Түркістан облысында туризмді дамыту, туристер мен келушілерге қолайлы жағдай жасау мақсатында жол инфрақұрылымын қамту жұмыстары ұдайы жалғасып келеді. Солардың бірі М-32 «Самара – Шымкент» автомобиль жолының бұрылыс алаңы күрделі жөндеуден өтіп, пайдалануға берілді. 2056 шақырымдағы жол айрығы «Самара– Шымкент-Орал-Ақтөбе-Қызылорда» қалаларына бағытталады.
Айта кетейік, Түркістан қаласы маңында орналасқан Сауран кешеніне келушілер саны жыл сайын артып келеді. 2024 жылы келген туристер саны 2683 адам болса, 2025 жылдың 11 айдың қортындысымен келген туристер саны 9925 құрады. Туристер мен келушілерге қолайлы жағдай жасау мақсатында «Батыс Еуропа – Батыс Қытай» автомагистралынан Сауран қалашығына бұрылатын жол бөлігін ашу жұмыстары белсенді жалғасуда. Өңірде туристік бағытты дамыту мен саланың кірісін көбейту, сондай-ақ жергілікті турбизнес субъектілерін қолдауды қамтамасыз ету үшін «ҚазАвтоЖол» ҰК» АҚ Түркістан облыстық филиалы тарапынан өңірге келуші туристердің жайлылығын қамтамасыз ету жұмыстары тұрақты жүргізілуде.
Жаңа нысанның ашылу салтанатына Түркістан облысы әкімінің бірінші орынбасары Зұлпыхар Жолдасов қатысып, жұртшылықты айтулы күнмен құттықтады.
“– Бүгін өңіріміз үшін үлкен маңызға ие инфрақұрылымдық жоба – республикалық маңызы бар «Батыс Қытай – Батыс Еуропа» автожолынан Сауран қалашығына бұрылыс жолы пайдалануға берілмек. Бұл нысан – тек жол инфрақұрылымының жаңаруы ғана емес, тарихи-туристік «Сауран археологиялық-сәулеттік кешеніне» кіреберіс пен шығаберісті айтарлықтай жеңілдетіп, жол қозғалысының қауіпсіздігін қамтамасыз ететін стратегиялық маңызды объект. Сапалы жол – туристің алғашқы әсерін қалыптастыратын басты фактор. Сондықтан бүгін іске қосылып отырған бұл жол нысаны туристік ағымды көбейтуге, өңірдің инвестициялық тартымдылығын арттыруға, кәсіпкерлік нысандарының дамуына және жалпы өңірлік инфрақұрылымның жақсаруына үлкен серпін береді. Өздеріңізге белгілі, Сауран қалашығына келушілер бұрын шамамен 30 шақырым айналма жол жүріп келуге мәжбүр болатын. Енді осы бұрылыс жолының іске қосылуымен бұл мәселе толық шешімін тауып отыр. Біз бұл жобаның іске қосылуы өңіріміздің әлеуметтік-экономикалық дамуына жаңа серпін беріп, жол қауіпсіздігін арттырып, халқымыздың игілігіне қызмет ететініне сенімдіміз,” – деген Зұлпыхар Жолдасов жобаны іске асыруға атсалысқан азаматтарға алғысын білдірді.
Маңызды жол айрығының құрылысын «Қыран» ЖШС мердігер мекемесі жүргізді. Құрылыс жұмыстары өткен жылы басталған. Жолдың ұзындығы 1955 метрді құрайды. Құрылыс барысында қолданыстағы жол жамылғысы фрезерленіп, су өткізгіш құбыр орнатылды. Сонымен қатар жолды абаттандыру, жол белгілері мен таңбалау, жарықтандыру жұмыстары толық аяқталған.
Жалпы Шымкент–Қызылорда жолының қарқыны жоғары. Мұнда тәулігіне 11 000 жеңіл автокөлік, 3 000 автобус және 8 000 жүк көлігі жүріп өтеді. Сондықтан жол инфрақұрылымын дамыту, қауіпсіздік шараларын күшейту және жолды сапалы жөндеу, көлік қатынасын қамтамасыз ету мақсатында жоспарлы жұмыстар атқарылып келеді.
