Түркістан облысында Мемлекет басшысы Қасым-Жомарт Тоқаевтың бастамасымен қолға алынған «Таза Қазақстан» бағдарламасы аясында биыл жұмыстар күшейтіле түспек. Нақтырақ айтсақ, облыс аумағында күнделікті өткізілетін 7 263 сенбілік іс-шарасы бекітілді. Жоспарға сәйкес әр күні 40-қа жуық елді мекенде сенбіліктер өтіп, аптасына 200-ге жуық елді мекен толық тазалық жұмыстарымен қамтылмақ. Сонымен қатар іс-шаралар 9 ауқымды тақырыпқа бөлініп өткізіледі. Облыс көлемінде «Үлгілі ауыл», «Жомарт түлек» байқаулары өткізіліп, үздік елді мекендер анықталады.

Түркістан облысының әкімі Нұралхан Көшеровтің төрғағалығымен өткен жиында бағдарлама аясында атқарылған жұмыстар мен алдағы жоспар сараланды. Облыстық энергетика және тұрғын үй-коммуналдық шаруашылық басқармасының басшысы Руслан Мұздыбеков бағдарлама аясында атқарылатын жұмыстар туралы баяндады. Оның айтуынша, басымдық аумақтардың тазалығын қамтамасыз етуге, абаттандыруға, нысандардың қасбеттерін, жарықшамдар мен субұрқақтарды күтіп-ұстауға, жол белгілерін ретке келтіруге, жолдарды жөндеу жұмыстарына берілмек. Сонымен қатар білім, денсаулық сақтау, мәдениет, спорт, діни нысандардың тазалығы назарда болады. Бұл жұмыстарға тұрғындармен қатар, кәсіпкерлер де жұмылдырылады.

Түркістан облысының әкімі Нұралхан Көшеровтің тапсырмасына сәйкес, бағдарлама аясында 210 мыңнан астам кәсіпкерлік нысанның, соның ішінде 4 мыңға жуық орта кәсіпорынның аумақтарын ретке келтіру жұмыстары ұйымдастырылады.

Мемлекет басшысы Қасым-Жомарт Тоқаев өз Жолдауында табиғатты қорғау және экологияны жақсарту мәселесіне ерекше назар аударып, ел аумағында жасыл белдеу құруды тапсырған болатын. Осы ретте, республикалық маңызы бар жолдардың бойында 1 млн. ағаш отырғызу бастамасы қолға алынуда. Ағаштар кезең-кезеңімен республикалық маңызы бар 691 шақырым жол бойына орналастырылады. Ағаштардың күтімін қамтамасыз ету үшін ұңғыма бұрғылау жұмыстары жүргізіліп, тамшылатып суару жүйесі мен арнайы қоршаулар орнатылады. Жобаға облыс аумағындағы «Қазатомөнеркәсіп», ҚТЖ, «KEGOC», «Инкай» және өзге де ірі кәсіпорындарды тарту көзделуде. Оған қоса осы жылы елді мекендерді көгалдандыру бойынша 1,2 миллионнан аса ағаш отырғызу межеленген.

Облыс әкімі жауапты тұлғаларға елді мекендерде тұрмыстық қатты қалдықтарды жинау және тасымалдау қызметін жүйелендіру, қоқысты алып кету жиілігі мен қызмет көрсету сапасын бақылауда ұстауды тапсырды.

– Елімізде «Таза Қазақстан» бағдарламасы іске асырылуда. Мемлекет басшысының тапсырмасы мерзімінде және сапалы орындалуы тиіс. Аудан, қала әкімдерінің жұмысы енді «Таза Қазақстан» бағдарламасын орындау арқылы да бағаланады. Кейбір аудан, қалаларда жүргізіліп жатқан абаттандыру, көгалдандыру және тазалық жұмыстары тиісті деңгейде емес. Тазалық жұмыстарын жүргізетін мемлекеттік коммуналдық кәсіпорындардың жарғыларына тиісті өзгерістер енгізбеген әкімдіктер де бар. Біз тиісті жұмыстар жүргізу арқылы тұрғындардың қоршаған ортаға, тазалыққа деген сана-сезімін көтеріп, экологиялық мәдениетті қалыптастырып, тұрғындардың, жастардың тазалыққа деген жауапкершілігін арттыруымыз қажет. Жұмысты ширатыңыздар, – деді Нұралхан Көшеров.

