Түркістан облысы, Созақ ауданында «Қазыналы Созақ – ұлт руханиятының негізі» атты ғылыми-практикалық конференция өтті.

Тағылымды жиында еліміздің тарихында өзіндік орны бар өңір – Созақтың өткен тарихы мен бүгінгі келбеті, мәдениеті және тарихи орындарының ғылыми негізі кеңінен талқыланды.

Басқосуға отандық және шетелдік белгілі тарихшылар, археологтар, өнертанушылар мен қоғам қайраткерлері қатысып, ғылыми баяндамалар жасады. Өзбекстан, Қырғызстан секілді бауырлас елдердің ғалымдары да рухани байланыстың тамырын сөз етті.

Іс-шараға ҚР Парламенті Сенатының депутаты Дархан Қыдырәлі модераторлық етті.

Түркістан облысы әкімінің орынбасары Ертай Алтаев Мемлекет басшысы Қасым-Жомарт Тоқаев Ұлттық құрылтайдың «Адал адам – Адал еңбек – Адал табыс» атты үшінші отырысында «Біз болашаққа сеніммен қадам басу үшін төл тарихымыздың ауқымы кең екенін толық сезініп, мәдени мұрамызды сақтап, оны дәріптеуіміз қажет» деген сөздеріне ерекше тоқталып, Созақтың көне және орта ғасырлардағы, Қазақ хандығы тұсындағы тарихы жайында ғалымдардың ой-тұжырымдарына негізделу керектігін атап өтті. Сондай-ақ Созақтың сан ғасырлық тарихы бар, қазақ халқының тағдырында ерекше орын алатын қасиетті мекен екенін айтып, басқосудың ғылыми тұрғыдағы мән-маңызына тоқталды.

Ал аудан әкімі Мұхит Тұрысбеков алғаш рет өткен ғылыми-практикалық конференцияның аудан үшін үлкен мәртебе екенін жеткізіп, конференция жұмысына сәттілік тіледі.

Конференция қарарымен қатысушыларды Қ.А.Ясауи атындағы ХҚТУ-дың археологиялық ғылыми-зерттеу институтының директоры Көпжасар Жетібаев таныстырды.

Маңызды шарада сондай-ақ, Созақтың киелі орындарын Түркістан облысының туризм картасына енгізу, инфрақұрылымын қалыптастыру, Созақтағы мәдени мұраларды ЮНЕСКО тізіміне енгізу жөніндегі ұсыныстар айтылды.

Өздеріңіз білетіндей, Мемлекет басшысы Ұлттық құрылтайдың Атырауда өткен үшінші отырысында:  «Қожа Ахмет Ясауи мұраларын терең зерделеп, дәріптеуге де айрықша назар аударған жөн. Бұл мәселе бойынша ең әуелі өз еліміздің және шетелдің ғалымдарын шақырып, арнайы симпозиум өткізу қажет»,- деген болатын.

Осыған орай, киелі Түркістанда «Заман мен мәдениет диалогындағы Ясауи мұрасы: гуманистік бағыт-бағдар мен заманауи сын-қатерлер» атты халықаралық симпозиум өтті.

Симпозиумға Мемлекеттік кеңесші Ерлан Қарин, Қазақстан Республикасы Мәдениет және ақпарат министрі Аида Балаева, Қазақстан Республикасы Ғылым және жоғары білім министрі Нұрбек Саясат, Халықаралық түркі мәдениеті мен мұрасы қорының президенті Ақтоты Райымқұлова және еліміз бен Әзербайжан, Германия, Үндістан, Иран, Италия, Қырғызстан, Ресей, АҚШ, Тәжікстан, Түрікменстан, Түркия, Өзбекстан және Жапония елдерінен келген жүзге жуық белгілі ғалымдар қатысты.

Өз кезегінде, Ерлан Қарин Мемлекет басшысының симпозиумға қатысушыларға арналған құттықтау хатын оқып беріп, симпозиумның Ясауи мұраларын терең зерттеуге және насихаттауға зор үлес қосатынын атап өтті.