Мемлекет басшысы Қазақстан халқына арнаған Жолдауында ауылдардағы әлеуметтік меселелерді шешу, әсіресе медициналық нысандарды ашу жөнінде тапсырма берген болатын. Осы бағытты Түркістан облысында ауқымды жұмыстар атқарылуда. Бүгін, осы орайда Түлкібас ауданына қарасты Қызылбастау ауылында көптен күткен жаңа медициналық тірек ел игілігіне берілді. Шараға арнайы облыс әкімінің орынбасары Ертай Алтаев қатысып, ауыл тұрғындарын жаңа нысанның ашылуымен құттықтады. Тұрғындарға денсаулық сақтау қызметінің жақсарып, ауылдық жерлерде медициналық көмектің қолжетімділігі артатынын айтты.
« – Қызылбастау ауылында ашылған жаңа медициналық тірек жергілікті халық үшін үлкен қуаныш әкелді. Бұрын дәрігерге қаралу үшін алыстағы ауруханаға баруға мәжбүр болған тұрғындар енді сапалы медициналық көмекті өз ауылынан алатын болды. Заманауи құрал-жабдықтармен қамтамасыз етілген бұл нысан алғашқы медициналық-санитарлық көмек көрсетуге, науқастарды дер кезінде тексеріп, ем-дом жүргізуге зор мүмкіндік береді. Медициналық тіректе енді тәжірибелі дәрігерлер мен медбикелер де жұмыс істейді.«Халық денсаулығы – ең басты байлық» қағидасын негізге алған бұл бастама ауыл тұрғындарының өмір сапасын жақсартып, медициналық қызметтің қолжетімділігін арттыра түсетіні сөзсіз.» – деді облыс әкімінің орынбасары Ертай Алтаев.
Бұған дейін ауыл халқы жалдамалы ғимаратта медициналық көмек алып келген. Енді жаңа, заманауи талаптарға сай салынған медициналық тірек халыққа сапалы және қолжетімді медициналық қызмет көрсетуге толық мүмкіндік береді. Жаңа медициналық тірек – тек денсаулық сақтау нысаны ғана емес, ел игілігіне қызмет ететін маңызды әлеуметтік жоба. Оның жұмысына разы болған тұрғындар алғыстарын білдіріп, медицина қызметкерлеріне табыс тілеп отыр. Биыл ауданда жыл басынан бері тұрғындарға қолжетімді медициналық көмек көрсету мақсатында Мақталы, Тастұбұлақ, Шақпақ-Баба ауылдарында жаңа медициналық тіректер іске қосылса, жуырда ғана Азаттық ауылында да жаңа медициналық нысан қолданысқа берілді. Ауданда медициналық нысандарды арттыру үшін келесі жылы Қараағашты, Жаңұзақ, Майтөбе және Еңбек елді мекендерінде де заманауи медициналық тіректер салу жоспарлануда.
Айта кетсек, өткен жылы Түркістан облысында «Ауылда денсаулық сақтауды жаңғырту» ұлттық пилоттық жобасы аясында жалпы құны 10 млрд теңге құрайтын 49 медициналық-санитариялық алғашқы көмек нысандарының құрылысы жүргізіліп, толық іске қосылған болатын. Осы бағыттағы жұмыстар осы жылы да жалғасын табуда. Атап айтқанда облыс көлемінде қайта жаңғырту қажет ететін 73 медициналық нысанның, биылғы жылы жергілікті бюджет есебінен 34 медициналық-санитариялық алғашқы көмек нысандарының құрылысы жүргізілді.
Түркістан облысы Мақтаарал ауданына қарасты Ынталы елді мекенінде жаңадан салынған 200 орындық мәдениет үйі мен кітапхананың салтанатты ашылу рәсімі өтті. Тұрғындар үшін маңызды ғимараттың ашылуына Түркістан облысының әкімі Нұралхан Көшеров арнайы қатысып, ауыл тұрғындарын қуанышты сәтімен құттықтады.
