Мақтаарал ауданында еңбек қауіпсіздігін қамтамасыз ету, жұмысшылардың еңбек құқықтарын қорғау және жұмыс берушілердің заң талаптарын сақтауына бақылауды күшейту бағытындағы жұмыстарға басымдық берілуде. Бұл мәселе аудан әкімдігінде өткен аппараттық мәжілісте жан-жақты талқыланды. Аудан әкімі Бақыт Асановтың төрағалығымен өткен жиында еңбек қатынастарының заң талаптарына сай жүргізілуі, қызметкерлердің әлеуметтік құқықтарының сақталуы және өндірістегі қауіпсіздік шараларының қамтамасыз етілуі бойынша атқарылған жұмыстар сараланды.

Ауданның жұмыспен қамту және әлеуметтік бағдарламалар бөлімінің басшысы Н.Елшібаевтың мәліметінше, еңбек заңнамасын сақтау бойынша жүргізілген бақылау және түсіндіру жұмыстарының нәтижесінде бірқатар оң өзгеріс бар. Атап айтқанда, шілде айының басында еңбек шарттарын тиісті түрде тіркемеген 130 мекеме анықталған. Жүргізілген түсіндіру жұмыстары мен қабылданған шаралардың нәтижесінде олардың саны 28 мекемеге дейін қысқарған. Осылайша, 102 мекеме еңбек қатынастарын заң талаптарына сәйкестендірген.

Бұл көрсеткіш жұмыс берушілер арасында еңбек шарттарын ресімдеу талаптарын сақтау бағытында жүргізіліп жатқан жұмыстың нәтижесін көрсетеді. Өйткені еңбек шарты – қызметкердің құқықтары мен әлеуметтік кепілдіктерін қамтамасыз ететін негізгі құжаттардың бірі. Ресми еңбек қатынасының болуы жұмысшының еңбекақы алуына ғана емес, оның зейнетақы және әлеуметтік аударымдарының жүргізілуіне, еңбек демалысына шығуына және өндірістегі жазатайым оқиғалардан қорғалуына мүмкіндік береді. Мәжілісте қызметкерлердің зейнетақы жарналары мен әлеуметтік аударымдарының уақытылы жүргізілуі де назардан тыс қалмады. Баяндамашының айтуынша, аталған бағытта да оң динамика қалыптасқан. Бұған дейін зейнетақы жарналарын аудармаған 405 мекеме анықталса, қазіргі таңда олардың саны 153-ке дейін төмендеген. Ал әлеуметтік аударымдары жүргізілмеген қызметкерлер саны 1428 адамнан 689 адамға дейін азайған.

Бұл бағыттағы көрсеткіштердің төмендеуі жұмыс берушілердің еңбек заңнамасы талаптарын орындауға біртіндеп көшіп жатқанын аңғартады. Дегенмен, қол жеткізілген нәтижелермен шектелуге болмайды. Себебі әрбір қызметкердің еңбек құқығы толық сақталуы үшін жұмыс берушілер тарапынан заң талаптары тұрақты түрде орындалуы қажет. Жиында өндірістегі жазатайым оқиғалардан міндетті сақтандыру мәселесіне де ерекше назар аударылды. Қазіргі таңда өндірістегі жазатайым оқиғалардан міндетті сақтандыру шартын жасамаған 108 мекеме бар екені айтылды.

Аталған мәселе еңбек қауіпсіздігін қамтамасыз етудің маңызды құрамдас бөлігі саналады. Қызметкердің өндірістегі қауіпсіздігін қамтамасыз ету тек қажетті құрал-жабдықтармен қамтумен немесе қауіпсіздік талаптарын түсіндірумен шектелмейді. Жұмыс беруші заңда белгіленген міндетті сақтандыру талаптарын да орындауы тиіс. Осыған байланысты жиында сақтандыру шарттарын жасамаған мекемелермен түсіндіру жұмыстарын күшейту қажеттігі айтылды. Жауапты бөлімдерге заң талаптарын орындамаған жұмыс берушілермен жұмысты жандандырып, еңбек қатынастары саласындағы кемшіліктерді кезең-кезеңімен жою тапсырылды. Жалпы, ауданда еңбек қауіпсіздігі мен еңбек заңнамасының сақталуы тек тексеру шараларымен ғана емес, алдын алу және түсіндіру жұмыстары арқылы да қамтамасыз етілуде. Мұндай тәсіл жұмыс берушілердің заң талаптарын ерікті түрде орындауына ықпал етіп, еңбек қатынастарын заңдастыруға мүмкіндік береді.

Еңбек қауіпсіздігі – қызметкердің өмірі мен денсаулығын қорғауға бағытталған маңызды бағыт. Сондықтан әрбір мекеме мен кәсіпорында қауіпсіз еңбек жағдайын қалыптастыру, жұмысшылардың әлеуметтік құқықтарын қамтамасыз ету және еңбек заңнамасының талаптарын сақтау тұрақты бақылауда болуы тиіс. Аппараттық мәжілісте еңбек мәселелерімен қатар ауданның санитариялық-эпидемиологиялық ахуалы да қаралды. Жыл басынан бері Конго-Қырым геморрагиялық қызбасына күдікті үш жағдай тіркеліп, оның біреуі зертханалық жолмен расталғаны айтылды. Сондай-ақ кене шағуына байланысты 40 тұрғынның медициналық көмекке жүгінгені хабарланды. Кенеге қарсы ветеринариялық және залалсыздандыру жұмыстарының барысы да талқыланды. Бұдан бөлек, аудандағы қоғамдық-саяси тұрақтылықты сақтау, төтенше жағдайлар туындаған кездегі мемлекеттік органдардың өзара іс-қимылы, қоғамдық резонанс тудыруы мүмкін оқиғалар жөніндегі ақпарат алмасу мәселелері қаралды. Этносаралық келісімді нығайту бағытындағы жұмыстардың барысы да сараланды.

Жиында ауданның 2026 жылғы І жартыжылдықтағы әлеуметтік-экономикалық даму көрсеткіштері бойынша қызмет тиімділігінің рейтингі де жарияланды. Аудан әкімдігі мен бөлімдер жұмысына қатысты бекітілген 103 индикатордың 86-сы орындалып, 17 көрсеткіш бойынша жоспарлы межеге қол жеткізілмеген. Қорытындысында Мақтаарал ауданы 14,2 ұпай жинап, облыстағы 17 қала мен аудан арасында 5-орынға тұрақтаған. Аппараттық мәжілісті қорытындылаған аудан әкімі Б.Асанов жауапты мемлекеттік органдар мен бөлім басшыларына еңбек заңнамасының сақталуын күшейту, қызметкерлердің әлеуметтік құқықтарын қорғау, өндірістегі қауіпсіздік талаптарының орындалуын қамтамасыз ету, сондай-ақ ауданның әлеуметтік-экономикалық және қоғамдық-саяси тұрақтылығына қатысты жұмыстарды жүйелі түрде жалғастыру жөнінде нақты тапсырмалар берді.

