Түркістан облысының агроөнеркәсіптік кешені республикада ерекше орын алады. Еліміздегі жалпы өнім көлемінің 13% өңірге тиесілі немесе жыл сайын 1 трлн. теңгеден астам өнім өндіріледі. Биыл су үнемдеу технологияларын 27 мың гектарға енгізу жоспарланып, нақты 59 мың гектар алқапқа егілді. Оның ішінде 53,7 мың гектарға тамшылатып суару, 6,2 мың гектарға жаңбырлатып суару технологиялары қолданылып, жоспар 2 есе артық орындалды. Жалпы бүгінгі күнге облыста 114 мың гектарға су үнемдеу технологиялары енгізілді. Үнемделген су көлемі – 195 млн.м³. Жыл сайын 50 мың гектарға технологияны қосымша ендіру арқылы 2030 жылға қарай 364 мың гектар алқаптан 622,8 млн.текше метр су үнемдеу көзделіп отыр. Cу үнемдеу технологиялары өндірісін дамыту, қолжетімділігін арттыру мақсатында қуаттылығы 163 мың гектар алқапты қамтитын 4 кәсіпорын іске қосылды. Сонымен қатар 2026 жылы жылдық қуаттылығы 30 мың гектар алқапты құрайтын 2 кәсіпорын іске қосылады. Мақта мен күріш өсіруде жаңа су үнемдеу технологиялары қолданылып, нәтижесінде артық өнім алынды.

– Су тапшылығы қазірдің өзінде халықтың өмір сүру сапасына және экономиканың тұрақты дамуына тікелей кері әсерін тигізуде, бұл су ресурстарын тиімді басқару және пайдалану тиімділігін арттыру мәселелерін ерекше өзекті етеді. Қауіп-қатерлерді азайту және агроөнеркәсіптік кешеннің тұрақты дамуын қамтамасыз ету мақсатында су үнемдейтін технологияларды, суару әдістерін және ирригациялық жүйелердің жағдайын мониторинг жүргізу тәсілдерін кеңінен енгізуді күшейту қажет. Сонымен қатар су ресурстарын заңсыз пайдалану, соның ішінде «қара нарық» жағдайларын болдырмау үшін құқық қорғау органдарының белсенді қатысуымен қарсы шаралар қабылдануы тиіс. Егіс құрылымдарын әртараптандыруға, сондай-ақ құрғақшылыққа төзімді және аз су қажет ететін дақылдарды енгізуге ерекше назар аудару қажет. Мұндай тәсіл су ресурстары шектеулі жағдайда ауыл шаруашылығы өндірісінің өнімділігін арттыруға, азық-түлік қауіпсіздігін қамтамасыз етуге және ауылдық аймақтардың тұрақты дамуын қолдауға мүмкіндік береді. Бұл туралы ҚР Премьер-министрінің орынбасары Қанат Бозымбаев Түркістан облысына жұмыс сапарымен келген уақытта айтқан болатын. Түркістан облысының әкімі Нұралхан Көшеров өңірде су үнемдеу технологияларын енгізуге және өндіріс орындарын ашуға, ауыл шаруашылығы өнімдерін терең өңдеу бағытына басымдық беріліп отырғанын мәлімдеп, Мемлекет басшысы Қасым-Жомарт Тоқаевтың тапсырмасымен су үнемдеу технологияларын енгізу, су нысандарын реттеу жұмыстары үздіксіз жүріп жатқанын жеткізген еді.

Расында Түркістан облысы бұл бағытта нақты жобаларды жүзеге асырып келеді. Су үнемдеу технологиясын енгізу – облыстың ауыл шаруашылығындағы стратегиялық бағыты. Өңір климатының құрғақтығы, егіншілік пен мал шаруашылығына тәуелділік суға деген сұранысты жылдан-жылға арттырып отыр. Осыған байланысты соңғы жылдары облыста су үнемдеу технологияларын енгізу мемлекеттік деңгейдегі басым бағыттардың біріне айналды. Бүгінде Түркістан облысында су ресурстарын тиімді пайдалану мақсатында тамшылатып суару, жаңбырлатып суару және цифрлық су басқару жүйелері кезең-кезеңімен енгізілуде. Бұл жұмыстар ең алдымен ауыл шаруашылығы саласының тұрақты дамуын қамтамасыз етуге бағытталған. Қазіргі таңда облыстың бірқатар аудандарында егін алқаптарына тамшылатып суару жүйесі кеңінен қолданылып келеді. Бұл технология суды тікелей өсімдіктің тамырына жеткізу арқылы су шығынын 40–50 пайызға дейін азайтады, топырақтың тұздануын тежейді, өнімнің сапасы мен көлемін арттырады, – дейді ауыл шаруашылығының мамандары.

Сонымен қатар, жаңбырлатып суару әдісі мал азықтық дақылдар мен жайылымдық алқаптарда тиімді қолданылуда. Бұл әдіс жердің ылғалдылығын біркелкі сақтауға мүмкіндік береді. Жалпы бұл жобаның ауыл шаруашылығына тигізіп отырған пайдасы орасан мол. Сала мамандарының айтуынша, су үнемдеу технологияларын енгізудің нәтижесінде өңірде су тапшылығының алдын алу мүмкіндігі артқан және егістік алқаптарда өнімділік өсе бастаған. Сондай-ақ, шаруалардың шығыны азайып, табысы көбейген. Одан бөлек, суды әділ әрі жоспарлы бөлу жүйесі қалыптасып келеді екен. Ал, шаруа қожалық иелерінің  айтуынша, тамшылатып суару енгізілген алқаптарда өнім бұрынғыдан ерте пісіп, сапасы жақсарған. Бұл нарыққа өнімді дер кезінде шығаруға мүмкіндік беріп отыр.

Соңғы кезеңде облыста су ресурстарын цифрлық бақылау және есепке алу жүйелері де енгізіле бастады. Бұл жүйелер арқылы су арналарының жағдайы бақыланады және судың нақты көлемі есепке алынады, сондай-ақ заңсыз су алу деректерінің алдын алу мүмкіндігі артады. Цифрландыру су ресурстарын қорғау және пайдаланудағы тәртіпті күшейтіп, әділдікті қамтамасыз етуге жол ашуда.

Ауыл тұрғындары мен  шаруалар үшін су үнемдеу технологиялары – бұл тек техникалық жаңалық емес, ауыл болашағын сақтаудың кепілі. Су үнемделсе келер ұрпаққа су қоры сақталады және ауыл шаруашылығы тұрақты дамиды, экологиялық тепе-теңдік бұзылмайды. Бүгінде көптеген шаруалар жаңа технологияларға бейімделіп, өз тәжірибелерімен бөлісе бастады. Бұл – су мәдениетінің қалыптасып келе жатқанын көрсетеді.Жалпы бұл заманауи технологияларды енгізу – уақыт талабы. Бұл бағыттағы жұмыстар ауыл шаруашылығының тиімділігін арттырып қана қоймай, су тапшылығының алдын алып, өңірдің экологиялық қауіпсіздігін қамтамасыз етеді.