Өңір басшысы облыс аумағындағы «Қазпочта» «Қазақтелеком», банктер және осы секілді халыққа қызмет көрсететін мекемелер «Таза Қазақстан» бағдарламасын орындаудан тыс қалмай, өздеріне тиесілі ғимараттар мен ауларын таза ұстауға міндетті екенін жеткізді.

Қазіргі уақытта Түркістан облысының әкімдігі жергілікті атқарушы органның жанынан мемлекеттік коммуналдық мекеме құру арқылы санитарлық тазалық жұмыстарын аудан орталықтарында және ауылдық елді мекендерде жүргізу жұмыстарын қолға алуда. Бағдарлама аясында санитарлық жұмыстар мен абаттандыру жұмыстарын жүргізуге 407 арнайы техника сатып алу жұмыстары басталды. Аудан, қалалар мен басқармалардың іс-шара жоспары бекітіліп, әкімдердің рейтингісі жасалады.

Айта кетейік, өткен жылы 1440 сенбілік өткізіліп, бұл жұмыстарға 300 мыңнан астам адам мен 1,5 мыңнан астам техника жұмылдырылды. Нәтижесінде, 3,4 мың тонна қоқыс шығарылып, 1,1 миллион ағаш отырғызылды. Одан бөлек, 120 көппәтерлі тұрғын үйлердің келбеті ретке келтіріліп, 83 арнайы техника сатып алынды. Аудан, қала әкімдіктерінің Полиция департаментімен бірге қоғамдық орындарда тазалық пен тәртіпті қамтамасыз ету бағытында атқарған жұмыстардың нәтижесінде заң талаптарын бұзған тұлғаларға 26 702 хаттама толтырылып, жалпы көлемі 318,5 млн. теңге айыппұл салынды. Мониторинг жұмыстарының нәтижесінде 2880 қоқыс үйіндісі анықталып, қысқа мерзімде тазалау жұмыстары жүргізілді. «Ғарыш сапары» космомониторинг арқылы 367 жерде заңсыз қоқыс орындары анықталып, қоқыстан тазартылды.

Бүгінгі таңда TazaQazBot платформасына мыңға жуық өтінім түскен. Оның ішінде, 988 өтінім орындалған болса, қалғандары орындалу барысында. Жүйелі жұмыстардың нәтижесінде аталған жүйенің Түркістан облысында іс жүзінде қолданылуы республика көлемінде алғашқы орында қалыптасты.

Қадірлі Сауран ауданының тұрғындары!

Туған жердің тазалығы – әрбір азаматтың жауапкершілігі мен мәдениетінің айқын көрінісі. Табиғатты аялау, қоршаған ортаны таза ұстау – тек мемлекеттік мекемелердің ғана емес, барша халықтың ортақ міндеті. Осы орайда, “Таза Қазақстан” экологиялық акциясы аясында ауданымызда сенбіліктер ұйымдастырылып, тазалық жұмыстарын күшейтуге ерекше көңіл бөлінуде.

Сауран – біздің ортақ үйіміз!
Ауданымыздың экологиялық жағдайын жақсарту, айналамызды қоқыстан тазарту, көшелерімізді, өзен-көлдерімізді, саябақтар мен аулаларды көркейту – біздің әрқайсымыздың міндетіміз. Тазалық – тек сыртқы көрініс қана емес, ол – денсаулықтың, өмір сапасының және өркениеттіліктің кепілі. Таза ортада өсіп келе жатқан жас ұрпақтың бойында туған жерге деген құрмет қалыптасады.

Көп болып атсалысайық!
Мен барлық мемлекеттік мекемелерді, кәсіпорындар мен ұйымдарды, мектептер мен колледждерді, ауыл әкімдіктерін, жеке кәсіпкерлерді және белсенді азаматтарды осы тазалық акциясына белсене қатысуға шақырамын!

Ауданымыздың әрбір тұрғыны өз үйінің, ауласының, көшесінің тазалығына жауапкершілікпен қараса, айналамыз гүлденіп, көркейе түсетіні сөзсіз. Сенбіліктерге қатысып, өз үлесіңізді қосу арқылы сіз туған жерге деген сүйіспеншілігіңізді көрсетесіз.

Біз бірге әрекет етсек, ауданымыз бұрынғыдан да таза, көрікті әрі жайлы бола түседі! Қоршаған ортаға жанашырлық танытып, табиғатты аялауға шақырамын!

Келіңіздер, туған жеріміздің тазалығы мен көркеюіне бірге үлес қосайық!

