Түркістан облысы Бәйдібек ауданы Ағыбет ауылдық округіне қарасты Жұлдыз елді мекеніне табиғи газ берілді. Салтанатты шараға аудан әкімінің міндетін атқарушы Нұрпеис Ақбаев қатысып, тұрғындардың қуанышын бөлісті. Ізгі тілегін жеткізіп, бұл жұмыстар Мемлекет басшысының халықтың әл-ауқатын арттыруға бағытталған саясатының жарқын көрінісі екенін атап өтті.

Сонымен қатар салтанатты шараға Түркістан облысының Энергетика және тұрғын үй-коммуналдық шаруашылық басқармасы басшысының орынбасары Роза Сариева, аудан әкімдігінің өкілдері, жергілікті тұрғындар, жобаны жүзеге асырған мердігер мекеме өкілдері мен «QazaqGaz Aimaq» АҚ Түркістан өңірлік филиалының мамандары қатысып, тұрғындарды құттықтады.

« – Құрметті аудан тұрғындары! Сіздерді ел игілігі жолындағы үлкен жетістік – елді мекендеріміздің табиғи газға қосылуымен шын жүректен құттықтаймыз! Бұл қуанышты жаңалық әр отбасының тұрмыс сапасын арттырып, үйдің жылуын, тіршіліктің жайлылығын қамтамасыз ететіні сөзсіз. Көгілдір отынның келуі – әлеуметтік жағдайдың жақсаруына, экологиялық ахуалдың оңалуына және ауданымыздың экономикалық дамуына серпін береді. Бұл – мемлекетіміздің халық қамын ойлаған нақты істерінің нәтижесі. Әр шаңыраққа береке, молшылық, амандық тілейміз! Үйлеріңіз әрдайым жылы, өмірлеріңіз шуақты болсын!» – деді, аудан әкімінің міндетін атқарушы Нұрпеис Ақбаев

Жобаны жүзеге асырған – «KazBuildCo» ЖШС. Газ құбырының ұзындығы – 10,700 шақырым. Нәтижесінде аудандағы жалпы 50 елді мекеннің 39 елді мекені (78%), 48 221 халықтың 43 778-і (90,8%) табиғи газбен қамтылды. Бұдан бөлек, биыл 8 елді мекенді (Ақжар, Қаратас, Тұрақты, Алмалы, Қошқарата, Кеңсай, Ақтас, Шұқыршақ) газдандыру құрылысы жүргізілуде. Бұл жобалар толық іске асқан жағдайда, Бәйдібек ауданы 100 пайыз табиғи газбен қамтылады.

Айта кетейік, бұған дейін аудандағы Жыланды, Жоғарғы Боралдай, О. Тайманов, Теректі елді мекендері табиғи газға қосылған болатын. Бұл ауылдарға газ беру салтанатты түрде іске қосылды және жергілікті тұрғындар үшін көгілдір отын қолжетімді болды. Ал, Қазата елді мекеніне газ тарту жұмыстары 2025 жылдың көктемінде арнайы мердігер «Birlik Stroy1» ЖШС арқылы жүзеге асырылды. Бұл жерде 10,335 км газ құбыры жүргізіліп, 173 абонентке газ берілді. Бұл газдандыру жобалары тұрғындардың тұрмыс сапасын жақсартады, жылыту шығындарын азайтады және әлеуметтік-экономикалық жағдайды нығайтуға ықпал етеді.

Түркістан облысы еліміздегі агроөнеркәсіп саласында көш бастап тұрған өңір. Республика бойынша жалпы өндірілетін өнімнің 13 пайызы облысқа тиесілі. 2025 жылдың қорытындысымен 1 трлн 226 млрд теңгенің өнімі өндірілген. Сондай-ақ, облыс – экспортқа шығарылатын ірі қара мал етінің 80 пайызын, қой етінің 75 пайызын қамтып отыр. Бүгінде ет кластерін одан әрі дамыту бағытында құны 49 млрд теңгені құрайтын 7 инвестициялық жоба жүзеге асырылуда. Бұл жұмыстар толық аяқталған соң қосымша 35 мың тонна ет өндіріліп, экспорт көлемі 2 есеге ұлғаймақ. Бұл жайында Түркістан облысының ауыл шаруашылығы басқармасы басшысының орынбасары Әлібек Плалов брифингте мәлімдеді.

