Біз аз ғана уақыт ішінде ауқымды жұмыс атқардық. Әділетті, Қуатты, Қауіпсіз әрі Таза Қазақстанның іргесін бірге қаладық.
Сіздер еліміздің саяси-экономикалық, әлеуметтік және рухани болмысын өзгерту жолында зор еңбек еттіңіздер. Мемлекеттігімізді нығайтуға елеулі үлес қостыңыздар. Алдағы уақытта да біз бірге ел игілігіне қызмет ете береміз деп сенемін.
Бізді әлі де көп жұмыс күтіп тұр. Ұлт болашағын айқындайтын ең маңызды шаруалар енді басталды. Сондықтан қиындықтан жалтарып немесе табысқа тоқмейілсіп отыруға қақымыз жоқ, уақытымыз да жоқ.
Бірлігімізді бекемдеп, білек сыбанып, іске кірісуіміз керек.
Келесі Парламентіміз халқымыздың ұлттық санасында өзіндік орны бар ұғым, атына заты сай Құрылтай сөзімен аталса, мұны жақсы ырымға балауға болады деп сенемін».
Абаттандыру мен санитарлық жұмыстар – қоршаған ортаны қорғаудың маңызды бағыты. Қоршаған ортаны қорғау – қазіргі қоғамның басты міндеттерінің бірі. Табиғатты сақтау, халықтың өмір сүру сапасын арттыру және экологиялық қауіпсіздікті қамтамасыз ету жолында абаттандыру мен санитарлық жұмыстардың маңызы ерекше. Бұл бағыттағы жүйелі іс-шаралар елді мекендердің көркін жақсартып қана қоймай, адам денсаулығына да тікелей әсер етеді.
«Жасыл Түркістан» коммуналдық мемлекеттік мекемесі қала аумағында абаттандыру, санитарлық тазалықты қамтамасыз ету және тұрғындар қауіпсіздігін сақтау бағытында жоспарлы жұмыстарды жүзеге асыруда.
Атап айтқанда, ойын алаңшалары мен ағаш орындықтарды ретке келтіру және қайта қалыпқа келтіру бойынша бірқатар жұмыстар атқарылды. Алтын бидай көшесіндегі ойын алаңшасы ретке келтіріліп, қайта қалпына келтірілді. Сонымен қатар, Жаңа қала шағынауданы 9-көше, 10/8 үйлер ауласындағы ойын алаңшасында жөндеу және қалпына келтіру жұмыстары жүргізілді. Каскад шағынауданы, 10/5 үйлер ауласында сынған ойын алаңшалары мен орындықтар қайта қалыпқа келтірілді.
Қыс мезгіліндегі қауіпсіз қозғалысты қамтамасыз ету мақсатында қар күреу жұмыстары да жүйелі түрде орындалуда. Жаңа қала шағынауданы 11-көшесінде қар күреу жұмыстары жүргізілді. Саттарханов көшесінде аталған жұмыстар жалғасуда. Қалалық әкімдік аумағында, Қазыбек би көшесінде қар тазалау жұмыстары толық орындалды. Сондай-ақ, Жарылқапов көшесінде қар күреу және тұз шашу жұмыстары атқарылды.
Бұдан бөлек, электр сымдарына тиіп тұрған және апаттық жағдайда тұрған ағаштарды қысқарту жұмыстары жүргізілуде. Абдрахманов көшесі, 3-үй мекенжайында талдарды қысқарту жұмыстары аяқталды. Ықылас көшесі, 3-үй аумағында ағаштарды қысқарту жұмыстары қазіргі таңда жүргізілуде. Ал Құрылысшы көшесі, 17-үй маңында апаттық жағдайда тұрған ағаштар қысқартылды.
