Түркістан облысында 2025–2026 жылдары толық циклді мақта-тоқыма кластері құрылады. Қазақстанда теңдесі жоқ инвестициялық жоба аясында 4 мақта өңдеу зауыты мен толыққанды тоқыма кешені іске қосылады. Атап айтқанда, егіс алқабынан бастап иіру өндірісі, мата шығару мен бояу, өңдеу және дайын өнімге дейінгі барлық кезеңді қамтиды.

30 000 гектардан астам алқапта заманауи су үнемдеу технологиялары енгізіліп, мақта өсіріледі. Бұл ірі жоба – тоқыма саласындағы тәуелсіздікке, экономикалық тұрақтылық пен технологияда көшбасшылыққа жетелейтін маңызды стратегиялық қадам. Табиғи ресурстарды ұтымды пайдаланумен қатар,ауыл шаруашылығының тұрақты дамуына мол үлес қосады. Экологиялық бағытта да тиімді тәсіл саналады.

«Түркістан әлеуметтік-кәсіпкерлік корпорациясы» АҚ (SPK Turkistan) және «Алтын дала мақта» ЖШС 2024 жылы Отырар ауданында толыққанды тоқыма кешенін салуды қолға алды. Қазіргі таңда жеке шикізат базасын, ұлттық тоқыма өнеркәсібінқалыптастыруда. Жобаның артықшылығы – шитті мақтаны сатудан бөлек, мақта талшығын терең қайта өңдеуге басымдық берілуінде.Салаға қажет технологиялар, оның ішінде тамшылатып суару жүйелері импортқа тәуелді болмай аталған кешенде өндіріледі.

Жобаның жалпы инвестиция көлемі — 140 миллиард теңгеден асады. 4 000-нан астам жаңа жұмыс орны ашылады.

Жобаның өндірістік қуаттылығы:
Мақта өңдеу – жылына 180 000 тонна;
Мата – 45 миллион погон метр;
Үйге арналған тоқыма бұйымдары – 7 миллион дана.

Бастамаға кеңесші ретінде қытайлық «Lihua Spinning Technology Co., Ltd» ЖШС тартылған.Компания тоқыма және тігін өнеркәсібі секторы бойынша нарықта 20 жылдық тәжірибесі бар Қытайдағы ірі кәсіпорын. Әлемге танымал брендтермен тікелей жұмыс істейді. Бүгіндеөндіріс орнының құрылысы қарқынды жүргізілуде. Сонымен қатар тамшылатып суару жүйелері орнатылып, біршама аумаққа мақтаның элиталық сорттарының тұқымы себілді.

Кластерлік тәсіл – барлық өндірістік тізбекті бір алаңда біріктіретін тиімді модель.Ауыл шаруашылығы, өнеркәсіп және технологияның бірлігінен туындайтын синергия. Шығындарды азайту, сапаны жақсарту мен жаһандық нарықтағы бәсекеге қабілеттілікті арттыру мақсатында екі зауыт салынады.

Түркістан облысы – елімізде мақта өсіретін жалғыз өңір. Аграрлық әлеуетті ілгерілетуге бағытталған мұндай баламасы жоқ жобалар тұтас ел экономикасына әсер етіп, жаңа даму нүктесіне айналдырады.

Түркістан облысы, Сайрам ауданы, Қарасу ауылында жаңа шағынауданның капсуласын салу рәсімі өтті. Жалпы аумағы 60 гектарға жететін жаңа қалашықта жалпы 2300-ге жуық пәтерлі 47 көпқабатты тұрғын үй салынып, 12 мыңдай ауыл халқы қоныстанады. Құрылыс жоспарымен танысқан Түркістан облысының әкімі Нұралхан Көшеров тарихи сәттің куәгері болған жергілікті тұрғындармен кездесті.