«– Мемлекет басшысы Қасым-Жомарт Кемелұлы Тоқаев: «Жаһан жұрты елімізді өнеріміз, мәдениетіміз арқылы танып біледі» деп атап өткен болатын. Сондықтан мәдениет саласына қолдау көрсетудің маңызы зор. Биылғы 13 наурызда Мақтаарал тұрғындарымен өткен кездесуде халық тарапынан бірнеше маңызды мәселе көтерілген болатын. Сіздер құрылысы басталып, қаржының толық бөлінбеуіне байланысты тоқтап қалған екі мәдениет үйінің құрылысын аяқтау туралы ұсыныс бердіңіздер. Бұл – Ж.Нұрлыбаев және Достық ауылдық округіндегі мәдениет үйлері. Аталған нысандарды өз бақылауыма алып, құрылыс жұмыстарына қажетті қаражат толық қарастырылды. Нәтижесінде бүгінде бұл мәдениет ошақтары халық игілігіне табысталуда. Сонымен қатар А.Қалыбеков ауылдық округіндегі бір мәдениет үйінде күрделі жөндеу жұмыстары жүргізіліп жатыр. Сондай-ақ халықпен кездесуде көтерілген тағы бір маңызды мәселе – Мырзакент кентіндегі орталық саябақты қайта жаңғырту еді. Халықтың осы өтініші де назардан тыс қалмай, бюджеттен қажетті қаржы бөлініп, жоба толық жүзеге асырылды. Ауылдарды, өңірді дамыту жұмыстар жалғасады,» – деді Нұралхан Көшеров.
Мәдениет үйінің құрылысын «Нүрі-Л-Жетісай» ЖШС жүргізген. Құрылысы 2024 жылдың мамыр айында басталған. Жер телімінің жалпы алаңы – 1 гектар, ғимараттың жалпы ауданы – 1 273 шаршы метр. Конкурстық құны – 794 002,7 мың теңге. Нысанның ашылуымен 70-тен астам жаңа тұрақты жұмыс орны құрылды. Мұнда түрлі бағыттағы шығармашылық үйірмелер, концерттер мен мәдени іс-шаралар өткізуге толық мүмкіндік бар. Сонымен қатар ғимарат ішінен заманауи талаптарға сай кітапхана да ашылып, оқырмандарға есігін айқара ашты. Спорттық үйірмелерге де орын қаралған.
Айта кетсек, бүгінгі таңда ауданда 10 мәдениет мекемесі халыққа қызмет көрсетуде. Аталған мәдени мекемелерде жастар мен оқушылар би, домбыра, қолөнер, эстрада және тағы басқа бағыттар бойынша өз өнерлерін шыңдап келеді.
Ел Президенті Қасым-Жомарт Кемелұлы Тоқаев еліміздің білім саласын жаңа деңгейге көтеру мақсатында «Келешек мектептері» жобасын қолға алуды тапсырған болатын. Түркістан облысында осы жоба арқылы 29 мектептің құрылысы жүргізілді. Бүгін солардың бірі Мақтаарал ауданына қарасты Атакент кентінде ашылып, 1500 орындық мектеп қолданысқа берілді. Білім ошағының ашылуына Түркістан облысының әкімі Нұралхан Көшеров арнайы қатысып, жұртшылықты ғимараттың ашылуымен құттықтады.
«– Бүгін Мақтаарал өңірінде сүйінші жаңалық болып жатыр. Ауданда тағы да заманауи мектеп бой көтеріп, оқушыларға есігін айқара ашты. Бұл – мемлекетіміздің білім мен ғылымға бағытталған стратегиялық саясатын көрсететін мәні зор оқиға. Мемлекет басшысы Қасым-Жомарт Кемелұлы Тоқаевтың бастамасымен жүзеге асырылған «Келешек мектептері» ұлттық жобасы – еліміздің интеллектуалдық әлеуетін арттыруға бағытталған бағдарлы қадам. Мақтаарал ауданында ашылып отырған 1500 орындық жаңа мектеп – ауылдағы балаларға жасалған үлкен қолдау. Бұл заманауи білім ордасында оқушылардың терең білім алуына, шығармашылықты дамытуына барлық жағдай жасалған. Мұнда келешектің ойлы, парасатты және бәсекеге қабілетті жастары тәрбиеленеді. Бұл мектеп – тек оқу орны ғана емес, жас ұрпақтың азамат болып қалыптасатын айбынды ордасы. Мақтаарал – еңбекқор халқы бар, қарқынды дамып келе жатқан қасиетті мекен. Бүгін бой көтерген жаңа білім ұясы – осы өңірдің адами капиталын жақсартып, ұстаздар мен оқушыларды жаңа белеске жетелейді. Бізге білімді, отаншыл, рухы биік, жаңашыл буын керек. Міне, жаңа мектеп сол асыл міндетті орындауға қызмет етеді. Бұл – ұлт болашағына салынған инвестиция. Сондықтан ұстаздарымыз үнемі ізденіп, сапалы білім берулері керек. Сіздерді жаңа мектептің ашылуымен шын жүректен құттықтаймын! Мақтааралдың білімге құштар жастары ғылым мен мәдениеттің биік шыңдарын бағындырып, елге қызмет ете берсін!» – деді облыс басшысы Нұралхан Оралбайұлы.