«2025 жылы ауыл шаруашылығы дақылдары 907 мың гектарға егіліп, өткен жылға қарағанда 34 мың гектарға артты. Ал, көкөніс және бақша алқаптары 117,5 мың гектарға егілді. Нәтижесінде 695 мың тонна дәнді дақыл, 54 мың тонна майлы дақыл, 1,5 млн тонна көкөніс пен картоп, 1,7 миллион тонна бақша өнімі, 5 миллион тонна мал азықтық дақыл және 428 мың тонна мақта жиналды. Сондай-ақ, облыстағы су үнемдеу технологияларын қолданатын алқап саны 59 мың гектарға артып, жалпы көлемі 114 мың гектарға жетті. Нәтижесінде ағын су 30-50 пайызға үнемделіп, өнділік 20-30 пайызға артты»- деді спикер.

Биыл өңірде мақта өнімін жинау бойынша соңғы 18 жылдағы рекордтық көрсеткішке қол жеткізілді. Орташа өнімділік гектарына 30 центнерді құрап, жалпы 428 мың тонна шитті мақта жиналған. Сонымен қатар, мақта өніміне экспорттық тәуелділікті жою, дайын өнім секторына кешенді өту бағытында өңірде мақта тоқыма кластерін құру жобасы басталды. Бұл бағытта құны 201 млрд. теңгені құрайтын 5 жоба іске асырылады. Нәтижесінде 7 мыңнан астам жұмыс орнын құру көзделіп отыр.

Сонымен қатар, Әлібек Әбдіхалықұлы өңірдегі жылыжайлар көлемінің артқанын да тілге тиек етті. Өткен жылы жалпы көлем 75 гектарға өсіп, 1 715 гектарды құраған. Бұл жұмыстар өңірдің аталған саладағы үлесін 76 пайызға жеткізіп отыр. Айта кетейік, 2025 жылы жылыжайлардан 150 мың тоннадан астам көкөніс өнімі, 550 тонна банан, 3,2 мың тонна лимон мен 13 мың тонна құлпынай өндірілген. Облыстың ауыл шаруашылығы саласына инвестиция тарту бойынша да республикада көш бастап тұр. 2025 жылы салаға 246 млрд теңге қаржы тартылған. Ал, «Ауыл аманаты» жобасы аясында 7,4 млрд теңге бөлініп, 3,5 млрд теңгеге 401 жоба қаржыландырылған.

Түркістан облысы – республика аумағында аграрлық саласы қарқынды дамып келе жатқан жетекші өңірлердің бірі. Аймақтағы суармалы егістік жерлердің жалпы аумағы 575 мың гектарды құрайды. Бұл көрсеткіш елдегі барлық суармалы алқаптардың шамамен төрттен біріне тең. Сондықтан өңірді суармалы сумен үздіксіз әрі тиімді қамтамасыз ету мәселесі аса маңызды саналады.

Трансшекаралық су ресурстары аймақтың әлеуметтік-экономикалық дамуы мен ауыл шаруашылығы өндірісінің тұрақтылығын қамтамасыз етудегі маңызды факторлардың бірі болып табылады.

Бұл тұрғыда «Достық» магистральдық каналы айрықша маңызға ие. Аталған су арнасы арқылы Түркістан облысының оңтүстік бөлігіндегі аудандарда 140 мың гектардан астам ауыл шаруашылығы алқабы сумен қамтамасыз етіледі. Вегетациялық кезең кезінде каналдар арқылы судың қажетті көлемде дер кезінде жеткізілуі өңірдің егін шаруашылығы үшін басты шарттардың бірі болып табылады.