Мақтаарал ауданында халықты әлеуметтік қолдау және тұрғын үймен қамтамасыз ету бағытындағы жұмыстар жүйелі түрде жалғасуда. Соның нақты бір көрінісі – Жаңажол ауылдық округіне қарасты Фирдауси елді мекенінде жаңа баспаналардың әлеуметтік осал топтағы азаматтар мен көпбалалы отбасыларға берілуі.

Қазақстан Республикасы Үкіметінің №736 қаулысымен бекітілген «Тұрғын үй-коммуналдық инфрақұрылымды дамытудың 2023–2029 жылдарға арналған тұжырымдамасы» аясында елді мекенде 100 тұрғын үйдің құрылысы жүргізіліп, құрылыс-монтаж жұмыстары толық аяқталды. Бүгінде сол баспаналардың алғашқы 52-сі «Отбасы банк» АҚ арқылы тұрғын үй кезегінде тұрған азаматтарға табысталды. Жаңа қоныс иелерінің қатарында әлеуметтік жағынан осал санаттағы азаматтар мен көпбалалы отбасылар бар. Осылайша, ұзақ уақыт бойы баспана күтудегі отбасылардың әлеуметтік жағдайын жақсартуға мүмкіндік туды.

Пәтер кілттерін табыстау рәсіміне Мақтаарал ауданының әкімі Бақыт Асанов қатысып, жаңа баспана иелерін қуаныштарымен құттықтады. Аудан басшысы тұрғын үйдің әр отбасы үшін маңызды әлеуметтік мәселе екенін атап өтіп, баспаналы болу – азаматтардың тұрмыс сапасын арттыратын маңызды қолдау шараларының бірі екенін жеткізді.

«Баспана – әрбір отбасының бақыты мен берекесінің, тұрақтылығы мен жарқын болашағының негізі. Сондықтан, бүгінгі іс-шара көптеген отбасылар үшін жаңа өмірдің бастауы, көптен күткен арманның орындалған күні деп білемін. Жаңа қонысқа ие болып отырған барлық отбасыларды шын жүректен құттықтаймын! Шаңырақтарыңыз шаттыққа, дастархандарыңыз берекеге толсын! Жаңа үйлеріңізге құт-береке, ырыс пен ынтымақ орнасын! Балаларыңыздың күлкісі үзілмей, әр шаңырақта бақыт пен бақ-дәулет мәңгілік мекен етсін!» – деді, Бақыт Насырханұлы.

Жаңа үйлер тұрғындардың жайлы өмір сүруіне қажетті инженерлік инфрақұрылыммен толық қамтамасыз етілген. Атап айтқанда, тұрғын үйлерге табиғи газ, электр энергиясы, ауыз су және кәріз жүйесі тартылған. Сонымен қатар, аумақты абаттандыру, асфальт-бетон жабындысын төсеу және кірме жолдарды ретке келтіру жұмыстары да аяқталған.

Әр тұрғын үйдің жалпы аумағы 63 шаршы метрді құрайды. Үй ішінде кіреберіс, үш тұрғын бөлме, ас үй және санитарлық торап қарастырылған. Бұған қоса, әр отбасыға 7 сотық жер телімі беріледі. Бұл ауыл тұрғындарына жеке қосалқы шаруашылықпен айналысып, бау-бақша өсіруге және отбасылық табысын арттыруға қосымша мүмкіндік береді.

Жаңа шағын ауданның әлеуметтік инфрақұрылымын дамыту да назардан тыс қалмайды. Алдағы уақытта мұнда спорт және ойын алаңшаларын, сондай-ақ мәдениет үйін салу жоспарланып отыр. Бұл тұрғындардың бос уақытын тиімді ұйымдастырып, елді мекендегі қоғамдық және мәдени ортаны қалыптастыруға жол ашады.

Сонымен қатар, Жаңажол ауылдық округі әкімінің аппараты Ақжол елді мекенінен жаңа тұрғын үйлер орналасқан Фирдауси елді мекеніне көшіріліп, ауыл әкімшілігінің ұжымы жаңа ғимаратқа орналасты. Бұл шешім елді мекеннің әлеуметтік және әкімшілік инфрақұрылымын дамытуға оң ықпал етеді.

Жалпы, Фирдауси елді мекеніндегі тұрғын үйлердің берілуі – халықты әлеуметтік қамтамасыз ету бағытындағы нақты нәтижелердің бірі. Әсіресе баспанаға мұқтаж көпбалалы және әлеуметтік осал отбасылардың тұрғын үй мәселесінің шешілуі олардың тұрмыс сапасын жақсартып қана қоймай, әлеуметтік тұрақтылықты нығайтуға да ықпал етеді.

Мемлекеттік қолдаудың басты мақсаты – азаматтарға лайықты өмір сүруге қажетті жағдай жасау. Осы тұрғыдан алғанда, жаңа баспаналардың берілуі Мақтаарал ауданында халықтың әлеуметтік әл-ауқатын арттыруға бағытталған жұмыстардың нақты жемісін көрсетеді.

Мемлекет басшысы Қасым-Жомарт Тоқаев өз Жолдауында су ресурстарын тиімді пайдалану мәселесіне ерекше тоқталып, трансшекаралық өзендердің су қорын ұтымды пайдалану және су үнемдеу технологияларын кеңінен енгізу қажеттігін атап өткен болатын.

Су – ауыл шаруашылығының негізгі тірегі. Әсіресе егін шаруашылығы дамыған өңірлер үшін су ресурстарын тиімді пайдалану мен оның ысырабын азайту – бүгінгі күннің маңызды міндеттерінің бірі. Климаттың өзгеруі, су қорының азаюы және егістік алқаптарға түсетін су жүктемесінің артуы шаруаларды су үнемдеу технологияларын кеңінен қолдануға бағыттап отыр.  Осы бағыттағы жұмыстар Арыс қаласында да жүйелі түрде жүргізілуде. Мамандар Арыс қаласы мен ауылдық округтердегі ауыл шаруашылығы тауарын өндірушілердің егістік алқаптарына су үнемдеу технологияларын енгізу кезінде 80 пайызға дейін мемлекеттік қолдау қарастырылғанын атап өтті.

