуындағы мәселелер» атты Халықаралық ғылыми-тәжірибелік конференцияға қатысып, баяндама жасайтын болады.
Айта кетейік, 2021 жылы ғалымдардың бас қосуымен өткен халықаралық конференцияда Түркістан облысының аймағында құрылып жатқан «Жасыл белдеуге» «С.Сейфуллин атындағы Қазақ агротехникалық зерттеу университеті» коммерциялық емес акционерлік қоғамы (КеАҚ) «Ә.Н.Бөкейхан атындағы Қазақ орман шаруашылығы және агроорманмелиорация ғылыми-зерттеу институты» (әрі қарай-ҚазОШАОМҒЗИ) ЖШС-нің Алматы филиалы мамандарымен табиғи климаттық жағдайына талдау жүргізілген болатын. Соның нәтижесінде Түркістан облысы аумағындағы орман дақылдарының нормалық жерсіну және сақталу көрсеткіші 75 пайыздан 50 пайызға төмендетілген.
ҚазОШАОМҒЗИ мамандарының қорытындысына сәйкес, Түркістан қаласының қатаң континентальды климаты, желдің бағыттары мен соғу мерзімдері ескеріліп, қала айналасынан құрылып жатқан «Жасыл белдеуге» егілген орман екпелерінің нормалық жерсіну және сақталу көрсеткіші (көнімділігі) 50 пайызды құрайтыны анықталып, дәлелденді.
Ақпарат, Ауыл шаруашылығы, Жаңа жоба, Қоғам, Экология

ТҮРКІСТАН ОБЛЫСЫНДА ХАЛЫҚАРАЛЫҚ ҒАЛЫМДАР КӨГАЛДАНДЫРУ ЖАЙЫН ТАЛҚЫЛАЙДЫ

Оставить комментарий

Бұл туралы  Түркістан облысының Өңірлік коммуникациялар қызметінде өткен брифингте ҚР Ауыл шаруашылығы академиясының Ясауи білім тарату орталығының директоры Битөре Жұмақанов мәлімдеді.

Спикердің айтуынша, Түркістан облысының жасыл желегін дамыту мақсатында 3-4 тамыз күндері Түркістан облысының 5 жылдығына және Қазақстан Республикасы Ауыл шаруашылығы ғылымдары Академиясы орталығының ашылуына арналған «Экологиялық жағдайды жасыл желектерді дамыту жолымен жақсарту және ауыл шаруашылығы дамуындағы мәселелер» атты халықаралық ғылыми-тәжірибелік конференциясы өтеді. Ғылыми конференцияда шетелдік ғалымдар өңірдегі жасыл желек және көгалдандыру жұмыстарына баса назар аудармақ.

 