Ия, расында бұл жиынның маңыздылығы өте ерекше. Көпшілік әсер алған симпозиумда XII ғасырдағы ұлы ойшыл, түркі сопылық мектебінің негізін қалаушы Қожа Ахмет Ясауи мұрасының түрлі қырлары қамтылған  ғылыми баяндамалар жасалып, қызықты пікірлер айтылды. Соның бірі, ұлт әдебиетінің ұлы классигі Абайдың Қожа Ахмет Ясауи ілімін оқығандығы және Абайдың шығармаларындағы көзқарасы, идеялық мазмұны Ясауи ілімімен үндесетіндігі айтылды.

Жалпы, Қожа Ахмет Ясауи ілімі – бірлікке, жеке адам мен қоғамды тұтастыққа, жалпы жаратылыстың гармониясы мен діндер арасындағы төзімділікке бағытталған. Данышпан бабамыздың мемлекет, ел басқару жөніндегі тұжырымдары, әлеуметтік көзқарастары бүгінгі біз өмір сүріп жатқан қоғамға берері мол. Әсіресе жастарды имандылық пен ізгілікке, адалдық пен тазалыққа, отансүйгіштікке, төзімділікке шақыруда рөлі зор.

Ахмет Ясауи даналығы мың жылдар бойына ұрпақтан-ұрпаққа мұра. Оның «Хикметтер жинағы», «Диуани хикмет», «Пақырнама және тағы да басқа еңбектерінің жүздеген елдің тілдеріне аударылуы – оның маңыздылығын көрсетеді.

Сондықтан, Ясауи жолын, оның ислам мәдениеті мен өркениетіне қосқан үлесін тануда осындай халықаралық шаралардың өткізілуі өте құптарлық іс.

Өйткені, Ясауи мұрасының ой толғамдарында көрсетілген адамдардың ғылым мен білімді меңгеруі, қоғам болып дамуы туралы өсиеті осы заманның ырғағына орамдас жазылғандай.

Ғұлама Ясауидің нақыл сөздерін оқып қараған әрбір оқырман бұл еңбектердің ешқашан мағынасын жоғалтпайтын, әлі талай ғасыр адамзаттың рухани қазынасы болатын дүние екендігіне көз жеткізеді деп ойлаймын.  

Түркістан облыстық мәслихатының төрағасы Н.Әбішов

Түркістан облыстық мәслихатының 2025 жылға арналған жұмыс жоспарына сәйкес
маусым айында өтетін сессияда облыстық жұмылдыру даярлығы, аумақтық қорғаныс және азаматтық қорғау басқармасы басшысының есебі тыңдалады. Осыған байланысты облыстық мәслихат төрағасы Н.Әбішовтың өкімімен уақытша депутаттық комиссия құрылды. Уақытша комиссия аталған басқармаға қарасты екі мекемеде болып, тыныс-тіршілігімен танысты.

Мекемелердің жұмысымен танысуға облыстық мәслихат төрағасы Нұралы Әбішов, әлеуметтік-мәдени даму, мемлекеттік-құқық, жергілікті өзін-өзі басқару және депутаттық этика мәселелері жөніндегі тұрақты комиссия төрағасы Алмас Салимов, облыстық мәслихаттың депутаттары Қайрат Салыбек, Бахыт Басымбек, Инара Намазбаева, Талғат Садуов барды.

Түркістан облыстық жинақтау бекеті Қазақстан Республикасы Қарулы Күштерін және әскери құрылымдарды жасақтауға Түркістан облысының барлық аудандарынан 18 – 27 аралығындағы жасөспірімдерді мерзімді әскери қызметке азаматтарды толықтырады.
Облыстық жинақтау бекетінің жаңа ғимараты барлық санитарлық және өрт қауіпсіздік нормаларға сәйкес жабдықталған, бір күнде 100 адамға дейін әскерге шақырылушыларды қабылдауға мүмкіндігі бар.