Сауран ауданының әкімі
Мақсат Таңғатаров

Шымкент қалалық аумақтық сайлау комиссиясында алдын-ала арнайы бекітілген іс-шара жоспарына сәйкес, 6 Ақпан – Дүниежүзілік сайлау күніне орай, “Ашық есік күні” өтті.

Іс-шара барысында Шымкент қалалық аумақтық сайлау комиссиясының төрағасы Қайырбек Құнанбаев Республикасының сайлау жүйесіндегі соңғы өзгерістер мен жаңашылдықтар, азаматтардың сайлау процесіндегі құқықтары мен міндеттері, Орталық сайлау комиссиясының даму стратегиясы мен жоспарлары туралы мәліметтер берді.

Қатысушылар өздерінің сайлау процесіне қатысты: сайлаудың ашықтығы, саяси партиялар мен қоғамдық ұйымдар өкілдері ретінде байқаушылардың міндеттері, қаладағы аудан әкімдерін сайлау, жалпы сайлау жүйесі туралы заңнамасында болып жатқан өзгерістер туралы сұрақтарын қойып, толыққанды жауап алды.

Қатысушылар арнайы ұйымдастырылған шараға алғыстарын білдіріп, комиссия мүшелері мен жалпы сайлаушыларды аталған мерекемен құттықтады.

2024 жылы Түркістан облысы бойынша Сауда және тұтынушылардың Құқықтарын қорғау департаментіне жалпы саны 1 624 өтініш келіп түсті. Оның 1 495-і қаңағаттандырылса, қадғаны өзге мемлекеттік органдарға қайта жолданды. Бұл туралы брифингте Түркістан облысы бойынша Сауда және тұтынушылардың Құқықтарын қорғау департаменті басшысының міндетін атқарушы Асқар Әшімханов мәлімдеді.

«2024 жылы Түркістан облысының тұтынушыларына 107 миллион теңгеден астам қаржы қайтарылды. Мәселен, бір тұтынушы 13 миллион теңгеге сатып алынған сапасыз пәтер үшін қаржысын қайтарып алды. Ал, бір азамат 6 миллион теңге тұратын сапасыз қызмет үшін өтемақы алды. Өтініштерді талдау нәтижесінде 2024 жылы кәсіпкерлік субъектілеріне қатысты 497 әкімшілік іс-қозғалған. Түркістан облысында сауда алаңдарын, жұмыс орындарын және тауар айналымын дамытуға бағытталған мемлекеттік қолдау шаралары өз жалғасын тауып келеді. Атап айтар болсақ, 2024 жылдың 12 айында облысқа сауда саласына 101,4 миллиард теңгеден астам инвестиция тартылды» – деді спикер.

Сондай-ақ, баспасөз жиынында департамент өкілі халық көп тұтынатын азық-түлік өнімдерінің бағасының төмендегенін жеткізді. Атап айтар болсақ күнбағыс майы – 11,5 пайызға, сиыр еті – 2,6 пайызға, сүт – 2,5 пайызға, сәбіз – 10,6 пайызға, қырыққабат – 17,1 пайызға, құмшекер – 6,4 пайызға, қарақұмық – 30 пайызға, ал күріш бағасы 3,8 пайызға арзандаған.

Түркістан облысында “CONFITURE” әйелдер клубының алғашқы кездесуі өтті. Бұл – рухани байлық алаңы. Мақсаты: Өз кәсібі мен отбасының берік тұтқасы болған әйелдердің мәдени және кәсіпкерлік саласында жеткен жетістіктері мен олардың қоғамдағы алатын орнын айшықтау. Іскерлік мүмкіндерімен бөлісу. Әйелдердің қабылет-қарымын дамыту. Сонымен қатар, әйелдердің пікір алмастыратын ортақ алаңын құру. Тәжірибе алмасу. Конфитюр клубының құрамы көшбасшы, іскер, шығармашыл, идеяға толы нәзік жандылардан құралған.

Бұл өз кезегінде бірнеше арулардың ой – қабілетін арттыруға сеп болмақ. Бүгінгі басқосуға Түркістан облыстық мәслихат депутаты Қ.Жантөреева, ТОО “Барс Құрылыс” директоры М.Ислам, “Согдиана” балабақшасының құрылтайшысы Д.Хабибова, Түркістан қалалық мәслихат депутаты Ж.Турехановна, жеке кәсіпкер Ш.Османова және “Атамеке-Түркістан” МҚҰ-ның директоры С.Шорабековна қатысып, пікір талас алңында белсенділік танытып, идеяларымен бөлісті.