Міне, осы мәселелер Түркістан қаласында өткен Қазақстан мен Өзбекстан арасындағы су қатынастарына арналған жиында Өзбекстан Республикасы Су шаруашылығы министрі Шавкат Хамраев, Қазақстан Республикасы Су ресурстары және ирригация министрі Нұржан Нұржігітов пен Түркістан облысының әкімі Нұралхан Көшеровтің қатысуымен жан-жақты талқыланды.
Кездесу барысында екі ел арасындағы су және су-энергетикалық ынтымақтастықты нығайту, трансшекаралық су көздерін тиімді пайдалану және «Достық» магистральдық каналын тазалау мен жөндеу мәселелері қаралды.

Тараптар сондай-ақ су үнемдеу технологияларын енгізу және пайдалану саласында тәжірибе алмасуға келісті.
Бұл бағыттағы жұмыстар халық қалаулыларының назарынан да тыс қалмаған. Мәслихат депутаттары Жетісай мен Мақтаарал аудандарында сала мамандарының, шаруалардың қатысуымен кездесулер өткізіп, каналдардың жай-күйімен танысты.

Мақсат – жазғы су тапшылығының алдын алу, каналдардың жай-күйін бақылау және сор шаю жұмыстарын уақытылы ұйымдастыру.

Атап айтқанда, Жетісай ауданында аудандық мәслихат төрағасы Медет Қасымов «Достық» мемлекетаралық магистральдық каналынан тарайтын К-21 және К-21-4 каналдарының жағдайымен танысып, тиісті түсіндіру жұмыстарын жүргізді. Бұл каналдар арқылы Жаңа ауыл және Жылы су ауылдық округтеріндегі егістік алқаптар суарылады. Қазіргі таңда «Достық» каналында жеткілікті көлемде су болғанымен, қысқы сор шаю мақсатында шаруалар тарапынан сұраныстың төмен екені байқалған.
Осыған байланысты шаруаларға «Достық» каналы арқылы келетін суды тиімді пайдалану, «ҚазСушар» РМК-мен келісім-шарттарды дер кезінде рәсімдеу және сор шаю жұмыстарын жандандыру қажеттігі түсіндірілді.

Сонымен қатар, К-21-4 каналына насос орнату, коллекторларды механикалық тазалау мәселелері де назарға алынды.
Дәл осындай кездесуді Мақтаарал ауданында облыстық мәслихат депутаты Жарқынбек Қанаев өткізді. Жиында су тапшылығының алдын алу, шаруалардың суға деген сұранысын толық қамтамасыз ету жолдары талқыланды. Сонымен қатар, каналдарды жүйелі тазалау және сор шаю жұмыстарын тиімді ұйымдастыру бойынша нақты ұсыныстар берілді.

Қазіргі таңда «ҚазСушар» РМК-ның Түркістан филиалы Жетісай ауданында 57,3 мың гектар, ал Мақтаарал ауданында 43,5 мың гектар суармалы алқапта сор шаю жұмыстарын белсенді жүргізіп жатыр. Жоспарға сәйкес, жұмыстар наурыз айының алғашқы онкүндігінде аяқталуы тиіс. Мамандардың айтуынша, сор шаю – жердің тұздануына қарсы күрестегі ең тиімді әдістердің бірі.

Жалпы, Түркістан облысында су қауіпсіздігін қамтамасыз ету, «Достық» магистральдық каналының әлеуетін тиімді пайдалану және шаруаларды су үнемдеуге бағыттау жұмыстары депутаттардың тікелей қатысуымен кешенді түрде жүзеге асырылуда. Бұл қадамдар өңірдің аграрлық әлеуетін сақтап қана қоймай, оның болашақтағы тұрақты дамуына берік негіз қалайды.

Түркістан облыстық мәслихатының төрағасы Н.Әбішов

Облыс әкімі Нұралхан Көшеровтің төрағалығымен сәулеттік жобалар жөніндегі кеңестің кезекті мәжілісі өтті. Кеңес жұмысына сала басшылары, жауапты басқарма өкілдері мен инвесторлар қатысты. Өңір басшысы әрбір жобаны егжей-тегжейлі сараптап, сарапшылардың ұсыныстары мен пікірлерін тыңдады.