Аталған ғимаратта жатын орындар, психологиялық тест өткізуге арналған бөлме, Тәрбие және ақпараттық бөлме теледидармен қамтамсыз етілген.
Асхана бөлмесі барлық керек жарақтармен, медициналық комиссия құрамының бөлмелері, әскери бөлім өкілдеріне арнайы жабдықталған бөлмелер қарастырылған.

Ғимаратта интернет желісі толықтай қамтылған, темір жол станциясына әскерге шақырушыларды шығарып салу үшін қызметтік автокөлікпен қамтамасыз етілген.
Әскерге шақырушыларды флюрографиялық тексеруден өткізу үшін жылжымалы рентген аппаратымен жабдықталған. 2024 жылы Қарулы Күштері мен әскери құрылымдарды жасақтауға 5000 адамға жуық әскерге шақырылушыға тапсырыс берілген.

Депуттарға мекемені аралау барысында бірқатар ұсыныстар айтылды. Аталған мәселелерді халық қалаулылары алдағы тұрақты комиссияда талқылап, сессияда қарайтын болады.

Түркістан облысында шегіртке мен ауыл шаруашылығы зиянкестеріне қарсы залалсыздандыру жұмыстары үздіксіз жүргізіліп жатыр. Аталған мәселе облыс әкімі Нұралхан Көшеровтың тұрақты бақылауында. Қазіргі таңда өңірдегі  866,7 гектар жер зерттеліп, оның 359,8 мың гектары өңделген.

Атқарылып жатқан жұмыстарды бақылау және өзекті мәселелерді талқылау мақсатында облыс мәслихатының төрағасы Нұралы Әбішов Келес ауданындағы Бірлік ауылдық округіне арнайы барды. Келес ауданының әкімі Жәнібек Ағыбаев пен жауапты мамандар аймақтағы қазіргі ахуалды баяндап берді.

Шегірткеге қарсы күрес бойынша Келес ауданында 17 сектор белгіленіп, 85 бүрку техникасы бөлінген. Жұмысшы топтар 123 аспалы бүріккішпен қамтылып, 447 анықтаушы залалсыздандыру шарасына жұмылдырылған. Аймақтарда орналасқан шаруа қожалық иелері де бұл науқанға өз үлестерін қосып жатыр.

Мамандардың мәлімдеуінше зиянкестермен күреске Арыс қаласы бойынша Қожатоғай, Ақдала, Монтайтас, Дермене ауыл округтеріне 22 жұмысшы топ, Сарыағаш ауданы бойынша Әлімтау, Дарбаза, Жылға, Тегісшіл, Қызылжар, Дербісек, Жібек жолы, Ақжар ауыл округтеріне 15 жұмысшы топ, Келес ауданы бойынша Бірлік, Жамбыл, Бозай, Ошақты, Ақтөбе, Біртілек, Қошқарата ауыл аймақтарына 17 жұмысшы топ жұмылдырылуда.

Соңғы мәліметтер бойынша дернәсілдер анықталған аймақтар бойынша Арыста – 46, Келесте – 26, Сарыағашта 13 техника алқаптарды дәрілеуге қатысуда. Жауаптылар зиянкестерге қарсы дәрі мен су және жанар-жағармай тасымалы жеткілікті екенін мәлімдеді.

Қазығұрт ауданы, Қарабау ауылдық округіне қарасты Сынтас ауылында Ұлы Отан соғысында ерліктің үлгісін көрсеткен абыз ақсақал тұрады. Ол 1926 жылы Жаңатұрмыс колхозында дүниеге келген. 1944 жылы 18 жасқа толғанда әскер қатарына шақыртылып, Семей қаласында әскери дайындықтан өтіп, Белорусь майданына жөнелтілген. Батыр жауынгер 1-пулеметшілер құрамында, атақты маршал Г.Жуков басқарған әскердің сапында шайқасқан. Ол – Анарбай Мырзахметов.

