ҚР Оқу-ағарту министрлігі елімізде Мемлекет басшысы Қасым-Жомарт Тоқаевтың бастамасымен жалпыұлттық сипат алған «Таза Қазақстан» идеясын білім беру жүйесіне енгізу бағытында кешенді жұмыстарды бастады. Бұл туралы бүгін Премьер-министр Олжас Бектеновтің төрағалығымен өткен «Таза Қазақстан» бастамасын жүзеге асыру мәселелері жөніндегі кеңесте Оқу-ағарту министрі Жұлдыз Сүлейменова баяндады.

Министр бұл бағытта «Таза Қазақстан» бастамасы тұлға тәрбиесімен ұштастырылып, білім мазмұны жаңа құндылықтармен толықтырылатынын жеткізді. Жаңартылған оқу бағдарламаларына экологиялық мәдениет пен тұрақты даму мазмұны енгізілді. Жаратылыстану, физика, химия, биология, география, тіл мен әдебиет, адам және қоғам, технология және өнер пәндерінде экологиялық мәселелер, табиғатты қорғау, энергияны үнемдеу, қалдықтарды қайта өңдеу арқылы зерттеу дағдылары кеңейтілді. Бұл өзгерістер оқушылардың табиғатқа деген жауапкершілігін арттыратын мінез-құлықты қалыптастыруға және дамытуға ықпал етеді.

«Біз бүгінде білім саласында «Адал азамат» біртұтас тәрбие бағдарламасын жүзеге асырып жатырмыз. Оның негізінде – Заң мен Тәртіп, Еңбек адамы және «Таза Қазақстан» идеясы жүзеге асырылады. Үш идея қоғамды топтастыруға жұмыс жасайды. Ең алдымен, жаңа мазмұн сабақ барысында, сабақтан тыс уақытта мектеп және мектептен тыс шаралар арқылы бұрынғыдан кең форматта жүзеге асырылады», – деді еліміздің Оқу-ағарту министрі Жұлдыз Сүлейменова

Министрлікпен «Таза Қазақстан» бастамасы аясында алты әлеуметтік жоба жүзеге асырылуда. Жастар арасында «Таза Қазақстан» тақырыбында эссе байқауы ұйымдастырылды. Тұжырымдама аясындағы кешенді жұмыстарға оқушылармен бірге ата-аналар да белсенді түрде тартылуда.

Бүгінде «Жасыл балабақша» жобасымен 186 мектепке дейінгі білім беру ұйымы, мектептерде 125 мыңнан астам оқушыны қамтыған 4 мыңнан астам «Жасыл клуб» белсенді қызмет атқаруда. Сондай-ақ қоршаған ортаны қорғау, азаматтық жауапкершілікті арттыруға арналған 40 мыңнан астам баланы қамтитын жас натуралистер мен жас туристер станциялары бар.

Расында тазалық – тәрбиенің бастауы екені бәрімізге белгілі. Мемлекет басшысының бастамасы мен аталған бағдарламадағы басым бағыттарға  Түркістан облысының және қаласының білім ордалары әрдайым қолдау танытып келеді. «Таза Қазақстан» республикалық экологиялық акциясы аясында белсенді түрде тазалық жұмыстары мен сенбіліктерді ұйымдастыруда.

Атап айтар болсақ, С.Сейфуллин атындағы №4 мектеп-лицейі еліміздің мерейлі мерекесі Тәуелсіздік күні қарсаңында «Таза Қазақстан» республикалық экологиялық акциясын өткізді. Іс-шараға білім мекемесінің ер азаматтары белсене қатысты. Аталған акцияның басты мақсаты – қоршаған ортаны қорғау, тазалық мәдениетін насихаттау және қоғамда экологиялық жауапкершілікті арттыру.

« – Осындай экологиялық бағыттағы игі істер туған жерге деген құрметті күшейтіп, қоғамдық белсенділік пен азаматтық жауапкершілікті нақты әрекеттер арқылы көрсетуге мүмкіндік береді. Тазалық – елдік сана мен ортақ жауапкершіліктің айқын көрінісі. Таза Қазақстан – жарқын болашақтың кепілі!» – дейді мектеп ұжымы.

Сонымен қатар, Түркістан қаласының білім бөлімінің 08.12.2025 жылғы №41-03/4500 хатына сәйкес «№31 бастауыш мектеп-балабақша»  кешені коммуналдық мемлекеттік мекемесінде 2025 жылдың 20 желтоқсанда «ТАЗА ҚАЗАҚСТАН» акция аясында сенбілік тазалық жұмыстары жүргізілді. Сенбілік жұмыстарына мектеп-балабақша қызметкерлері белсенділік танытып, өз үлестерін қосып, жауапкершілік таныта білді. Сенбілік арқылы экологиялық мәдениетті қалыптастыру,ортақ іске жұмыла отырып,балалар үшін қолайлы әрі салауатты орта жасау басты назарда болды. Таза орта-сапалы тәрбие мен берекелі ұжымның негізі.

Жалпы, елімізде жүзеге асырылып жатқан «Таза Қазақстан» жалпыұлттық бастамасы тек экологиялық акция ретінде ғана емес, ұрпақ тәрбиесінің маңызды бағытына айналып келеді. Соған орай білім беру саласында да үлкен өзгерістер жасалып, оқу-тәрбие бағдарламалары «Таза Қазақстан» құндылықтарымен жүйелі түрде толықтырылуда. Бұл жұмыстың басты мақсаты балалардың экологиялық мәдениетін қалыптастыру, табиғатқа жанашырлық сезімін тәрбиелеу, туған жерге жауапкершілікпен қарауды үйрету және тазалық, тәртіп, ұқыптылық құндылықтарын санаға сіңіру.