—Соңғы бес жылда Түркістан облысы көптеген игі жобаларды, бастамаларды іске асырып келеді. Осы орайда өңірдің экологиялық жағдайын жақсарту, халқы мен ауылшаруашылық егістік алқаптарын сумен қамтамасыз ету мақсатында Түркістан Жасыл желегінің орны мен рөлі ерекше. Түркістан облысы көпсалалы ауыл шаруашылығымен айналысатын өңір болғандықтан, ең күрделі шешімін таппай жатқан мәселелерде осы өңірде деуге болады. Нақтырақ айтсақ, су тапшылығы, топырақтың құнарсыздануы, өнім сапасының төмендеуі және тағы басқа қордаланған мәселелер аз емес. Осы мақсатта Түркістан қаласында Ауыл шаруашылығы Ғылым академиясының орталығы ашылғалы отыр, сондай-ақ осы мәселерлердің алдын алу және облыстағы жасыл белдеу мен көгалдандыруды дамыту үшін халықаралық ұйымдармен шетелдік ғалымдарды шақырып отырмыз. Соңғы жылдары ауыл шаруашылығында топырақтың құнарлылығы мен өнім сапасын жоғарылатуға бағытталған «гумус», «биогумус», «органикалық тыңайтқыш» деген жаңа ұғымдар келіп қосылды. Осы орайда облыста мақсат тек жоғарғы өнім өндіру ғана емес, жетілдірілген сапалы өнім халықымыздың игілігіне жарату болып саналады, — деді Битөре Молдатөреұлы.
Брифингте сөз алған Түркістан облысының табиғи ресурстар және табиғат пайдалануды реттеу басқармасының басшысы Қайрат Абдуалиев орман шаруашылығы қағидаларында көрсетілгендей қураған ағаштарды қайта жаңғырту мақсатында орман екпелерін толықтыру жұмыстарын жүргізу және екпелерді құру процесінің кезекті тармағы болып есептелетіндігін айтты. Осы ретте жасыл желектерді күтіп баптау мерзімі 5 жылға созылғандығын мәлімдеді.
—Облыс әкімінің бастамасымен Түркістан қаласының экологиялық ахуалын жақсарту мақсатында «Жасыл белдеу» аумағын 30 мың гектарға жеткізу жоспарланып, бүгінгі таңда 15 009 гектар жерге көшеттер егіліп, күтіп-бапталуда. Түркістан қаласы мен облыстың бірқатар аудандарында климаты күрт континетальды болуына орай, егілген орман ағаштарының 1-2 жылдары 25 пайызының жерсінбей қурап қалуы, табиғи заңды құбылыс.
Сонымен қатар, Түркістан облысындағы мәдени орман алқаптарының жерсіну мен сақталу көрсеткіші 50 пайызға белгіленді. Түркістан қаласы экологиялық аймаққа енгізілгенімен, күзгі түгендеу қортындыларына сәйкес, қазіргі таңда қала айналасындағы жасыл екпелердің көнімділігі 60-65 %-ды құрап отыр. Бұдан бөлек, Арал теңізінің тартылуы, түбінің тұздануы, оған жақын орналасқан көрші мемлекеттер мен еліміздің бірнеше облыстары, оның ішінде Түркістан облысындағы бірқатар аудан, елді мекендерге де табиғи кері әсерін тигізуде. Тұздың Аралдан ұшпауына тосқауыл болатын жалғыз жол – Арал ұлтанына өсімдіктер егу және сексеуіл алқабын отырғызу болып саналады, — деді Қайрат Аманкелдіұлы.
Ақпарат, Қызықты, Мәдениет, Өнер

ТҮРКІСТАНДА ЖАҢА ОТАНДЫҚ ФИЛЬМНІҢ ТҰСАУЫ КЕСІЛДІ

Оставить комментарий
Оңтүстік өңірінің кино қоржыны тағы бір жаңа туындымен толықты.
«Khanshaiym Plaza» ойын-сауық орталығындағы Kinoparkте «Шала бандиттер» шытырман оқиғалы фильмнің көрсетілімі өтті. Тұсаукесер алдында өткен баспасөз жиынында актерлік құрам мен түсірілім тобы бұқаралық ақпарат құралдарына жаңа туынды жайлы баяндады.
– Түркістан қаласына 37 жылдан кейін келіп тұрмын. Қала мүлдем өзгеріп кеткен деуге болады. Зәулім әрі заманауи ғимараттар мен мәдени орталықтар мұнда құрылыстың қарқынды жүргенін көрсетеді. Нағыз туристік қалаға айналып келеді. Жаңа киноның алғашқы көрсетілімі де дәл осы жерден басталғанына қуаныштымын. Себебі бұл Түркістанның рухани-мәдени саласындағы басты жаңалық болады деп ойлаймын , – деді басты рөлді сомдаған Жан Байжанбаев.
«САҚ» киностудиясы түсірген фильмде Жан Байжанбаев, Ілияс Көпжасаров, Әшім Ахметов, Мәлік Абдраманов сынды танымал актерлар басты рөлді сомдаған. Фильм режиссері – Фурхат Саипов, сценарий авторы – Бақытжан Құлжабай, продюсері – Нұриддин Паттеев, көркемдік жетекші – Батырхан Дәуренбеков.
Фильм желісі Серік атты дәрігердің отбасымен байланысты өрбиді. Бір күні күтпеген жерден Серіктің үйіне «маска» киген бандиттер басып кіріп, отбасы мүшелерін тұтқынға алады. Бас кейіпкер оларға бар ақшасын ұсынады. Бірақ олар ақшадан бас тартады. Бұл әрекеттеріне Серіктің отбасы мүшелері таң қалады. Сонда олар не үшін келді? Әрине, бұл сұрақтың жауабы тереңде жатыр еді.
«Маска» кигендер ақшадан бас тартқанымен әсте де «Шала бандиттер» емес! Олардың не үшін келгені, қандай құпияны жасырғаны фильмнің соңында белгілі болады. Фильм комедиялық жанрға бағытталғанымен, ондағы оқиғалар желісі жақсы мен жаманның, адалдық пен арамдықтың, махаббат пен жалған сезімнің ара жігін ажыратады. Ақиқат пен жұмбақтың күресі арқылы көрерменге ой салады.
Айта кетейік, көрерменге жол тартқан «Шала бандиттер» комедиялық мелодрамасы еліміздің барлық өңіріндегі кинозалдарда көрсетіледі.
"AMANAT", Ақпарат