Майдангер алғашқы ұрысын Польша жерінде бастап, Варшаваны азат ету операцияларына қатысқан. 1945 жылдың мамырында Беларусь фронтының жауынгері ретінде Эльба өзеніне жетіп, Магдебург пен Бланкенбург қалаларын азат етудегі ауыр шайқастарда ерлік көрсеткен. Жеңіс күнін Берлинде қарсы алған Анарбай ақсақал 1946 жылға дейін Германияда әскери міндетін атқарған. Кейін 1948 жылы Иванов қаласында әскери борышын толық аяқтап, 1950 жылы елге оралады.

Соғыстан кейін бейбіт өмірге араласып, жүргізуші, кейін ферма меңгерушісі қызметін атқарған. Жұбайы Шәман Мырзахметовамен бірге 10 ұл-қыз тәрбиелеп, бүгінде 47 немере, 93 шөбере және 2 шөпшек сүйіп отыр.

Анарбай Мырзахметов – «Берлинді алғаны үшін», «Ерлігі үшін», «Германияны жеңгені үшін» медальдарымен марапатталған.

Мамандар Шаға жағажайындағы мәселеге түсінік берді, деп хабарлайды TAQ.KZ ақпараттық агентігі «Oinet.kz» порталына сілтеме жасап. 

Осыдан үш жылға жуық уақыт бұрын Түркістанның іргесінен көпшіліктің сүйікті демалыс орнына айналады, туристерді тартады деген «Шаға» жасанды көлі салтанатты түрде ашылған болатын. Жуырда әлеуметтік желіде жағажайдың қараусыз қалғаны, жуынатын жері, дәретханасының бүлінгені, көшеттердің қурап қалғаны туралы видео таралып, ол көпшілік арасында қызу талқыланды.  

Осыған қатысты материалдар «Рейтинг» газеті мен «oinet.kz» порталында да жариялаған болатын.  Жуырда аталған ақпараттық редакцияға Түркістан облыстық құрылыс басқармасынан және осы нысандағы жүргізілген құрылыс жұмыстарының сапасын бақылаған техникалық қадағалаушы мекеменің өкілдері барып, мәселенің мән-жайына түсінік берді.

Мамандардың айтуынша, келешегінен көп үміт күттірген жағажайдың осындай жағдайға жетуіне мердігелердің де, оның құрылысына тапсырыс беруші Түркістан облыстық құрылыс басқармасының да, сол кездегі облыс басшысы Ө.Шөкеевтің де қатысы жоқ. Нысан бойынша құрылыс жұмыстары толық бітпеген, тек шомылу аймағы (№1 учаскесі) аяқталған. Екіншіден, нысанды пайдаланушы және сенімгерлік басқаруға алған мекемелер өзіне тиісті міндеттерін жеткілікті жағдайда орындамаған. Яғни, бәріне сол мекемелердің жауапсыздығы, өз міндетіне салғырт қарауы себеп болған.

Облыстық құрылыс басқармасының қызметкері,  осы нысанға жауапты жетекші маман Әсет Қадырбектің айтуынша, «Түркістан» туристік-рекреациялық орталығының инженерлік инфрақұрылымын салу» немесе «Шаға жасанды көлі» деген атауға ие болған жобаның негізгі мақсаты Түркістан қаласын көктемгі су тасқынынан сақтау, қар мен жаңбырдан жиналған суларды көгалдандыруға қолдану, қаланың микроклиматын жақсарту, сонымен қатар жаз айларында жағажайды шомылу аймағы ретінде қолдану болған.