Бұл бағдарлама аясында қоршаған ортаны қорғау, экология, су мен жер ресурстарын сақтау, тазалық мәдениеті жөніндегі мазмұн кеңейтіліп енгізілуде. Мектептерде «Таза сынып – таза мектеп», «Жас эколог», «Менің таза аулам – менің жауапкершілігім» сияқты жобалар да іске асырылады деп жоспарланған. Экологиялық сананы қалыптастыру бағытында оқушыларға табиғатты қорғаудың маңызы түсіндіріледі. Сонымен қатар, қоқысты сұрыптау мәдениеті үйретіледі жіне су мен энергияны үнемдеу, туған жерге деген жанашырлық сезімін қалыптастыру бойынша насихат жүргізіледі. Бұл – тек мектеп қабырғасындағы жұмыс емес, өмірлік дағды қалыптастыруға бағытталған тұрақты тәрбие.

Мемлекет басшысының бастамасымен іске асып жатқан «Таза Қазақстан» жобасы тек акция емес, ұлттық құндылыққа айналуы тиіс идея. Оқу бағдарламасына енгізілген өзгерістер арқылы жалаң ұрандар емес, нақты тәрбиелік нәтижеге қол жеткізуге болады. Экологиялық мәдениеті жоғары, жауапкершілігі зор, елінің болашағын ойлайтын саналы ұрпақ тәрбиелеу –ортақ міндет болып табылады. Таза ойлы ұрпақ – Таза Қазақстанның негізі!

Елімізде жүзеге асырылып жатқан “Таза Қазақстан” жалпыұлттық акциясы – табиғатты қорғау, қоршаған ортаны таза ұстау, экологиялық мәдениетті арттыруға бағытталған маңызды бастама. Бұл игі іске еліміздің әр өңіріндегі білім беру ұйымдары – мектептер, колледждер мен оқу орындары – белсенді атсалысып, үлгі болатын деңгейде еңбек етіп келеді.

Мектеп – тек білім беретін орын емес, жас ұрпақты тәрбиелейтін, жауапкершілікке баулитын орта. Осы акция аясында білім ұйымдары сенбіліктер ұйымдастырып, мектеп аумағын, көшелер мен қоғамдық орындарды тазалап және жас көшеттер егіп, көгалдандыру жұмыстарын да жүргізді. Сонымен қатар экология, табиғат қорғау жөнінде түсіндіру шараларын өткізді. Бұл жұмыстар оқушылардың бойына туған жерге деген сүйіспеншілікті, табиғатқа жанашырлықты қалыптастыруға зор ықпал етеді.

Мемлекет басшысы Қасым-Жомарт Тоқаевтың бастамасымен жүзеге асырылып жатқан «Таза Қазақстан» жалпыұлттық экологиялық акциясына қолдау білдірген Түркістан қаласында орналасқан білім ордалары да аптаның әр сенбісінде тазалық жұмыстарын жүргізуде.

Атап айтар болсақ, Түркістан қаласы білім бөліміне қарасты Хамза атындағы N2 жалпы білім беретін мектебінде 2025 жылдың 20 желтоқсан күні «Таза Қазақстан» экологиялық акциясы аясында кезекті сенбілік ұйымдастырылып, аталған шараға мектеп ұжымы, кіші қызметкерлер белсене қатысып, мектеп ауласын жапырақтар мен қоқыстан тазартып, тәртіпке келтірді.

Сенбіліктің басты мақсаты – қоршаған ортаны қорғау, жасыл желекті көбейту, экологиялық мәдениетті қалыптастыру және ұжымдық жауапкершілікті арттыру болды.

«- Мұндай іс-шаралар экологиялық мәдениетті қалыптастырып, мектебіміздің тазалығы мен көркіне ортақ жауапкершілікті арттыра түседі.Таза табиғат-денсаулық негізі.Өз қаламыздың, білім ордамыздың табиғатын көркейтуге үлесімізді қосайық! Сенбілікке атсалысқан ерікті ұстаздар және кіші қызметкерлерге белсенділігі мен табиғатқа деген жанашырлығы үшін алғыс айтамыз!!» – дейді білім ордасының басшылығы.

Сонымен қатар, Түркістан қалалық білім бөліміне қарасты «Ж.Жабаев атындағы №11 жалпы білім беретін мектеп» коммуналдық мемлекеттік мекемесінде 20 желтоқсан күні «Таза Қазақстан» тұжырымдамасын іске асыру мақсатында мектеп аумағында сенбілік тазалық жұмыстарын өткізді. Қоршаған ортаның тазалығын сақтау әр адамның ішкі мәдениетінің көрсеткіші. Мектеп ұжымы және кіші қызметкерлер де сенбілікке белсене атсалысты.

Сондай-ақ, шахардағы “Әл-Фараби атындағы N10 жалпы білім беретін мектебінде де “Таза Қазақстан” экологиялық жобасы аясында әр аптаның сенбісінде тазалық жұмыстары жүргізіледі. Кезекті тазалық шарасында мектеп қызметкерлері ғимараттың ауласы мен жақын орналасқан көшелерді қоқыстардан тазартты. Мектеп мұғалімдері мен қызметкерлері қоршаған ортаның ластанбай таза болуына өз үлестерін қосты.  Сенбілік — бұл қоғам болып жиналып, қоршаған ортаны тазалау, абаттандыру үшін өткізілетін ерікті еңбек күні. Мақсаты — тазалықты сақтау, экологиялық мәдениетті арттыру.

Одан бөлек, бұл күні «М.Маметова атындағы жалпы білім беретін мектеп» коммуналдық мемлекеттік мекемесінде Түркістан қалалық білім бөлімінің 08.12.2025 жылғы №41-03/4500 санды хатын басшылыққа ала отырып,«Таза Қазақстан» акциясы аясында мектеп ауласына ұжым мүшелері сенбілік жұмыстарын ұйымдастырды. Сенбілік барысында қоқыстардан, ағаш жапырақтары мен шөптерден таратылды.