Айта кетейік, Түркістан облысы білім беру саласын жаңғырту және оқушы орындарының тапшылығын шешу мақсатында «Келешек мектептері» ұлттық жобасын белсенді жүзеге асырып жатыр. Бұл жоба — еліміздің білім жүйесін заманауи талаптарға сай қайта құру, сапалы және қауіпсіз білім беру инфрақұрылымын қамтамасыз ету бағытындағы ауқымды бастама.
Мақтаарал ауданына қарасты Атакент кентінде ашылған 1500 орындық мектеп жобасының құны 5,2 млрд. теңгені құрайды. Ал ғимарат 14 710 метр аумақта орналасқан. Сыйымдылығы – 1500 бала. «Samruk-Kazyna Construction» АҚ тапсырысымен құрылыс жұмыстарын «BCN Group» ЖШС компаниясы жүргізді. Мектеп заманауи талаптарға сай жабдықталған. Спорт залы, мәдениет залы, асхана, акт залы, оқу бөлмелері мәжіліс залы, арнайы пән кабинеттері бар. Айта кетейік, Түркістан облысында Мемлекет басшысының тапсырмасымен «Келешек мектептері» жобасымен 29 білім ұясы салынды.
«Келешек мектептері» — Президент Қасым-Жомарт Тоқаевтың бастамасымен жүзеге асырылып отырған ұлттық жоба. Оның негізгі мақсаты — жаңа мектептер салу, білім беру кеңістігін кеңейту, үш ауысымды оқыту мен оқушы орнын жетіспеу мәселелерін шешу, сондай-ақ оқушыларға заманауи, қауіпсіз әрі қолайлы оқу ортасын қамтамасыз ету. Бұған дейін де Түркістан облысында «Келешек мектептері» аясында бірнеше жаңа мектеп пайдалануға берілген болатын. Атап айтқанда Төлеби ауданының Достық ауылында 900 орындық және Сайрам ауданының Ақсу ауылында 600 орындық мектептер ашылды. Келес ауданында Абай ауылында 600 орындық жаңа мектеп ел игілігіне берілді. Сонымен қатар Сауран ауданында 300 орындық жаңа мектеп те ашылды. Бұл мектептер заманауи стандарттарға сай салынған: оқу кабинеттері, спорт залдары, кітапханалар, кең акт залдары, асхана және қауіпсіздік жүйелері бар. Мұндай инфрақұрылым оқушылардың жан-жақты дамуына жағдай жасайды. Облыстағы мектептердің ақпараттық инфрақұрылымын дамыту да маңызды назарда тұр. Мысалы, кейбір мектептерде интернетке тұрақты қол жеткізу, соның ішінде ауылдық жерлердегі білім беру ресурстарына қол жетімділікті қамтамасыз ету үшін халықаралық бастамалар да қолға алынып жатыр. Бұл оқушылар мен мұғалімдерге онлайн ресурстарға кіруді жеңілдетеді және білім беру сапасын арттыруға септігін тигізеді. «Келешек мектептері» жобасы Түркістан облысында мектеп тапшылығын жоюға айтарлықтай үлес қосуда. Заманауи мектептердің ашылуы жаңа оқу орындарының санын арттырып қана қоймай, оқушылар үшін қауіпсіз әрі қолайлы оқу ортасын қамтамасыз етеді. Бұл — өңірде білім сапасын көтеруге бағытталған жүйелі жұмыстардың айқын көрінісі.