– Арнайы экономикалық аймақта салуға ұсынылған жобаларды қолдаймыз. Бірақ жауапты басқарма мен мамандардың сараптауынан өтуі тиіс. Егер құрылыс уақтылы басталмаса, жер қайтарып алынады. Аудандардың сәулетін жақсарту, абаттандыру жайлы кеңістік қалыптастыру бағытындағы ұсыныстарды да терең талдап, уақтылы жүзеге асыруды тапсырамын, – деді Нұралхан Көшеров.

Күн тәртібіне өңірдің сәулеттік келбетін дамытуға бағытталған 13 мәселе шығарылды. Атап айтқанда, Сарыағаш ауданы көшелерін және «Рамадан» каналы бойын абаттандыру жобалары, Көктерек кентінің даму концепциясы мен санаторий орталығының жобасы қаралды. Сондай-ақ Отырар ауданының сәулеттік келбеті мен инвестор есебінен салынуы жоспарланған кешенді жоба қаралды. Оның ішінде Отырар қалашығын орта ғасырдағы үлгісіне сай етіп салып, туристер тарту жобасы ұсынылды.

Ал тағы бір инвестор Отырар ауданынан шөлдегі қонақүй, қабылдау орталығы, шығыс моншасы мен ежелгі Отырар кітапханасы аңызын жандандырып, кітапхана мен мұражай салып, арнайы туристік орталық ұйымдастыру жобасын жүзеге асыруға ниет білдірді. Сонымен бірге Отырар мен Сауран арасында саяхатшылар үшін экотуризмді дамытып, түйе керуенін үйлестіру жоспарын да баяндады. Бұл жоба зерделеніп, жүзеге асыру бойынша тиісті жұмыстар жүргізілмек.

Сонымен қатар Түркістандағы «Жаңа қала» аумағында салынатын ресторан, кеңсе ғимараттары, ресторан кешені мен қонақүй жобалары, медициналық туризм нысаны, Түркістан қаласындағы «қала ішіндегі қала» ұсынысы назарға алынды. Оған қоса Түркістандағы теміржол вокзалы аумағын абаттандыру және 20 ғасырға тесілі көне ғимараттарын реттеп, туристік орталықтарға айналдыру мәселесі де сөз болды.

Күн тәртібіндегі мәселелер бойынша Сәулет және қала құрылысы басқармасының басшысы Қуаныш Асанов, «Turan» арнайы экономикалық аймағы» АҚ басқарма төрағасының міндетін атқарушы Жасұлан Төлебаев ұсынылған жобаларға қатысты ақпарат беріп, инвестициялық әлеуеті мен қала инфрақұрылымына ықпалына назар аударды. Сонымен бірге Түркістан қаласы әкімінің орынбасары Әбілсейіт Рабаев баяндама жасап, қалалық кеңістікті кешенді дамыту бағытындағы ұсыныстарды таныстырды.

Мәжіліс қорытындысында облыс әкімі Нұралхан Көшеров әрбір жобаға қатысты нақты тапсырмалар беріп, сәулеттік талаптардың сақталуына, заманауи және ұлттық нақыштың үйлесуіне, тұрғындар үшін қолайлы әрі сапалы орта қалыптастыруға ерекше мән беру қажеттігін атап өтті.

Абаттандыру мен санитарлық жұмыстар – қоршаған ортаны қорғаудың маңызды бағыты. Қоршаған ортаны қорғау – қазіргі қоғамның басты міндеттерінің бірі. Табиғатты сақтау, халықтың өмір сүру сапасын арттыру және экологиялық қауіпсіздікті қамтамасыз ету жолында абаттандыру мен санитарлық жұмыстардың маңызы ерекше. Бұл бағыттағы жүйелі іс-шаралар елді мекендердің көркін жақсартып қана қоймай, адам денсаулығына да тікелей әсер етеді.