– 2012 жылы қатты жауын-шашын кезінде Түркістан қаласының бірқатар елді  мекендерін су алып кеткен. Жоба осындай апатты жағдайларды болдырмау үшін қолға алынған және ол өзінің мақсатына жетті деп есептеуге болады. 2023 жылдың ақпан айында Сауран ауданының аумағында су тасқыны кезінде көлдің өзінде жиналған су көлемі   2,5 млн. м3 асты, бұл өз кезегінде жасанды көлдің  су жинау қуаттылығы ең жоғарғы  жобалық деңгейінен асып түседі. Әйтсе де, су тасқыны кезінде «Шаға» көлі еріген суды ұстап тұру бойынша өз функцияларының толық деңгейде орындай отырып, Түркістан қаласын су тасқыны шайып кетуі залалдарынан сақтап қалды. Көлге жиналған сулар одан  ары қарай    Түркістан магистральдық каналына және «Шаға» ағызу каналына жіберіледі. Жаз мезгілінде көл «Кеңсай Қосқорған – 2» су қоймасынан келетін сумен толтырылады,–деді Ә.Қадырбек.

Жалпы жобаның құны 9,3 млрд теңгені құраған. Қаржының басым бөлігі көлді, каналдарды салуға жұмсалған.

2022 жылы жағажайда шомылау маусымын ашу үшін нысанды                   2 учаскеге бөлу туралы шешім қабылданады. №1 учаскедегі жұмыстар толығымен аяқталып, 2022 жылдың 5 маусымында пайдалануға қабылданған.

–2022 жылдың 28 маусымында Түркістан облысының қаржы және мемлекеттік активтер басқармасы басшысының бұйрығымен №1 учаске облыстық ауыл шаруашылық басқармасына қарасты «Тұран су» мекемесінің теңгеріміне өткізілген.  8 шілдеде Түркістан облысы әкімдігінің қаулысына сәйкес, нысан облыстық туризм басқармасына қарасты «Open Turkistan» туристік ақпараттық орталығы» ЖШС-не сенімгерлік басқаруға берілген. Алайда пайдаланушы мекемелер («Тұран су», «Open Turkistan») тарапынан нысанды күтіп ұстау жұмыстары дұрыс жүргізілмеуіне және жасанды көлге қажетті сумен қамтамасыз етілмеуіне байланысты жағажай аймағы жарамсыз күйге түскен. Сонымен қатар,  қажетті деңгейде күзетпен қамтамасыз етілмеуі себепті, нысан басында вандализмдік әрекеттердің орын алуы әсерінен ғимараттар бүлінген, кейбір мүліктермен құрал-жабдықтар ұрланып, қолды болып кеткен. Өз кезегінде, объектіге тиесілі ұрланған заттармен жабдықтар бойынша Түркістан облысы Полиция департаменті тарапынан қылмыстық істер қозғалған,-дейді «Стройконсалтинг LTD» ЖШС-інің техникалық қадағалаушысы Айдархан Исабаев.

Яғни, мамандардың айтқанынан түсінгеніміз, Туризм басқармасына қарасты «Open Turkistan» туристік ақпараттық орталығы» өзіне тиесілі міндеттерді орындамаған. Естеріңізде болса, сол  2022 жылдың тамызында облыс әкімі Ө.Шөкеев отставкіге кеткен соң, облыстық туризм басқармасы дербестігінен айырылып, мәдениет басқармасына қосылды. 2024 жылы қайта бөлінді. Осындай алу-қосу жұмыстары туризм саласындағы жұмыстарға салқынын тигізген сияқты. «Байтал түгілі бас қайғы» болып жатқан мекеменің Шаға жағажайын күтіп ұстау, туристерді тарту жұмыстарымен айналысуға құлқы болмағанға ұқсайды.

Енді бөлінген қаражат мәселесіне келсек. Мамандардың бізге берген мәліметтеріне қарағанда, 2024 жылдан бастап Түркістан облысы экономикалық тергеп-тексеру департаменті тарапынан нысанға бөлінген қаражаттардың жұмсалуын тексеру жұмыстары жүргізілуде.