«AMANAT» Түркістан облысында 92 пайыз тозығы жеткен орталық қазандықтарына қайта жаңғырту жұмыстары жасалуда

Оставить комментарий

«AMANAT» партиясы Түркістан облыстық филиалының төрағасы Алтынсары Үмбетәлиев Түркістан облысы Кентау қаласында орналасқан № 5 жылу энергия (ТЭЦ) орталығына барды. Қайта құру жұмыстары жасалып жатқан қазандықтардың жұмысымен танысты. 92 пайызға тозығы жеткен сервис орталығында бүгінгі таңда, 4 қазандыққа ағымдағы жөндеу және 4 қазандыққа қайта жаңғырту жұмыстары жүргізілуде. 80 жылдық тарихы бар жылу мекемесі Кентау қаласындағы қуаттылығы 100 Гкал/сағ. жоғары жалғыз орталық болып саналады.

 

Осыған дейін орталықтың тозуына байланысты, қазандықтарын, жылу жүйелерін және қосалқы қондырғыларын қайта құру жұмыстарын жасау жоспарланған болатын. Сметалық құны 13,7 млрд. млн.теңгені құрайды. Мекеме жұмыстарымен танысқан партия төрағасы Алтынсары Дүйсенбекұлына, құрылыс – монтаж жұмыстарын жасап жатқан мердігер мекеме «ЭМ-Холдинг» серіктестік басшысы атқарылып жатқан жұмыстар барысын баяндады. Айтуынша жұмыс өз деңгейінде жасалуда әрі белгіленген уақытта аяқталатынын атап өтті.

 

Сонымен қатар мекеме басшысы,

— 8,9,10,11 қазандықтардың қайта құру жұмыстары 30 қазан аяқталады. Станцияның тозу дәрежесі жоғары болғандықтан, авариялық келеңсіз жағдай тудыруы мүмкін. Жылу орталығының қайта құру жұмыстары аяқталғаннан кейін қала тұтынушыларын сапалы әрі тұрақты жылумен қамтамасыз ету арта түспек,- деді Серік Симтиков.

 

Айта кетейік, нысан 2024 жылға өтпелі. Қазіргі таңда қазандықтардың демонтаж жұмыстары орындалуда. Дайындық жұмыстарын жылыту маусымы басталғанға дейін толық аяқтау жоспарланып отыр.
Одан бөлек, жылыту маусымына 6,6 шақырым магистралды жылу желілері мен 4 насостық станцияны қайта жаңғырту үшін ағымдағы жылға 3,8 млрд. теңге бөлінген.
№ 5 жылу энергия (ТЭЦ) орталығына партиялық бақылау бекеті орнатылған. Жауапты депутат бекітілген. Мәселе тұрақты бақылауда

"AMANAT", Ақпарат

БЕЛСЕНДІ АЗАМАТТЫҚ ҰЙЫМДАРДЫҢ ӨКІЛДЕРІМЕН КЕЗДЕСУ ӨТТІ

Оставить комментарий
 «AMANAT» партиясы Түркістан облыстық филиалында «Кедергісіз келешек» партиялық жобасы аясында белсенді азаматтық ұйымдардың өкілдерімен кездесу өтті.
Басқосу жиынын «AMANAT» партиясы Түркістан облыстық филиалы төрағасының орынбасары Қалыйма Жантөреқызы және «Еуразиялық инклюзивті қоғамды дамыту қауымдастығы»» заңды тұлғалар бірлестігінің төрағасы В.Пак жүргізді.
Жиынға үкіметтік емес ұйымдардың басшылары мен өкілдері қатысты.
 