Бұл – егін шаруашылығымен айналысатын диқандар үшін маңызды мүмкіндік. Себебі су үнемдеу технологияларын енгізу бір жағынан мемлекет тарапынан көрсетілетін қолдауды пайдалануға мүмкіндік берсе, екінші жағынан шаруашылықтың өндірістік шығындарын азайтып, суды тиімді пайдалануға жағдай жасайды. Қазіргі таңда егін алқаптарын дәстүрлі әдіспен суару кезінде судың белгілі бір бөлігі топыраққа сіңіп, буланып немесе егістікке біркелкі жетпей ысырап болуы мүмкін. Ал заманауи су үнемдеу технологиялары суды қажетті мөлшерде және өсімдіктің тамыр жүйесіне барынша тиімді жеткізуге мүмкіндік береді.  Тамшылатып және басқа да су үнемдеу жүйелерін пайдалану арқылы су шығынын оңтайландыруға, өсімдіктің қажетті ылғалмен қамтамасыз етілуін бақылауға және еңбек шығынын төмендетуге болады. Сонымен қатар мұндай технологиялар егістікті тиімді басқаруға, суару уақытын реттеуге және суды қажетсіз пайдалануды болдырмауға мүмкіндік береді.

Су үнемдеу технологиясының тағы бір маңызды артықшылығы – су ресурсын сақтай отырып, шаруашылықтың тұрақты жұмысын қамтамасыз ету. Бұл әсіресе суармалы егіншілікке тәуелді шаруалар үшін аса өзекті. Сондықтан қазіргі жағдайда су үнемдеу технологиясына көшу тек табиғи ресурсты қорғау шарасы ғана емес, шаруашылықтың экономикалық тиімділігін арттырудың да бір жолы болып табылады. Ауыл шаруашылығы саласында егін шаруашылығын дамытып отырған диқандарға, сондай-ақ егістік алқаптарына су үнемдеу технологияларын енгізуге ниетті ауыл шаруашылығы тауарын өндірушілерге мемлекеттік субсидия алу мүмкіндігі қарастырылған. Аталған қолдау «Инвестициялық салымдар кезінде агроөнеркәсіптік кешен субъектісі шеккен шығыстардың бір бөлігін өтеу бойынша субсидиялау қағидаларын бекіту туралы» Қазақстан Республикасы Ауыл шаруашылығы министрінің міндетін атқарушының 2018 жылғы 23 шілдедегі №317 бұйрығының №11 паспорты негізінде қарастырылады. Мемлекеттік қолдаудың басты мақсаты – ауыл шаруашылығы тауарын өндірушілердің заманауи технологияларды енгізуге жұмсаған шығындарының бір бөлігін өтеу арқылы олардың өндірістік мүмкіндігін арттыру және су ресурстарын тиімді пайдалануға ынталандыру.

Бұл бағытта Арыс қаласының ауыл шаруашылығы бөлімі ауыл шаруашылығы тауарын өндірушілер арасында түсіндіру жұмыстарын жүргізіп, су үнемдеу технологияларын енгізудің маңыздылығын насихаттауда. Шаруалар үшін бұл мүмкіндікті тиімді пайдалану – егістік алқаптарды сумен қамтамасыз етудің тұрақтылығын арттырып қана қоймай, болашақта су тапшылығының алдын алуға да өз үлесін қосады. Су – шектеулі табиғи ресурс. Сондықтан оны тиімді пайдалану тек мемлекетке немесе белгілі бір салаға ғана жүктелетін міндет емес. Бұл – әрбір су пайдаланушының ортақ жауапкершілігі. Ауыл шаруашылығы тауарын өндірушілердің су үнемдеу технологияларына көшуі өңірдегі су ресурстарын ұтымды пайдалануға, ауыл шаруашылығы өндірісінің тиімділігін арттыруға және егістік алқаптардың тұрақты сумен қамтамасыз етілуіне оң әсер етеді. Бүгінде заманауи технологияны енгізу – уақыт талабына сай шешім. Мемлекет тарапынан көрсетіліп отырған қолдау мүмкіндігін пайдалана отырып, шаруалар өз өндірісін жаңғыртып, суды үнемді жұмсауға және шаруашылықтың экономикалық тиімділігін арттыруға мүмкіндік алады.

Осыған байланысты мамандар Арыс қаласының ауыл шаруашылығы тауарын өндірушілерін су үнемдеу технологияларын енгізу мүмкіндігін тиімді пайдалануға шақырады. Субсидия алу тәртібі, қажетті құжаттар, талаптар, су үнемдеу технологияларының түрлері және мемлекеттік қолдау шаралары бойынша толық ақпаратты Арыс қаласының ауыл шаруашылығы бөлімінен алуға болады.

Мекенжайы: Арыс қаласы, Д.Қонаев көшесі, 9А, 2-қабат.

Байланыс телефоны: 8 (72540) 5-92-19.