Аталған акцияға  Ататүрік атындағы №17 мектеп-гимназиясы да өз үлесін қосты. Іс-шара барысында оқу ордасының ауласы тұрмыстық қалдықтардан тазартылып, ағаштардың түскен жапырақтары жиналды. Қоршаған ортаны қорғауға бағытталған бұл игі іске ұжым мүшелері белсене атсалысты. Тазалық пен жауапкершілікті басты құндылық ретінде ұстанған барша әріптестерге мектеп басшылығы шынайы алғыстарын білдірді.

Тазылық жұмыстарына кейде өз еріктерімен оқушылар да белсенді түрде атсалысады. Бұл қуантарлық нәтиже, себебі акция кезінде оқушылар таза орта үшін өз еркімен еңбек етеді, жасөспірімдер қоғамдық жауапкершілікті сезінді, “тазалық – әркімнен басталады” деген түсінік нығайды және  ұжымдық еңбек, ұйымшылдық, бірлік арта түседі. Осылайша балалардың табиғатты қорғауға деген көзқарасы өзгеріп, экологиялық мәдениет деңгейі жаңа сатыға көтерілді.

Бұл тұста мұғалімдер мен ата-аналардың қолдауы да ерекше. Олар ұйымдастырушылық жұмыстарды үйлестіріп, балаларға үлгі көрсетеді. Түсіндірме, насихат шараларын да жүргізеді.Осының нәтижесінде “Таза Қазақстан” акциясы тек науқандық емес, үздіксіз жалғасатын игі дәстүрге айналып келеді.

“Таза Қазақстан” акциясына білім ордаларының қосқан үлесі – мемлекет бастамасына жасалған қолдау ғана емес, болашақ ұрпақтың экологиялық санасын қалыптастыру жолындағы үлкен қадам. Табиғатты аялаған ұрпақ – елдің ертеңі. Сондықтан білім ұйымдарының белсенді еңбегі – еліміздің экологиялық қауіпсіздігіне қосылған нақты үлес деп толық айтуға болады.

Ел Президенті Қасым-Жомарт Кемелұлы Тоқаев еліміздің білім саласын жаңа деңгейге көтеру мақсатында «Келешек мектептері» жобасын қолға алуды тапсырған болатын. Түркістан облысында осы жоба арқылы 29 мектептің құрылысы жүргізілді. Бүгін солардың бірі Мақтаарал ауданына қарасты Атакент кентінде ашылып, 1500 орындық мектеп қолданысқа берілді. Білім ошағының ашылуына Түркістан облысының әкімі Нұралхан Көшеров арнайы қатысып, жұртшылықты ғимараттың ашылуымен құттықтады.

«– Бүгін Мақтаарал өңірінде сүйінші жаңалық болып жатыр. Ауданда тағы да заманауи мектеп бой көтеріп, оқушыларға есігін айқара ашты. Бұл – мемлекетіміздің білім мен ғылымға бағытталған стратегиялық саясатын көрсететін мәні зор оқиға. Мемлекет басшысы Қасым-Жомарт Кемелұлы Тоқаевтың бастамасымен жүзеге асырылған «Келешек мектептері» ұлттық жобасы – еліміздің интеллектуалдық әлеуетін арттыруға бағытталған бағдарлы қадам. Мақтаарал ауданында ашылып отырған 1500 орындық жаңа мектеп – ауылдағы балаларға жасалған үлкен қолдау. Бұл заманауи білім ордасында оқушылардың терең білім алуына, шығармашылықты дамытуына барлық жағдай жасалған. Мұнда келешектің ойлы, парасатты және бәсекеге қабілетті жастары тәрбиеленеді. Бұл мектеп – тек оқу орны ғана емес, жас ұрпақтың азамат болып қалыптасатын айбынды ордасы. Мақтаарал – еңбекқор халқы бар, қарқынды дамып келе жатқан қасиетті мекен. Бүгін бой көтерген жаңа білім ұясы – осы өңірдің адами капиталын жақсартып, ұстаздар мен оқушыларды жаңа белеске жетелейді. Бізге білімді, отаншыл, рухы биік, жаңашыл буын керек. Міне, жаңа мектеп сол асыл міндетті орындауға қызмет етеді. Бұл – ұлт болашағына салынған инвестиция. Сондықтан ұстаздарымыз үнемі ізденіп, сапалы білім берулері керек. Сіздерді жаңа мектептің ашылуымен шын жүректен құттықтаймын! Мақтааралдың білімге құштар жастары ғылым мен мәдениеттің биік шыңдарын бағындырып, елге қызмет ете берсін!» – деді облыс басшысы Нұралхан Оралбайұлы.

Айта кетейік, Түркістан облысы білім беру саласын жаңғырту және оқушы орындарының тапшылығын шешу мақсатында «Келешек мектептері» ұлттық жобасын белсенді жүзеге асырып жатыр. Бұл жоба — еліміздің білім жүйесін заманауи талаптарға сай қайта құру, сапалы және қауіпсіз білім беру инфрақұрылымын қамтамасыз ету бағытындағы ауқымды бастама.

Мақтаарал ауданына қарасты Атакент кентінде ашылған 1500 орындық мектеп жобасының құны 5,2 млрд. теңгені құрайды. Ал ғимарат 14 710 метр аумақта орналасқан. Сыйымдылығы – 1500 бала. «Samruk-Kazyna Construction» АҚ тапсырысымен құрылыс жұмыстарын «BCN Group» ЖШС компаниясы жүргізді. Мектеп заманауи талаптарға сай жабдықталған. Спорт залы, мәдениет залы, асхана, акт залы, оқу бөлмелері мәжіліс залы, арнайы пән кабинеттері бар. Айта кетейік, Түркістан облысында Мемлекет басшысының тапсырмасымен «Келешек мектептері» жобасымен 29 білім ұясы салынды.