Мемлекет басшысы биылғы Жолдауында еліміздің жаңа экономикалық бағытын айқындап берді. Жолдаудың басты идеясы – мемлекетімізді инновация мен цифрлық технологияға негізделген экономикаға көшіру. Біріншіден, экономиканы әртараптандыру міндеті қойылды. Яғни, ел экономикасының негізгі басымдығы мұнай мен шикізат емес, жоғары технологиялық өндіріс пен инновациялық индустрия болуы тиіс. Түркістан облысында осы бағытта жүйелі жұмыстар жүріп жатыр.

Өндірісті дамыту мақсатында өңірімізге сырттан келетін тауарларға талдау жүргіздік. Негізгі үлес құрылыс материалдары, жеңіл өнеркәсіп, машина жасау, химия өнеркәсібі және тамақ өндірісіне тиесілі. Олар бойынша импорт көлемі 98 млрд.теңгені құрайды. Бұл тауарларды облыста шығаруға барлық мүмкіндіктеріміз бар. Инвесторлармен келіссөздер жүргізіп, оларға индустриалды және арнайы экономикалық аймақтардан дайын алаңшаларды ұсындық. Нәтижесінде маңызды жобаларды іске асыруға қол жеткіздік. Өңірде зауыттар мен кәсіпорындар саны артып жатыр.

Түркістан облысындағы 20 индустриалды аймақта құны 152 млрд. теңгені құрайтын 99 инвестициялық жоба іске асырылуда. Толық іске асқанда 6 361 жұмыс орны ашылады. Бүгінгі таңда 39 млрд. теңге инвестиция тартылып, 50 жоба іске қосылды. 2609 адам тұрақты жұмыспен қамтылды. «Turan» арнайы экономикалық аймағында 211,8 млрд. теңгеге 28 ірі жоба қолға алынған.

Облыста жыл басынан бері 10 айда өнеркәсіп саласында биыл 107 млрд. теңгеге 22 жоба іске асырылып, 2443 жұмыс орны ашылды. Оның ішінде маңызды әрі ірі жобалар қатарында Созақ ауданындағы табиғи уран өңдеу кешені («Катко» ЖШС, құны – 35 млрд. тг., 300 жұмыс орны); Отырар ауданындағы 2 мақта өңдеу зауыты («Kazakhstan Lihua» ЖШС, құны – 21 млрд. тг., 960 жұмыс орны); Түлкібас ауданында RC Cola брендімен түрлі түсті сусын шығаратын зауыт («Beibars Bottlers» ЖШС, құны – 9 млрд. тг., 96 жұмыс орны) бар. Сонымен қатар Сайрам ауданында заманауи ет комбинаты («KazEcoMeat» ЖШС, құны – 8,5 млрд. тг., 150 жұмыс орны); Ордабасы ауданында алюминий бұйымдарын шығаратын зауыт («Central Asia Aluminium» ЖШС, құны – 8 млрд. тг., 150 жұмыс орны) жұмысын жүргізіп жатыр. Жыл соңында 103,5 млрд. теңгеге қосымша 8 өнеркәсіп жобасы іске қосылады.

Президентіміз өз Жолдауында Орталық Азия елдерімен экономикалық байланысты күшейтуді тапсырған болатын. Көршілес Өзбекстанмен жүргізілген келіссөздер нәтижесінде 100 гектар аумақта «Орталық Азия халықаралық кооперация орталығы» құрылды. Нысан – кеден бекетімен заманауи қоймалар және өндірістік нысандармен интеграцияланған логистикалық орталық қызметін атқарады.

Қазір 7 инвестор осы орталықта жобаларды жүзеге асыруға қызығушылық танытып отыр. Нәтижесінде өңір экономикасына 185 млрд. теңге инвестиция тартылып, 1175 жұмыс орны ашылады. Бюджетке қосымша салық түседі (355 млн. теңге). Бүгінгі таңда 8 өндірістік ғимарат пен ішкі инфрақұрылым жүйелерінің құрылысы қарқынды жүргізілуде. Келесі жылы іске қосу жоспарлануда.

Облыстағы индустриалды аймақтар, инвестиция тарту, шағын өндірістік парктер мен арнайы экономикалық аймақтардың жұмысын жандандыру нәтижесінде 10 айда өнеркәсіп өнім көлемі 1,3 трлн. теңгеге жетіп, өсім деңгейі 113,4 пайызды құрады.

Түркістан маңында отандық өндірісті дамыту және қайта өңдеуді қолдау мақсатында 100 гектар аумақта «Шағын өнеркәсіптік парк» жобасы іске асырылуда. Жоба аясында 152 ғимарат салып, 6 040 жұмыс орнын құру жоспарланған. Жобаның І кезеңінде 40 ғимарат салынып, 32 жоба қосылды. 1 220 жұмыс орны ашылды. Нәтижесінде бюджеттің 1 теңгесіне 8,5 теңге жеке инвестиция тартылған.

Өндірістік парк аумағында жиһаз, жаңбырлатып суғару, сусын, мұздатқыш және құрылыс заттарын шығаратын зауыттар ашылды. Отандық өндірісті дамыту есебінен 27 млрд. теңгеге импорттық тауарларды алмастыруға қол жеткіздік. Алдағы уақытта бейнекамера, медициналық жиhаз, тұрмыстық химиялық бұйымдармен елімізді қамтамасыз етуге және экспортқа шығаруға мүмкіндік болады. Шағын өндірістік алаңдарды дамыту үшін жергілікті кәсіпкерлер белсенді атсалысуда. Біздің әрбір аудан мен қалада, халық тығыз орналасқан ауыл округтерінде өндірістік алаңдар құрылып, кәсіпорындар мен зауыттар ашылады.

Осы жұмыстар нәтижесінде Сауран ауданында жеке инвестиция есебінен 55 гектар аумақта 5 шағын өндірістік алаң құрылды. Мұнда 30 млрд. теңгеге 115 жобаны іске асырып, 1 124 жұмыс орнын құру жоспарланған. Бүгінгі таңда «Қарашық», «Иассы», «Шорнақ», «Үшқайық» және «Жүйнек» өндірістік алаңдарында 37 ғимараттың құрылысы жүргізілуде. Ордабасы ауданында аумағы 10,5 гектар болатын «Темірлан» өндірістік алаңында 5 ғимарат салыну үстінде. Инвестиция көлемі – 10,4 млрд. теңге. 100 жұмыс орны құрылады. Жобаның мультипликативтік тиімділігін ескере отырып, барлық аудандарда осы тәжірибені ендіру жұмыстары басталып кетті.

Жалпы, облыс бойынша жалпы 21 шағын өндірістік алаңдары құрылған. Негізгі бағыттар ретінде: құрылыс материалдары, жиһаз, пластик және резеңке, химия өнімдері өндірістері мен жеңіл өнеркәсіп айқындалды. Бүгінгі таңда, 192 ғимараттың құрылысы қарқынды жүргізілуде. Келесі жылы аяқтап, іске қосуды көзделген.

Түркістан облысында медицина саласын дамыту, ғылым мен технологияның заманауи жетістіктерін қолдана отырып, халыққа сапалы әрі қолжетімді қызмет көрсету мақсатында жүйелі жұмыстар жүргізілуде. Соның аясында бүгін Ордабасы ауданы, Қараспан ауылында жаңа дәрігерлік амбулатория ел игілігіне пайдалануға берілді. Жаңа нысанның ашылу салтанатына Түркістан облысының әкімі Нұралхан Көшеров арнайы қатысып, ауыл тұрғындарын құттықтады. Елімізде әлеуметтік инфрақұрылымды жақсартуға ерекше көңіл бөлініп жатқанын атап өтіп, жұмыстар жалғасатынын жеткізді.