Басқосуда кәсіпті тұрақты дамытып, әйелдер кәсіпкерлігін өркендету, шығармашылық әлеуетін көтеріп, тұлғалық мүмкіндігін арттыру, қоғамдағы рөлін нығайту жайы сөз болды. Түрлі ойындар арқылы клуб мүшелерінің өз-өзін бағалау мүмкіндіктері байқалды. Әр кездесу еркін форматта түрлі тақырыптарда жүзеге асатын болады.

Қоғамның дамуы мен өркендеуі көбінесе жастарға байланысты. Себебі жастар – елдің тірегі, мемлекеттің белсенді бөлігі. Олар жаңа идеяларды енгізіп, өзгерістердің көшбасшылары бола алады. Сондықтан олардың ең басты міндеті — жаңа мүмкіндіктерді пайдалана отырып, тұрақты даму үшін алға жылжу.

Осы орайда, Мемлекеттік қызмет істері агенттігімемлекеттік қызметке білімді жастарды тарту үшін бірқатар шараларды қабылдауда.

Солардың бірі, Президенттің Жарлығымен айқындалған  Мемлекеттік қызметті дамытудың 2024-2029 жылдарға арналған тұжырымдамасы аясында мектеп пен жоғарғы оқу орындарын қамтитын ерте кәсіптік бағдарлау институтын көздейді.

Онда, мемлекеттік қызметке қызығушылық танытқан бітіруші сынып оқушыларын мемлекеттік қызметке дайындау жұмыстары жүргізіледі.

Бұл дегеніміз – оқушылардың мектепқабырғасында жүрген кезден-ақ олардың қарім-қабілетін, білімі мен біліктілігін дамыту, мемлекеттік қызметке қызығушылық танытқан жастарға кәсіби бағыт-бағдар бере отырып, мемлекеттік қызметтің қыр сырын түсіндіру.

Өз кезегінде, Департамент Түркістан қаласындағы білім беру ұйымдарының жоғарғы сынып оқушыларына мемлекеттік қызмет саласында өткізілетін кездесу, форум, «Ашық есік күні»
іс-шараларына қатыстырып,  бірлесе жұмыстар жүргізуде.

Бұдан басқа, Қ.А. Ясауи атындағы қазақ-түрік университетінің жоғарғы курс студенттерінен құралған Департамент жанындағы «Жас мемлекеттік қызметшілер» мектебінің тыңдаушыларына бүгінгі мемлекеттік қызметтің ерекшеліктері мен негізгі жұмыс бағыттары түсіндірілуде.

Бұл – білімді жастардың дағдыларын дамыта отырып, оларды мемлекеттік қызметке тартудың бірден бір тәсілі.

Қазіргі уақытта, осы мектептің 10 тыңдаушысыорталық, облыстық және қалалық, аудандықдеңгейдегі мемлекеттік органдарда қызмет атқаруда.Яғни, кешегі студенттер бүгінгі мемлекеттік қызметтегі әріптесімізге айналып отыр.

Жалпы, білімге құштарлық әрқашан біздің халқымызға тән қасиет. Бүгінгі білімді жас – ертеңгі кәсіби білікті маман. Сондықтан, мемлекет білімді,  талапты жастарға  үлкен үміт артатыны анық.

Осы тұста, «Қазақстан Республикасының мемлекеттік қызметі туралы» Заңына бірқатар өзгерістер енгізіліп, жастардың мемлекеттік қызметке орналасу тәртібі жеңілдеді.

Соның бірі, мемлекеттік грантпен жоғарғы оқу орнын жақсы бағамен аяқтаған түлектер (GPA 3.33-тен жоғары) бір жыл ішінде аудан, ауылдардағы төменгі лауазымдарға конкурссыз орналасуы.

Осы мүмкіндікті пайдаланып республикада – 442,облыста – 35 түлек мемлекеттік қызметке конкурстық іріктеусіз қабылданды.

Бұл өз кезегінде білікті жастарды мемлекеттік қызметке ынталандыруға, жас мамандардың аудан,ауылдарға  оралуына, сонымен қатар өңірлердегі кадр тапшылығын азайтуға септігін тигізіп отыр.

Мемлекет басшысы Қасым-Жомарт Кемелұлы Тоқаев өңірге келген іссапарында «Жастарға жаңа мүмкіндіктер беруіміз керек. Ол үшін жастарды олардың өмірін жақсартуға, мансабы бойынша жоғарылауға арналған әлеуметтік лифттер іс жүзінде жұмыс істеуі керек» – деп айтқан болатын.