Мемлекеттік қызмет – елдің дамуына тікелей ықпал ететін маңызды сала. Сондықтан бұл жүйеге кәсіби білімі жоғары, жаңашыл ойлайтын, жауапкершілігі мол жастарды тарту – мемлекеттік саясаттың басым бағыттарының бірі болып қала береді. Осы мақсатта мемлекет тарапынан жастарға қолдау көрсететін жаңа тетіктер енгізіліп келеді.
Осындай маңызды өзгерістердің бірі – Мемлекет басшысы 2026 жылғы 19 мамырда қол қойған «Қазақстан Республикасының мемлекеттік қызметі туралы» Заң. Аталған Заң
2026 жылғы 1 шілдеден бастап күшіне еніп, мемлекеттік қызметке орналасу тәртібін одан әрі жетілдіруге бағытталған бірқатар жаңашылдықтарды енгізді.
Заңдағы ең маңызды жаңалықтардың бірі – жоғары оқу орнын үздік аяқтаған түлектерге мемлекеттік қызметке конкурс өткізілместен орналасу мүмкіндігінің кеңейтілуі.
Жаңа Заңның 28-бабының 6-тармағының 5) тармақшасына сәйкес, жоғары және жоғары оқу орнынан кейінгі білім беру ұйымдарын GPA көрсеткіші 3,33-тен төмен емес нәтижемен аяқтаған түлектер оқуын аяқтағаннан кейін бір жыл ішінде мемлекеттік әкімшілік қызметтің бірқатар «Б» корпусы лауазымдарына конкурссыз қабылдана алады.
Бұл мүмкіндік аудандық және ауылдық деңгейдегі мемлекеттік органдардың төменгі және басшы емес лауазымдарын қамтиды. Яғни, жас мамандар кәсіби қызмет жолын туған өңірінен бастап, тәжірибе жинақтап, мемлекеттік басқару саласында өз әлеуетін жүзеге асыра алады.
Егер бұрын мұндай мүмкіндік негізінен мемлекеттік білім беру гранты негізінде білім алған үздік түлектерге ғана берілсе, енді ақылы негізде білім алып, оқуын GPA көрсеткіші 3,33-тен жоғары нәтижемен аяқтаған түлектер де конкурс өткізілместен мемлекеттік қызметке орналасуға құқылы.
Аталған өзгеріс мемлекеттік қызметке талантты, білімді әрі бастамашыл жастардың көптеп келуіне жол ашады. Әсіресе, аудандық және ауылдық жерлердегі кадр тапшылығын азайтып, өңірлердің дамуына серпін береді. Сонымен қатар бұл тетік жастардың туған өлкесінде еңбек етіп, ел игілігіне қызмет етуіне жаңа мүмкіндік қалыптастырады.
Бүгінде Түркістан облысында осы мүмкіндік арқылы мемлекеттік қызметке қабылданған 78 жас түлек өздерінің кәсіби қабілеттерін іс жүзінде дәлелдеп келеді. Олар мемлекеттік қызметтің ашықтығын, тиімділігін арттыруға үлес қосып, халыққа сапалы қызмет көрсету ісіне белсенді атсалысуда.
Жастарға берілген бұл мүмкіндік – тек жұмысқа орналасудың жеңілдетілген тәртібі ғана емес. Бұл – мемлекет тарапынан білімді, еңбекқор және өз ісіне адал жастарға көрсетілген сенім. Сондықтан жоғары оқу орнын үздік аяқтаған жас түлектерді Заңда қарастырылған мүмкіндікті тиімді пайдаланып, мемлекеттік қызмет саласына келуге шақырамыз.
Мемлекеттік қызмет – тұрақты мансаптың ғана емес, елдің дамуына үлес қосудың, қоғам игілігі үшін еңбек етудің және кәсіби тұрғыдан шыңдалудың үлкен мектебі.

Қазақстан Республикасы
Мемлекеттік қызмет істері агенттігінің
Түркістан облысы бойынша
департаменті

Арыс қаласында тұрғындар арасында тазалық мәдениетін қалыптастыру және абаттандыру талаптарының сақталуын қамтамасыз ету бағытындағы жұмыстар жаңа кезеңге көшті. 2026 жылғы 1 шілдеден бастап елімізде абаттандырудың жаңа қағидалары күшіне енуіне байланысты қала аумағында тұрғындарға түсіндіру жұмыстары күшейтілді. Бүгінде Арыстағы 17 сектордың барлығында жаңа талаптарды халыққа жеткізуге бағытталған жұмыстар жүргізілуде. Негізгі мақсат – тұрғындарға заң талаптарын түсіндіріп қана қоймай, тазалық пен ұқыптылықты күнделікті өмір салтына айналдыру.

Осы бағытта қалалық Мәдениет бөліміне бекітілген №3 сектор аумағында да арнайы іс-шара ұйымдастырылды. Қызметкерлер көшелерді аралап, тұрғындармен тікелей кездесіп, жаңа абаттандыру қағидаларының негізгі талаптарын түсіндірді. Әңгімелесу барысында әр азаматтың өз үйі мен оған іргелес аумақтың тазалығына жауапкершілікпен қарауы қажеттігі айтылды.

Түсіндіру жұмыстарымен қатар сектор аумағында сенбілік өткізіліп, көшелер мен ортақ пайдаланылатын орындар тазартылды. Мұндай шаралар қаланың санитарлық жағдайын жақсартумен бірге тұрғындарды қоршаған ортаға жанашырлықпен қарауға ынталандыруды көздейді. Жаңа қағидаларға сәйкес, әрбір үй иесі немесе жалға алушы өз нысанының, қоршауының, сауда немесе қызмет көрсету орнының сыртындағы 5 метр радиуста орналасқан іргелес аумақты таза ұстап, күтіп-баптауға міндетті. Бұл талап жеке сектор тұрғындарына да қатысты.

Сонымен қатар жеке тұрғын үйлер мен қоршаулардың сыртқы келбетіне қойылатын талаптар да назарда болады. Аула маңының ретсіздігі, қоршаулардың ұқыпсыз күйде болуы және іргелес аумақтың қараусыз қалуы қаланың жалпы көркіне әсер ететін фактор ретінде қарастырылады. Жауапты мамандар тұрғындарға жаңа талаптардың басты мақсаты айыппұл салу емес, елді мекендерде тазалық пен тәртіпті қалыптастыру екенін түсіндірді. Сондықтан тұрғындарға белгіленген талаптарды алдын ала орындап, өз аумағын жүйелі түрде күтіп ұстау ұсынылды.

Қағидаларды алғаш рет бұзған жағдайда азаматқа ескерту жасалады. Ал белгіленген талаптар орындалмаған кезде қолданыстағы заңнамаға сәйкес 20 айлық есептік көрсеткіш мөлшерінде айыппұл қарастырылған. Құқық бұзушылық бір жыл ішінде қайталанса, айыппұл көлемі 30 АЕК-ке дейін ұлғаяды.

Арыста абаттандыру талаптарын түсіндіру жұмыстары алдағы уақытта да жалғасады. Қала тазалығы тек арнайы қызметтердің емес, әр тұрғынның ортақ жауапкершілігі екені ескертіледі. Үй маңын таза ұстау, көшені ластамау және ортақ кеңістікке ұқыпты қарау – жайлы қалалық ортаны қалыптастырудың негізгі шарттарының бірі. Таза аула – көрікті көше, көрікті көше – жайлы қала.

Сайрам аудандық жұмыспен қамту және әлеуметтік бағдарламалар бөлімінің «Белсенді ұзақ өмір орталығы» коммуналдық мемлекеттік мекемесінде «Қариясы бар ел – қазынасы бар ел» тақырыбында дөңгелек үстел ұйымдастырылды.

Іс-шараның негізгі мақсаты – қоғамдағы қариялардың өмірлік тәжірибесі мен даналығын дәріптеу, аға буынға құрмет көрсету мәдениетін қалыптастыру, белсенді ұзақ өмір сүру қағидаттарын насихаттау, ұрпақтар сабақтастығын нығайту және өзара сыйластық пен ынтымақтастық құндылықтарын кеңінен дәріптеу.

Шараға Сайрам ауданы әкімінің орынбасары С. Дүйсебаев, аудандық жұмыспен қамту және әлеуметтік бағдарламалар бөлімінің басшысы Д. Абылғазиев, «Белсенді ұзақ өмір орталығының» басшысы И. Усипбаева, сала мамандары, ардагерлер, мүмкіндігі шектеулі азаматтар мен қоғам белсенділері қатысты.