«Жасыл Түркістан» коммуналдық мемлекеттік мекемесі қала аумағында абаттандыру, санитарлық тазалықты қамтамасыз ету және тұрғындар қауіпсіздігін сақтау бағытында жоспарлы жұмыстарды жүзеге асыруда.

Атап айтқанда, ойын алаңшалары мен ағаш орындықтарды ретке келтіру және қайта қалыпқа келтіру бойынша бірқатар жұмыстар атқарылды. Алтын бидай көшесіндегі ойын алаңшасы ретке келтіріліп, қайта қалпына келтірілді. Сонымен қатар, Жаңа қала шағынауданы 9-көше, 10/8 үйлер ауласындағы ойын алаңшасында жөндеу және қалпына келтіру жұмыстары жүргізілді. Каскад шағынауданы, 10/5 үйлер ауласында сынған ойын алаңшалары мен орындықтар қайта қалыпқа келтірілді.

Қыс мезгіліндегі қауіпсіз қозғалысты қамтамасыз ету мақсатында қар күреу жұмыстары да жүйелі түрде орындалуда. Жаңа қала шағынауданы 11-көшесінде қар күреу жұмыстары жүргізілді. Саттарханов көшесінде аталған жұмыстар жалғасуда. Қалалық әкімдік аумағында, Қазыбек би көшесінде қар тазалау жұмыстары толық орындалды. Сондай-ақ, Жарылқапов көшесінде қар күреу және тұз шашу жұмыстары атқарылды.

Бұдан бөлек, электр сымдарына тиіп тұрған және апаттық жағдайда тұрған ағаштарды қысқарту жұмыстары жүргізілуде. Абдрахманов көшесі, 3-үй мекенжайында талдарды қысқарту жұмыстары аяқталды. Ықылас көшесі, 3-үй аумағында ағаштарды қысқарту жұмыстары қазіргі таңда жүргізілуде. Ал Құрылысшы көшесі, 17-үй маңында апаттық жағдайда тұрған ағаштар қысқартылды.

Санитарлық жұмыстар қоршаған ортаны қорғауда шешуші рөл атқарады. Оған тұрмыстық қатты қалдықтарды уақытылы жинау, қоқысты сұрыптау, заңсыз қоқыс орындарын жою, көшелер мен қоғамдық орындарды тазалау жатады. Тазалық сақталған ортада жұқпалы аурулардың таралу қаупі азайып, тұрғындардың денсаулығы жақсарады. Санитарлық талаптардың орындалуы экожүйенің тепе-теңдігін сақтауға да септігін тигізеді.

Осы тұста айта кететін жайт, абаттандыру мен санитарлық жұмыстардың тиімділігі тек мемлекеттік органдардың емес, әрбір азаматтың жауапкершілігіне байланысты. Қоршаған ортаны қорғау мәдениетін қалыптастыру, экологиялық сауаттылықты арттыру және ортақ мүлікке ұқыпты қарау – тұрақты дамудың негізгі шарттары. Қоғамдық сенбіліктер, экологиялық акциялар мен еріктілер қозғалысы бұл бағыттағы жұмысты күшейтеді.

Түркістан облысының әкімі Нұралхан Көшеровтің тапсырмасына сәйкес аудан әкімі Серік Мамытов ауыл шаруашылығы саласындағы өзекті мәселелердің бірі – ағын су арналарының қазіргі жағдайын зерделеу мақсатында жауапты сала басшыларымен бірге су өткізу қабілетін арттыру мақсатында тазарту жұмыстары жүргізілген каналдарды аралап, орындалған жұмыстардың сапасына зерделеу жүргізді. Механикалық тазалау барысында канал табандарында жиналған лай-қоқыстар, шөгінділер мен бөгеттер алынған. Бұл өз кезегінде ағын судың еркін өтуіне және егістік алқаптарды сумен уақытылы қамтамасыз етуге үлкен мүмкіндік береді.

Сондай-ақ аудан басшысы көршілес Өзбекстан Республикасынан келіп жатқан ағын судың көлемін де көрді. Мамандардың мәліметінше, қазіргі таңда су қалыпты деңгейде, вегетациялық кезеңде су ресурстарын тиімді пайдалану мен қатаң бақылау қажеттігі атап өтілді.