«Келешек мектептері» — Президент Қасым-Жомарт Тоқаевтың бастамасымен жүзеге асырылып отырған ұлттық жоба. Оның негізгі мақсаты — жаңа мектептер салу, білім беру кеңістігін кеңейту, үш ауысымды оқыту мен оқушы орнын жетіспеу мәселелерін шешу, сондай-ақ оқушыларға заманауи, қауіпсіз әрі қолайлы оқу ортасын қамтамасыз ету. Бұған дейін де  Түркістан облысында «Келешек мектептері» аясында бірнеше жаңа мектеп пайдалануға берілген болатын. Атап айтқанда Төлеби ауданының Достық ауылында 900 орындық және Сайрам ауданының Ақсу ауылында 600 орындық мектептер ашылды.  Келес ауданында Абай ауылында 600 орындық жаңа мектеп ел игілігіне берілді. Сонымен қатар Сауран ауданында 300 орындық жаңа мектеп те ашылды.  Бұл мектептер заманауи стандарттарға сай салынған: оқу кабинеттері, спорт залдары, кітапханалар, кең акт залдары, асхана және қауіпсіздік жүйелері бар. Мұндай инфрақұрылым оқушылардың жан-жақты дамуына жағдай жасайды.  Облыстағы мектептердің ақпараттық инфрақұрылымын дамыту да маңызды назарда тұр. Мысалы, кейбір мектептерде интернетке тұрақты қол жеткізу, соның ішінде ауылдық жерлердегі білім беру ресурстарына қол жетімділікті қамтамасыз ету үшін халықаралық бастамалар да қолға алынып жатыр. Бұл оқушылар мен мұғалімдерге онлайн ресурстарға кіруді жеңілдетеді және білім беру сапасын арттыруға септігін тигізеді.   «Келешек мектептері» жобасы Түркістан облысында мектеп тапшылығын жоюға айтарлықтай үлес қосуда. Заманауи мектептердің ашылуы жаңа оқу орындарының санын арттырып қана қоймай, оқушылар үшін қауіпсіз әрі қолайлы оқу ортасын қамтамасыз етеді. Бұл — өңірде білім сапасын көтеруге бағытталған жүйелі жұмыстардың айқын көрінісі.

Қазіргі кезеңдегі әлемдік өзгерістер білім беру жүйесіне де түбегейлі жаңаруды талап етуде. Ғылым мен технологияның дамуы, цифрлық орта, жасанды интеллекттің кең қолданылуы – болашақ мектептерінің бейнесін түзіп, олардың жаңа бағытта дамуына жол ашып отыр. Сондықтан келешек мектебі – тек білім беретін орын ғана емес, тұлға қалыптастыратын, шығармашыл ойлауды дамытатын, өмірге бейімдейтін заманауи орталық болмақ.

Болашақ мектептерінде дәстүрлі оқыту әдістерімен қатар толыққанды цифрлық платформа қолданылады. Интерактивті тақталар, виртуалды зертханалар, онлайн білім беру ресурстары, қашықтан оқу жүйесі оқушыларға кең мүмкіндік береді. Жасанды интеллект әр оқушының қабілеті мен қызығушылығына сай жеке оқу бағдарламасын ұсына алуы мүмкін. Келешек мектебі тек ақпарат берумен шектелмейді. Ең басты міндет – оқушыны ойландыру, талдауға, шешім қабылдауға, жаңа идея ұсынуға үйрету. Жобалық жұмыс, зерттеу жүргізу, тәжірибе жасау сияқты оқу формалары көбейеді. Бұл балалардың сын тұрғысынан ойлау дағдысын қалыптастырып, шығармашылық қабілетін дамытады.Тек білімді ұсыну жеткіліксіз. Болашақ мектебі – ұлттық құндылықтарды сақтай отырып, әлемдік мәдениетке бейім тұлға қалыптастыру ортасы болуы тиіс.

Құрмет, жауапкершілік, отансүйгіштік, еңбексүйгіштік секілді қасиеттерді бойға сіңіру – мектеп жұмысының маңызды бөлігі болып қала береді. Келешек мектебінің табысы – мұғалімге байланысты. Болашақ ұстаз тек пән үйретуші емес, бағыт беруші, кеңесші, мотивация беретін тұлғаға айналады. Заманауи технологияны меңгерген, үздіксіз ізденісте болатын, оқушымен тең дәрежеде сұхбат құратын жаңа форматтағы педагог қажет. Келешек мектептері  жай ғана оқу ғимараты емес, қауіпсіз, қолжетімді, психологиялық тұрғыдан жайлы кеңістікке айналады. Спорт, өнер, ғылыммен айналысуға арналған заманауи кабинеттер мен орталықтар оқушылардың жан-жақты дамуына жағдай жасайды.Озық технология, сапалы білім, адамгершілік құндылық және жас ұрпақтың қабілетін ашуға бағытталған жаңа жүйе – елдің дамуына негіз болады.

Түркістан облысындағы «Келешек мектептері» жобасы — елдің білім беру жүйесін жаңғыртудағы маңызды стратегиялық қадам. Жаңа мектептердің ашылуы аймақтағы оқушыларға сапалы білім алу мүмкіндігін кеңейтіп, білім саласындағы инфрақұрылымның дамуына серпін беруде. Жоба болашақта да оқушы орындарының тапшылығын жойып, заманауи талаптарға сай білім беру ортасын қалыптастыруды жалғастырады деп күтілуде.