Қазіргі кезеңдегі әлемдік өзгерістер білім беру жүйесіне де түбегейлі жаңаруды талап етуде. Ғылым мен технологияның дамуы, цифрлық орта, жасанды интеллекттің кең қолданылуы – болашақ мектептерінің бейнесін түзіп, олардың жаңа бағытта дамуына жол ашып отыр. Сондықтан келешек мектебі – тек білім беретін орын ғана емес, тұлға қалыптастыратын, шығармашыл ойлауды дамытатын, өмірге бейімдейтін заманауи орталық болмақ.
Болашақ мектептерінде дәстүрлі оқыту әдістерімен қатар толыққанды цифрлық платформа қолданылады. Интерактивті тақталар, виртуалды зертханалар, онлайн білім беру ресурстары, қашықтан оқу жүйесі оқушыларға кең мүмкіндік береді. Жасанды интеллект әр оқушының қабілеті мен қызығушылығына сай жеке оқу бағдарламасын ұсына алуы мүмкін. Келешек мектебі тек ақпарат берумен шектелмейді. Ең басты міндет – оқушыны ойландыру, талдауға, шешім қабылдауға, жаңа идея ұсынуға үйрету. Жобалық жұмыс, зерттеу жүргізу, тәжірибе жасау сияқты оқу формалары көбейеді. Бұл балалардың сын тұрғысынан ойлау дағдысын қалыптастырып, шығармашылық қабілетін дамытады.Тек білімді ұсыну жеткіліксіз. Болашақ мектебі – ұлттық құндылықтарды сақтай отырып, әлемдік мәдениетке бейім тұлға қалыптастыру ортасы болуы тиіс.
Құрмет, жауапкершілік, отансүйгіштік, еңбексүйгіштік секілді қасиеттерді бойға сіңіру – мектеп жұмысының маңызды бөлігі болып қала береді. Келешек мектебінің табысы – мұғалімге байланысты. Болашақ ұстаз тек пән үйретуші емес, бағыт беруші, кеңесші, мотивация беретін тұлғаға айналады. Заманауи технологияны меңгерген, үздіксіз ізденісте болатын, оқушымен тең дәрежеде сұхбат құратын жаңа форматтағы педагог қажет. Келешек мектептері жай ғана оқу ғимараты емес, қауіпсіз, қолжетімді, психологиялық тұрғыдан жайлы кеңістікке айналады. Спорт, өнер, ғылыммен айналысуға арналған заманауи кабинеттер мен орталықтар оқушылардың жан-жақты дамуына жағдай жасайды.Озық технология, сапалы білім, адамгершілік құндылық және жас ұрпақтың қабілетін ашуға бағытталған жаңа жүйе – елдің дамуына негіз болады.
Түркістан облысындағы «Келешек мектептері» жобасы — елдің білім беру жүйесін жаңғыртудағы маңызды стратегиялық қадам. Жаңа мектептердің ашылуы аймақтағы оқушыларға сапалы білім алу мүмкіндігін кеңейтіп, білім саласындағы инфрақұрылымның дамуына серпін беруде. Жоба болашақта да оқушы орындарының тапшылығын жойып, заманауи талаптарға сай білім беру ортасын қалыптастыруды жалғастырады деп күтілуде.
Түркістан облысының әкімі Нұралхан Көшеров Мақтааралға жасаған жұмыс сапары барысында мақта кластерін дамыту бағытында іске асырылып жатқан бірқатар өндірістік нысандарды аралады. Аймақ басшысы «Cotton Makta» ЖШС мақта шикізатын өңдеу зауытының және «Хамро ата» ЖШС мақта майын өңдеу зауытының жұмыс барысымен танысты.
«Cotton Makta» ЖШС мақта зауыты 2016 жылдан бері тұрақты жұмыс істеп келеді. 2023 жылы зауыт өндірістік қуатын арттыру мақсатында Қытай Халық Республикасынан әкелінген заманауи өндірістік құрал-жабдықтармен толықтай жаңғыртылған. Зауыттың жылдық қуаттылығы – 90 мың тоннаға жуық. Қазіргі таңда кәсіпорында 150 адам тұрақты жұмыспен қамтылған, ал маусымдық кезеңде 250 адамға дейін қосымша жұмыс орындары ашылады. Жобаның жалпы құны – 3 млрд теңге.