– Бүгін біз Сайрам ауданының дамуы жолындағы аса маңызды бастаманың куәсі болып отырмыз. Мемлекет басшысы өзінің халыққа Жолдауында баспанамен қамту мәселесіне тоқталып өткен болатын. Осы тапсырма аясында облысымызда халықты баспанамен қамтамасыз етуге бағытталған нақты жобалар жүзеге асырылуда. Сайрам ауданында 63 мыңнан астам азамат жер телімі, ал 4 мыңнан аса адам баспана кезегінде тұр. Бүгін Қарасу ауылында 57 гектар жерге жаңа тұрғын ауданның құрылысы басталуда. Бұл – тұрғын үй тапшылығын шешуге, халықтың әлеуметтік жағдайын жақсартуға бағытталған жоба. Ауыл тұрғындарының үйлі болуына, аймақтың дамуына мүмкіндік беретін жаңа шағынауданда көптеген әлеуметтік нысандар бой көтереді. Халықтың тұрмыс сапасын танытатын маңызды көрсеткіш – баспана. Мұқтаж жандарды баспанамен қамту, олардың тұрмысын түзету, әлеуметтің әлеуетін арттыруға мұрындық болу – әр әкімнің міндеті. Сондықтан осы жұмыстарға бар күшімізді салуымыз керек, – деді Нұралхан Көшеров.

Жаңа шағынауданда әкімшілік ғимараты, 600 орындық заманауи жаңа мектеп, 280 орындық балабақша, тәулігіне 250 адам қабылдайтын жаңа емхана және Мәдениет үйі мен жастар сарайы бой көтереді. Сайрам аудандағы мемлекеттік тұрғын үй қорынан тұрғын үйге мұқтаж ретінде 4 206 азамат тіркелген.
Қазақтың құтты мекені саналатын ауылға жасалатын жағдайға қуанған тұрғындар өңір басшылығына алғыс айтты. Облыс әкімі өңірдің дамуына күш салынатынын жеткізіп, азаматтарды тазалықты сақтауға және көгалдандыруға үлес қосуға шақырды. Тазалықты сақтау мекемесінің қызметкерлеріне алғыс білдірді.

Айта кетейік, Сайрам ауданында жергілікті бюджет есебінен 455 млн теңге қаржы бөлініп, 20-дан астам арнайы техника сатып алынған. Бұл бағыттағы жұмыстар жалғасады. Облыстық бюджеттен техника жаңартуға 175 млн теңге қаралған. «Таза Қазақстан» бағдарламасы бойынша жүйелі жұмыс жалғасады.

Президенттің «Халық үніне құлақ асатын мемлекет» қағидасын жүзеге асыру мақсатында Түркістан облысының «Цифрлық даму орталығы» КММ-де 109 бірыңғай байланыс бөлімі тәулік бойы тұрғындардың арыз-шағымдарын қабылдайды.

Call-орталықтың жұмысын жандандыру мақсатында мекеме басшысы Арман Асхатұлы Астана қаласына арнайы іссапармен барып, iKomek109-дың жұмысымен танысты. Ондағы мамандармен тәжірибе алмасып алдағы жоспарларды талқылады.

– 2025 жылдың басынан бері 40 874 өтінім түсіп, 40 583-і дер кезінде жабылды. Ал 391-і орындалу барысында тұр. Облыс әкімінің хаттамасы негізінде «109 мониторинг» тобы өтініштердің сапалы орындалуын қадағалау үшін шалғай елді мекендерге барып, тұрғындармен кездесу өткізуде. Сондай-ақ насихаттау жұмыстары жүргізіліп жатыр. Алдағы уақытта iKOMEK орталығымен бірлесе атқаратын жұмыстар ауқымды болмақ, – деді мекеме басшысы.

Өтініштер 109 номерінен бөлек, Байланыс орталық turkistan_oblysy.109 инстаграм желісі, +7 701 13 13 109 whatsapp номері және «aikey-109» мобильді қосымшасы арқылы қабылданады.