Күн тәртібінде қаралған мәселелер:
Мүгедектігі бар адамдардың белсенді қоғамдық ұйымдарымен танысу.
2. Қоғамдық ұйымдар мен жергілікті атқарушы органдар арасында сапалы және жүйелі жұмыс істеу үшін қолжетімді орта бойынша сараптамалық қоғамдастық құру.
3. Мүгедектігі бар адамдар үшін жаңа жұмыс орындарын құру.
4. Мүгедектігі бар адамдардың өмір сүру сапасын арттыруға байланысты жұмыстарды ұйымдастыру жөніндегі іс-қимыл алгоритмі.
Облыста 17 ППТК-да 1663 ерекше білім беруді қажет ететін бала оңалту және әлеуметтік бейімдеу мемлекеттік қызметін алуда. Ағымдағы жағдай бойынша кезекте тұрған балалар саны 402 баланы құрайды. Кезек болу себебі ата-аналар тарапынан ППТК жұмысына деген қажеттіліктері артуда. Сондай-ақ, «AMANAT» партиясының Түркістан облыстық филиалының 2023-2027 жылдарға арналған сайлауалды бағдарламасында ерекше қажеттілігі бар адамдарды қамқорлыққа алуға, олардың өмір сүру жағдайын жақсартуға ерекше көңіл бөлінген. Алдағы уақытта аймақта мүмкіндігі шектеулі жандарға қолайлы орта қалыптастыруға көп күш салынып, тың бастамалар қолға алынбақ.
Ақпарат, Спорт

УЕФА-НЫҢ ҚОЛДАУЫМЕН ФУТБОЛ СТАДИОНДАРЫ ЖАҢАРТЫЛАДЫ

Оставить комментарий
Мемлекет басшысының бұқаралық спортты дамытуға бағытталған тапсырмасын орындау мақсатында Қазақстан футбол федерациясы футбол алаңдарын қайта жаңарту бағдарламасын енгізілді.
«Үш жылға арналған бағдарлама УЕФА-ның қолдауымен жүзеге асырылады. Сондай-ақ жоба аясында жеке инвестицияларды тарту жоспарланып отыр.
Жобаның басты мақсаты – футбол инфрақұрылымын дамытып, бұқаралық футболды дамытуға жағдай жасау», — делінген федерацияның Telegram-арнасында.
Биыл бағдарлама аясында Ақтау, Алматы, Шымкент, Ақтөбе қалалары және Жетісу облысындағы стадиондардың алаңдары жаңартылмақ.
2023 жылы реновация бағдарламасына кіретін футбол алаңдары:
1. ЦСКА стадионы, Алматы қаласы
2. Б.Оңғаров атындағы стадион, Жетісу облысы, Балпық би ауылы
3. «Цементник», Шымкент қаласы
4. №2 БЖСМ, Ақтөбе қаласы
5. «Каспий» СК, Ақтау қаласы
Ақпарат, Жаңа жоба, Жол саласы

ТҮРКІСТАН ОБЛЫСЫНДА ЖЫЛ БАСЫНАН БЕРІ 10 МЫҢНАН АСТАМ ШЕТЕЛ КӨЛІГІ ЗАҢДАСТЫРЫЛДЫ

Оставить комментарий
Бұл туралы  Өңірлік коммуникациялар қызметінде өткен брифингте Түркістан облысы Полиция департаменті Әкімшілік полиция басқармасының бастығы, полиция полковнигі Алмасхан Тастанбеков мәлімдеді.
ҚР Президенті Қ.Тоқаев халыққа арнаған Жолдауында 2022 жылдың 1 қыркүйегіне дейін елге әкелінген шетел автокөліктерін біржолғы заңдастыру туралы айтқан болатын. Осыған сәйкес, елімізде автокөліктерді тіркеу жұмыстары жүргізіліп жатыр.
Спикердің айтуынша елімізге шетелден әкелінген көліктерді тіркеп, қазақстандық нөмір беру бағытында бір реттік акция өткізілген. Ал Түркістан облысында 2022 жылдың 1 қыркүйегіне дейін елімізге әкелінген және қолданыстағы заңнамаға сәйкес тіркелмеген шетелдік көліктерді заңдастыруды жүргізу туралы тапсырма сапалы орындалған. Ал 2023 жылдың 30 шілдесіне дейін Қазақстан Республикасының мемлекеттік тіркеу нөмерін алуға 19231 өтініш түскен. Оның ішінде 10615 автокөлік құралы тіркеліп заңдастырылып, 8616 автокөлік құралы заңдастырудан бас тартылған. Сондай-ақ, ҚР Үкіметінің қаулысына сәйкес, еліміздің аумағына конструкторлық жолмен бөлшектеніп әкелінген шетелдік 250 автокөлік тіркеліп рәсімделген.
Осы ретте Алмасхан Тастанбеков Мемлекет басшысының тапсырмасын орындау мақсатында Түркістан облысының полицейлері жүйелі жұмыстар атқарып жатқандығын және «Шетелдік көліктерді уақытша тіркеу туралы» енгізілген өзгерістердің тәртібін түсіндіріп өтті.
«Еуразиялық экономикалық одақ елдерінен әкелінген және заңдастырудан өтпеген автомобильдерді мемлекеттік тіркеу жөніндегі жұмысты көрсетілген мерзім өткеннен кейін кері әкету немесе бастапқы тіркеуден өту туралы міндеттеме қойылды. Яғни 5 жыл мерзімге уақытша есепке алу рәсімі енгізіліп, облысымызда осы бойынша жалпы 297 өтініш түсті. Оның ішінде 289 автокөлік құралы уақытша тіркеуге алынып, 8 көлік құралы уақытша тіркеуден бас тартылды. Осы орайда өңір тұрғындарын заңдастырылған көліктерді сатып алуға шақырамын. Өз кезегінде полицейлер заң бұзушылықтарға жол бермеу мақсатында, көлік құралдарын заңдастыру кезінде заңдылықты сақтау мәселелері қатаң бақылауда тұрғандығын ескертеміз»,- деді Алмасхан Мамбетұлы.
Ақпарат, Кәсіпкерлік, Қоғам, Спорт