Санитарлық жұмыстар қоршаған ортаны қорғауда шешуші рөл атқарады. Оған тұрмыстық қатты қалдықтарды уақытылы жинау, қоқысты сұрыптау, заңсыз қоқыс орындарын жою, көшелер мен қоғамдық орындарды тазалау жатады. Тазалық сақталған ортада жұқпалы аурулардың таралу қаупі азайып, тұрғындардың денсаулығы жақсарады. Санитарлық талаптардың орындалуы экожүйенің тепе-теңдігін сақтауға да септігін тигізеді.
Осы тұста айта кететін жайт, абаттандыру мен санитарлық жұмыстардың тиімділігі тек мемлекеттік органдардың емес, әрбір азаматтың жауапкершілігіне байланысты. Қоршаған ортаны қорғау мәдениетін қалыптастыру, экологиялық сауаттылықты арттыру және ортақ мүлікке ұқыпты қарау – тұрақты дамудың негізгі шарттары. Қоғамдық сенбіліктер, экологиялық акциялар мен еріктілер қозғалысы бұл бағыттағы жұмысты күшейтеді.
Түлкібас ауданының әкімі Асқар Естібаев, жауапты орынбасары және сала мамандарымен «Kazakhstan Silk Road International Holdings Group» ЖШС-нің басшылығы Чан Минг мырза және Ли Хиаонг ханым бастаған инвесторлармен қайта кездесіп, Түлкібас ауданы Иірсу елдімекені маңынан әлемдік деңгейдегі экологиялық-этнографиялық демалыс аймағын құру жобасының негізгі тұстарын талқылады.
Маңызды басқосуда екі тарап туристік аймаққа қажетті инфрақұрылымды тарту сынды тұстарын пысықтап, жобаның алғашқы кезенің жүзеге асыру барысын нақтылады.
Чан мырзаның айтуынша жауапты мамандардың біршамасы жобаның есеп-қисабын толық жетілдіру мақсатында қазірден бастап дәстүрлі Қытай жаңа жылы саналатын Көктем мерекесіне қарамастан тиісті жұмыстарды жүргізілетінін жеткізді. Ал, жалпы жобаның алғашқы кезенің, яғни құрылыс жұмыстарын наурыз айында бастап, жүзеге асыруды көздеп отыр. Алғашқы кезеңде құрылыс жұмыстарына шамамен 7 млн. АҚШ доллары жұмсалады деп күтілуде. Аталмыш жұмыстар бекітілген жоспарға сай жүргізілсе, ағымдағы жылдың маусым-шілде айларында, яғни туристік науқан қызған шағында сынақ түрінде туристерді қабылдау жұмыстары атқарылатын болады.
Түлкібас ауданының басшысы жобаның негізгі тұстарын инвесторлармен егжей-текжейлі талқылап болған соң, аудан әкімдігі тарапынан қадамдық жоспар бекітіліп, сол бойынша тиісті жұмыстар атқарылатындығын жеткізді.
Айта кетерлік, Иірсу елді мекенінің маңынан түсетін туристік аймақта, жоба аясында шатқал үстінен көру алаңы, 4 жұлдызды қонақ үй, киіз үйлер мен гленплинг қалашығы, атпен және жаяу серуендеу орындары, ұлттық ойындар алаңы, фотозоналар мен гүл ландшавын құру сынды бағыттар қарастырылған.
« – Қазақта «Келісіп пішкен тон келте болмас» немесе «Жеті рет өлшеп, бір рет кес» -деген тамаша сөз бар. Осы орайда, біз аталған жобаны жан-жақты талқылап, нақты шешімдерді қарастырып жатырмыз. Екі жақты келісім де өз деңгейінде өтуде. Инвестициялық бастамаларға қашанда қолдау көрсетеміз» – Түлкібас ауданының әкімі Асқар Естібаев.