Дөңгелек үстел Қазақстан Республикасының Мемлекеттік Әнұранымен ашылып, орталықтың белсенді апаларынан құралған «Тұмар» тобының ән шашуымен жалғасты.

Іс-шара барысында аудан әкімінің орынбасары С. Дүйсебаев қатысушыларды құттықтап, Сайрам ауданындағы «Белсенді ұзақ өмір орталығының» құрылу тарихы мен оның қоғамдағы маңызына тоқталды. Өз кезегінде бөлім басшысы Д. Абылғазиев бөлімнің және орталықтың қол жеткізген жетістіктері туралы баяндап, егде жастағы азаматтардың белсенді өмір сүруіне жасалып жатқан мүмкіндіктерді атап өтті.

Орталық басшысы И. Усипбаева «Белсенді ұзақ өмір орталығының бүгінгі жетістіктері» тақырыбында баяндама жасап, жүзеге асырылып жатқан жобалар мен қызметтердің нәтижелері жөнінде жан-жақты ақпарат берді.

Дөңгелек үстелдің пікір алмасу бөлімінде қатысушылар орталық қызметін одан әрі жетілдіруге қатысты өз ұсыныстары мен пікірлерін ортаға салып, белсенді ұзақ өмір сүру мәдениетін дамыту, қариялардың қоғамдық өмірге араласуын арттыру және әлеуметтік қолдау тетіктерін жетілдіру мәселелерін талқылады.

Іс-шара соңында қатысушылар аға буынның қоғамдағы орны мен рөлін айқындайтын мұндай кездесулердің маңыздылығын атап өтіп, естелік суретке түсті.

Казахстан второй год подряд остается крупнейшим поставщиком растительных масел на рынок Узбекистана. С сентября 2025 года по май 2026 года объем экспорта казахстанской масложировой продукции в соседнюю страну достиг 553 тыс. тонн. Это на 130,8 тыс. тонн, или на 31%, больше по сравнению с аналогичным периодом предыдущего маркетингового года.

По итогам 2025 года доля Казахстана на рынке растительных масел Узбекистана превысила 90%. Устойчивый рост поставок отмечается на протяжении последних пяти сезонов.

Одновременно увеличиваются общие объемы экспорта продукции масложировой отрасли. За девять месяцев маркетингового года Казахстан поставил за рубеж растительное масло, шрот и жмых на сумму $944 млн.

Экспортная выручка выросла на $331 млн, или на 54%, по сравнению с сентябрем — маем 2024/2025 годов. По прогнозам, к завершению текущего маркетингового года экспорт растительного масла, шрота и жмыха превысит $1,15 млрд.

Рост внешних поставок обеспечивается развитием отечественной переработки. Действующие мощности по переработке масличных культур в Казахстане превышают 5,2 млн тонн в год, включая 4,4 млн тонн мощностей по переработке подсолнечника. Это на 700 тыс. тонн больше совокупных перерабатывающих мощностей Узбекистана.

За счет строительства и запуска новых предприятий к 2028 году мощности казахстанской масложировой отрасли планируется увеличить до 8 млн тонн в год.

Казахстанская продукция поставляется более чем в 20 стран. Страна также полностью покрывает потребности государств Центральной Азии в подсолнечном шроте и занимает шестое место в мире по экспорту подсолнечного масла. В перспективе отрасль планирует войти в тройку крупнейших мировых экспортеров и довести экспортную выручку до $2 млрд.

Түркістан облысының Созақ ауданында уран өндіру саласының маңызды кәсіпорындарының бірі – «АППАК» ЖШС өз жұмысын өндірістік тиімділікпен қатар, еңбек қауіпсіздігіне, қызметкерлердің әлеуметтік жағдайына және жергілікті халықты қолдауға басымдық бере отырып жүргізіп келеді.

Жуырда бұқаралық ақпарат құралдарының өкілдері арнайы кәсіпорынға барып, «Батыс Мыңқұдық» кенішінің жұмысымен танысты. БАҚ өкілдеріне кәсіпорынның өндірістік қуаты, еңбек қауіпсіздігі, қызметкерлерге жасалған жағдай, медициналық қызмет көрсету жүйесі және әлеуметтік бағыттағы жобалары туралы кеңінен ақпарат берілді.

«Батыс Мыңқұдық» кеніші Созақ ауданында орналасқан және «Қазатомөнеркәсіп» ҰАК» АҚ-ның еншілес ұйымы болып табылатын «АППАК» ЖШС құрамына кіреді. Кәсіпорынның құрылтайшылары қатарында «Қазатомөнеркәсіп» ҰАК» АҚ, жапониялық Sumitomo Corporation және Kansai Electric Power Co., Inc. бар.

Мыңқұдық кен орнында уран өндіруге арналған келісімшарт 2005 жылы жасалып, 2035 жылға дейін қолданылады. Кеніш 2007 жылы іске қосылып, 2011 жылы жобалық қуатына толық шыққан.

2025 жылдың қорытындысы бойынша «Батыс Мыңқұдық» кенішінде жоспарланған 800 тонна уранның орнына 810,7 тонна уран өндірілді. Ал сары кек (ЗОУ) түріндегі дайын өнім көлемі жоспардағы 800 тоннаның орнына 805,1 тоннаны құрады. 2026 жылы 800,1 тонна уран өндіру жоспарланса, 2027 жылға арналған өндірістік жоспар 820,2 тоннаны құрайды.

Кәсіпорын қызметінің маңызды бағытының бірі – еңбек қауіпсіздігі мен қызметкерлердің денсаулығын қорғау. Бүгінде «АППАК» ЖШС-де ауысым алдындағы медициналық тексерулер толық автоматтандырылып, цифрландырылған. Бұл жүйе медициналық бақылаудың сапасы мен объективтілігін арттырып, жұмысқа жіберуге кедергі келтіретін медициналық қарсы көрсетілімдерді дер кезінде анықтауға мүмкіндік береді.

Кәсіпорындағы медициналық қызметтің жоғары деңгейде ұйымдастырылуының нәтижесінде соңғы бес жыл ішінде жұмыс орнында денсаулық жағдайының күрт нашарлауына байланысты бірде-бір өлім жағдайы тіркелмеген. Бұл – өндірістегі қауіпсіздік пен медициналық алдын алу шараларына ерекше көңіл бөлінетінін көрсететін маңызды көрсеткіш.

Сонымен қатар кәсіпорында қауіпті өндіріс қызметкерлерін алғашқы көмек көрсету дағдыларына үйретуге басымдық берілген. Халықаралық деңгейде мойындалған арнайы курстардан өткен екі нұсқаушы-жаттықтырушы дайындалған. Қазіргі таңда қауіпті өндіріс қызметкерлері алғашқы көмек көрсету бойынша қажетті оқудан толық өткен.