Осы орайда, дарынды жастарды мемлекеттік басқару ісіне араластыру мақсатында, Агенттік 2019, 2021, 2023 жылдары Президенттік жастар кадр резервін қалыптастыру жұмыстарын жүргізді.

Нәтижесінде, 400 адам резервке алынып, бүгінде оның
300-ден астамы мемлекеттік органдарда және квазимемлекеттік секторларда басшылықлауазымдарда қызмет етуде.

Сол сияқты, білімді жастардың пулын қалыптастыру бойынша 2024 жылы алғаш рет Өңірлік кадр резервіне іріктеу жүргізілді. Оған облысымызда ниет білдірген 600-ден астам адамдардың арасынан 30 адам резервшілер тізіміне ілікті.

Айта кету қажет, түрлі салаларда еңбек еткенрезервшілерге мемлекеттік қызметке конкурссыз орналасу немесе мемлекеттік қызметте одан әрі ілгерілеу бойынша заңнамаларда ерекшемүмкіндіктер берілген.

Осы мүмкіндікті пайдаланған 9 резервші облыстық, аудандық деңгейдегі мемлекеттік әкімшілік лауазымдарда еңбек етуде.

Жалпы, кадр резервіне іріктеудің мақсаты – талантты жастар арасынан жаңашыл ойлайтын көшбасшылар мен жас басқарушылардың тобын қалыптастыру.

Қорыта келе, жастар қоғамның негізгі қозғаушы күштерінің бірі болып табылатындықтан, олар жаңа идеялармен, белсенділікпен ерекшеленеді және өздерінің күш-жігерін қоғамның дамуына арнауы тиіс. Сондықтан, жастардың әлеуетін дұрыс пайдалану арқылы қоғамды жақсартуға, болашаққа деген сенімді арттыруға болады.

Осы орайда, елдің дамуына әрбір жастың өзүлесін қосуы үшін,
жастарды мемлекеттік қызметтегі мүмкіндіктерді тиімді пайдалануға шақырамын.

ҚР Мемлекеттік қызмет істері агенттігінің

Түркістан облысы бойынша департаментінің басшысы,   Әдеп жөніндегі кеңес төрағасы

Абылайхан Дағыстанұлы Наурызбаев

Қазақстан Республикасының Мемлекеттік қызмет істері агенттігінің Түркістан облысы бойынша департаменті облыс көлемінде мемлекеттік қызметтер көрсету сапасын бағалау және бақылау, халыққа сапалы қызмет көрсету, оған қолайлы жағдайлар жасау және қызмет көрсету рәсімдерін жетілдіру және қызмет алушылардың бұзылған құқықтарын қалпына келтіру бағыттарында жүйелі жұмыстарды атқаруда.

Осы орайда, Қазығұрт ауданының тұрғындарының арызы негізінде, аталған шағымдарды жан-жақты, объективті және толық қарау мақсатында тиісті мемлекеттік органға жоспардан тыс тексеру жүргізілді.

Анықталғандай, қызмет алушылармен трактор жүргізу құқығына куәлік және тракторға арналған мемлекеттік нөмірлік белгі алу туралы өтінішьер жолданып, тиесілі бөліммен «Құжаттар толық емес»деген негізбен қызмет көрсетуден бас тартылған.

Аталған мемлекеттік көрсетілетін қызмет «Тракторларды және олардың базасында жасалған өздігінен жүретін шассилер мен механизмдерді, өздігінен жүретін ауыл шаруашылығы, мелиоративтік және жол-құрылыс машиналары мен механизмдерін, сондай-ақ жүріп өту мүмкіндігі жоғары арнайы машиналарды жүргізу құқығына куәліктер беру» қағидасымен реттеледі
(ҚР АШМ 30.03.2015ж. № 4-3/270 бұйрық).

Бұл ретте, Қағиданың 1-қосымшасының 9-тармағында бас тартудың негіздері нақты көрсетілген.

Дегенмен, қызмет алушыларға мемлекеттік қызмет көрсетуден бас тарту кезінде қолданыстағы заңнама талаптарына сәйкес емес негізсіз бас тартылған.

Өз кезегінде, тексеру барысында Департаменттің ықпалымен
бөлім тарапынан қызмет алушыларға трактор жүргізу құқығына куәлік және тракторға арналған мемлекеттік нөмірлік белгі ұсынылды.

Жүргізілген тексеру нәтижесінің қорытындысы бойынша Департамент тарапынан тиісті түсіндірме жұмыстары жүргізіліп, бұзушылықтарды жою және алдағы уақытта болдырмау туралы ұсыныс енгізілді.