– Алдымен баршаңызды кеше өткен Тәуелсіздік күнімен құттықтаймын. Мемлекет басшысы Қасым-Жомарт Кемелұлы Тоқаев «Бірінші кезекте билік тарапынан денсаулық сақтау, білім беру, әлеуметтік қолдау бағытында нақты шаралар қолға алынуы керек» деп, нақты тапсырма жүктеген болатын. Біздің ең басты мақсатымыз – облыстағы әрбір тұрғынның бақытты өмір сүріп, сапалы медициналық қызметтерге қол жеткізуіне мүмкіндік жасау. Сондықтан тұрғындардың денсаулығын қорғау – өңір дамуының стратегиялық бағыты. Түркістан облысы еліміздің ең серпінді дамып келе жатқан өңірлерінің біріне айналуда. Облыста 2025 жылы жергілікті бюджет есебінен 34 медициналық-санитариялық алғашқы көмек нысандарының құрылысы жүргізілді. Бүгін солардың бірі – Қараспан дәрігерлік амбулаториясының ашылу салтанатына қатысып отырмыз. Жаңа дәрігерлік амбулатория ел игілігіне қызмет етіп, ауыл тұрғындарына сапалы медициналық көмек көрсетеді. Дәрігерлеріміз өз істеріне адал болып, еліміздің бұдан әрі дамуына өз үлестерін қоса береді деп сенемін, – деді Нұралхан Оралбайұлы.

Нысанның құрылысы 2024 жылдың қараша айында басталған. Құрылыс жұмыстарын «Лидер Строй» ЖШС атқарды. Жаңа медициналық нысан Түркістан облысы әкімдігінің денсаулық сақтау басқармасына қарасты «Ордабасы орталық аудандық ауруханасы» ШЖҚ МКК теңгеріміне берілді. Жобаның құны – 201 млн. теңге. 0,25 гектар аумақта орналасқан ғимараттың жалпы алаңы – 376,9 шаршы метр. Мұнда 52 медицина қызметкері еңбек етеді. Нысан заманауи талаптарға сай салынып, қажетті медициналық құрал-жабдықтармен толық қамтылған. Дәрігерлік амбулатория тіс дәрігері, физиотерапия, акушер-гинекология, кеңейтілген мейіргер бөлмесі, тегін дәрі-дәрмек босату орны, дені сау бала бөлмесі, күндізгі ем алу бөлмесі, сүзгі бөлмесі, ине және екпе егу бөлмесі, дезинфекциялық ерітінді дайындау бөлмесі, дәрі-дәрмек қоймасы, педиатр, психолог және әлеуметтік қызметкерлерге арналған арнайы кабинеттермен қамтылған. Дәрігерлік амбулатория бір мезетте 100 адамды қабылдай алады. Қараспан ауылдық округіндегі ауылдар мен елді мекендерде тұратын 14 мыңнан астам тұрғынға медициналық көмек көрсететін болады. Алдағы уақытта да облыста денсаулық сақтау саласын жақсарту бағытында жаңа жобалар жүзеге асырылады.

Айта кетейік, денсаулық сақтау саласында облыс бойынша 219 мекеме халыққа қызмет көрсетеді. Ауылдық жердегі нысандарды жаңғыртуға ерекше назар аударылуда. Бүгінгі таңда 73 нысанға қажеттілік бар. Нақты жоспар түзіп, 3 жылда кезең-кезеңімен шешу жоспарланған. Биылдың өзінде жергілікті бюджет есебінен 34 жаңа ғимараттың мәселесі шешіледі. 3 аудандық орталық ауруханаға күрделі жөндеу жұмыстары жүргізілуде. Алғашқы медициналық көмек сапасын арттыру мақсатында 60 жедел жәрдем көлігі сатып алынды. Медициналық ұйымдарды материалдық-техникалық жарақтандыру деңгейі 84,7 пайызға жетті.

Түркістан облысында «Бәйдібек-ата» және «Қарақуыс» су қоймаларының құрылысы жалғасып жатыр. Көлемі 68 млн текше метр болатын «Бәйдібек-ата» су қоймасы Түркістан облысының Бәйдібек ауданында, Балабөген мен Үлкен Бөген өзендерінің қосылатын жерінде, жалпы аумағы 860 гектар болатын жерде салынып жатыр. Су қоймасы бөгетінің ұзындығы – 1,75 шақырым, биіктігі – 26 метр.

Бұл нысан тасқын суды жинап, вегетация кезеңінде қосымша су көлемін Бөген су қоймасына тиімді бағыттауға мүмкіндік береді. Қазіргі таңда жоба бойынша құрылыс жұмыстары 75 пайызға орындалған.

«Бәйдібек-ата» су қоймасынан Бөген су қоймасына су беру үшін «Сарқырама» каналы салынып жатыр. Ұзындығы 21,7 шақырым болатын бұл канал секундына 12 текше метрге дейін су өткізе алады және 2,5 мың гектар суармалы алқапты суармалы сумен қамтамасыз етеді. Бүгінде ұзындығы шамамен 21 шақырым болатын учаскеде жұмыстар толық аяқталды.

Ал көлемі 1,2 млн текше метрді құрайтын «Қарақуыс» су қоймасы Түркістан облысының Төлеби ауданында салынып жатыр. Қазіргі уақытта құрылыс-монтаж жұмыстары 90 пайызға аяқталған. Бұл нысан 500 гектар суармалы жерді сумен қамтуға мүмкіндік береді.

«- Барлық жұмыс заманауи сапа стандарттарына сай жүргізіліп жатыр. Жаңа су қоймалары тасқын және еріген қар суын тиімді пайдалануға жол ашады, бұл су ресурстары азайып жатқан жағдайда аса маңызды. Қосымша суармалы алқаптарды игеруге, сондай-ақ Бөген су қоймасындағы су деңгейін қауіпсіз реттеуге мүмкіндік туады. Ауыл шаруашылығы, балық шаруашылығы, мал шаруашылығы мен туризмді дамытуға қолайлы жағдай жасалады. Гидрологиялық есептеулерге сәйкес, Бөген өзені арқылы орташа жылдық су ағыны 165 млн текше метрге жетеді. Сондықтан бұл суды жинап, азаматтардың қажеттілігіне бағыттау маңызды», – деді Су ресурстары және ирригация министрі Нұржан Нұржігітов.

Түркістан облысы экономикасының негізгі драйверлері – инвестиция, өнеркәсіп және ауыл шаруашылығы. Облыс әкімі аппаратының апталық мәжілісінде осы салалардағы жұмыстар мен жоспарлар талқыланды. Түркістан облысының әкімі Нұралхан Көшеров жауапты басқарма басшыларының есептерін тыңдап, оларға және аудан, қала әкімдеріне осы салалардағы индикаторларды толық орындап, жұмысты жандандыруды тапсырды.