«Батыс Мыңқұдық» кенішінде қызметкерлердің салауатты өмір салтын ұстануына да жағдай жасалған. Вахталық кент аумағында спорт залы жұмыс істейді. Мұнда корпоративтік турнирлер, спорттық жарыстар, денсаулық марафондары ұйымдастырылып, аурулардың алдын алу және алғашқы көмек көрсету бағытында дәрістер мен семинарлар өткізіледі. Қызметкерлерге психологиялық қолдау көрсететін корпоративтік психологтың жұмысы да жолға қойылған.

2026 жылғы 30 маусымдағы мәлімет бойынша «АППАК» ЖШС-де 423 адам еңбек етеді. Оның 372-сі тікелей «Батыс Мыңқұдық» кенішінде жұмыс істейді. Қызметкерлердің 66 пайыздан астамы Созақ ауданы мен Түркістан облысының басқа аудандарында тұрады. Бұл кәсіпорынның өңір тұрғындарын тұрақты жұмыспен қамтудағы рөлінің жоғары екенін аңғартады.

Кәсіпорын кадрлардың кәсіби біліктілігін арттыруға да айрықша мән береді. 2026 жылдың алғашқы жартыжылдығында «Батыс Мыңқұдық» кенішінің 207-ден астам қызметкері әртүрлі бағыттар бойынша оқудан өтті. Олардың қатарында еңбек және өнеркәсіптік қауіпсіздік, үнемді өндіріс, қаржылық сауаттылық, жасанды интеллект технологияларын қолдану, уранды бақылау және ядролық материалдарға қатысты арнайы бағыттар бар.

Жас мамандарды дамыту мақсатында «Қазатомөнеркәсіп» ҰАК» АҚ-ның «IZBASAR» бағдарламасы аясында тағылымдамалар ұйымдастырылуда. Соңғы үш жылда «АППАК» ЖШС-де атом холдингіне қарасты басқа кәсіпорындардан келген бес жас маман тәжірибеден өткен. Бұл бастама жастардың өндірістік тәжірибе жинақтап, кәсіби құзыреттерін жетілдіруіне мүмкіндік беріп отыр.

Кәсіпорын қызметкерлердің еңбек жағдайын жақсартуға бағытталған жобаларды да тұрақты түрде жүзеге асыруда. Өндірістегі қауіпсіздік талаптарының бұзылуын нақты уақыт режимінде анықтауға мүмкіндік беретін бейнеаналитика жүйесі енгізілген. Сонымен қатар қызметкерге өмірі мен денсаулығына қауіп төнген жағдайда жұмысты тоқтатуға мүмкіндік беретін «ТОҚТА-карталар» жүйесі жұмыс істейді.

Қызметкерлер заманауи жеке қорғаныс құралдарымен және арнайы киіммен қамтамасыз етіледі. Вахталық кентте тамақтану және демалу бөлмелері, санитарлық-тұрмыстық орындар ұйымдастырылған. Ал өндірістік инфрақұрылымды одан әрі дамыту мақсатында вахталық кентті 120 орынға кеңейту жобасы жүзеге асырылуда. Бұдан бөлек, заманауи санитарлық-тұрмыстық корпус пен шамамен 1000 шаршы метр аумақта дене шынықтыру-сауықтыру кешенін салу жоспарланған.

«АППАК» ЖШС үшін өндірістік көрсеткіштермен қатар, жергілікті халықты қолдау да маңызды бағыттардың бірі. Кәсіпорын жұмыс істейтін өңірлерде тұрақты түрде әлеуметтік және қайырымдылық жобалар жүзеге асырылады.

2026 жылдың алғашқы жартыжылдығында кәсіпорын тарапынан бірқатар әлеуметтік бастама қолға алынды. Халықаралық әйелдер күніне орай еңбек ардагерлері, «Алтын алқа» және «Күміс алқа» иегерлері мен көпбалалы аналар қатарындағы 30 әйелге азық-түлік себеттері табысталды. Наурыз мерекесі кезінде Созақ ауданының Степное, Шолаққорған және Құмкент елді мекендеріндегі мерекелік іс-шараларға демеушілік көрсетілді.

Сондай-ақ соғыс ардагерлері мен тыл еңбеккерлерінің 20-сына материалдық көмек көрсетіліп, Балаларды қорғау күніне орай Құмкент ауылдық округіндегі әлеуметтік осал топтарға жататын 54 балаға арналған мерекелік шара ұйымдастырылды.

Кәсіпорынның әлеуметтік жауапкершілігі білім беру саласын да қамтиды. «АППАК» ЖШС жер қойнауын пайдалану жөніндегі келісімшарттық міндеттемелері аясында Созақ ауданындағы әлеуметтік осал топтардан шыққан студенттердің оқуына тұрақты түрде қолдау көрсетеді. Мәселен, 2025 жылы өңірден 41 студентке білім алуға қаржылай көмек берілген.

Ал 2026 жылдың екінші жартыжылдығында әлеуметтік жағдайы төмен және көпбалалы отбасыларға, жетім балаларға және мүгедектігі бар балаларға қолдау көрсету мақсатында «Мектепке жол» қайырымдылық акциясына қатысу жоспарланып отыр. Бұл бастама аясында 60 отбасыға көмек көрсету көзделген. Сонымен қатар әлеуметтік осал топтарға жататын 50 отбасыны қатты көмірмен қамтамасыз ету және студенттердің оқуына қаржылай қолдау көрсету жоспарланған.

Жалпы, БАҚ өкілдерінің кәсіпорынға арнайы барып, өндіріс барысымен танысуы «АППАК» ЖШС жұмысының негізгі бағыттарын көзбен көруге мүмкіндік берді. Өндірістік көрсеткіштермен қатар, кәсіпорындағы еңбек қауіпсіздігі, қызметкерлердің денсаулығын қорғау, кадрларды дамыту, әлеуметтік қолдау және жергілікті қауымдастықпен өзара байланыс мәселелеріне ерекше назар аударылатыны байқалады.

Бүгінде «АППАК» ЖШС үшін өндіріс көлемін арттырумен қатар, қауіпсіз еңбек ортасын қалыптастыру, адам капиталын дамыту және өзі қызмет ететін өңірлердің әлеуметтік-экономикалық тұрақтылығына үлес қосу маңызды міндеттердің бірі болып отыр. Бұл бағыттағы жүйелі жұмыстар кәсіпорынның корпоративтік әлеуметтік жауапкершілік пен тұрақты даму қағидаттарына адалдығын көрсетеді.