Айта кету қажет, мемлекеттік қызмет көрсету кезінде құқықтарыңыз бұзылған жағдайда Мемлекеттік қызмет істері агенттігінің Түркістан облысы бойынша департаментіне Жаңа қала ықшам ауданы 32 көше, 16 ғимарат мекен-жайы бойынша жазбаша түрде, не электрондық түрде «электрондық үкімет» порталы немесе «Е-Otinish» азаматтардың барлық өтініштерін қабылдау мен өңдеудің бірыңғай платформасы және «Kenes 1414 officiall» тelegram-бот арқылы жүгіне аласыздар.

Мемлекеттік қызмет істері агенттігінің Түркістан облысы бойынша департаменті басшысының орынбасары, Әдеп жөніндегі кеңес хатшылығының меңгерушісі

Дархан Аширханұлы СУРТЕКОВ

2024 жылы Түркістан облысының сауда және тұтынушылардың құқықтарын қорғау департаменті тұтынушылардың құқықтарын қорғау бағытында маңызды жұмыстар атқарып, өз қызметінде айтарлықтай жетістіктерге қол жеткізді. Департаменттің 2024 жылғы жұмысы облыс тұрғындары үшін елеулі нәтижелерге алып келді. Бұл жылы тұтынушыларға 107 миллион теңгеден астам қаржы қайтарылып, сапасыз қызмет пен тауарлар үшін өтемақы төлеу мәселелері шешілді. Мұның бәрі — тұтынушылардың құқықтарын қорғауға бағытталған нақты және тиімді әрекеттердің нәтижесі.

Тұтынушыларға қайтарылған қаражат және атқарылған жұмыстар

2024 жылдың ішінде Түркістан облысының тұтынушыларына 107 миллион теңгеден астам қаржы қайтарылды. Бұл — қарапайым ғана қаржылық көмек емес, көптеген тұрғындардың құқығы мен әділеттілікті іздеуге деген ұмтылысы. Мәселен, бір тұтынушы 13 миллион теңгеге сатып алынған сапасыз пәтер үшін қаржысын қайтарып алды. Ал басқа бір азамат 6 миллион теңге тұратын сапасыз қызмет үшін өтемақы алды. Департамент сонымен қатар көптеген шағымдар мен өтініштерді қарап, әрбір тұтынушының мүддесін қорғау жолында нақты шаралар қабылдады.
2024 жылы департаментке жалпы 1624 өтініш келіп түсті. Оның 447-і жазбаша түрде, 570 өтініш жедел желі арқылы, ал 567 өтініш жеке қабылдауларда түскен. Бұл көрсеткіш департаменттің жұмысына тұрғындардың үлкен қызығушылық танытқанын және тұтынушылардың құқықтарының бұзылуына қарсы әрекет ету қажеттілігін айғақтайды.

Тұтынушылардың құқықтарын қорғау бойынша шаралар

Департамент тұтынушылардың құқықтарын қорғау аясында кәсіпкерлерге қатысты бірқатар шаралар қабылдады. Бұл шаралар тек заңбұзушылықтармен күресуді ғана емес, сонымен қатар тұтынушылардың құқығын қорғаудың тиімді жүйесін қалыптастыруды мақсат етті. Мысалы, «Сауда қызметін реттеу» туралы заңнаманы бұзған кәсіпкерлерге 1 164 736 теңге айыппұл салынды. Бұл құқықбұзушылықтар кәсіпкерлердің өз қызметтерін сапалы көрсетуіне әсер етті және нарықта әділ бәсекелестікті орнатуға ықпал етті.
Нәтижесінде, департаментке келіп түскен өтініштердің 92%-ы қанағаттандырылды. Бұл департаменттің жұмысының тиімділігін және тұтынушылардың құқықтарын қорғау мәселесінде үлкен жетістіктерге қол жеткізгенін көрсетеді.

Өтініштер мен шағымдар бойынша бағыттар

2024 жылы департаментке түскен өтініштердің негізгі бөлігін бөлшек сауда саласындағы мәселелер құрады. Түркістан облысының тұрғындарын сапасыз тауарлар мен қызметтер, сондай-ақ тауарды айырбастау немесе қайтару мәселелері алаңдатты. Тұтынушылар көбіне сапасыз жиһаз, тұрмыстық қызметтер мен пәтерлердің сапасына қатысты шағымдар білдірді.
Мысалы, бір тұтынушы 13 миллион теңгеге сатып алған сапасыз пәтердің ақшасын қайтаруды талап етсе, басқа тұтынушы 6 миллион теңге тұратын сапасыз қызмет үшін өтемақы сұрады. Мұндай жағдайлар халықтың құқықтарын қорғау қажеттілігін одан сайын күшейтті, және департамент өз міндетін абыроймен атқарды.