Түркістан облысының әкімі Нұралхан Көшеровтің тапсырмасына сәйкес аудан әкімі Серік Мамытов ауыл шаруашылығы саласындағы өзекті мәселелердің бірі – ағын су арналарының қазіргі жағдайын зерделеу мақсатында жауапты сала басшыларымен бірге су өткізу қабілетін арттыру мақсатында тазарту жұмыстары жүргізілген каналдарды аралап, орындалған жұмыстардың сапасына зерделеу жүргізді. Механикалық тазалау барысында канал табандарында жиналған лай-қоқыстар, шөгінділер мен бөгеттер алынған. Бұл өз кезегінде ағын судың еркін өтуіне және егістік алқаптарды сумен уақытылы қамтамасыз етуге үлкен мүмкіндік береді.
Сондай-ақ аудан басшысы көршілес Өзбекстан Республикасынан келіп жатқан ағын судың көлемін де көрді. Мамандардың мәліметінше, қазіргі таңда су қалыпты деңгейде, вегетациялық кезеңде су ресурстарын тиімді пайдалану мен қатаң бақылау қажеттігі атап өтілді.
« – Вегетациялық кезең – ауыл шаруашылығы үшін ең жауапты әрі шешуші уақыт. Бұл кезеңде егіс алқаптарының өнімділігі тікелей су ресурстарының жеткіліктілігі мен оны дұрыс басқаруға байланысты. Климаттың өзгеруі, жауын-шашын мөлшерінің азаюы және су көздерінің шектеулілігі жағдайында суды тиімді пайдалану мен қатаң бақылау – уақыт талабы. Соңғы жылдары көптеген өңірлерде су тапшылығы айқын сезіле бастады. Өзен-көлдер деңгейінің төмендеуі, трансшекаралық өзендерге тәуелділік және суару жүйелерінің тозуы ауыл шаруашылығына елеулі қауіп төндіруде. Әсіресе вегетациялық кезеңде судың ысырап болуы егіннің күйіп кетуіне, өнім көлемінің азаюына әкелуі мүмкін. Сондықтан, су ресурстарын қорғау және тиімді пайдалану үшін заманауи және ғылыми негізделген тәсілдерді енгізу қажет. Яғни, тамшылатып және жаңбырлатып суару әдістері суды 30–50 пайызға дейін үнемдеуге мүмкіндік береді. Ал, суару кестесін сақтау – әр дақылдың биологиялық ерекшелігіне сәйкес нақты уақыт пен мөлшерде суару маңызды. Каналдар мен арықтарды жаңғырту – бетондау, қаптау арқылы судың жерге сіңіп кетуін азайту. Цифрландыру – су шығынын есептейтін автоматтандырылған жүйелерді қолдану маңызды шешімдер болып табылады.
Суды үнемді пайдалану тек ауыл шаруашылығы өнімінің тұрақтылығын емес, сонымен қатар экологиялық тепе-теңдікті сақтауға да ықпал етеді. Вегетациялық кезеңде су ресурстарын тиімді пайдалану мен қатаң бақылау – ауыл шаруашылығының тұрақты дамуының негізгі кепілі. Бұл бағытта мемлекет, жергілікті билік және шаруалар бірлесе әрекет еткенде ғана нақты нәтиже болады. Әрбір тамшы судың қадірін білу – бүгінгі ғана емес, болашақтың да аманаты.» – деді аудан әкімі.
Серік Үсенұлы су тапшылығының алдын алу, ысырапшылдыққа жол бермеу және шаруалардың сұранысын толық қамтамасыз ету мақсатында жауапты мекемелерге каналдарды жүйелі түрде тазалау жұмыстарын жалғастыру, гидротехникалық нысандардың техникалық жағдайын тұрақты бақылауда ұстау, су бөлу кестесін әділ әрі тиімді ұйымдастыру секілді нақты тапсырмалар берді.
Сонымен қатар су шаруашылығы саласында заманауи су үнемдеу технологияларын енгізудің маңыздылығына, шаруалармен түсіндіру жұмыстарын күшейтуге, стратегиялық маңызы бар ресурсты ұқыпты әрі жауапкершілікпен пайдалануға бағытталған нақты шараларды іске асыру жолдары сөз болды.