Бүгін Астана қаласында Мемлекет басшысы Қасым-Жомарт Тоқаевтың қатысуымен Қазақстан халқы Ассамблеясының ХХХІV сессиясы өтті.
Президент сессия жиынында өзекті мәселелерді айтты. Сонымен қатар, бірлік пен ынтымақ басты құндылығымыз әрі мемлекеттік саясаттың бұлжымас бағдары болып қала беретінін тілге тиек етті.
— Бүгінгі басқосудың тарихи мән-маңызы айрықша. Биыл Қазақстан халқы Ассамблеясының құрылғанына 30 жыл толып отыр. Баршаңызға құтты болсын! Бұл — бүкіл Қазақстан үшін айтулы оқиға. Осы уақыт ішінде Ассамблея қоғамдағы тұрақтылық пен келісімді нығайтуға өлшеусіз үлес қосты. Еліміздегі бірлік пен теңдіктің, тұрақтылық пен тыныштықтың символына айналды. Этносаралық қатынас саласындағы теңдессіз қоғамдық институт ретінде танылды. Соның арқасында Қазақстанда бейбітшілік пен келісімнің қайталанбас үлгісі қалыптасты. Ассамблея тарихы еліміздің егемендік жылнамасымен тығыз астасып жатыр. Ұйым 1995 жылы Қазақстанның тұңғыш Президенті Нұрсұлтан Назарбаевтың бастамасымен құрылғанын білесіздер. Бұл бастама қазақ мемлекеттілігі қалыптасып жатқан қиын кезеңде терең саяси мәнге ие болды, — деді Мемлекет басшысы.
Президент консультативтік-кеңестік орган ретінде жасақталған Ассамблеяға 2007 жылы конституциялық мәртебе беріліп, ұйым жалпыұлттық бірліктің негізгі моделіне айналғанын айтты.
— Елімізде соңғы жылдары атқарылған ауқымды өзгерістердің арқасында Ассамблея қызметі жасампаздықтың жаңа сипатына көтерілді. Сенаттың бес депутатын Ассамблея кеңесінің ұсынысымен Президент тағайындайды. Бұл қадам заңнамалық деңгейде барлық этностың мүддесін қорғау мүмкіндігін едәуір арттырды. Оған қоса, Қазақстан парламентаризмі тарихында алғаш рет «Бір ел — бір мүдде» атты палатааралық депутаттар тобы құрылды. Бұл топ қоғамдық келісімді нығайту мәселелерімен айналысады. Қазір мемлекеттік органдар түгел Ассамблея жұмысына атсалысады. Министрліктерден, облыс әкімдіктері мен барлық деңгейдегі мәслихаттардан бастап ауыл әкімдіктеріне дейін одан шет қалмайды, — деді Қасым-Жомарт Тоқаев.

Бегзат ХАБИБОВ,
Кентау қаласы, Қарнақ ауылының өзбек этномәдени бірлестігінің төрағасы