– Біздің мақсатымыз – облысты өзін-өзі қамтитын өңірге айналдыру. Ол үшін өндіріс орындарын көбейтіп, ауыл шаруашылығы өнімдерін терең өңдеу керек. Инвестиция тарту жұмыстары тұрақты әрі сапалы атқарылуы қажет. Индикаторды орындамаған басшылардың жауапкершілігі қаралады, – деді Нұралхан Көшеров.

Мәжілісте Өнеркәсіп және индустриалды-инновациялық даму басқармасы басшысының міндетін атқарушы Қанат Шонбасовтың есебі тыңдалды. Оның айтуынша, 2025 жылғы 24-25 қараша аралығында Түркістан қаласында өткен «Turkistan Investment and Tourism Forum-2025» халықаралық инвестиция және туризм форумына шетелден 153 компания, жалпы 300-ден астам делегат қатысқан. Халықаралық форумда жалпы құны 432,2 млрд теңгені құрайтын 9 меморандумға қол қойылды. Осы арқылы өңірде мақта кластері, металды терең өңдеу, индустриалды аймақ құру, қағаз өндіру, ауыл шаруашылығы өнімдерін өңдеу және өзге де ірі жобаларды жүзеге асыру көзделіп отыр. Аудан, қала әкімдері де шетелдік инвесторлармен меморандумдар жасаған. Осы жұмыстар нәтижесінде жыл басынан бері облыс экономикасына 1,4 трлн теңге инвестиция тартылып, өсім 123 пайызды құраған.

Ауыл шаруашылығы басқармасының басшысы Файзулла Байдуллаев саладағы индикаторлардың орындалу барысын баяндады. Мемлекет басшысының ауыл шаруашылығы жалпы өнімінің көлемін 2 есеге ұлғайту жөніндегі тапсырмасы аясында, Қазақстан Республикасы ауыл шаруашылығы министрлігімен бекітілген жол картасы бойынша 2025 жылға негізгі 10 индикаторлық көрсеткіштер жоспары бекітілген. 11 айдың қорытындысымен 7 көрсеткіш толығымен орындалды. Атап айтқанда, су үнемдеу технологияларын ендіру жоспары 140 %-ға, техника паркін жаңалау 143 %-ға, егіс алқаптарына минералды тыңайтқыштар енгізу 120 %-ға, жеміс-көкөніс сақтау қоймаларын салу, сүт фермасын құру, жұмыртқа бағытындағы құс фермасын ашу жоспарлары 100 %-ға орындалған. Ауыл шаруашылығындағы жалпы өнім көлемін өндіруде облыс республикада алғашқы орында, үлесі – 13%. 11 айда 1 трлн 154 млрд теңгенің өнімі өндіріліп, өсім 101,2 % құрады. Жыл қорытындысымен жалпы өнім көлемі 1 трлн 254 млрд. теңгеге жеткізіледі деп жоспарланып отыр.

Қазақстан Республикасының Тәуелсіздік күні қарсаңында Түркістан облысы Сарыағаш ауданына қарасты Жартытөбе ауылдық округіндегі Достық елді мекені орталықтандырылған ауыз су жүйесіне қосылды. Аталған нысанның іске қосылуына арналған салтанатты шараға Сарыағаш ауданының әкімі Арман Абдуллаев, аудандық мәслихат депутаттары, сондай-ақ ел ағалары мен ауыл тұрғындары да қатысты. Салтанатты жиында ауыл ақсақалдары ақ батасын беріп, аудан басшысына алғыстарын білдірді. Бұл қуанышты жаңалық ауылдың әлеуетін көтеріп, тұрмысын жақсартатынын атап өтті.

« – Ауыл тұрғындары атынан ең алдымен мемлекетке, облыс және аудан басшылығына, осы іске атсалысқан барлық мамандар мен құрылысшыларға шынайы алғысымызды білдіреміз. Жылдар бойы күткен таза ауыз судың әр үйге жетуі – халықтың өмір сапасын айтарлықтай жақсартады. Су дегеніміз тіршіліктің негізі, өмірдің өзегі ғой. Осы қарапайым, бірақ аса маңызды игіліктің қадірін ауыл халқы жақсы біледі. Себебі таза ауыз су әр үйге жетпеген кезеңдер ауыл тұрғындарының жадында әлі де сақтаулы. Сондықтан бүгінде ауылдарға сапалы ауыз су жүйесі тартылып, халықтың тұрмысы жақсаруы – барша тұрғындар үшін үлкен қуаныш әрі зор жетістік болып отыр. Сонымен қатар, таза ауыз су ауылдың көркеюіне және болашағына сенім ұялатады. Су жүйесі бар ауылдар тартымды бола бастайды. Осы орайда, ауыл халқы атынан ауыз сумен қамту жобасын жүзеге асырған барша азаматтарға тағы да алғыс айтамыз. Бұл игілікті іс алдағы уақытта да жалғасын тауып, еліміздегі әрбір ауыл таза ауыз сумен толық қамтамасыз етіледі деп сенеміз.  Таза су – денсаулықтың кепілі, берекелі өмірдің бастауы. Осындай маңызды мәселені шешіп берген өңір басшыларына ауыл тұрғындары әрдайым ризашылығын білдіреді.» – деді ауыл қариялары.

Жартытөбе ауылдық округіне қарасты Достық елді мекенін ауыз сумен қамту мақсатында республикалық бюджеттен қаржы қаралып, құрылыс жұмыстарын «Универсал Строй Сервис» ЖШС жүзеге асырды. Жоба аясында сыйымдылығы 500 текше метр болатын 2 су резервуары, бірінші және екінші көтерілімдегі насостық станциялар, сондай-ақ қуаттылығы 63 кВА трансформатор қондырғысы орнатылды. Нәтижесінде 890 абонент таза ауыз сумен қамтылып, атқарылған жұмыстардың игілігін көруде. Айта кетейік, биыл Сарыағаш ауданында жалпы 8 елді мекен орталықтандырылған ауыз су жүйесіне қосылды. Ауыз сумен қамту деңгейі 12,76 пайызға артып, 92,1 пайызды құрады.

Түркістан облысының экономикалық ахуалын жақсарту, өңірге инвестиция тарту, отандық өндірісті дамыту мақсатында жоспарлы жұмыстар атқарылып келеді. Бүгін осы мақсатта Түркістанда кезекті жоба бастау алып, джинсы маталарын шығаратын кәсіпорынның іргетасы қаланды. Оған Түркістан облысының әкімі Нұралхан Көшеров, «Hygeia Textile Kazakhstan» ЖШС-ның директоры Жин Ёуйй қатысып, мақта-мата жібін иіру мен джинсы маталарын өндіру желілерінің құрылысының капсуласын салды.