Түркістан облысы, Ордабасы ауданына қарасты Төрткөл ауылдық округінде орналасқан «ТӨРТКҮЛ-ҚҰС» ауыл шаруашылығы өндірістік кооперативінде халықаралық маңызы бар ірі аграрлық жоба іске асырылуда. Аталған жоба өңірдегі құс шаруашылығын жаңа деңгейге көтеруге, сондай-ақ халықаралық озық тәжірибені жергілікті өндіріс үдерісіне енгізуге бағытталған.
Жоба аясында Түркістан облысына Senior Experten Service (SES) халықаралық бағдарламасы шеңберінде Германия Федеративтік Республикасынан жоғары білікті аграрлық сарапшы арнайы шақырылды. Бұл жергілікті кәсіпкерлер үшін әлемдік деңгейдегі тәжірибені тікелей өндіріс орнында меңгеруге мүмкіндік беретін маңызды қадам болып отыр.
Халықаралық жобаны жүзеге асыруда «TÚRKISTAN» кәсіпкерлерге қызмет көрсету орталығы шешуші рөл атқарды. Орталық тарапынан SES халықаралық ұйымымен өзара байланыс орнату, қажетті құжаттарды рәсімдеу, шетелдік сарапшыны тарту және жобаны үйлестіру бойынша кешенді жұмыстар атқарылды.
Осыған орай, «TÚRKISTAN» кәсіпкерлерге қызмет көрсету орталығының басшысы Берік Кенжебаев өндіріс орнына арнайы барып, жоба барысымен және халықаралық сарапшының жұмысымен танысты. Кездесу барысында ол мұндай бастамалардың өңір кәсіпкерлері үшін стратегиялық маңызға ие екенін атап өтіп, Ордабасы ауданы ғана емес, Түркістан облысының барлық аудандарындағы кәсіпкерлерге бизнес бастау, өндірісті кеңейту және халықаралық бағдарламаларға қатысу бағытында жан-жақты қолдау көрсетуге дайын екенін жеткізді.
Ауыл шаруашылығы өндірістік кооперативі 2023 жылдан бастап бройлер тауықтарын өсіру, өндіру және қайта өңдеу бағытында тұрақты жұмыс істеп келеді. Қазіргі таңда кәсіпорында 5 адам тұрақты жұмыспен қамтылған. Өндіріс үдерісі толықтай жергілікті шикізатқа негізделген. Кооператив COBB-500 тұқымды тәуліктік балапандарды пайдаланып, құстарды отандық жем-шөппен азықтандырады.
Кәсіпорын басшылығы SES бағдарламасы аясында халықаралық сарапшының тәжірибесін пайдалана отырып, бірқатар стратегиялық міндеттерді жүзеге асыруды жоспарлап отыр. Атап айтқанда, тәуліктік балапандардың өміршеңдігін арттыру, 100 пайыз қалдықсыз өндіріс жүйесін енгізу, яғни құс етінен бөлек қауырсын, көң және ішкі ағзаларды толық өңдеу арқылы қосымша өнім көздерін қалыптастыру көзделген. Сонымен қатар, жылдық өндіріс көлемін 800 тоннаға дейін ұлғайту, өнімнің өзіндік құнын төмендету және болашақта экспорттық нарықтарға шығу мүмкіндіктерін қарастыру негізгі мақсаттардың қатарында.
Германиядан келген халықаралық аграрлық сарапшы Эберхард Вестхаузер кәсіпорын басшылығымен алғашқы жұмыс кездесулерін өткізіп, өндірістік үдерістермен жан-жақты танысты. Неміс маманы Түркістан өңірінде екі апта бойы жұмыс істеп, құс шаруашылығын дамыту бағытындағы кәсіби тәжірибесімен бөліседі.