Астанада Президент Қасым-Жомарт Тоқаевтың қатысуымен Қазақстан халқы Ассамблеясының ХХХІV сессиясы өтті.
Аталған сессияға Түркістан облысынан бір топ «Ассамблея жастары» қатыстық. “Ассамблея жастары” РҚБ-нің Түркістан облыстық өкілдігінің төрағасы ретінде өзіммен бірге белсенді әріптестерім Түркістан облыстық ҚХА төрағасының орынбасары, «Жастар рухы» қоғамдық бірлестігі облыстық филиалының төрағасы Жансерік Жұман және ұйымның белсенді мүшелері Фаез Файзидинов, Интизора Насратуллаева қатысты.
Президент Қасым-Жомарт Тоқаев сессияда алмағайып заманда стратегиялық бағдарға сай әрекет ету — Қазақстан халқының алдында тұрған аса маңызды міндет екенін айтты.
— Кейбір мемлекет үшін этникалық әралуандылық сын-қатердің, сенімсіздік пен төзбеушіліктің белгісі болуы мүмкін. Бірақ бұл біздің жалпыұлттық қазынамыз әрі стратегиялық артықшылығымыз. Ынтымақ-бірлік, диалог, өзара сенім мен құрмет, азаматтық жауапкершілік — мұның бәрі елімізді қарқынды дамытудың мызғымас қағидаттары. Осы құндылықтарға арқа сүйей отырып, біз Тәуелсіздіктің зор жетістіктерін сақтап, еселеп, келер ұрпаққа аманаттай аламыз. Сонда ғана Әділетті Қазақстанды құрамыз, — деді Қасым-Жомарт Тоқаев.
Мемлекет басшысы Қазақстан халқы өз жерінде тыныштық пен келісімде өмір сүруге болатынын дәлелдеген біртұтас ұлт екенін атап өтті.
— Осынау тар жол, тайғақ кешуде еліміздің тәуелсіздігі мен дербестігін нығайтып, барлық қиындықты еңсеріп, мақсатымыздан айнымаймыз, — деді Президент.
Сондай-ақ Президент барлық этномәдени бірлестікті «Таза Қазақстан» акциясына белсене қатысуға шақырды.
— Менің бастамаммен былтырдан бері «Таза Қазақстан» акциясы жүзеге асырылып жатыр. Жалпыұлттық жобаға 6 миллионнан астам адам қатысты. 1,6 миллион тоннадан аса қоқыс жиналды. 3,3 миллион көшет отырғызылды. «Таза Қазақстан», бұл — біздің бүгінгі және ертеңгі күніміздің кепілі. Сондықтан жұмыс үздіксіз жалғаса береді. Біз әр азаматтың, әсіресе, жастардың бойына тазалық, ұқыптылық, жауаптылық сияқты қасиеттерді сіңіруіміз керек. Таза я тазалық, бұл — киелі сөздер. Ары таза адам ешқашан елін сатпайды. Біз «Қазақстан — ортақ үйіміз» деп үнемі айтамыз. Сондықтан еліміз таза, тартымды, мәдениетті болуы керек. Ассамблея бұл идеяны жан-жақты дәріптеп келеді. Бұл — өте тиімді әрі пайдалы жұмыс. Тазалық әр үйден басталуы керек. Сонда ғана «Таза Қазақстан» боламыз, — деді Мемлекет басшысы.
Президент өз сөзінде кішкентай кезінен тазалыққа үйренген бала кейін жауапкершілігі жоғары, саналы азамат болып өсетінін еске салды.
— Сондықтан бүгін мен Қазақстан халқы Ассамблеясының мүшелерін, барлық этномәдени бірлестікті «Таза Қазақстан» жалпыұлттық акциясына белсене қатысуға шақырамын. Бұл — жай науқан емес, бұл — өскелең ұрпаққа озық білім мен тәлім-тәрбие беру деген сөз. Баршамызға қатысы бар идеологиялық маңызды іске әр қаланың, ауылдың, көшенің және ауланың тұрғындарын жұмылдыру керек. «Таза Қазақстан», бұл — шынайы отаншылдықтың көрінісі. Бәріміз Әділетті, Қауіпсіз және Таза Қазақстанда өмір сүргіміз келеді, — деді Президент.
Осы орайда, біз, «Ассамблея жастары» РҚБ-нің Түркістан облыстық өкілдігінің мүшелері Президент ұсынған бастамаларды толық қолдаймыз және оны нәтижелі орындауға күш саламыз.

Нодиржон Хасантаев,
“Ассамблея жастары” РҚБ-нің Түркістан облыстық өкілдігінің төрағасы

Бүгін Астанада Қазақстан халқы Ассамблеясының ХХХІV сессиясы өтті. Сессия аясында қатысушылар ел бірлігін нығайту, этносаралық келісімді сақтау және Ассамблеяның қоғамдық келісім мен жалпыұлттық бірлікті қамтамасыз етудегі маңызын талқылады.