Биыл зауыт 57 мың тонна мақта шикізатын қабылдап, мақта дақылын еккен 800-ден астам шаруа қожалығымен келісімшарт жасаған. Шаруа қожалықтарынан қабылданған мақта шикізатының 1 келісі сорттық ерекшелігіне қарай 250-270 теңге аралығында бағаланған. Биыл 11 мақта қабылдау бекеті жұмыс істеп, барлық шаруалармен толық есеп айырысу жүргізілген.
Мақта кластерін дамыту бұл өңірлік экономиканы қолдайтын стратегиялық бағыт. Мақта шаруашылығы – Қазақстанның оңтүстігі үшін экономикалық, әлеуметтік әрі өндірістік тұрғыдан ерекше маңызға ие сала. Әсіресе Түркістан облысындағы Жетісай және Мақтарал өңірлері осы бағыттың орталығы саналады. Мақта тек ауыл шаруашылығы өнімі ғана емес, ол – тұтас өндірістік тізбекті қамтитын, қосымша құн қалыптастыратын үлкен экономикалық жүйе. Сондықтан мақта кластерін дамыту – өңірдің тұрақты дамуына серпін беретін маңызды міндет.
Бүгінгі күнге дейін 13 мың тонна мақта талшығы өңделіп, дайын өнімнің 80 пайызы Қытай Халық Республикасына экспортталса, қалған бөлігі Түркия мемлекетіне жөнелтілуде.
Мақта кластері – егіс алқаптарынан басталып, мақта талшығын өңдеу, жіп иіру, мата тоқу, дайын тоқыма және тігін өнімдерін шығару сияқты бірнеше кезеңді қамтитын жүйе. Мұндай кешенді модель шикізатты тек сатумен шектелмей, оны терең өңдеу арқылы жоғары табыс алуға мүмкіндік береді. Сонымен қатар салада жаңа жұмыс орындары ашылып, кәсіпкерлік дамиды, бюджетке түсетін түсім көлемі артады.
Облыс басшысына «Хамро ата» ЖШС-ның мақта майын өңдеу зауытының жұмысы туралы да баяндалды. Қазіргі таңда өндірістік нысанның құрылыс жұмыстары 80 пайызға аяқталған. Өндіріске қажетті барлық құрал-жабдықтар Қытай Халық Республикасынан толық көлемде сатып алынған. Бұл бастама толық іске асса, кәсіпорын жылына 5 мың тонна мақта майын өндіреді. Жобаның жалпы құны 1 млрд теңгені құрайды. Құрылыс жұмыстары 2025 жылдың мамыр айында басталған. Нысанды пайдалануға беру 2026 жылға жоспарланған.
Облыс әкімі Нұралхан Көшеров кәсіпорын басшылары мен басқарма басшыларына, аудан әкіміне өндірісті әртараптандыру, қосымша жұмыс орындарын ашу және дайын өнім экспортын ұлғайту бағытында нақты тапсырмалар беріп, мақта кластерін дамыту өңір экономикасы үшін маңызды екенін айтты.
« – Мақта өсірудің табысты болуы ең алдымен технологияға байланысты. Су үнемдеу жүйелерін енгізу, тамшылатып және жаңбырлатып суару әдістерін қолдану, заманауи ауыл шаруашылығы техникасын пайдалану – өнім сапасын арттырудың негізгі жолдары. Сонымен бірге цифрлық бақылау, агроаналитика, смарт-фермерлік жүйелері еңбек өнімділігін арттырып, шығынды азайтады. Жалпы өңдеу саласын дамыту – басты басымдықтардың бірі. Мақта өнімін терең өңдеу – кластердің негізгі өзегі. Мақта тазалау зауыттарын жаңғырту, жіп иіру және мата өндіру кәсіпорындарын көбейту, тігін және тоқыма фабрикаларын дамыту арқылы ішкі нарықты толық қамтамасыз етіп қана қоймай, экспорттық әлеуетті күшейтуге болады. Бұл жергілікті халықты тұрақты жұмыспен қамтып, әлеуметтік әл-ауқатты арттыруға жол ашады.» – деді Түркістан облысының әкімі Нұралхан Көшеров.