Эберхард Вестхаузер – аграрлық ғылымдар саласында көпжылдық тәжірибесі бар, мал және құс шаруашылығы бойынша халықаралық деңгейде танылған сарапшы. Ол ірі қара, шошқа, ешкі және бройлер тауықтарын өсіру мен азықтандыру саласында терең білімге ие. Бұған дейін Кения, Танзания, Косово, Молдова және Уганда елдерінде SES бағдарламасы аясында 17-ден астам халықаралық жобада жұмыс істеп, фермерлерді оқыту мен ауыл шаруашылығы кәсіпорындарының өндірістік тиімділігін арттыруға елеулі үлес қосқан.
Аталған жоба Түркістан облысының агроөнеркәсіптік әлеуетін арттырумен қатар, өңірді отандық және халықаралық нарықта бәсекеге қабілетті ауыл шаруашылығы өнімдерін өндіретін аймақ ретінде қалыптастыруға ықпал етпек.
Түркістан облысының әкімі Нұралхан Көшеровтің тапсырмасы аясында Сауран ауданында инвестиция тарту, жаңа жобаларды жүзеге асыру арқылы жұмыссыздық деңгейін төмендету және бірқатар жобаларды жүзеге асыру қолға алынған. Осы мақсатта Сауран ауданының әкімі Мақсат Таңғатаров «EURO SANDWICH PANEL» жауапкершілігі шектеулі серіктестігі мен Қытай Халық Республикасының CHONGQING JINJIAHANG CONSTRUCTION ENGINEERING CO., LTD компаниясы өкілдерімен ресми кездесу өткізді.
Кездесуде Сауран ауданы аумағында жүзеге асырылып жатқан ірі инвестициялық жобаның барысы және оны одан әрі дамыту мәселелері талқыланды. Нақтырақ айтқанда, «EURO SANDWICH PANEL» ЖШС-не Шаға ауылдық округі аумағынан көлемі 2,5 гектар жер телімі бөлініп, бұл аумақта сэндвич-панельдер мен металл конструкцияларын өндіретін зауыт, сондай-ақ электр қауіпсіздігін қамтамасыз етуге арналған құрылғыларды шығаратын өндіріс орнының құрылысы жүргізіліп жатыр.
Электр қауіпсіздігін қамтамасыз етуге арналған құрылғылар 7 жыл көлемінде эксперименттік сынақтан өткен, жоғары сенімділігімен және қауіпсіздік талаптарына толық сәйкестігімен ерекшеленеді. Қазіргі таңда бұл өнім әлем бойынша тек Қытай Халық Республикасында ғана өндірілуде. Алдағы уақытта аталған технология Сауран ауданында да өндіріліп, ішкі нарықпен қатар экспорттық әлеуетті арттыруға мүмкіндік береді.
Жобаның негізгі мақсаты – құрылыс және өнеркәсіп салаларын отандық сапалы өніммен қамтамасыз ету, импортты алмастыру, өндірістегі қауіпсіздік деңгейін көтеру және өңірдің индустриялық әлеуетін нығайту. Жалпы инвестициялық құны 6,0 млрд теңгені құрайтын жоба толық іске қосылған жағдайда 65-70 жаңа тұрақты жұмыс орнын ашу көзделген.
Кездесу барысында аудан әкімі Мақсат Таңғатаров жобаның стратегиялық маңыздылығына тоқталып, электр қауіпсіздігіне арналған заманауи құрылғылардың Сауранда шығарылуы – аудан үшін үлкен жетістік екенін жеткізді. Сондай-ақ әкімдік тарапынан инвесторларға жан-жақты қолдау көрсетілетінін атап өтті. Атап айтқанда, инвестициялық жобаларды іске асыру барысында қажетті инфрақұрылыммен қамтамасыз ету, рұқсат құжаттарын рәсімдеуге жәрдемдесу және әкімшілік кедергілерді азайту бағытында нақты шаралар қабылданады.