Әкімшілік іс-шаралар мен құқықбұзушылықтар

Өтініштер мен шағымдар негізінде 497 әкімшілік іс қозғалып, кәсіпкерлерге қатысты Әкімшілік құқық бұзушылық туралы хаттамалар жасалды. Бұл іс-шаралар арқылы кәсіпкерлерге айыппұлдар салынған және ескертулер берілген. Әкімшілік құқық бұзушылықтар нарықтағы заңбұзушылықтарды азайтуға ықпал етіп, тұтынушылардың құқықтарының қорғалуына оң әсерін тигізді.

Құқықтық сауаттылықты арттыру

Департамент халықтың құқықтық сауаттылығын арттыру бағытында да көптеген іс-шаралар өткізді. 2024 жылы 200-ден астам ақпараттық-түсіндіру іс-шаралары ұйымдастырылды, оның ішінде тікелей эфирлер, теледидардағы сөз сөйлеулер, дөңгелек үстелдер мен басқа да шаралар болды. Түркістан облысының тұрғындарына құқықтық көмек көрсету мақсатында әлеуметтік желілерде белсенділік артты. Instagram және Facebook парақшаларында 1600-ден астам ақпараттық және түсіндіру материалдары жарияланды, бұл халықтың құқықтық сауаттылығын арттыруға елеулі ықпал етті.

Департамент басшысының пікірі

“2024 жыл біздің департамент үшін өте маңызды кезең болды. Тұтынушылардың құқықтарын қорғау жұмысы — бұл тек заңдық жауапкершілікті қана емес, қоғамның әлеуметтік әділеттілігін қамтамасыз етуге бағытталған үлкен міндет. Біз әрбір тұтынушының құқығын қорғауға тырыстық және олардың мәселелерін шешуге аянбай еңбек еттік. Бұл жұмыстың нәтижесінде 107 миллион теңге қайтарылды, және біз бұл көрсеткішті одан әрі арттыруға ниеттіміз. Тұтынушылардың құқықтарын қорғау біз үшін тек кәсіби міндет емес, әрбір адамға әділеттілік пен қолдау көрсету жолындағы қасиетті миссия болып табылады. Алдағы уақытта да бұл бағыттағы жұмыстарымызды жалғастырып, тұтынушыларымыздың құқықтарын қорғау мен олардың құқықтық сауаттылығын арттыру мақсатында тиімді шаралар қабылдайтын боламыз”, — деді Кистауов Болатбек департамент басшысы.

Тұтынушыларға кеңестер мен ұсыныстар

Тұтынушылардың құқығын бұзудың алдын алу мақсатында департамент бірнеше маңызды кеңестер ұсынады:
• Тауар туралы ақпаратты мұқият зерделеу: оның кепілдік мерзімі мен жарамдылық мерзімін тексеру.
• Күмәнді интернет-ресурстардан тауар сатып алмау және сатушының байланыс деректерін тексеру.
• Өз құқықтарыңыздың бұзылғанын анықтаған жағдайда, фотосурет немесе бейнемазмұн арқылы дәлелдер жинақтау.

Бұл кеңестер тұтынушылардың өз құқықтарын қорғау үшін маңызды қадам болып табылады.

2024 жылы Түркістан облысы бойынша сауда және тұтынушылардың құқықтарын қорғау департаменті өз жұмысын жоғары деңгейде атқарып, облыс тұрғындарының құқықтарын қорғау мен олардың мәселелерін шешу бойынша айтарлықтай нәтижелерге қол жеткізді. Қазіргі уақытта тұтынушыларға құқықтық көмек көрсету жүйесі күннен-күнге жетіліп, азаматтардың құқықтарын қорғауда тиімді шаралар қабылдануда. Бұл жұмыстар алдағы уақытта да жалғасын тауып, тұрғындардың құқықтық сауаттылығын арттырып, әділеттілікті қамтамасыз етуде маңызды рөл атқарады.
Департаменттің ұстанған принциптері мен әдістері тұтынушылардың құқықтарын қорғау саласындағы ең тиімді тәжірибелердің бірі ретінде танылды және алдағы жылдары да бұл бағытта нәтижелі жұмыстар жүргізіледі.