« – Вегетациялық кезең – ауыл шаруашылығы үшін ең жауапты әрі шешуші уақыт. Бұл кезеңде егіс алқаптарының өнімділігі тікелей су ресурстарының жеткіліктілігі мен оны дұрыс басқаруға байланысты. Климаттың өзгеруі, жауын-шашын мөлшерінің азаюы және су көздерінің шектеулілігі жағдайында суды тиімді пайдалану мен қатаң бақылау – уақыт талабы. Соңғы жылдары көптеген өңірлерде су тапшылығы айқын сезіле бастады. Өзен-көлдер деңгейінің төмендеуі, трансшекаралық өзендерге тәуелділік және суару жүйелерінің тозуы ауыл шаруашылығына елеулі қауіп төндіруде. Әсіресе вегетациялық кезеңде судың ысырап болуы егіннің күйіп кетуіне, өнім көлемінің азаюына әкелуі мүмкін. Сондықтан, су ресурстарын қорғау және тиімді пайдалану үшін заманауи және ғылыми негізделген тәсілдерді енгізу қажет. Яғни, тамшылатып және жаңбырлатып суару әдістері суды 30–50 пайызға дейін үнемдеуге мүмкіндік береді. Ал, суару кестесін сақтау – әр дақылдың биологиялық ерекшелігіне сәйкес нақты уақыт пен мөлшерде суару маңызды. Каналдар мен арықтарды жаңғырту – бетондау, қаптау арқылы судың жерге сіңіп кетуін азайту. Цифрландыру – су шығынын есептейтін автоматтандырылған жүйелерді қолдану маңызды шешімдер болып табылады.

Суды үнемді пайдалану тек ауыл шаруашылығы өнімінің тұрақтылығын емес, сонымен қатар экологиялық тепе-теңдікті сақтауға да ықпал етеді. Вегетациялық кезеңде су ресурстарын тиімді пайдалану мен қатаң бақылау – ауыл шаруашылығының тұрақты дамуының негізгі кепілі. Бұл бағытта мемлекет, жергілікті билік және шаруалар бірлесе әрекет еткенде ғана нақты нәтиже болады. Әрбір тамшы судың қадірін білу – бүгінгі ғана емес, болашақтың да аманаты.» – деді аудан әкімі.

Серік Үсенұлы су тапшылығының алдын алу, ысырапшылдыққа жол бермеу және шаруалардың сұранысын толық қамтамасыз ету мақсатында жауапты мекемелерге каналдарды жүйелі түрде тазалау жұмыстарын жалғастыру, гидротехникалық нысандардың техникалық жағдайын тұрақты бақылауда ұстау, су бөлу кестесін әділ әрі тиімді ұйымдастыру секілді нақты тапсырмалар берді.

Сонымен қатар су шаруашылығы саласында заманауи су үнемдеу технологияларын енгізудің маңыздылығына, шаруалармен түсіндіру жұмыстарын күшейтуге, стратегиялық маңызы бар ресурсты ұқыпты әрі жауапкершілікпен пайдалануға бағытталған нақты шараларды іске асыру жолдары сөз болды.

Түркістан облысы, Ордабасы ауданына қарасты Төрткөл ауылдық округінде орналасқан «ТӨРТКҮЛ-ҚҰС» ауыл шаруашылығы өндірістік кооперативінде халықаралық маңызы бар ірі аграрлық жоба іске асырылуда. Аталған жоба өңірдегі құс шаруашылығын жаңа деңгейге көтеруге, сондай-ақ халықаралық озық тәжірибені жергілікті өндіріс үдерісіне енгізуге бағытталған.

Жоба аясында Түркістан облысына Senior Experten Service (SES) халықаралық бағдарламасы шеңберінде Германия Федеративтік Республикасынан жоғары білікті аграрлық сарапшы арнайы шақырылды. Бұл жергілікті кәсіпкерлер үшін әлемдік деңгейдегі тәжірибені тікелей өндіріс орнында меңгеруге мүмкіндік беретін маңызды қадам болып отыр.