Сонымен қатар, инвесторлармен тұрақты байланыс орнатылып, олардың ұсыныс-пікірлері ескерілетіні, ал туындаған мәселелер жедел әрі жүйелі түрде шешілетіні айтылды. Ал, аталған инвестициялық жоба Сауран ауданының әлеуметтік-экономикалық дамуына серпін беріп, жаңа жұмыс орындарын ашуға, өндірістік инфрақұрылымды дамытуға және қауіпсіздікке бағытталған заманауи технологияларды өңірге енгізуге мүмкіндік береді.
Түркістан облысында тұрғындарды еңбекпен қамту, өндіріс орындарын ашу бағытында ауқымды жұмыс жүріп жатыр. 2025 жылы облыс тұрғындарын сапалы жұмыс орындарымен қамту арқылы жұмыссыздық деңгейін төмендетуге бағытталған «Өңірлік жұмыспен қамту картасы» бекітілген. Жұмыспен қамту картасы шеңберінде 130 769 жаңа жұмыс орнын құру көзделген. Бұл республика бойынша құрылатын жұмыс орындарының 14,5 пайызын құрап, ең жоғары көрсеткіш болып қалыптасты. 2025 жылдың қорытындысымен 147 719 азамат жұмыспен қамтылып, жоспар артығымен орындалған. Оның ішінде 100 046 тұрақты жұмыс орны құрылса, 47 673 уақытша жұмыс орны жасақталған. Жұмыссыздық деңгейі 4,6%-ды құрап, төмендеген.
Аталған салаға қатысты мәселелер мен жоспарлар облыс әкімі аппаратының апталық мәжілісінде талқыланды. Өңір басшысы Нұралхан Көшеров жұмыспен қамту және өндіріс орындарын ашу ең негізгі міндеттер екенін кезекті рет ескертіп, жауапты басқарма басшысы мен аудан, қала әкімдеріне жұмысты күшейтуді тапсырды.
– «Өңірлік жұмыспен қамту картасы» аясындағы міндеттерді сапалы орындауды, жұмысқа орналасқан азаматтарға міндетті зейнетақы жарналарының аударылуын қадағалауды тапсырамын. Субсидияланатын жұмыс орындарына, жастар практикасы, әлеуметтік жұмыс орындары мен «Күміс жас» жобасына тартылған тұрғындар нақты жұмыспен қамтылуы тиіс. Аудан, қала әкімдері, жауапты басқарма өңірдегі кәсіпорындарды түгел аралап, штаттық кестесін, қанша жұмыс орны қажет екенін анықтап, халықты еңбекке тартыңыздар. Жұмысты үйлестіріңіздер. Тұрғындарды қолдауымыз керек, түсіндіру жұмыстарын жандандырыңыздар, – деді Нұралхан Көшеров.
Мәжілісте жұмыспен қамту жоспарын орындамаған аудан, қала әкімдерінің есептері тыңдалып, тиісті ескертулер берілді.
Жұмыспен қамтуды үйлестіру және әлеуметтік бағдарламалар басқармасының басшысы Мекенхан Қозыханұлының айтуынша, еңбекпен қамту 5 бағыт бойынша жүргізілген. 4074 жұмыс орны ұлттық жобалар мен жеке инвестициялық жобалар шеңберінде құрылса, 22 595 жұмыс орны «10 мың тұрғынға 100 жаңа жұмыс орны» шеңберінде ашылған. 45 мың адам субсидияланатын жұмыс орындарына жіберілсе, 57 221 адамды еңбек нарығындағы бос орындар арқылы жұмысқа орналастыру және 1793 адамға грант беру көзделіп, тиісті индикатор орындалған.