Егер өз құқығыңыз бұзылса, дүкен сөрелерінде тауар бағалары көрсетілмегенін байқасаңыз, әлеуметтік маңызы бар азық-түлік тауарларының бағасы өскенін байқасаңыз немесе сапасыз қызмет алған жағдайда Сауда және тұтынушылардың құқықтарын қорғау департаментіне шағымдана аласыз. Бұл үшін келесі тәсілдермен арыз-шағым жіберуге болады:

1. «Жедел желі» нөмірлеріне хабарласу:
– +7771 322 8282
– +7700 606 0071
– +7775 224 5616
– +7707 347 3876
2. Электронды немесе жазбаша өтініштерді департаменттің мекенжайына жіберу:
Түркістан қаласы, Жаңа қала мөлтек ауданы, 32 көше, 16 ғимарат, А корпусы, 427 кабинет.
3. «Е-otinish» ақпараттық жүйесі арқылы өтініш қалдыру.

Бәріміз де түрлі тауарлар мен қызметтерді тұтынып жатамыз. Біз – сатып алушымыз, емделушіміз, жолаушымыз, оқырманбыз, демек тұтынушымыз. Әрбір адам сауатты, өркениетті тұтынушы болу, сондай-ақ тұтынушылық құқығы мен мүддесін қорғай алу үшін қажетті білімге ие болуы керек. Өкінішке қарай, тауарларды сатып алу мен қызметтерді пайдалану барысында сапасыз тауарларға немесе сатушы мен қызмет көрсетуші тарапынан болатын жауапсыздыққа ұрынып жататын кезіміз бар. Демек, бұл тұтынушы құқығы жиі бұзылады деген сөз. Ал бізде тұтынушы құқығы қалай қорғалып жүр? Өз құқығымызды білеміз бе?

Түркістан облысы бойынша сауда және тұтынушылардың құқықтарын қорғау департаменті тұрғындарға дер кезінде ақпарат беріп, оларды қаржылық сауаттандыра отырып, өз құқықтарын сақтауды үйретеді. Бұл бағытта департамент мамандары түрлі шаралар ұйымдастырып отырады. Жалпы халықтың тұтынушы ретінде өз құқықтарын білгені олардың өмір сүру салтына тікелей әсер етеді. Қазіргі кезде дүние жүзі мемлекеттерінің заңдары БҰҰ Бас Ассамблеясының Тұтынушылар құқығын қорғаудағы негізгі қағидаларын басшылыққа ала отырып, құқықтық сауаттылыққа шақырады. Мәселен, тауардың қауіпсіздігі, ақпарат құқығы, тауарды таңдау, өз мүддеңді жеткізе алу, негізгі қажеттілігіңді қанағаттандыра алу, шығынның орнын жабу сынды қағидаларды сақтау маңызды.

Ал біздің елімізде тұтынушылардың заң бойынша тауарларды иеленуге, яғни еркін шарт жасасуға, тұтынушылардың құқықтарын қорғау саласындағы ағарту және тұтынушының өз құқықтары мен заңды мүдделерін қорғау мәселелері жиі айтылады. Кез келген тұрғын құқықтық сауаттылығын арттыруға, тауар туралы және сатушы жайлы ақпарат алуға құқылы. Сондай-ақ тұрғындардың қауіпсіз тауарды сатып алуы және оның тиісті сапасына қарауы маңызды. Бүгінде тұтынушы тиісті де, тиісті емес сападағы тауарды айырбастап алу немесе қайтарып беру, тұтынушылардың көрсетілген қызметінің кемшіліктері салдарынан өздерінің өміріне, денсаулығына және мүлкіне келтірілген залалды толық көлемде өтеп ала алады. Сондай-ақ, сатушыдан тауарды сатып алу фактісін растайтын құжатты немесе тауарды сату кезінде жасалған шартты алу құқығы қарастырылған. Бұдан бөлек ұтыс түрінде берілген тауардың сапасы бойынша ойындардың ұйымдастырушысына кінә қоюға, тұтынушылардың қоғамдық бірлестіктерін құруға, моральдық зиянды өтеуде заң тұрғысынан қорғалған. Қазақстанда тұратын азамат Қазақстан Республикасының заңдарымен қорғалған және өз құқығын дәлелдей алады.

Егер тұтынушы ретінде құқығыңыз бұзылған жағдайда Түркістан қаласы, Жаңа қала шағынауданы, 32-көше, 16-ғимарат, А-блок, 4-қабат, 427-бөлме, Түркістан облысы бойынша сауда және тұтынушылардың құқықтарын қорғау департаментіне жүгіне аласыз.