Халықаралық жобаны жүзеге асыруда «TÚRKISTAN» кәсіпкерлерге қызмет көрсету орталығы шешуші рөл атқарды. Орталық тарапынан SES халықаралық ұйымымен өзара байланыс орнату, қажетті құжаттарды рәсімдеу, шетелдік сарапшыны тарту және жобаны үйлестіру бойынша кешенді жұмыстар атқарылды.

Осыған орай, «TÚRKISTAN» кәсіпкерлерге қызмет көрсету орталығының басшысы Берік Кенжебаев өндіріс орнына арнайы барып, жоба барысымен және халықаралық сарапшының жұмысымен танысты. Кездесу барысында ол мұндай бастамалардың өңір кәсіпкерлері үшін стратегиялық маңызға ие екенін атап өтіп, Ордабасы ауданы ғана емес, Түркістан облысының барлық аудандарындағы кәсіпкерлерге бизнес бастау, өндірісті кеңейту және халықаралық бағдарламаларға қатысу бағытында жан-жақты қолдау көрсетуге дайын екенін жеткізді.

Ауыл шаруашылығы өндірістік кооперативі 2023 жылдан бастап бройлер тауықтарын өсіру, өндіру және қайта өңдеу бағытында тұрақты жұмыс істеп келеді. Қазіргі таңда кәсіпорында 5 адам тұрақты жұмыспен қамтылған. Өндіріс үдерісі толықтай жергілікті шикізатқа негізделген. Кооператив COBB-500 тұқымды тәуліктік балапандарды пайдаланып, құстарды отандық жем-шөппен азықтандырады.

Кәсіпорын басшылығы SES бағдарламасы аясында халықаралық сарапшының тәжірибесін пайдалана отырып, бірқатар стратегиялық міндеттерді жүзеге асыруды жоспарлап отыр. Атап айтқанда, тәуліктік балапандардың өміршеңдігін арттыру, 100 пайыз қалдықсыз өндіріс жүйесін енгізу, яғни құс етінен бөлек қауырсын, көң және ішкі ағзаларды толық өңдеу арқылы қосымша өнім көздерін қалыптастыру көзделген. Сонымен қатар, жылдық өндіріс көлемін 800 тоннаға дейін ұлғайту, өнімнің өзіндік құнын төмендету және болашақта экспорттық нарықтарға шығу мүмкіндіктерін қарастыру негізгі мақсаттардың қатарында.

Германиядан келген халықаралық аграрлық сарапшы Эберхард Вестхаузер кәсіпорын басшылығымен алғашқы жұмыс кездесулерін өткізіп, өндірістік үдерістермен жан-жақты танысты. Неміс маманы Түркістан өңірінде екі апта бойы жұмыс істеп, құс шаруашылығын дамыту бағытындағы кәсіби тәжірибесімен бөліседі.

Эберхард Вестхаузер – аграрлық ғылымдар саласында көпжылдық тәжірибесі бар, мал және құс шаруашылығы бойынша халықаралық деңгейде танылған сарапшы. Ол ірі қара, шошқа, ешкі және бройлер тауықтарын өсіру мен азықтандыру саласында терең білімге ие. Бұған дейін Кения, Танзания, Косово, Молдова және Уганда елдерінде SES бағдарламасы аясында 17-ден астам халықаралық жобада жұмыс істеп, фермерлерді оқыту мен ауыл шаруашылығы кәсіпорындарының өндірістік тиімділігін арттыруға елеулі үлес қосқан.

Аталған жоба Түркістан облысының агроөнеркәсіптік әлеуетін арттырумен қатар, өңірді отандық және халықаралық нарықта бәсекеге қабілетті ауыл шаруашылығы өнімдерін өндіретін аймақ ретінде қалыптастыруға ықпал етпек.