Түлкібаста жеке кәсіпкер жазғы спорттық трамплин салуда

Оставить комментарий
«Атабұлақ» спорттық туристік нысан жанынан жазғы спорттық трамплин құрылысы ағымдағы жылдың мамыр айында басталған болатын. Еркін стильдегі спорт түрінің трамплині республика бойынша 6 облыста ғана бар. Аудандар арасында алғаш рет Түлкібаста Пістелі елді-мекенінде салынып жатыр.
-Жалпы, бұл спорт түрімен аудан жастары әлі таныс емес. Өйткені, біздің түскей өңірде қар жату мерзімі қысқа болғандықтан бұл спорт түрімен шұғылданатындар қатары да, қызығатындар қатары да сирек. Дегенмен, Шымкент қаласында орналасқан 8 спорт мектебінде фристайл спорт түрі, Қазақстан бойынша 6 облыста бұл спорт түрімен шұғылданатын спортшылар бар. Әр мектепте шамамен 120-150 бала осы бағытпен айналысады. Түлкібастың төрінен салынып жатқан трамплиннің аналогы жоқ. Көктемде спортшыларға арнап үлкен спорт зал салынды. Онда барлық құрал жабдықтар қойылған. Жазғы трамплингке қызығушы жастар болса мамандандырылған мектептегі спортшыларды шақырып, ауыл жастарын шақырып алғашқы уақыттарда арнайы жиындар өткізуге мүмкіндік береміз, деді кәсіпкер Тимур Нарымбетов.
Ауыл тұрғындары да аталған жобаның керемет бастама екенін айтуда. Себебі, Түлкібаста алғаш рет салынып жатқан жазғы спорттық трамплин халықты салауатты өмір салтын ұстануға және жастар арасында спортты насихаттауға септігін тигізеді.
Айта кетейік, соңғы жылдары Түлкібастық кәсіпкерлер жергілікті тұрғындарға қажетті әлеуметтік нысандар мен ел игілігіне қызмет жасайтын нысандарды салып, азаматтарды жұмыспен қамтуға да өз үлестерін тигізіп жатыр. Тимур Нарымбетов те туған жерінде еңбек етіп, бизнесін өркендетіп келеді. Жеке кәсіпкер алдағы уақытта жаңа бастамасын іске асырып, аудандағы алғашқы жаңа нысанды іске қоспақ.
Ақпарат, Кәсіпкерлік, Қоғам

ТҮЛКІБАСТЫҚ КӘСІПКЕР ТӘУЛІГІНЕ 200 БАНКА КӨКӨНІС КОНСЕРВІЛЕП, САТЫЛЫМҒА ШЫҒАРАДЫ

Оставить комментарий
Түлкібас ауданындағы Жаскешу ауылының тұрғыны Қатира Алдабергенова қайтарымсыз грант аясында консервалық өнімдерді шығару кәсібін қолға алған. Бүгінде өндіріс орнында жалпы саны бес адам тұрақты жұмыспен қамтылып, тәулігіне 200 банка консервіленген өнімді сатылымға шығарып отыр.
 