Қазіргі заманғы білім беру үдерісінде цифрлық технологияларды тиімді қолдану оқушылардың шығармашылық қабілеттерін арттырумен қатар, нақты өндірістік дағдыларды қалыптастыруға мүмкіндік береді. Осы мақсатта № 34 жалпы білім беретін мектебінде AI көмегімен 3D модельдеу және тігін шеберханасымен интеграцияланған жаңа оқу жобасы іске қосылды.

Жоба аясында оқушылар жасанды интеллектті пайдаланып киім бөлшектерінің 3D моделін әзірлейді. Арнайы бағдарламалар арқылы дайындалған сандық макеттер 3D принтерге жіберіліп, одан лекалолар мен трафареттер басып шығарылады. Бұл әдіс дәстүрлі лекало дайындау процесін жеңілдетіп қана қоймай, оны әлдеқайда дәл әрі тиімді етеді.

Алынған 3D трафареттер көркем еңбек сабағында үлгі ретінде қолданылады, оқушылар бұйымның құрылымын, пішімін және өлшемдік пропорцияларын тереңірек түсінеді. Кейін осы трафареттер тігін шеберханасына жіберіліп, оқушылар нақты матадан дайын бұйымдарды тігуге кіріседі.
Жоба мақсаты – цифрлық технологияларды тәжірибелік оқытумен байланыстыра отырып, оқушылардың дизайнерлік ойлауын, инженерлік дағдыларын және тігін ісіне қызығушылығын арттыру. Сонымен қатар, бұл тәсіл оқушыларды заманауи өндіріс стандарттарымен таныстырып, болашақ мамандықтарын саналы таңдауға ықпал етеді.

Бұл бастама болашақта мектептің STEAM бағытындағы мүмкіндіктерін кеңейтіп, оқушыларды жаңа технологиялармен жұмыс істеуге ынталандыратынына сенім мол.

Шардара қаласындағы үш ауысымды оқыту мәселесі толық шешімін тапты. Бұған дейін сыныптар толып, ғимарат мүмкіндігі шектеулі болған №12 жалпы білім беретін мектеп «Келешек мектептері» ұлттық жобасы аясында жаңа, заманауи ғимаратқа көшті.

2025 жылдың 17 ақпанында 1200 орынға арналған жаңа мектеп пайдалануға беріліп, 1057 оқушы мен 107 педагог №4 мөлтек ауданындағы кең, толық жабдықталған білім ошағына орналасты. Бұрынғы ескі мектеп ғимаратында сыныптардың жетіспеуі салдарынан үш ауысымды оқу қаупі туындаған еді. Жаңа ғимарат бұл проблеманы түбегейлі шешіп, оқушылардың қауіпсіз әрі қолайлы ортада білім алуына жағдай жасады.

Жаңа мектепте пән кабинеттері, STEM және робототехника зертханалары, ІТ сыныптары, спорт және акт залы, кітапхана, психолог және медицина кабинеттері толық жабдықталған.

Мектепте білім сапасын арттыру бағытында білікті педагогтер қызмет етеді: педагог-зерттеуші, сарапшы, модератор санатындағы 90-ға жуық мұғалім жұмыс істейді.

Бүгінде №12 мектеп – Шардара өңіріндегі үш ауысым мәселесін шешкен, заманауи талаптарға толық сай білім ордасы ретінде қызметін жалғастыруда.

Мақтаарал ауданында БАҚ өкілдеріне арналған баспасөз туры өтті. Тілшілер қосыны әуелі Ж.Нұрлыбаев ауылдық округіне қарасты Өнімкер елді мекенінде болып, газ беру жұмыстарымен танысты. Аудан бойынша 5 елді мекен газға қосылып, ауыл тұрғындарының көптен күткен қуанышына куә болды. Оның ішінде Ж.Нұрлыбаев ауылдық округіне қарасты Ырысты, Қарақыр, Өнімкер елді мекендері және Жаңажол ауылдық округіне қарасты Арайлы, Достық елді мекендері бар.

Соңғы жылдары өңірде жаңа мәдениет үйлері мен кітапханалар бой көтеріп, тұрғындардың рухани-мәдени сұранысын қамтамасыз етуге айрықша көңіл бөлінуде. Мәселен, биылдың өзінде ауданда «Ауыл – ел бесігі» бағдарламасы аясында 2 мәдениет үйі мен кітапхананың құрылысы жүріп жатыр. БАҚ өкілдері аталған жұмыстармен танысу үшін Ж.Нұрлыбаев ауылдық округіне қарасты Ынталы елді мекенінде болды.

Ж.Нұрлыбаев ауылдық округіндегі Ынталы елді мекенінде орналасқан мәдениет үйі мен кітапхана құрылысы 2025 жылдың қазан айында аяқталады деп күтілуде. Құрылысқа бөлінген жалпы қаржы көлемі – 794 млн теңге.

Журналистер сапар аясында Мақтаарал ауылдық округіне қарасты Игілік елдімекенінде орналасқан «Агрогруз» ЖШС-ң жұмысымен танысты. Ауыл шаруашылығы саласында жүзеге асып жатқан бұл инвестициялық жоба бүгінде құрылыстың аяқталу кезеңінде тұр. Нысан қажетті инфрақұрылыммен толық қамтамасыз етіліп, заманауи технологиялармен жабдықталған. Жалпы құны 150 миллион теңге көлеміндегі инвестиция тартылған бұл жоба шетел нарығына бақша өнімдерін экспорттауға бағытталған. Жоспар бойынша серіктестік жылына 6 мың тоннаға дейін қауын-қарбыз және өзге де бақша өнімдерін экспортқа шығаруға қауқарлы.