Президент Қасым-Жомарт Тоқаев сессияда ҚХА бүгінде қоғамдық келісімнің бірегей инфрақұрылымын қалыптастырған қуатты тармақтары бар институтқа айналғанын атап өтті.

— Ассамблея қоғамда кәсібилік және еңбекқорлық құндылықтарын дәріптеуге белсене атсалысып келеді. Александр Папп Ассамблеяның Жұмысшы мамандықтары жылын өткізуге белсене кіріскенін атап өтті. Өткен жылы Еңбек күнінде Сенат пен Мәслихат депутаттары Ассамблея мүшелерімен бірге еліміздің ірі кәсіпорындарына барып, өндіріс ардагерлеріне құрмет көрсетті. Бұл бастаманы Еңбек күнін атап өтудің жаңа дәстүрі ретінде биыл да жалғастыруға болады. Осылайша, ҚХА бүгінде қоғамдық келісімнің бірегей инфрақұрылымын қалыптастырған қуатты тармақтары бар институтқа айналды. Жер жүзінде мұндай бірегей ұйым құра білген мемлекет кемде-кем. Ассамблеяның арқасында еліміздегі барлық этностар Қазақстандағы оң өзгерістердің бел ортасында жүр, — деді Мемлекет басшысы.

Сондай-ақ Президент жалпыұлттық бірлік пен татулықты нығайту жолында адал қызмет етіп жүрген Ассамблеяның барлық белсенді азаматтарына алғыс айтты.

— Мен жалпыұлттық бірлік пен татулықты нығайту жолында адал қызмет етіп жүрген Ассамблеяның барлық белсенді азаматтарына шынайы алғысымды айтамын. Туған жерге пайдамды тигізсем деген алғаусыз ниетті өмірінің мәніне айналдырған олар нағыз отаншылдық пен адал азаматтың үлгісін көрсетті. Ассамблея Төрағасының қоғамдық орынбасарлары ретінде жыл бойы лайықты еңбек еткен Лугмар Харкиевич Буларов пен Юрий Германович Шинге ризашылығымды білдіремін. Ассамблея Төрағасының орынбасарлары болып жаңадан тағайындалған Дмитрий Валерьевич Останькович пен Расул Сурмалиевич Ахметов — қоғам құрметтейтін абыройлы азаматтар. Олардың білімі мен білігі Ассамблеяға үлкен пайдасын тигізеді деп сенемін, — деді Қасым-Жомарт Тоқаев.

Сессияда Президент атап өткендей, өткен жылы Ассамблея барлық өңірде 15 мыңнан астам іс-шара ұйымдастырды. Оған 1 миллионға жуық адам қатысты. Былтыр көктемгі су тасқыны кезінде азаматтарымыз зардап шеккен жандарға көмек қолын созып, ырысты ынтымақ пен бірліктің тамаша үлгісін көрсетті. Ассамблеяның «Жүректен жүрекке» жобасы аясында 12 мыңнан астам ерікті ортақ іске жұмыла кірісті. Олар гуманитарлық көмек пен жылу жинады. Қираған үйлерді қалпына келтіруге атсалысты.

Жалпы, ел бірлігін нығайту ісінің стратегиялық маңызы ерекше. «Соның айқын дәлелі ретінде Ассамблеяның «Ел бірлігі» ордені атты жаңа мемлекеттік награда тағайындалды. «Бірлік» ұғымы қазіргі дүние жүзіндегі тұрақсыз жағдайда аса маңызды. Әлемде, әсіресе, біздің айналамыздағы кейбір елдерде не болып жатқанына бәріміз куә болып отырмыз. Сондықтан шын мәнінде, «Бірлік бар жерде ғана тірлік бар». Бұл – ақиқат», – деді Президент.