Түркістан облысында тұрғындарды еңбекпен қамту, өндіріс орындарын ашу бағытында ауқымды жұмыс жүріп жатыр. 2025 жылы облыс тұрғындарын сапалы жұмыс орындарымен қамту арқылы жұмыссыздық деңгейін төмендетуге бағытталған «Өңірлік жұмыспен қамту картасы» бекітілген. Жұмыспен қамту картасы шеңберінде 130 769 жаңа жұмыс орнын құру көзделген. Бұл республика бойынша құрылатын жұмыс орындарының 14,5 пайызын құрап, ең жоғары көрсеткіш болып қалыптасты. 2025 жылдың қорытындысымен 147 719 азамат жұмыспен қамтылып, жоспар артығымен орындалған. Оның ішінде 100 046 тұрақты жұмыс орны құрылса, 47 673 уақытша жұмыс орны жасақталған. Жұмыссыздық деңгейі 4,6%-ды құрап, төмендеген.

Аталған салаға қатысты мәселелер мен жоспарлар облыс әкімі аппаратының апталық мәжілісінде талқыланды. Өңір басшысы Нұралхан Көшеров жұмыспен қамту және өндіріс орындарын ашу ең негізгі міндеттер екенін кезекті рет ескертіп, жауапты басқарма басшысы мен аудан, қала әкімдеріне жұмысты күшейтуді тапсырды.

– «Өңірлік жұмыспен қамту картасы» аясындағы міндеттерді сапалы орындауды, жұмысқа орналасқан азаматтарға міндетті зейнетақы жарналарының аударылуын қадағалауды тапсырамын. Субсидияланатын жұмыс орындарына, жастар практикасы, әлеуметтік жұмыс орындары мен «Күміс жас» жобасына тартылған тұрғындар нақты жұмыспен қамтылуы тиіс. Аудан, қала әкімдері, жауапты басқарма өңірдегі кәсіпорындарды түгел аралап, штаттық кестесін, қанша жұмыс орны қажет екенін анықтап, халықты еңбекке тартыңыздар. Жұмысты үйлестіріңіздер. Тұрғындарды қолдауымыз керек, түсіндіру жұмыстарын жандандырыңыздар, – деді Нұралхан Көшеров.

Мәжілісте жұмыспен қамту жоспарын орындамаған аудан, қала әкімдерінің есептері тыңдалып, тиісті ескертулер берілді.

Жұмыспен қамтуды үйлестіру және әлеуметтік бағдарламалар басқармасының басшысы Мекенхан Қозыханұлының айтуынша, еңбекпен қамту 5 бағыт бойынша жүргізілген. 4074 жұмыс орны ұлттық жобалар мен жеке инвестициялық жобалар шеңберінде құрылса, 22 595 жұмыс орны «10 мың тұрғынға 100 жаңа жұмыс орны» шеңберінде ашылған. 45 мың адам субсидияланатын жұмыс орындарына жіберілсе, 57 221 адамды еңбек нарығындағы бос орындар арқылы жұмысқа орналастыру және 1793 адамға грант беру көзделіп, тиісті индикатор орындалған.

Ал 2026 жылға арналған «Өңірлік жұмыспен қамту картасы» аясында 74 516 адамды (54481 – тұрақты, 20035 – уақытша) жұмыспен қамту жоспарлануда. Оның ішінде 40 588 адам бос жұмыс орындарына жолданса, 2472 тұрғын ұлттық жобалар негізінде ашылатын жұмыс орындарына тартылады. 11476 тұрғын «10 мың тұрғынға 100 жаңа жұмыс орны» жобасы, ал 18530 адам субсидияланатын жұмыс орындары арқылы еңбекке тартылады деп жоспарланған. 1450 адамға грант беру межеленген.

Тұрғындар облыстағы инфрақұрылымдық жобаларды жүзеге асыру, өнеркәсіп және кәсіпкерлік, туризм, ауыл шаруашылығы салаларына жолданады. Оның ішінде «Түркістан мақта агроөнеркәсіптік кешені» және «JASYL SUYQ QAZAQSTAN» компанияларына тағы мыңнан астам тұрғынды жұмысқа орналастыру көзделіп отыр.