Аудан аумағында егін шаруашылығында еңбек өнімділігін 2-3 есеге арттыру мақсатында заманауи су үнемдеу технологияларын енгізу бағытында жүйелі жұмыстар жүргізілуде. Тілшілер аталған жұмыстармен танысу мақсатында Мақтаарал ауылдық округі Өркениет елді мекенінде болды. 2025 жылы 8 мың гектар жерге су үнемдеу технологияларын енгізу жоспары бекітілсе, бүгінгі таңда 182 жоба іске асырылып, 3,4 мың гектар жерге тамшылатып суғару технологиясы енгізілген. Оның ішінде 988,7 гектар – мақта дақылы, 1 800 гектар – бақша дақылдары, 520 гектар – қырыққабат, 35 гектар – күріш дақылы бар.

Сонымен қатар, БАҚ өкілдері Атакент кентінде құрылысы жүріп жатқан 1500 орындық мектептің жұмысымен танысты. «Келешек мектептері» ұлттық жобасы аясында салынып жатқан мектеп құрылысы 2023 жылы басталған, биыл жаңа оқу жылында пайдалануға беру көзделуде. 4 гектар аумақты алып жатқан мектеп ғимаратының жалпы көлемі – 14 710 шаршы метр. Нысанның инженерлік инфрақұрылымы толығымен жүргізілген. Қазіргі уақытта ішкі әрлеу және абаттандыру жұмыстары жүргізілуде. Мектепте оқушылардың сапалы білім алуы үшін, қауіпсіздігі мен қолайлылығы үшін барлық жағдай қарастырылған.

Қазақстан өңірлерінің бәрінен 1000 ауыл оқушысы Алматыға – еліміздегі ең ауқымды білім шараларының бірінің қорытынды кезеңі – 13-20 маусымда өтетін IQanat республикалық Олимпиадасының финалына қатысу үшін аттанады!

Бұл мың бала бұған дейінгі 50 мың бала қатысқан іріктеу кезеңдерінен үздік шыққан 8-сынып оқушылары. Ақтық сын – жай ғана финал емес, тағдырларды өзгертетін апта болмақ! Финалға өткен 1000 үздік баланың ішіндегі 256 бала Түркістандық өрендер.

Басты жүлде – еліміздің ең үздік оқу орындарының бірі IQanat High School of Burabay мектебінде білім алуға арналған гранттар. Финалистердің бір бөлігі мектеп-пансионатта тегін оқуға мүмкіндік алатын болса, екінші бөлігі олимпиададан кейінгі үш жылдық тегін қолдау бағдарламасына қатысады. Оның аясында балалар ҰБТ-ға, халықаралық емтихандарға белсенді дайындалады, ағылшын тілін, ІТ дағдыларды, кәсіпкерлік негіздері мен өзге бағыттарды меңгереді. Олардың ынтасы мен жетістіктері үнемі бақылауда болады.

Финалдың бағдарламасы тестілеуден бөлек, білім беру бағытындағы мәдени шараларды қамтиды: soft skills дамыту бойынша тренингтер, қала мен университеттерге экскурсиялар, сондай-ақ бірегей peer-to-peer бағдарламасы. Оның аясында IQanat  мектебінің түлектері мен жоғары сынып оқушылары жасы кіші балалардың білім алуына көмектеседі.

Түркістан облысының білім басқармасына қарасты мектептерінде 28 мамыр күні балаларды қорғау күніне орай, “Қазақстан балалары” бірыңғай тұжырымдамасы аясында «Кибер тұмар» ақпараттық білім беру науқаны өтті. Бұл науқан интернеттегі қауіптерден қорғауға, интернет алаяқтардан аулақ болуға, жалған ақпараттардан сақ болуға және олардың цифрлық сауаттылығын арттыруға бағытталған. Науқан аясында оқушыларға: Жеке деректерді қалай қорғау керек?, Кибербуллингтен қалай сақтануға болады?, Әлеуметтік желіні қауіпсіз пайдалану жолдары, интернет алаяқтардан сақтану сияқты маңызды тақырыптар бойынша түсіндіру жұмыстары жүргізілді.  Мақсат – балалардың қауіпсіз цифрлық ортада дамуына ықпал ету және олардың интернеттегі жауапкершілігін қалыптастыру.

Мектептерде балаларды цифрлық ортадан қорғауға бағытталған «Кибер тұмар» ақпараттық білім беру науқаны” 4, 8, 9, 10 сынып оқушылары арасында арнайы ұйымдастырылып, мектептердегі информатика пән мұғалімдері арнайы видео, презентация көрсету арқылы түсіндірме жұмыстарын жүргізе отырып сабақ өтті. Оқушылар сабақ барысында “Кибер Тұмар” ақпараттық білім беру орталығының дұрыс ақпарат бере отырып, цифрлық құжаттарын құпия түрде сақтайтынына сенім білдірді. Науқанның жалпы бағыты да оқушыларға интернет қауіпсіздігі туралы түсінік беру, кибербуллингтің, фишингтің, зиянды сілтемелердің алдын алу жолдарын үйрету және сандық сауаттылықты арттыру болатын.  Іс-шара барысында түрлі бейнероликтер көрсетіліп, ақпараттық парақшалар таратылды, интерактивті сабақтар мен пікірталас алаңдары ұйымдастырылды. Оқушылар өз ойларын ашық айтып, қауіпсіз интернетті қалыптастыруда өз рөлдерін ұғынды. “Кибер тұмар” науқаны арқылы  балаларды тек білімді ғана емес, сонымен қатар қауіпсіз цифрлық кеңістікте өмір сүру дағдыларын қалыптастыруды үйренді.