–№1 учаскеге жалпы көлемі 6,9 млрд теңге қаралып, ол толығымен игерілген. Ал, екінші учаскеге 2,28 млрд теңге бөлу жоспарланған. Алайда бүгінгі таңда №2 учаске бойынша қаржыландырудың болмауына байланысты, құрылыс жұмыстары тоқтап тұр. Бюджеттен қаржысы қарастырылған жағдайда құрылыс жұмыстары жалғасатын болады,-делінген мамандардың берген жауап хатында.

Осы жерде айта кетері, 2023 жылдың күзінде Астанада өткен брифингте сол кездегі облыс басшысы Дархан Сатыбалды «Шаға» жасанды көліндегі құрылыс жұмыстары қаржы тапшылығына байланысты тоқтап қалғанын айтқан болатын.

Ал, енді құрылыс жұмыстары аяқтала ма, жоқ па? Биыл жазда Шағада шомылу маусымы бола ма, жасанды көлге су толтырыла ма? Нысанды сенімгерлік басқаруға алған «Open Turkistan» туристік ақпараттық орталығы» өзіне тиесілі міндеттерді неге атқармады?

Бұл сұрақтарға енді  облыстық ауыл шаруашылығы басқармасы мен облыстық туризм басқармасы жауап бере жатар. 

Түркістан қаласындағы «Достық үйі» ғимараты жанындағы аллеяда 1 мамыр – Қазақстан халқының бірлігі күні мерекесіне орай «Тұрақтылық – татулық тұғыры» атты іс-шара өтті.

Достық пен татулықты паш еткен мерекелік шараға өңірдегі этномәдени бірлестіктердің, еңбек және шығармашылық ұжымдарының өкілдері, сондай-ақ облыс тұрғындары мен қонақтары қатысты. Жиынға қатысушылар алдымен іс-шара аясында этнос өкілдері ұйымдастырған қолөнер көрмесін тамашалады.

Салтанатты жиында жиналған жұртшылықты Түркістан облысының әкімі Нұралхан Көшеров құттықтап, ізгі тілегін білдірді.

– Бәріңізді Қазақстан халқының бірлігі күнімен құттықтаймын. Біз, биыл Қазақстан халқы Ассамблеясының 30 жылдық мерейтойын атап өтудеміз. Осы жылдар ішінде Ассамблея халқымыздың бірлігін нығайтуға елеулі үлес қосты. Еліміздегі тәуелсіздік пен теңдіктің, тұрақтылық пен татулықтың символына айналды. Таяуда Астанада Қазақстан халқы Ассамблеясының ХХХІV (34-ші) сессиясы өтті. Маңызды жиында Мемлекет Басшысы Қасым-Жомарт Кемелұлы Ассамблеяның қоғамды біріктіретін ұйымға айналғанын атап өтті. Түркістан облысында қазіргі таңда 2 млн 150 мыңнан аса адам тұрады. Өңірде қазақ халқымен бірге 50-ден аса этностың өкілдері тату-тәтті өмір сүруде. Мемлекеттік тілді ұлықтау, ортақ тарих пен тағдырды құрметтеу – баршамызға ортақ міндет. Осы орайда, барлық азаматты ел болашағы үшін бірігіп әрекет етуге шақырамын. Шуақты мерекеде Сіздерге зор денсаулық, отбасыларыңызға бақыт пен ынтымақ тілеймін! – деді Нұралхан Көшеров.

Мерекелік іс-шарада ҚХА-ның 30 жылдығына орай Түркістанда өткен «Бірлік» марафонының жеңімпаздары мен өңірдегі этносаралық татулықты, қоғамдық келісімді нығайтуға үлес қосып жүрген бірқатар азаматтар марапатталды.

Бірлікке үндеген мерекеде «Жаңа леп» ұжымы, «Алқоңыр» фольклорлық ансамблі, сондай-ақ «Самғау» және «Фараб» би ансамблдері, «Сарын» тобы өнерпаздарының арнайы әзірлеген өнерлері тарту етілді. Жергілікті өнерпаздар мен этномәдени бірлестіктер өкілдері «Қазақтай ел қайда», «Домбыра», «Қазақ батырлары» т.б. патриоттық әндерін шырқап, би билеп, мерекенің ажарын аша түсті. Сондай-ақ шара барысында облыстық татар-башқұрт этномәдени бірлестігінің төрағасы Фарит Аюпов және «Ассамблея жастары» РҚБ-і Түркістан облыстық өкілдігінің мүшесі Интизора Нусратуллаева сөз сөйлеп, еліміздегі бірлік пен бейбітшіліктің мән-маңызына тоқталды.