Ал 2026 жылға арналған «Өңірлік жұмыспен қамту картасы» аясында 74 516 адамды (54481 – тұрақты, 20035 – уақытша) жұмыспен қамту жоспарлануда. Оның ішінде 40 588 адам бос жұмыс орындарына жолданса, 2472 тұрғын ұлттық жобалар негізінде ашылатын жұмыс орындарына тартылады. 11476 тұрғын «10 мың тұрғынға 100 жаңа жұмыс орны» жобасы, ал 18530 адам субсидияланатын жұмыс орындары арқылы еңбекке тартылады деп жоспарланған. 1450 адамға грант беру межеленген.
Тұрғындар облыстағы инфрақұрылымдық жобаларды жүзеге асыру, өнеркәсіп және кәсіпкерлік, туризм, ауыл шаруашылығы салаларына жолданады. Оның ішінде «Түркістан мақта агроөнеркәсіптік кешені» және «JASYL SUYQ QAZAQSTAN» компанияларына тағы мыңнан астам тұрғынды жұмысқа орналастыру көзделіп отыр.
Түркістанда қазақ-өзбек бірлескен жұмыс топтарының отырыстары өтіп, Сырдария өзенінде автоматтандырылған гидробекеттер орнату, мемлекетаралық каналдарды жөндеу және су ресурстарын қорғау мен үнемдеу бойынша тәжірибе алмасу мәселелері талқыланды.
Түркістан қаласында Қазақстан Республикасы мен Өзбекстан Республикасы арасындағы су қатынастарының барлық бағыты бойынша екіжақты ынтымақтастықты тереңдету бойынша ұсыныстар әзірлеу үшін бірлескен жұмыс тобының XIII отырысы, сондай-ақ Орталық Азияда өзара тиімді әрі орнықты су-энергетикалық ынтымақтастық тетігін әзірлеу жөніндегі күш-жігерді үйлестіруге бағытталған қазақ-өзбек бірлескен жұмыс тобының II отырысы өтті.
Отырыстарға ҚР Су ресурстары және ирригация министрі Нұржан Нұржігітов, Өзбекстан Республикасының Су шаруашылығы министрі Шавкат Хамраев және Түркістан облысының әкімі Нұралхан Көшеров қатысты.
Тараптар екіжақты су және су-энергетикалық ынтымақтастық салаларындағы негізгі мәселелерді талқылады. Атап айтқанда, «Достық» мемлекетаралық каналын тазалау және жөндеу жұмыстары қаралды. Былтыр Қазақстан тарапы каналдың учаскелерінде, еңістерінде, коллекторларында және бас құрылысжайларында механикалық тазалау жұмыстарын жүргізді.
Сонымен қатар нысанның бас және бөгейтін құрылысжайларындағы қақпаларға жөндеу жұмыстары жасалды. Биыл «Достық» каналын механикалық тазалау және бас құрылысжайларын жөндеу жұмыстары жалғасын табады.
Тараптар сондай-ақ су үнемдеу технологияларын енгізу және пайдалану саласында тәжірибе алмасуға келісті. Бұдан бөлек, Сырдария өзенінде он автоматтандырылған гидробекет орнату жобасын іске асыруды бастау жоспарланып отыр. Әр мемлекет аумағында бес-бестен нысан салынады.
Германияның Халықаралық ынтымақтастық қоғамының (GIZ) қолдауымен әзірленген бұл жоба трансшекаралық суды бөлудің ашықтығы мен дәлдігін қамтамасыз етуге бағытталған. Қазіргі уақытта GIZ осы жоба бойынша техникалық тапсырманы әзірлеуді аяқтады.
«Былтыр екі мемлекеттің басшыларының қатысуымен біз трансшекаралық су нысандарын бірлесіп басқару және ұтымды пайдалану туралы үкіметаралық келісімге қол қойдық. Бұл құжат көпжылдық жұмыстың нәтижесі болды, соның арқасында трансшекаралық суды басқарудың келісілген тәсілдерін әзірлеу мүмкін болды. Сондықтан бұл келісімнің қабылдануы тарихи маңызға ие оқиға болды. Келісім Орталық Азиядағы су дипломатиясын дамытуға елеулі үлес қосады және болашақтағы өзара тиімді ынтымақтастықтың негізгі бағыттарын нақты айқындайды. Біз екіжақты әріптестікті тату көршілік, өзара құрмет және сындарлы диалог рухында одан әрі дамытуға ниеттіміз», – деді Су ресурстары және ирригация министрі Нұржан Нұржігітов.