2026 жылғы 23 тамызда өтетін Құрылтай сайлауы – азаматтардың қоғамдық өмірге белсенді араласуына жол ашатын маңызды саяси оқиға. Бұл сайлау тек өкілдерді анықтау ғана емес, елдің болашағына қатысты маңызды мәселелерді бірге талқылауға мүмкіндік беретін демократиялық үдеріс.

Құрылтайдың басты мақсаты – халықтың пікірін тыңдап, қоғамдағы өзекті мәселелерді ортақ талқылау арқылы тиімді шешімдер қабылдауға ықпал ету. Сондықтан әр азаматтың сайлауға қатысуы – ел дамуына қосылған нақты үлес.

Сайлау барысында ашықтық пен әділдік қағидаттарының сақталуы қоғамның сенімін арттырып, азаматтық жауапкершілікті нығайтады. Белсенділік танытып, өз таңдауыңызды жасау – болашаққа бейжай қарамайтын азаматтың белгісі.

23 тамыз күні өтетін Құрылтай сайлауына қатысу – ел тағдырына бейжай қарамайтын әрбір азаматтың маңызды қадамы. Бірлігіміз бен жауапкершілігіміз ортақ мақсатқа жетелеп, қоғамның тұрақты дамуына негіз болады.

Қазығұрт аудан әкімдігі.

Қазіргі заманда қоғамдық келісім мен жалпыұлттық бірлікті нығайтуда Қазақстан халқы Ассамблеясының да атқарып отырған қызметі маңызды. Ассамблея – еліміздегі этносаралық келісім мен өзара түсіністікті қамтамасыз ететін бірегей қоғамдық институт. Оның қызметі елдегі тұрақтылықты сақтауға, түрлі этнос өкілдерінің ортақ шаңырақ астында татулықта өмір сүруіне, мәдениеттер мен дәстүрлердің өзара сабақтастығына мүмкіндік береді.

Созақ ауданында да Қазақстан халқы Ассамблеясының қоғамдық келісім мен бірлікті нығайтуға бағытталған бастамаларын ақпараттық сүйемелдеу мен түсіндірудің маңызы зор. Себебі кез келген азамат еліміздегі қоғамдық келісімнің мәнін, оның тарихи негізін және болашақ үшін маңызын түсінуі керек.

Қазақстанның бірлігі – тек этностардың бейбіт қатар өмір сүруімен ғана шектелмейді. Бұл – ортақ Отанға деген сүйіспеншілік, мемлекеттік тілге құрмет, ортақ тарихты қадірлеу, заңды сақтау, бір-біріне қолдау көрсету және ел болашағына деген ортақ жауапкершілік. Әрбір азамат өзін осы елдің толыққанды мүшесі ретінде сезінгенде ғана шынайы қоғамдық келісім қалыптасады.

Созақбай Исаұлының айтуынша, жалпыұлттық бірліктің негізінде ортақ құндылықтар жатыр. Ол – Тәуелсіз Қазақстан, бейбітшілік, туған жер, мемлекеттік тіл, ұлттық мәдениет, отбасы, еңбек және адамгершілік.

«Біздің ортақ үйіміз – Қазақстан. Біз осы елдің болашағына бәріміз бірге жауаптымыз. Қай этносқа жататынымызға қарамастан, бәріміздің Отанымыз бір. Сондықтан бір-біріміздің мәдениетіміз бен дәстүрімізді құрметтей отырып, ортақ құндылықтар төңірегінде топтасуымыз қажет. Елдің жетістігі – әр азаматтың жетістігі. Ал елдің тыныштығы – бәріміздің ортақ аманатымыз. Бұл ойдың астарында үлкен мән бар. Себебі қоғамның бірлігі тек мерекелік іс-шаралармен немесе ресми кездесулермен ғана қалыптаспайды. Бірлік – күнделікті өмірдегі қарым-қатынастан басталады. Көршімен тату болу, өзгенің пікірін құрметтеу, қоғамдық тәртіпті сақтау, қиындыққа тап болған адамға қол ұшын беру – мұның барлығы қоғамдық келісімнің нақты көрінісі. Ал ұлтаралық келісім – Қазақстан қоғамының тұрақты дамуының маңызды негіздерінің бірі. Бірлік бар жерде ғана береке болады. Түрлі этнос өкілдерінің өзара сыйластықта өмір сүруі – еліміздің ең үлкен құндылықтарының бірі. Мұны сақтау үшін қоғамның әр мүшесі өз жауапкершілігін сезінуі тиіс. Әсіресе жастар тәрбиесі бұл бағытта айрықша маңызға ие. Жастар – елдің ертеңі. Олардың бойында отансүйгіштік, еңбекқорлық, білімге құштарлық, үлкенге құрмет, кішіге ізет, ұлттық құндылықтарға адалдық секілді қасиеттер қалыптасуы қажет.», – дейді ол.

Созақбай Исаұлы жастар тәрбиесінде құр сөзден гөрі нақты өнегенің маңызды екенін алға тартады. Оның пікірінше, жас ұрпаққа ақыл айтумен қатар, жақсы іспен үлгі көрсету керек. Өйткені жастар үлкендердің ісіне қарап бой түзейді.

«Жастарға «үлкенді сыйла», «елді құрметте», «бірлік керек» деп айту жеткіліксіз. Мұны өз өмірімізбен көрсетуіміз керек. Үлкендер өзара тату болса, жастар да татулықты үйренеді. Отбасында ата-ана бірлікті дәріптесе, бала да елдің бірлігін қадірлейді. Сондықтан тәрбиенің ең үлкен мектебі – адамның өз ісі. Бұл тұрғыдан алғанда, Созақ ауданындағы аға буынның өнегесі жас ұрпақ үшін үлкен мектеп бола алады. Елдің өткенін білетін, тарихтың талай белесін көрген азаматтардың әңгімесін тыңдау, олардың өмірлік тәжірибесінен сабақ алу – жастардың дүниетанымын кеңейтеді.  «Ата мұра – ұрпаққа аманат» деген ұғымның өзі үлкен жауапкершілікті білдіреді. Атадан қалған мұра – тек материалдық дүние емес. Оның ең қымбат бөлігі – тіл, діл, салт-дәстүр, ұлттық тәрбие, туған жерге деген сүйіспеншілік, елдік сана және адамгершілік қасиеттер. Осыларды кейінгі ұрпаққа жеткізу – бүгінгі буынның басты міндеті.