Осындай шараның бірі Түркістан қаласындағы Ататүрік атындағы № 17 мектеп-гимназиясында жоғарғы сынып оқушыларымен де болып өтті. Мектеп-гимназия директорының тәрбие ісі жөніндегі орынбасары Примбетова Шарипа ҚР Оқу-ағарту министрлігінің Балалардың құқықтарын қорғау комитеті Қазақстан ЮНИСЕФ ұйымымен бірлесіп, балаларды цифрлық ортада қорғауға бағытталған «КИБЕР ТҰМАР» ауқымды науқанының жүргізіліп жатқанына тоқталды. Ал, мектептің 9 Г сынып жетекшісі Наржанова Меруерт бейнеролик көрсете отырып, жалған терроризм -қоғамдық тәртіпке қол сұғатын, бейбіт тұрғындар арасында дүрбелең туғызатын, мемлекеттік органдар мен ұйымдардың жұмысын бұзатын қауіпті қылмыс екеніне тоқталды. Сондай-ақ, 9 В сынып жетекшісі Сүлейменова Ұлбосын мектептің өзін -өзі басқару ұйымының дайындаған бейне ролигі арқылы нашақорлық – адамзаттың қас жауы туралы айтып өтті. Дүние жүзі осы ғасыр дертінің алдын алу мақсатында түрлі шаралар қолданып, мәселені шешудің жолын іздеуде.Сонымен қатар, 9 Ә сынып оқушыларының «Вейпсіз мектеп» тақырыбында дайындаған бейнеролигі арқылы қорытынды жасады.

Жиында, Түркістан ҚПБ ЖПҚ ЮПТ УПИ полиция капитаны, мектеп инспекторы Өндірбай Еркебұлан да күн тәртібіндегі мәселелерге бүгінгі күннен кеңінен мысалдар келтіре отырып, жан- жақты тоқталып өтті. Оқушылар тарапынан қойылған сұрақтарға жауап берілді. Жоғарғы сынып оқушыларымен болған сауықтандыру жиналысын мектеп-гимназия директоры Урумова Рахила Кенжебекқызы қорытындылады.

Балаларды қорғау күніне орай ұйымдастырылған «Кибер Тұмар» ақпараттық-білім беру науқаны аясындағы түсіндіру іс-шарасы, Шардара ауданына қарасты «Қазақстан жалпы білім беретін мектептің 6-сынып оқушыларымен де өткізілді. Цифрлық құрылғыларды қауіпсіз пайдалану ережелері мен жеке деректерді қорғау тәсілдері таныстырылды. Құпия сөздерді құру және оларды қорғау туралы кеңестер берілді. Оқушылардың цифрлық құрылғыларды пайдалану дағдылары бағаланып, олардың интернеттегі қауіпсіздік туралы білім деңгейі анықталды. Кибербуллинг, фишинг және зиянды контенттерден қорғану жолдары талқыланды.

Бүгінгі таңда ақпараттық технологиялар қарқынды дамып, балалардың интернетке қолжетімділігі артып келеді. Бұл жағдай бір жағынан мүмкіндіктерді кеңейтсе, екінші жағынан түрлі қауіптермен бетпе-бет келуіне себеп болуы мүмкін. Сол себепті, балаларға цифрлық қауіпсіздік ережелерін үйрету – ата-ана мен қоғамның ортақ міндеті. «Кибер Тұмар» – бұл тек ақпараттық іс-шара ғана емес, бұл – әр баланың қауіпсіз болашағын қамтамасыз ету жолында жасалған нақты қадам. Шара аясында балалар мен жасөспірімдерге арналған семинарлар, тренингтер мен интерактивті сабақтар ұйымдастырылды. Бала – болашақтың иесі. Цифрлық кеңістікте өзін қорғай білетін, ақпаратты талдай алатын ұрпақ – саналы қоғамның негізі. Осыған орай, бұл іс-шара әр баланың саналы әрі қауіпсіз цифрлық өмір сүруіне бағытталған маңызды бастама ретінде өз жалғасын табады.

Түркістан облыстық мәслихатының депутаты Ж.Әбдібаев Сарыағаш ауданы Жібек жолы ауылындағы, “Амангелді” орта мектебінің соңғы қоңырау салтанатты кешіне қатысты. Осы қара шаңырақ болған мектеп қабырғасында білім мен тәрбие алып, өмірлік маңызды дағдыларды бойларына сіңірген түлектер, үлкен өмірге қадам басты.

Жыл бойы аянбай еңбек етіп, әрбір оқушының жүрегіне жол тауып, білім мен тәрбие берген ұстаздар еңбегі ерекше.

Түлектердің алдағы өмірлеріне бағыт беретін алтын арқау — осы білім ордасында қаланды. Ендігі жерде — үлкен жауапкершілік, жаңа белестер, тың бастамалар жолы күтіп тұр.
Қай жолды таңдаса да, абыройлы, адал, білімді азамат болуларына тілектес екендігін жеткізді.

«Түркістан жоғары көпсалалы, қол өнер колледжі» МҚКҚ – қазіргі жаһандану кезеңіндегі өзгерістерге сай бәсекеге қабілетті, кәсіби білікті маман даярлауда өзіндік орны мен шежірелі тарихы бар білім ордасы.