Шара соңында қатысушылар «Түркістан» әнін хормен орындап, халқымыз тату-тәтті бірлікте болсын деген игі тілекпен тарқасты.

Түркістан облыстық мәслихатының төрағасы Нұралы Әбішов бастаған облыстық мәслихат депутаттары А.Салимов, Ж.Ағабеков, С.Арыстанов, Ғ.Қапалбаев, Б.Байғараев, И.Намазбаева, Т.Қаржауов, Т.Садуов, Б.Шойбеков, Е.Хандиллаев, Е.Үсентаев өңірде салынып жатқан бірқатар спорт нысандарының құрылысымен танысты.

Халық қалаулыларына құрылыс басқармасы басшысының орынбасары А.Тұрханов және облыстық дене шынықтыру және спорт басқармасының басшысы Ғ.Құдияров спорт нысандарының жай-күйін таныстырды. Атап айтқанда депутаттар есу каналын, атшабар көпфункциялы спорт нысанын және Б.Саттарханов атындағы спорт кешенін аралап көрді.

Жалпы, «Түркістан қаласында спорт кешендері бар ескек есу каналының құрылысы» жобасын іске асыру 3 кезеңнен тұрады. Жобаның құрылысы 2021 жылы басталған.
Есу каналы олимпиадалық стандартқа сәйкес жабдықталған. Су спорты түрлерінен оқу-жаттығу жиындары, Әлем және Азия біріншіліктері мен ірі халықаралық және республикалық деңгейдегі жарыстарды өткізуге арналған.

Мұнда академиялық есу, триатлон, каноэде және байдаркада есу, желкенді спорт және жүзу спорт түрлері дамытылады.
Есу каналында 1000 орындық трибуна, эллинг, төреші мұнарасы, жағажай аймағы, көпір қарастырылған.

Ал, атшабар көпфункциялы спорт нысанның құрылысы 2 кезеңнен тұрады.Құрылыс жұмыстарын 2025 жылдың желтоқсан айында аяқтау жоспарланған.
Алдағы уақытта мұнда жүйелі түрде ұлттық және халықаралық деңгейдегі бәйгелер ұйымдастыру, балалар мен жасөспірімдерге арналған жарыстар өткізілмек.

Сонымен қатар, депутаттар Б.Саттарханов атындағы спорт кешенін аралап көрді. Спорт кешені оқу-жаттығу жиындарымен республикалық және облыстық деңгейдегі жарыстарды өткізуге арналған.
Мұнда бокс, дзюдо, еркін күресі, грек-рим күресі, баскетбол, волейбол, таэквондо, каратэ, қазақ күресі, асық ату, тоғызқұмалақ, шахмат, самбо және үстел теннисі спорт түрлері дамытылады.

Спорт кешенінде жиналмалы 320 орындықты әмбебап спорт залы, бокс залы, күрес залы, таэквондо залы, ауыр атлетика және жаттығу залы, дәрігер кабинеті, 72 орындық конференц-зал, 48 орындық буфет, футбол және баскетбол алаңшалары бар.
Сондай-ақ, спорт кешені заманауи спорттық құрал-жабдықтармен қамтылған. Бір мезетте 200 спортшы жаттығу өткізе алады.

Халық қалаулылары спорт нысандарын аралап болған соң, Б.Саттарханов атындағы спорт кешенінде аралауды қорытындылап, жиын өткізді.