– Бүгін Түркістан өңірінің жеңіл өнеркәсіп саласында стратегиялық маңызды жобаның іргетасы қалануда. Арнайы экономикалық аймақта «Hygeia Textile Kazakhstan» ЖШС-нің джинсы маталарын өндіру зауытының құрылысы басталады. Мемлекет басшысы биылғы Жолдауында еліміздің жаңа экономикалық бағытын айқындап берді. Жолдаудың басты идеясы – мемлекетімізді инновация мен цифрлық технологияға негізделген экономикаға көшіру. Біріншіден, экономиканы әртараптандыру міндеті қойылды. Бұл ретте біз Түркістан облысында мақта кластерін дамытуды бастап кеттік. Бұдан былай өңірдегі мақта 100 пайыз өзімізде өңделіп, дайын өнімдер шығарылады. Солардың бірі – бүгін іргетасы қаланған зауыт еліміздің тоқыма өндірісін жаңа деңгейге шығарады. Мұнда жылына 30 мың тонна мақта-мата жібі мен 10 млн метр джинсы маталары өндіріледі. Дайын өнімдер Еуропа мен Орталық Азия елдеріне экспортқа шығарылады. Жоба толық жеке инвестиция есебінен жүзеге асырылуда. Бұл – Түркістан облысындағы ивестиция тарту жұмыстарының жарқын жемісі. Біздің алдымызда Түркістан облысын өзін толық қамтитын әрі терең өңдеу саласы дамыған өңірге айналдыру міндеті тұр. Өйткені, Түркістан – жеңіл өнеркәсіпті дамытуға қолайлы өңір. Бұл жаңа зауыт – импортты алмастыруға, экспорттық әлеуетті арттыруға бағытталған ірі жоба. Осы нысан іске қосылғанда Түркістан – Қазақстандағы тоқыма орталықтарының біріне айналары анық. Сондықтан жобаға атсалысқан инвесторларға алғысымды білдіремін! Жаңа жоба сәтті жүзеге асып, Түркістанның өндірісі дами берсін! – деді Нұралхан Оралбайұлы.

Аталған нысанда жылына 10 млн метр джинсы маталары өндірілмек. Жобаның жалпы құны 23,3 млрд теңгені құрайды. Сондай-ақ мұнда мыңнан аса жаңа жұмыс орнын құру көзделген. Нысанның жалпы аумағы 20 гектарды қамтиды. Зауыт жұмысына қажетті жабдықтар толық заманауи технологиялармен қамтылады. «Turan» арнайы экономикалық аймағында орналасқан нысан жеке инвестор есебінен жүргізіледі. Жобаны үш кезең бойынша жүзеге асыру жоспарланып отыр. Жалпы, облыстағы индустриалды аймақтар, шағын өндірістік парктер мен арнайы экономикалық аймақтардың жұмысын жандандыру нәтижесінде 10 айда өнеркәсіп өнім көлемі 1,3 трлн. теңгеге жетіп, өсім деңгейі 113,4 пайызды құрады.

Түркістан қаласындағы «Тұран» арнайы экономикалық аймағы – кәсіпкерлер мен инвесторлар үшін жаңа мүмкіндіктер алаңы болып табылады. «Тұран» арнайы экономикалық аймағы Түркістан қаласының әлеуметтік-экономикалық әлеуетін арттыру, инвестиция тарту және жаңа өндіріс орындарын ашу мақсатында құрылған. Бұл аймақ – өңірді индустриялық және инновациялық тұрғыда дамытуға бағытталған маңызды жоба. Арнайы экономикалық аймақтың басты мақсаты – отандық және шетелдік инвесторлар үшін қолайлы жағдай жасау. Осы мақсатта аймақ аумағында инфрақұрылым толық жүргізіліп, кәсіпкерлерге инженерлік желілер, жол, байланыс және коммуналдық қызметтер қолжетімді етілген. Сонымен қатар, арнайы экономикалық аймақ резиденттеріне салықтық және кедендік жеңілдіктер қарастырылған. Арнайы экономикалық аймағында жүзеге асырылатын жобалар негізінен: өндіріс пен өңдеу саласын дамытуға, құрылыс индустриясына, логистика мен қойма қызметіне, ауыл шаруашылығы өнімдерін қайта өңдеуге бағытталған. Бұл бағыттар өңір экономикасының әртараптануына және қосылған құны жоғары өнім шығаруға мүмкіндік береді.

Аймақтың тағы бір маңызды артықшылығы – жаңа жұмыс орындарының ашылуы. «Тұран» арнайы экономикалық аймағында іске асырылып жатқан жобалар нәтижесінде жүздеген тұрғын тұрақты жұмыспен қамтылып, жастарға жаңа мүмкіндіктер берілуде. Бұл халықтың әл-ауқатын арттырып, әлеуметтік тұрақтылықты нығайтуға ықпал етеді. Арнайы экономикалық аймақтың жалпы аумағы 400 гектардан асады, бүгінде оның басым бөлігінде инженерлік инфрақұрылым толық жүргізілген. Бүгінде экономикалық аймақта 20-дан астам инвестициялық жоба тіркелген және жалпы инвестиция көлемі 200 млрд теңгеден асқан. Жалпы жобалар толық іске қосылған жағдайда 2 000-нан астам тұрақты жұмыс орны ашылады. Қазіргі таңда бірқатар өндіріс нысандары іске қосылып, қалған жобалар құрылыс және монтаж кезеңінде. 2025 жылы бұл аймақта өндірістік белсенділік айтарлықтай артып, оның нәтижесі өңір экономикасына тікелей әсер ете бастады. Алдағы уақытта «Тұран» арнайы экономикалық аймағы тек Түркістан облысының ғана емес, бүкіл оңтүстік өңірдің индустриялық орталығына айналады деп күтілуде.

2025 жылы Түркістан облысында табиғи газға қосылу жұмыстары жоғары қарқынмен жүзеге асырылуда. 80 жобаның іске асырылуы нәтижесінде 37 елді мекен газ желісімен қамтылып, 73 000-нан астам адам табиғи газға қол жеткізеді. Бұл жұмыстың нәтижесінде облыстың 1,9 млн тұрғыны бар 600 елді мекені көгілдір отынға қосылуы жоспарлануда.

Сонымен қатар, газдандыру жұмыстары 2027 жылға дейінгі кезеңге жоспарланып, қосымша елді мекендер мен тұрғындар көгілдір отынмен қамтылады.  Түркістан облысының газдандыру көрсеткіші 2025 жылы айтарлықтай өсуде, бұл өңірдің инфрақұрылымдық дамуында маңызды қадам. Елді мекендерді газға қосу тұрғындардың өмір сүру жағдайын жақсартып, әлеуметтік-экономикалық дамуды қамтамасыз етеді. Осындай игі істер өңірдің әр аудандарында атқарылып жатыр. Солардың бірі мереке қарсаңында Жетісай ауданында орындалды. Жалпы ауданда тұрғындарды табиғи газбен қамтамасыз ету жұмыстары жүйелі түрде атқарылып келеді. Жүргізілген жұмыстардың нәтижесінде бүгінде аудандағы 105 елді мекеннің 92-сі көгілдір отынмен қамтылып, газ пайдаланушы елді мекендердің үлесі 87,7 пайызға жетіп отыр.

Түркістан облысының әкімі Нұралхан Көшеровтың тұрғындардың өмір сүру сапасын арттыру, қолайлы орта қалыптастыру, елді мекендердің инфрақұрылымын жақсарту тапсырмасына сәйкес Тәуелсіздік күні қарсаңында тағы бір елді мекенге көгілдір отын берілді.