Оңтүстік өңірдегі ағартушылық бағытта мамандар даярлайтын, ілгері білімді кеңінен меңгерген, бастамашыл, еңбек нарығы мен технологиялардың ауысып тұратын талаптарына бейімделген қоғамда жұмыс жасай алатын, заман талабын ескере отырып өркендеп келе жатқан білім мекемесі.
Тағылымды тарихы 1934 жылдан басталатын, заманымен үндескен қарашаңырақтан елімізге әйгілі академик, профессорлар, белгілі қоғам қайраткерлері, зиялы азаматтар шығып, «Білім керуенінің» көшін бастады.
Колледждің материалдық-техникалық базасы заманауи технологиялық жүйемен қамтамасыз етілген, білім алушыларға қолайлы жағдай жасалған.
Білім ордасында гуманитарлық және техникалық бағытта төмендегі мамандықтар оқытылады: “Бастауыш білім беру педагогикасы мен әдістемесі”, “Мектепке дейінгі тәрбие және оқыту”, “Негізгі орта білім берудегі тіл мен әдебиетті оқытудың педагогикасы мен әдістемесі”, “Дене тәрбиесі және спорт”, “Туризм”, “Бағдарламалық қамтамасыз ету (түрлері бойынша)”, “Есептеу техникасы және ақпараттық желілер (түрлері бойынша)”, “Зергерлік іс”, “Сәндік қолданбалы және халықтық кәсіпшілік өнері (бейін бойынша)”, “Тігін өндірісі және киімдерді үлгілеу”, «Электромеханикалық жабдықтарға техникалық қызмет көрсету, жөндеу және пайдалану».
Ахан Асанов басқарып отырған білім ордасының ұжымы «Инновациялық дамудың қажеттілігі мен міндеттеріне сай, өңірдің өзгерген, әлеуметтік-экономикалық жағдайында техникалық және кәсіптік білім беру жүйесінде кәсіби машықтанған, бәсекеге қабілетті, білікті мамандарды даярлау» миссиясы бойынша жұмыс жасайды.
Колледждің стратегиялық жоспарлау міндеттерін жүзеге асыру нәтижесі – жоғары сападағы оқытушыларды даярлауда интеллект пен мәдениет рухын, студент өмірінің бірегей көрінісін сақтау.
Колледж ИДЖ – негізінде Дүниежүзілік банк жариялаған конкурста «Тігін өндірісі және киімдерді үлгілеу» мамандығы бойынша грант иеленген. Өңірдегі және аймақтағы сұраныстарға жауап беретін, жеңіл өнеркәсіп саласының дамуына үлес қоса алатын педагог кадрлар мен білім алушылар республика, облыс деңгейінде жоғары биіктерден көрінуде. Білім ордасы облыс деңгейінде «Сән технологиясы» бойынша құзыреттілік орталығы болып саналады. Дәстүрлі өткізілетін «Үздік шебер» байқауында арнайы пән оқытушылары жыл сайын жүлделі І орыннан көрінуде.
Колледж студенттері «WorldSkills Turkestan», республикалық «WorldSkills Kazakstan» чемпионаттарында, түрлі зияткерлік сайыстар мен олимпиадаларда жоғары нәтижелерге қол жеткізіп, колледж мерейін үстем етуде.

Колледж спортшылары түрлі облыстық, республикалық және халықаралық жарыстардың, әлем чемпионаттарының жеңімпаздары мен жүлдегерлері.
Техникалық және кәсіптік білім саласының бәсекеге қабілеттілігін арттыру мақсатында серпінді жұмыстар атқарылуда.
ҚР Президенті Қ.К.Тоқаевтың Жарлығымен 2025 жыл Қазақстанда «Жұмысшы мамандықтар жылы» деп жарияланды. Жұмысшы мамандықтардың беделін арттыру, техникалық және кәсіптік білім беру жүйесінің реформасын жүзеге асыру мақсатында білім алушыларға қолайлы жағдайлар жасау көзделуде. Шәкіртақының, жан басына шаққандағы қаржының ұлғаюы, жастардың бос жүрмеуін көздеу, белгілі бір маман иесі болып шығуына ықпал ету, еңбекқорлық пен кәсіпқойлық идеясын ілгерілету – басты мақсат.
«Жас маман» жобасы аясында колледжіміз «IT» және «Қол өнер» мамандықтары бойынша республикалық деңгейдегі құзыреттілік орталықтар болып саналады. Аталған жоба аясында «3 D модельдеу және протиптеу», «Кибернетика, робототехника», «Бағдарламалық инженерия және Biq Data талдау» сияқты бірнеше кабинет-зертханалар ашылды.

Дуальды оқыту жүйесі арқылы білім алушыларымыз өңірдегі озық мектептер мен балабақшаларда, өнеркәсіп орындарында тәжірибелерін шыңдауда.
Педагог кадрларымыз білім сапасын арттыру мақсатында ғылым мен техниканың озық үлгісі болған мемлекеттердің тәжірибесін үйреніп, біліктіліктерін арттыруда. Түркия, Сингапур, Малайзия, Франция, Германия, Белоруссия, Қытай, Қырғызстан, Өзбекстан сияқты елдердің оқу үдерісіндегі жаңашылдықтарды үйреніп, тәжірибе алмасуда.

Білім ордасы – талантты да талапты жастардың өзіндік айқындамасы бар, нағыз азамат болып қалыптасуына ерекше еңбек сіңіріп келе жатқан оқу орны.
Құрметті 9 және 11 сынып мектеп бітіруші түлектер және ата-аналар!
Түркістан жоғары көпсалалы, қол өнер колледжі сіздерді 2025-2026 оқу жылына білім алуға шақырады. Шалғай қалалар мен аудандардан келетін білім алушылар жатақханамен қамтамасыз етіледі.
Құрметті талапкер!
Бәсекеге қабілетті, өз болашағына нық сеніммен қарайтын маман боламын десеңіз, таңдауыңыз бізде болсын!
Қазақ зиялысы Жүсіпбек сөзімен айтсақ, «Оқу, білім – жанған шырақ ойласаң, үйренерсің, іздеп көрсең – қалмасаң».
Біздің мақсатымыз – жастарды білім алуға шақыру, саналы білім, сапалы тәрбие беру, елдің жарқын болашағы жолында үздік еңбек ететін мамандарды дайындау.

Мира СЕЙЛБЕКОВА,
«Түркістан жоғары көпсалалы, қол өнер колледжі» МҚКҚ әдіскері.