Министр сондай-ақ Мемлекет басшысы Қасым-Жомарт Тоқаевтың БҰҰ аясында Халықаралық су ұйымын құру және Орталық Азия елдерінің су пайдалану жөніндегі Негіздемелік конвенциясын әзірлеу туралы бастамаларын атап өтіп, олардың өңірлік су ынтымақтастығын ұзақ мерзімді тұрғыда дамыту үшін ерекше маңызды екенін жеткізді.
Түркістан облысының әкімі Нұралхан Көшеров кеңейтілген отырысқа шығарылып отырған мәселелер мен ұсыныстар алдағы уақытта өз шешімін тауып, екі ел арасындағы ынтымақтастықты одан әрі нығайтуға ықпал ететініне сенім білдірді.
– Түркістан облысы – ауыл шаруашылығы дамыған ірі аграрлық өңір. Облыстағы суармалы жерлердің жалпы көлемі 575 мың гектарды құрайды, бұл республикадағы барлық суармалы жерлердің төрттен біріне тең. Осыған байланысты суармалы сумен қамтамасыз ету мәселесі өңіріміз үшін айрықша маңызды. Екі ел арасындағы трансшекаралық су ресурстары өңірлердің әлеуметтік-экономикалық дамуына, ауыл шаруашылығының өркендеуіне және халықтың тұрмыс деңгейіне тікелей әсер етеді. «Достық» магистральдық каналы арқылы облыстың оңтүстік аудандары 140 мың гектар алқапта сумен қамтамасыз етіледі. Вегетациялық кезеңде каналдар арқылы қажетті су көлемінің тұрақты әрі уақтылы берілуі өңірдің ауыл шаруашылығы үшін шешуші маңызға ие. Облыс аумағында агроөнеркәсіптік кешен саласында ауқымды жобалар іске асырылуда, егіс алқаптарын әртараптандыру және су үнемдеу технологияларын енгізу бойынша нақты шаралар қабылдануда, – деді Нұралхан Көшеров.
Сонымен қатар облыс әкімі Сайрам ауданында қуаты 1000 МВт-ты құрайтын бу-газ қондырғысы базасында электр станцияның құрылысы жүріп жатқанын атап өтіп, осы бағытта ауқымды жобалар қолға алынғанын жеткізді.
Басқармаға қарасты коммуналдық мемлекеттік мекемелердің қызметін үйлестіру мақсатында облыстық табиғи ресурстар және табиғат пайдалануды реттеу басқармасының басшысы Ғалымжан Тулепов Шардара ауданындағы «Шардара орман және жануарлар әлемін қорғау жөніндегі» мемлекеттік мекемесіне жұмыс сапарымен барды.
Іссапар барысында тұқымбақтағы көшеттердің сапасына бақылап, биылғы жылғы көктемгі ағаш отырғызу науқанына дайындалған көшеттердің жай-күйі зерделенді. Сонымен қатар мекеменің материалдық-техникалық базасының жұмысқа жарамдылық күйі тексеріліп, тиісті түгендеу жұмыстары атқарылды.
Бұдан бөлек, мекеменің 2026 жылға арналған жұмыс жоспары мен өндірістік жоспарлары қаралып, алдағы кезеңге белгіленген міндеттердің орындалу барысы талқыланды. Сапар қорытындысы бойынша бірқатар нақты тапсырмалар беріліп, жұмыстарды жүйелі түрде жалғастыру қажеттігі атап өтілді.