Созақтың тарихы мен тағылымы да осы құндылықтармен тығыз байланысты. Бұл өлкенің әрбір тауы мен тасы, әрбір тарихи орны – ұрпаққа аманат. Сондықтан туған жердің тарихын білу – ел тарихын білу деген сөз. Өзінің туған жерін қадірлеген адам Отанын да құрметтейді. Бүгінгі таңда ұлттық құндылықтарды сақтау – өткенге ғана қарау емес, болашаққа сеніммен қадам басу. Ұлттық дәстүр мен заманауи дамуды сабақтастыра білу – қоғамның рухани тұрақтылығының кепілі. Біз әлемдік өркениетке ұмтылған кезде өз болмысымызды жоғалтпауымыз керек. Ал ұлттық болмыстың негізі – отбасы, тіл, дәстүр, тарих және елдік сана.» – дейді ол.

Созақбай Исаұлының пайымынша, қоғамдық келісімнің берік болуы үшін адамдар арасында сенім болуы қажет. Сенім бар жерде түсіністік болады. Түсіністік бар жерде татулық орнығады. Ал татулық бар жерде елдің іргесі берік болады. Сондықтан қоғамдағы кез келген мәселені шешуде сабыр, парасат және өзара құрмет басты орында тұруы тиіс. Әсіресе әлеуметтік желілер кең тараған қазіргі кезеңде жалған ақпаратқа ермей, арандатушылық сипаттағы пікірлерге бой алдырмай, әрбір ақпаратқа сын көзбен қарау – азаматтық жауапкершіліктің бір көрінісі.

«Дін саласындағы ақпараттық-түсіндіру жұмыстары да қоғамдық келісімнің маңызды бағыттарының бірі. Дін – адамның рухани дүниесіне әсер ететін маңызды құндылық. Сондықтан діни сауаттылықты арттыру, дәстүрлі діни құндылықтарды дұрыс түсіндіру, жастарды түрлі радикалды және теріс ағымдардың ықпалынан қорғау – ортақ міндет. Бұл бағытта қоғамның барлық институты бірлесе жұмыс істеуі қажет. Созақ ауданында дін саласындағы мемлекеттік саясатты түсіндірумен қатар, қоғамдық және ұлтаралық келісімді нығайту, жалпыұлттық бірліктің қазақстандық моделін насихаттау бағытындағы жұмыстардың да өзара сабақтастықта жүргізілуі маңызды. Себебі бейбітшілік пен тұрақтылық – барша азаматқа ортақ құндылық. Біздің мақсатымыз – ел ішінде алауыздыққа жол бермеу, адамдарды бірлікке шақыру. Дін де, дәстүр де, тәрбие де адамды ізгілікке бастауға тиіс. Жастардың діни сауаты дұрыс қалыптасса, олар түрлі жат ағымдарға ермейді. Ал елдің тарихын, дәстүрін, мәдениетін жақсы білген ұрпақ өзінің кім екенін, қандай елдің азаматы екенін терең түсінеді. Сондықтан рухани тәрбие мен қоғамдық келісім қатар жүруі керек», – деген ой білдіреді Созақбай Исаұлы.

Шын мәнінде, ұлттық құндылықтарды сақтау мен қоғамдық келісім бір-бірінен ажырамайтын ұғымдар. Өз мәдениетін құрметтеген адам өзгенің мәдениетін де сыйлай білуі керек. Өзінің тілін қадірлеген адам өзге тілге де құрметпен қарауы тиіс. Өз тарихын білген азамат басқа халықтың тарихын да бағалай алады. Осындай өзара құрмет қана қоғамда тұрақты келісім орнатады. Бүгінгі таңда еліміздің басты байлығы – бейбітшілік пен тұрақтылық. Бұл құндылықтарды сақтау – тек мемлекетке немесе белгілі бір қоғамдық ұйымдарға ғана жүктелетін міндет емес. Ол – барша қазақстандықтың ортақ жауапкершілігі.

Созақбай Исаұлы Әбдіқұловтың өмірлік ұстанымы да осы елдік мұраттармен үндеседі. Аға буын өкілі ретінде ол жастарға бағыт-бағдар беріп, ел ішіндегі ынтымақты нығайтуға, ұлттық құндылықтарды дәріптеуге, ұрпақтар арасындағы байланысты сақтауға ерекше мән береді.

«Созақ ауданының болашағы да ең алдымен оның тұрғындарының ауызбіршілігіне байланысты. Ауданның әлеуметтік-экономикалық дамуы, жастардың болашағы, ауылдардың өркендеуі, елді мекендердің көркеюі – барлығы да қоғамдағы тұрақтылық пен өзара түсіністікке тікелей қатысты. Сондықтан ел ішінде бірлік пен татулықты сақтау – баршаға ортақ міндет. Әрбір отбасы өз шаңырағында татулықты дәріптесе, әрбір ауылда көршілік сыйластық орнаса, әрбір азамат өзгені құрметтеп, елдің заңын сақтаса, қоғамның іргесі де берік болады. Ата-бабамыздан қалған ең үлкен аманат – елдің тұтастығы. Қазақ халқы талай тарихи қиындықты бірлік пен ынтымақтың арқасында еңсерді. Бүгінгі ұрпақтың міндеті – сол аманатқа адал болу. «Ата мұра – ұрпаққа аманат» деген сөздің мәні де осында. Біз атадан қалған рухани мұраны сақтап қана қоймай, оны заман талабына сай жаңғыртып, келесі ұрпаққа жеткізуіміз керек. Ұлттық құндылықтарды дәріптеу арқылы жастардың бойына елжандылықты сіңіреміз. Ұрпақтар сабақтастығын сақтау арқылы тарихи жадымызды жаңғыртамыз. Ал қоғамдық және ұлтаралық келісімді нығайту арқылы Қазақстанның тұрақты болашағына жол ашамыз.» дейді ел ағасы.

Созақбай Исаұлының сөзімен түйіндесек, елдің ең үлкен күші – оның бірлігінде. Бірлігі жарасқан ел ғана биік мақсаттарға жете алады. Сондықтан әрбір азамат қоғамдағы татулықты сақтауға өз үлесін қосып, елдің болашағына жауапкершілікпен қарауы тиіс.

Созақтың сайын даласында қалыптасқан елдік дәстүр мен ұлттық тәрбие, үлкенге құрмет пен кішіге ізет, ағайын арасындағы сыйластық – бүгінгі ұрпақ үшін баға жетпес мұра. Осы құндылықтарды көздің қарашығындай сақтап, кейінгі буынға жеткізу – баршамыздың ортақ міндетіміз. Өйткені ата мұраны сақтау – өткенді құрметтеу ғана емес, болашаққа жол ашу. Ал елдің бірлігін сақтау – бүгінгі ұрпақтың ең үлкен аманаты.