Жаңа ауыл ауылдық округіне қарасты Жаңа ауыл елді мекеніне газ беру рәсіміне аудан әкімі Серік Мамытов пен «QazaqGaz Aimaq» АҚ Түркістан өндірістік филиалы Жетісай газ шаруашылығының директоры Бақтыбай Акеев, аудандық мәслихат депутаты Мақсат Айнабеков қатысып, тұрғындарды қос қуанышпен құттықтады. Жылдар бойы қатты отынмен бойларын жылытып, күл шығарып келген 2460 тұрғын енді қаладағыдай табиғи газды тұтынатын болады.

« – Бүгінгі қуанышты сәтте ауыл тұрғындары атынан баршаңызға шынайы ризашылығымызды білдіруге рұқсат етіңіздер. Елді мекенімізді табиғи газбен қамту – көптен күткен, халық үшін аса маңызды әрі тарихи оқиға болып отыр. Бұл – ауылдың әлеуметтік-экономикалық дамуына тың серпін беретін үлкен игілік. Ең алдымен, еліміздің тұрақты дамуы жолында жүйелі саясат жүргізіп отырған мемлекет басшылығына, облыс және аудан басшылығына, осы игі істің жүзеге асуына тікелей атсалысқан сала мамандарына, құрылысшылар мен инженерлерге ауыл халқының атынан зор алғысымызды айтамыз. Сіздердің табанды еңбектеріңіздің арқасында ауылымызға көгілдір отын келіп, тұрғындардың тұрмыс-тіршілігі едәуір жеңілдеді. Табиғи газ – бұл тек жылу мен жайлылық қана емес, бұл – уақыт үнемдеу, денсаулықты сақтау және өмір сапасын арттыру деген сөз. Бұрынғыдай көмір тасып, күл шығарып, от жағудың машақаты артта қалып, енді әрбір отбасы үшін таза, қауіпсіз әрі қолайлы жағдай жасалып отыр. Әсіресе, бұл үлкен кісілер мен жас отбасылар үшін үлкен жеңілдік екені анық. Сонымен қатар, табиғи газдың келуі ауыл экономикасының дамуына да мол мүмкіндік береді. Ендігі жерде шағын кәсіпкерлік нысандарын ашуға, жылыжайлар мен өндіріс орындарын дамытуға жол ашылып отыр. Бұл – жаңа жұмыс орындарының құрылуына, жастардың ауылда тұрақтап, еңбек етуіне үлкен ықпал етеді. Экологиялық тұрғыдан алғанда да бұл бастаманың маңызы зор. Табиғи газды пайдалану арқылы қоршаған ортаға келетін зиян азайып, ауылымыздың ауасы тазарады. Бұл – келешек ұрпақтың денсаулығына жасалған қамқорлық деп білеміз.Табиғи газбен қамту – ауыл тұрғындарының әл-ауқатын арттыруға бағытталған нақты әрі нәтижелі жұмыс. Осындай халық игілігіне арналған бастамалар алдағы уақытта да жалғасын табады деп сенеміз. Ауыл халқы атынан баршаңызға зор денсаулық, еңбектеріңізге табыс, елге қызмет етудегі істеріңізге сәттілік тілейміз. Бірлігіміз бекем, еліміз аман, жұртымыз тыныш болсын!» – деген ауыл ақсақалдары өз ризашылықтарын білдірді.

Елді мекендерді газдандыру жұмыстарының қарқынды жүргізілуінің нәтижесінде өткен жылы Жетісай ауданда 4 елді мекен көгілдір отынға қосылса, жыл басынан бері 13-ші елді мекенге газ беріліп отыр. Жыл соңына дейін тағы 7 елді мекенді көгілдір отынға қосу жоспарланған. Қазіргі таңда 3 нысанның құрылыс-монтаж жұмыстары жүргізіліп жатса, тағы 10 елді мекенге жобалық-сметалық құжаттама әзірленуде.

Жалпы, Түркістан облысы – Қазақстанның оңтүстік бөлігінде орналасқан ірі өңір. Облыс бойынша елді мекендердің газбен қамтамасыз етілу деңгейі биыл жоғары қарқынмен өсіп келеді. Табиғи газбен қамтамасыз ету – елді мекендер инфрақұрылымын дамыту мен тұрғындардың тұрмыс сапасын жақсартудың маңызды компоненті болып табылады. Қазақстан Республикасының 2025 жылға арналған газдандыру бағдарламасы аясында Түркістан облысында да ауқымды жұмыстар жүргізілуде.Облыс тұрғындарының шамамен 85,5%-ы табиғи газбен қамтылған, бұл республика бойынша газдандыру көрсеткішінің орташа деңгейінен жоғары көрсеткішке сәйкес келеді. Одан бөлек биыл Сайрам ауданының Көлкент елді мекені табиғи газға толық қол жеткізді. Бұл ауылда газ желілері іске қосылып, шамамен 3 000 абонент көгілдір отынға қосылды.

Айта кетейік, 2024 жылдың қорытындысымен республика халқының орташа газбен қамтылу көрсеткіші 62,4% құраған болатын. Оның ішінде, Түркістан облысы халқының 85,5% немесе 563 елді мекеннің 69,7%-ы табиғи газға қосылып, қамту көрсеткіші бойынша республикада 8-орынға жайғасқан. Өткен жылы бюджеттен 27,3 млрд теңге бөлініп, 115 нысан құрылысы іске асырылып,  оның ішінде, 70 нысан құрылысы аяқталса, 45-і 2025 жылға өтпелі болған. Сондай-ақ, 2026 жылға өтпелі 26 нысанға 23,5 млрд теңге қаржы қарастыру жұмыстары жүргізілуде. Энергетика министрлігі арқылы «Самұрық-Қазына» қоры есебінен облысқа 9,4 млрд теңге қаржы бөлу жоспарланған. Қажетті қаржы бөлінген жағдайда, жыл қорытындысымен 45 елді мекендегі, яғни 84 мың халық табиғи газға қосылады. Нәтижесінде 89,4% облыс тұрғыны табиғи көгілдір отынмен қамтылмақ. Сонымен қатар, құны 25,7 млрд теңгені құрайтын 45 нысан республикалық бюджеттің кезекті нақтылауына ұсынылған.

« – Негізі, табиғи газ тұрғындар үшін ең қолайлы әрі таза отын түрі болып саналады. Газбен қамтылған елді мекендерде халықтың тұрмыс деңгейі айтарлықтай жақсарады. Көмір немесе отын жағумен салыстырғанда, газды пайдалану жеңіл, қауіпсіз әрі уақытты үнемдейді. Сонымен қатар, түтін мен күйенің азаюы тұрғындардың денсаулығына оң әсер етіп, тыныс алу жолдары ауруларының алдын алуға мүмкіндік береді. Газдың қолжетімді болуы шағын және орта бизнестің дамуына жол ашады. Наубайханалар, жылыжайлар, өндірістік цехтар мен қызмет көрсету нысандары үшін табиғи газ – тиімді энергия көзі. Бұл өз кезегінде жаңа жұмыс орындарының ашылуына және жергілікті экономиканың жандануына ықпал етеді. Бастысы экологиялық маңызы да ерекше. Табиғи газ көмірмен салыстырғанда қоршаған ортаға зиянды қалдықтарды әлдеқайда аз бөледі. Ауаның ластануы төмендеп, елді мекендердегі экологиялық жағдай жақсарады. Газдандырудың инфрақұрылымдық және стратегиялық маңызы бар. Табиғи газдың тартылуы өңірлердің дамуына серпін беріп, ауыл мен қала арасындағы өмір сүру деңгейінің айырмасын азайтады. Сонымен қатар, мектептер, балабақшалар, ауруханалар сияқты әлеуметтік нысандар тұрақты әрі үнемді жылумен қамтамасыз етіледі. Табиғи газбен қамту – халықтың әл-ауқатын арттыратын, экономиканы дамытатын және экологиялық тұрақтылықты қамтамасыз ететін маңызды бағыт. Сондықтан Түркістан облысында елді мекендерді газдандыру жұмыстары алдағы уақытта да жүйелі түрде жалғасын таба береді.» – деді «QazaqGaz Aimaq» АҚ Түркістан өндірістік филиалы Жетісай газ шаруашылығының директоры Бақтыбай Акеев.