Кәсіпкердің айтуынша, ол ауданда өсетін көкөністер мен жеміс-жидектердің пісу уақытына қарай консервының барлық түрін дайындайды. Өндіріс орнында тәтті тосаптар мен қатар тұздалған қияр консервісіне дейін дайындалады. Ол қажетті көкөністерді өздерінің игеріп отырған егін алқабынан алынып, табиғи өнімдер облыстағы басқа аудандар мен қалаларға да жөнелтіліп келеді.
Қатира Алдабергенова алдағы уақытта өндіріс көлемін арттыру мақсатында мемлекеттік қолдауларға жүгініп, кәсібін ұлғайтуға ниетті. Сондай-ақ, ол жоспары іске асқан жағдайда қосымша тағы 10 адамды тұрақты жұмыспен қамтып, ауыл халқының әлеуетін арттыруға өз үлесін қоспақ.
Қазіргі таңда мемлекеттік грант алып кәсіп бастаған түлкібастықтардың қатары күн санап артып келеді. Биыл жыл басынан бері 44 азамат мемлекеттен қолдау тауып жұмыс бастаса, жыл соңына дейін бағдарлама бойынша 46 адам қамтылады деп көзделіп отыр.
"AMANAT", Ақпарат

«AMANAT»: Түркістан облысының бюджет көлемі 1 триллион 325 млрд. теңге

Оставить комментарий

«AMANAT» партиясы Түркістан облыстық филиалы ғимаратында, облыстық мәслихат төрағасы, облыстық мәслихат депутаты Нұралы Алмаханұлы Әбішовтың қатысуымен баспасөз мәжілісі өтті. Нұралы Алмаханұлы БАҚ өкілдерінің алдында Түркістан облысы мәслихатының 4 айда атқарған жұмыстары туралы баяндады.
— Өздеріңізге белгілі, Мемлекет Басшысы Қасым-Жомарт Кемелұлы Тоқаевтың Жарлығына сәйкес, ағымдағы жылдың 19 наурызында Қазақстан Республикасы Парламенті Мәжілісі мен мәслихаттар депутаттарының кезектен тыс сайлауы өтті. Сайлау нәтижесі бойынша сегізінші шақырылымдағы облыстық мәслихаттың бірінші сессиясы 2023 жылғы 30 наурызда өтіп, жаңадан сайланған 46 депутатқа төсбелгілері табысталды.
Сонымен қатар, алғашқы сессияда 3 тұрақты комиссия құрылып, олардың төрағалары сайланды.
Атап айтқанда: Бюджет, экономика және ауыл шаруашылығы мәселелері жөніндегі тұрақты комиссиясы, әлеуметтік-мәдени даму, мемлекеттік-құқық, жергілікті өзін-өзі басқару және депутаттық этика мәселелері жөніндегі және кәсіпкерлік, құрылыс, инфрақұрылымды дамыту,  жер қатынастары және табиғатты пайдалану мәселелері жөніндегі тұрақты комиссиялар. Жалпы, елдiң алдында тұрған экономикалық және әлеуметтiк мiндеттердi орындауға ықпал етуде мәслихат маңызды рөл атқарады.

Жыл басынан бері облыстық мәслихаттың 4 сессиясы өткізіліп, түрлі салаларға қатысты маңызды мәселелерді реттейтін 53 шешім қабылданды, оның ішінде 9 шешім облыстық Әділет департаментінде мемлекеттік тіркеуден өтті. Жылдың облыстық бюджеті 2 рет нақтыланды. 2023 жылы облыс бюджетінің көлемі 1 триллион 325 млрд. теңгені құрады. Ал бюджеттің 58,5 % әлеуметтік салаға бөлінді. Бұл өз тұсында облыстың әлеуметтік-экономикалық дамуына қатысты бірқатар міндеттерді шешуге септігін тигізді, — деді облыстық мәслихаттың төрағасы.
Сонымен қатар, Нұралы Әбішов ағымдағы жылы жергілікті атқарушы органдарға 154 депутаттық сауал жолданған. Оның 86-ы немесе 56% қанағаттандырылып, орындалған. Ал, қалған 68-і орындалу үстінде немесе оларға заңнама талаптарына сәйкес түсініктемелер берілгенін атап өтті.

Айта кетейік, жалпы жолданған 154 депутаттық сауал, тұрғын-үй коммуналдық шаруашылық, құрылыс, инфрақұрылым, қаржы және экономика, білім, денсаулық және әлеуметтік салаға бағытталған.
Сонымен қатар, тағы бір маңызды бағыттардың бірі – азаматтардың өтініштерімен жұмыс. Биылғы жылы барлығы 73 өтініш келіп түскен, оның ішінде 59-ы жеке және 14-і заңды тұлғалардан.

«AMANAT» партиясы Түркістан облыстық филиалының баспасөз қызметі