Мәслихат төрағасы Нұралы Әбішов және депутаттар спорт нысандарының салынуы сыртқы және ішкі туризмді дамутуға үлкен септігін тигізетіндігін атап өтті. Сонымен қатар, тиісті басқарма басшыларына құрылыс жұмыстарын белгіленген мерзімде сапалы аяқтап, тиісті жұмыстарды ұйымдастыруды және Б.Саттарханов атындағы спорт кешенінде орналасқан залдағы орындықтар санын көбейтуді ұсынды.
Жалпы, депутаттар атқарылған жұмыстарды оң бағалап өтті.

Мемлекет басшысы Қасым-Жомарт Кемелұлы мәслихаттар мен жергілікті атқарушы органдарға елмен, түрлі қоғамдық ұйымдармен диалог орнатып, халықтың мұң-мұқтажын бірлесе шешуді тапсырды. Түркістан облыстық мәслихатының депутаттары бұл тапсырманы ортақ міндет деп біледі.

Осы ретте, халықтың аманатын арқалаған, азаматқа тән білім мен мінез, ең бастысы отаншылдық қасиетке ие депутаттың бірі – Уалихан Рахиев.

Жалпы, өңірде инвестиция тарту, өндіріс орындарын ашу, туризмді дамытуға басымдық берілуде. Соңғы жылдары ел азаматтары және шетелдік туристер арасында сауықтыру туризмінің танымалдылығы артқан. Өңірдегі қолайлы климаттық жағдай, бірегей минералды қайнар көздері мен емдік балшық орындары туристерді тартып, емдеу-сауықтыру нысандарының дамуына септігін тигізіп отыр. Шипажай-курортты кешендердің көпшілігі жыл бойы жұмыс істейді. Бұл бағытта депутат Уалихан Рахиев Түркістан облыстағы сауықтыру туризмінің өркендеуіне өз үлесін қосып, Қазақстан Республикасы туризм және спорт министрлігінің “ТУРИЗМ САЛАСЫНЫҢ ҮЗДІГІ” төс белгісімен марапатталған.

«Мемлекет басшысы елдегі туризмді дамыту экономиканы әртараптандырудың маңызды бағыттарының бірі екенін атап өтті. Бұл салада әрбір өңірдің даму перспективасы бар. Біз тек ішкі туризмді дамытумен ғана шектеліп қалмауымыз керек. Шетелдік туристерге бағыттай отырып, туристік инфрақұрылымды дамытуға да инвестициялар тарту қажет.
Түркістан облысы Сарыағаш ауданында туризмді дамытуға ерекше назар аударылып келеді. 70 тен астам демалыс сауықтыру орындары бүгінгі өмірдің талабына сай негізделе отырып халыққа қызметтерін көрсетуде. Алдағы уақытта әлі де дами түседі» – дейді Уалихан Рахиев.

Халқы тығыз орналасқан Сарыағаш ауданынан облысқа депутат болып сайланған ол тұрғындардың өзекті мәселелерін шешумен қатар, өңірді өркендету бағытында жұмыс атқаруда.
Сенімді ақтау – үлкен жауапкершілік деп есептейтін Уалихан Рысбекұлы Сарыағаш аудандық қоғамдық кеңесінде ауданның экономикасы мен әлеуметтік мәселелеріне баса назар аударып, елді мекендердегі түйіткілдердің түйінін тарқатуға да септігін тигізуде.

Одан бөлек, Түркістан облыстық мәслихатының әлеуметтік-мәдени даму, мемлекеттік-құқық, жергілікті өзін-өзі басқару және депутаттық этика мәселелері жөніндегі тұрақты комиссиясының мүшесі ретінде халықтың талап-тілегін жауаптыларға жеткізіп, проблемалардың оңынан шешілуіне ықпал жасап келеді.

«Атқарушы билік пен өкілетті биліктің ортақ міндеті – халықтың әл-ауқатын жақсарту, ел сенімін ақтау. Бірлігімізді бекемдеп, еліміздің тұрақты өркендеуіне еңбек етеміз» – дейді депутат.