Отырар ауданының Көксарай ауылында туған жерге деген жанашырлық пен сүйіспеншіліктің жарқын көрінісі болған игі бастама қарқын алып келеді. Ауыл жастары мен жасы жетпістен асқан қарияларға дейін бірлесіп, елді мекенді көркейтуге білек сыбана кірісті. Кіреберіс күре жолдың бойына көшет отырғызылып, қоршау жұмыстары жүргізіліп жатыр. Сонымен қатар ауыл ішіндегі көшелерді көгалдандыру ісі де назардан тыс қалмаған. Бұл бастама Мемлекет басшысы Қасым-Жомарт Кемелұлы Тоқаевтың «Таза Қазақстан» акциясының мақсатымен үндесіп, Көксарай ауылының экологиялық жағдайын жақсартуға әрі келбетін көркейтуге бағытталған маңызды қадам болып отыр.

Отырар ауданының әкімі Қайрат Жолдыбайұлы екеуміз атқарылып жатқан жұмыстың барысымен танысып, ауыл тұрғындарымен бірге көшет егу ісіне атсалыстық. Өз кезегінде аудан әкімі тұрғындардың белсенділігін атап өтіп, олардың туған жерді абаттандыруға қосқан үлесін жоғары бағалады. Мен де, “AMANAT” партиясының Отырар аудандық филиалының және аудандық мәслихаттың төрағасы ретінде, Көксарай ауылында бастау алған бұл ортақ істің ауданымыздағы елді мекендерге үлгі боларына сенемін. Тазалық пен тәртіп, ынтымақ пен ұйымшылдық – ауылдың көркеюінің басты кепілі. Ауыл тұрғындары мен белсенді азаматтардың еңбегіне өз атымнан және аудандық мәслихат депутаттарының атынан шынайы алғысымды білдіремін. Бірлесе атқарылған еңбек – туған өлкенің дамуына қосылған үлкен үлес.

Қоғамдық шара аясында 15 шақырым аумақ қоршалып, 8000-ға жуық көшет отырғызылды. Алдағы жылдары бұл бастама жалғасын тауып, екі жыл ішінде егілген көшеттер санын 100 мыңға жеткізу жоспарланып отыр. Бұл – Көксарайдың келешегіне жасалған маңызды инвестиция. Ауылына жанашыр азаматтары бар елдің еңсесі әрқашан биік болады! Ауыл – біздің түп тамырымыз, береке-бірліктің бастауы, ұлттық құндылықтың тірегі. Ауыл көркесе – ел көркейеді, ауыл дамыса – мемлекет күшейеді. Сондықтан ауылды көркейтіп, тұрғындардың тұрмыс сапасын арттыру үшін ең алдымен тазалық пен тәртіп, ынтымақ пен ұйымшылдық керек. Бұл – жай сөз емес, ауылдың нақты болашағын айқындайтын басты қағидалар.

Тазалық – мәдениеттің өлшемі. Тазалық – тек қоқыс жинау емес, ол қоршаған ортаға жанашырлық, өз үйіңе, өз еліңе деген құрмет, ұрпаққа аманат қалдыру мәдениеті. Ауламыз таза, көшелеріміз таза, арығымыз ашық болса – ауылымыздың келбеті де, тұрғындардың денсаулығы да жақсы болады. Әр адам «тазалық – меннен басталады» деген ұстаныммен жүрсе, ауылымыз әрдайым көрікті, шырайлы болып тұрады. Ал, тәртіп дегеніміз барлық жерде дамудың негізі болып саналады. Тәртіп бар жерде жұмыс ретімен жүреді және жауапкершілік артады, қоғамда өзара құрмет қалыптасады. Тәртіпсіз өскен ортада береке болмайды. Жолда, қоғамдық орындарда, тұрмыста тәртіп сақталса, ауыл өмірі жеңілдейді, тіршілік жүйелі болады. Осы тұста ауылдың тынысы мен жүрегі ынтымақ пен бірлік екенін айтқым келеді. Қазақ «бірлік бар жерде тірлік бар» дейді. Ынтымағы жарасқан ауылда дау аз, түсіністік көп болады, ортақ іске бәрі атсалысады және бір-біріне қолдау көрсететін қоғам қалыптасады. Көксарай ауылының тұрғындары да осындай игі істердің үлгісіне айналып отыр. Бірігіп, бір бағытта еңбек еткен халық қашанда мықты болады.  Ынтымақ бар жерде қиындық жеңіледі, бастама жүзеге асады, игілік орнайды. Ауылдың ұйымшылдығы жоспарлы жұмыс, ортақ мақсат, нақты әрекеттерден көрініп тұр. Еріктілер қозғалысы, сенбілік, қоғамдық кеңестер жұмысы – бәрі ұйымшылдықтың көрінісі.

Ауылымыздың тазалығын сақтауға, көркейтуге және абаттандыру жұмыстарына белсенді атсалысып жүрген барша азаматтарға шын жүректен алғыс айтамыз! Туған жерге деген жанашырлық, ортақ іске деген жауапкершілік – нағыз азаматтық ұстанымның көрінісі. Ортақ еңбектің нәтижесінде таза, әсем ауыл болуға қадамдар жасалуда. Сенбілікке қатысып, көшелерді тазалауға, арықтарды ашуға, қоқыс жинауға, жас көшеттер отырғызып, көгалдандыру жұмыстарына үлес қосқан әрбір тұрғынның еңбегі зор. Ауылдың көркеюі тек биліктің емес, халықтың да қолдауына байланысты. Осы тұрғыда тұрғындардың ұйымшылдығы, ауызбіршілігі, ортақ іске жұмылуы – ауылдың ең үлкен байлығы. Осындай ұйымшылдық пен бірліктің арқасында ауылымыздың келбеті жақсарып, тазалығы сақталып, көркі артты. Бұл – бәріміздің ортақ жеңісіміз.Тазалыққа үлес қосып, елді мекеніміздің көркеюі үшін жан аямай еңбек етіп жүрген әрбір азаматқа алғыс айта отырып, алдағы уақытта да осы игі дәстүрді жалғастыра беруге шақырамыз!

Ұзақов Уалихан Жамалханұлы – “AMANAT” партиясының Отырар аудандық филиалының және Отырар аудандық мәслихатының төрағасы.