Рамилия Мустафаева,
Түркістан облыстық әзірбайжан этномәдени бірлестігінің төрайымы

Түркістан облысы санитариялық-эпидемиологиялық бақылау департаментінің әдеп жөніндегі уәкілі Закрдин Алимкулов, Сауран аудандық санитариялық-эпидемиологиялық бақылау басқармасымен, Түркістан қалалық санитариялық-эпидемиологиялық бақылау басқармасында жиын өткізді. Жиынға Сауран ауданы және Түркістан қалалық СЭББ-ның басшылары, басшы орынбасарлары, бөлім басшылары, басқарма мамандары және жұртшылықпен байланыс жөніндегі бас маман Бейбіт Тілекұлы қатысты.

Күн тәртібінде:
1)Сыбайлас жемқорлыққа қарсы күрес
2)Әдеп нормаларын сақтау
3) Тұрмыстық зорлық зомбылық
4) Лудомания
5) Діни экстремистік ағымдар жайында сөз қозғалды.
Күн тәртібіндегі мәселелер аясында Түркістан облысы санитариялық-эпидемиологиялық бақылау департаментінің әдеп жөніндегі уәкілі З.Алимкулов сыбайлас жемқорлықтың алдын алу шараларын күшейту, азаматтардың құқықтық сауаттылығын арттыру, сондай-ақ «Сыбайлас жемқорлыққа қарсы іс-қимыл және әдеп қағидаларын сақтау» туралы заң талаптарын кеңінен түсіндіру мақсатында жиналыстар мен ақпараттық-түсіндіру жұмыстарын ауқымды түрде жүргізу қажеттігін атап өтті.

Сонымен қатар, Закрдин Алимкулов әдеп жөніндегі уәкіл ретінде, қазіргі кезеңде тәуелсіз мемлекет ретінде дамыған елдердің қатарынан көріну үшін әрбір азаматтың биік адамгершілік қасиеттерге, парасаттылыққа ұмтылуы қажет екенін, академиялық адалдықты сақтау керектігін атап өтіп, өз сөзін түйіндеді.

Түркістан облысының санитариялық-эпидемиологиялық бақылау департментінің баспасөз қызметі

Сарыағаш аудандық білім бөліміне қарасты №74 жалпы білім беретін мектептің қазақ тілі мен әдебиеті пәнінің мұғалімі Дәуренбек Нұрқұлов оқушыларға арналған сайт ашты. «Оян, қазақ» деп аталатын жоба бүгінгінің білімпаз балаларын оқуға баулу, білімге құштар ету мақсатында қолға алынған.
Сарыағаштық жас ұстаз «Оян, қазақ» жобасының тиімділігін аудандық «Дарынды оқушыларға – талантты ұстаз» байқауында қорғап, іс-жүзінде дәлелдеп шықты. Оның айтуынша, оқушылар білім ошағындағы академиялық жетістіктерін кітап оқумен байланыстырса, жан-жақты дамып, ізденіске ден қоймақ.
Жобаның мақсаты – оқушылардың оқу мәдениетінің деңгейін және олардың оқу белсенділігінің өсуін арттыру, жас ұрпақ бойында азаматтық, рухани-адамгершілік құндылықтарды қалыптастыру, оқушылар, педаогогтар және ата-аналар арасында оқуды танымал ету үшін жағдай жасайды.
Кітапқұмар оқушыларға арналған әлеуметтік сайт 7 қосымша беттен тұрады. Олар: басты бет, жаңалықтар, Kitap Fest, E-кітап, аудио кітапхана, үздіктер тақтасы, жобаның авторы, кері байланыс.
Қазіргі таңда кітап оқуға үндейтін сайтты 150-ден аса аудан оқушылары пайдалануда. Жобада 200-ден аса кітап қоры жинақталған. Оның ішінде оқушыларға арналған танымдық кітаптар, қазақ қаламгерлерінің әдеби шығармалары, әлем әдебиеті мен бестселлер оқулықтар топтастырылған.
«Кітап оқу жобалары білім беру жүйесінің ажырамас бөлігі болып табылады. Олар жастардың интеллектуалдық және рухани дамуына ықпал етіп, оларды білімге, ғылымға, мәдениетке баулуға мүмкіндік береді. Сондықтан да осындай жобаларды дамыту және қолдау қоғамның болашағы үшін маңызды деп ойлаймын», – дейді Дәуренбек Миатұлы.
Кітап оқу жобасы — бұл тек қана оқушыларды кітап оқуға баулу емес, сонымен қатар олардың өз ойларын еркін жеткізу, талдау, сын тұрғысынан ойлау қабілеттерін дамытуға ықпал ететін маңызды жұмыс. Мұндай жобалар арқылы оқушылар түрлі тақырыптарға арналған кітаптарды оқып, оларды талқылау, өз көзқарастарын білдіру мүмкіндігіне ие болады. Бұл өз кезегінде олардың сөйлеу және ойлау дағдыларын жетілдіреді. Ғаламторды өз деңгейінде оқушыларға жақсы жағынан пайдалы ақпаратты ала білуге үйрету. Сонымен қатар, кітап оқу жобасы ғылыми-зерттеу жұмыстармен айналысуына, өз бетімен білім алуға деген қызығушылығын оятуға мүмкіндік береді. Кітапты немесе белгілі бір шығарманы ұжымдық талқылау жаңа идеялар мен шешімдер табуға мүмкіндік береді.