Мемлекет басшысының бастамасымен жалпыхалықтың деңгейде сипат алып, тұрақты түрде ұйымдастырылып келе жатқан «Таза Қазақстан» бағдарламасы аясында Жетісай ауданында ауқымды сенбілік өтіп, 7 мыңға жуық түрлі көшет егілді.

Ауданның экологиялық ахуалын жақсартуға арналған шараға мемлекеттік және квазимемлекеттік мекеме қызметкерлері мен жергілікті мәслихат депутаттары, ауданның белсенді жастары мен жергілікті тұрғындар қатысты. 2 мыңға жуық адам мен 15 техника жұмылдырылған санитарлық тазалық жұмыстары қала, кент және барлық ауылдық округтерде арнайы бекітілген кесте негізінде жоғары деңгейде жүргізілді. Мемлекеттік және квазимемлекеттік мекеме қызметкерлері өздеріне бекітілген аумақтарда тазалық жұмыстарын жүргізіп, саябақтар мен көшелерді, арық-атыздарды тазаласа, тұрғындар үйіргелік жерлерін, ал кәсіпкерлер кәсіпкерлік нысандарына жапсарлас аумақтарды күл-қоқыстардан, қатты тұрмыстық қалдықтардан тазартты.

Өткен жылы бастау алған аталмыш шара аясында ауданда жыл басынан бері 100 мыңға жуық тұрғын мен 280 техника жұмылдырылған 77 ауқымды сенбілік өткізіліп, тазалық жұмыстары барысында 692 тонна қоқыс тиісті орындарға шығарылған. Сонымен қатар ауданда Жасыл белдеу қалыптастыру, көгалдандыру жұмыстарын жоспарға сай жүргізу мақсатында 7 мың түп түрлі ағаштардың көшеті егіліп, көлік қозғалысына кедергі келтіретін ағаштар бұталды.

Айта кетсек, былтыр аудан тұрғындары жиі баратын демалыс орындары мен скверлерге, парктер мен аллеяларға 23 мың түп туя, сән ағаштары, сирень, шынар, қарағаш, қарағай, каштан мен бадам секілді көшеттер отырғызылған еді. Биыл тағы 30 мың түп көшет егу жоспарлануда.

Арыс қаласы да игі іске ұйысып, жалпықалалық ағаш отырғызу акциясы өтті. Экологиялық мәдениетті қалыптастыруға бағытталған шараға қала әкімі Қайсар Маңқараев пен ардақты қариялар, белсенді жастар, мемлекеттік қызметкерлер, мешіт имамдары мен түрлі мекеме ұжымдары белсене қатысты. Алғашқы көшеттер қала орталығындағы Құрметті азаматтар аллеясында отырғызылды. Мұнда ардагерлер, этно-мәдени орталық өкілдері мен еріктілер бірлесе 50-ден астам қарағай көшетін отырғызса, дайындық жұмыстарын «Жасыл Арыс» КММ ұжымы алдын ала үйлестіріп, жер телімдерін әзірлеп, су көздерін қолжетімді етті.

Игі іс одан әрі «Жеңіс» скверінде жалғасты. Мұнда да жұртшылық жұмыла еңбек етіп, 250 түп жас талды топыраққа қондырды. Әр көшет ерекше ықыласпен отырғызылып, ортақ іске деген жауапкершілік пен ұйымшылдық айқын сезілді. Шара барысында қала әкімі аға буын мен жастардың бірлескен белсенділігіне ризашылығын білдірді.

«Арыс әрқашан бірлігімен, жанашыр халқымен мықты. Бүгін соның тағы бір дәлелі болды. Ұрпақтар сабақтастығы деген – осы. Еккен талдарыңыз жайқалып, ел игілігіне айналсын!» – деді қала басшысы.

Шараның ең ауқымды бөлігі Арыс–Шардара автожолының бойында өтті. Бұл жерде мекеме қызметкерлері, қоғамдық ұйымдар мен белсенді тұрғындардың қатысуымен 3 700 түп қарағаш көшеті отырғызылды. Айта кетейік, егілген ағаштардың барлығы – Арыстағы жергілікті тұқымбақта өсірілген, топырақ пен климат жағдайына толық бейімделген көшеттер.

Акцияға қатысушылардың әрқайсысы бұл жұмысты тек сенбілік деп емес, туған жерге деген құрмет деп қабылдап: «Бұл талдар – болашаққа қалдырған аманатымыз» деген ортақ оймен еңбек етті. Жаппай ағаш отырғызу шарасы қала экологиясын жақсартуға ғана емес, халықты ұйымшылдыққа, туған жерді сүюге және ортақ іске жауапкершілікпен қарауға шақырған ерекше бастама болды.

Одан бөлек, Ордабасы ауданында да «Таза Қазақстан» республикалық экологиялық акциясы аясында кең ауқымды сенбілік шарасы өтті. Тазалық пен қоршаған ортаны қорғау мақсатында қолға алынған іс-шараға аудан бойынша 2954 адам қатысты. Олардың қатарында мемлекеттік мекемелердің қызметкерлері, ардагерлер, жастар, еріктілер және ауыл тұрғындары белсенділік танытты.

Сенбілік барысында аудан аумағында орналасқан бірқатар маңызды нысандар мен инфрақұрылымдар күл-қоқыстан тазартылып, абаттандыру жұмыстары жүргізілді. Атап айтқанда, М-32 республикалық маңызы бар автомобиль жолының бойы, сондай-ақ К-16 және ішкі каналдарының айналасы арам шөптер мен қатты тұрмыстық қалдықтардан толықтай тазартылды. Тазалық жұмыстарына 15 дана арнайы техника жұмылдырылып, нәтижесінде 50 тоннадан астам күл-қоқыс сыртқа шығарылды.

Бұл жолғы сенбілік тек тазалық шараларымен шектелмей, көгалдандыру және ағаш отырғызу жұмыстарымен де ерекшеленді. Биылғы көктем-күз маусымындағы ағаш егу жұмыстары жылдағыдан ерте басталды. Осыған орай, аудан орталығы Темірлан елді мекенінде орналасқан “Шәмші Қалдаяқов” атындағы аллеясында салтанатты түрде ағаш отырғызу рәсімі ұйымдастырылып, 50 түп арша (можжевельник, сосна), көшеттері егілді.

Бұдан бөлек, 10 ауыл округі аумағында 890 түп қара ағаш көшеттері отырғызылды және өзге де жасыл желек түрлерін отырғызуға арналған 14 мың көшет орны алдын ала дайындалды. Жалпы алғанда, аудан бойынша күз мезгілінің соңына дейін 21 150 дана ағаш көшетін отырғызу жоспарланып отыр. Бұл жоспар – аймақтың экологиялық жағдайын жақсартуға, ауаны тазартып, тұрғындардың өмір сүру сапасын арттыруға бағытталған маңызды бастамалардың бірі.

Сенбілікке қатысушылардың айтуынша, мұндай шаралар қоғамда экологиялық мәдениетті қалыптастырып, тұрғындарды табиғатқа жанашырлықпен қарауға үндейді. Сенбілікке қатысқан мемлекеттік және бюджеттік мекеме қызметкерлері, жастар мен еріктілер мұндай бастамалардың алдағы уақытта да жалғасын табуын қолдайтындарын жеткізді.