Түркістан қаласында 23-25 сәуір күндері аралығында «ASPARA FASHION WEEK» жобасының 15-мерейтойлық маусымы өтеді. 2017 жылдан бері дәстүрлі түрлі өткізіліп келе жатқан бағдарлама әлемдік сән индустриясында өзіндік орнын қалыптастырып, дүниежүзілік сән апталықтарының ресми күнтізбесіне енген. Бұған дейінгі 14-маусым кезінде 55-тен астам елдің 700-ден астам дизайнері қатысып, Қазақстанды, оның бай мәдениетін, дәстүрін және туризм әлеуетін жақыннан тануға мүмкіндік алған. Бұл жайында «ASPARA FASHION WEEK» халықаралық жобасының президенті Айдархан Қалиев БАҚ өкілдерімен өткен брифингте мәлімдеді.

«Бүгінде бұл жоба жаһандық деңгейдегі 20-дан астам ірі сән апталықтарымен серіктестік орнатқан. «ASPARA FASHION WEEK» туралы әлемнің жетекші сән басылымдарында жазылды. Олардың қатарында америкалық «FNL Network» телеарнасы, «ELLE» журналы, «MERCURYʼS», «Gazzetta Italia», «Fashion Collection», «Business Emirates», «DFashion magazine», «ZOOM» секілді әйгілі басылым беттері бар»- деді жоба жетекшісі.

Түркістанда өтетін сән көрсетіліміне әлемнің 10 елінен 40-тан астам дизайнер қатысады. Оның 70%-ға жуығы қазақстандық жас сәнгерлер. Жоба жетекшісі осындай көрмелер арқылы әлемдік сән өнерінің үздіктерімен тәжірибе алмасып, біліктілігін арттыруға мүмкіндік сыйлауға ниетті екенін жеткізді.

«Түркістан – көне тарих пен дәстүрдің ұштасқан орны. Мұнда өте дәмді ас, қонақжай адамдар, әдемі қала бар екен. Біз осы жоба арқылы Түркістандай қаланы көргенімізге қуаныштымыз»- деді итальяндық «MadMood FASHION WEEK Milano» халықаралық жобасының президенті Марианна Мичелли.

Айта кетейік, «ASPARA FASHION WEEK» халықаралық жобасы Түркістан қаласының Дүниежізілік «Қолөнершілер қаласы» статусын алуы аясында ұйымдастырылып отыр. Бұл мәртебе киелі шаһарға биыл берілген болатын.