Мақта кластерін дамытуда мемлекет қолдауы үлкен рөл атқарады. Инфрақұрылым тарту, субсидиялау, жеңілдетілген несие беру, арнайы экономикалық аймақтар мүмкіндіктерін пайдалану – инвесторлар үшін қолайлы жағдай қалыптастырады. Мемлекет, кәсіпкерлер және фермерлер арасында өзара әріптестік орнағанда ғана кластердің тиімділігі артады. Халықаралық нарыққа сапалы, стандартқа сай дайын өнім шығару – басты мақсаттардың бірі. Брендтік тоқыма және тігін өнімдерін дамыту, сыртқы нарықтармен тұрақты байланыс орнату арқылы Қазақстан мақтасының беделін көтеруге мүмкіндік бар.
Мақта кластерін дамыту – тек ауыл шаруашылығы саласын жетілдіру емес, өңірлік өнеркәсіптің дамуы, жаңа өндірістердің ашылуы, халықтың табысының артуы деген сөз. Жүйелі жоспар, заманауи технология, инвестиция және тиімді басқару – табысты кластердің негізгі кепілі. Осы бағыттағы нақты жұмыстар өңір экономикасына жаңа серпін беріп, елдің агроөнеркәсіптік әлеуетін нығайта түседі.
Жетісай ауданында инвестиция тарту, жаңа жобаларды жүзеге асыру арқылы жұмыссыздық деңгейін төмендету бойынша жүйелі жұмыстар атқарылып жатыр. Түркістан облысының әкімі Нұралхан Көшеровтың тапсырмасы аясында Жетісай ауданында аумағы 59 га құрайтын «Жетісай» өңірлік маңызы бар индустриялық аймақ пен 1 га жерге өндірістік парк құру жұмыстары қарқынды жүргізілуде. Осыған орай Жетісай ауданының әкімі Серік Үсенұлы Мамытов аталмыш аймақтардың инвесторларымен кездесті. Атқарылған жұмыстарды саралап, алдағы жоспарларды талқылады. Айтылған ұсыныс-пікірлер бойынша тиісті сала басшылары жауаптар берді.
Аудан әкімдігі тарапынан әлеуетті жобаларды іске асыруға ынталы инвесторларымен жүргізілген келіссөздердің нәтижесінде бүгінде индустриялды аймақта жалпы құны 31,2 млрд теңгені құрайтын сүт өңдеу зауыты, мақта өңдеу зауыты, жіп иіру фабрикасы, су үнемдеу жабдықтарын өндіру зауыты, полиэтилен қалдықтарын қайта өңдеу зауыттары секілді 9 жобаны, өндірістік паркте құны 210 млн теңгені құрайтын түйіршіктелген құрама жем өндіру, темір бұйымдарын дәнекерлеу, құрғақ құрылыс қоспаларын өндіру, құрғақ, сұйық ұнтақ, кір сабын мен сусабын өндіру, әжетхана қағазы мен майлықтар өндіру сынды 5 өндіріс орындарын іске қосу жоспарланған. Аталмыш жобаларды жүзеге асыру арқылы 1200-ге тарта тұрғын тұрақты жұмыспен қамтылады деп көзделуде.
«- Біздің ауданымыз егін шаруашылығы мен мал шаруашылығы саласы дамыған аудан. Сондықтан, алдағы күндері іске қосылатын зауыттар мен өндіріс орындары шикізаттан тапшылық көрмейді деп сенеміз.Өңір басшысының бастамасымен қолға алынып жатқан аталмыш жобаларды жүзеге асыру арқылы ауданда кәсіпкерлікті дамытып, жаңа жұмыс орындарын ашатын, халықтың әлеуметтік ахуалын жақсартып, өңірдегі жұмыссыздық деңгейін төмендетуге бағытталған нақты істерді жүзеге асыратын боламыз. Жетісай ауданы Түркістан облысының оңтүстік бөлігінде орналасқан, ауыл шаруашылығы мен өндірістік салалардың үйлесімді дамуына негізделген аймақ. Соңғы жылдарда аудан экономикасы қарқынды түрде өзгеріп, инвестиция тарту бағытында нақты қадамдар жасалып келеді. Соңғы бес жылда ауданға 90,2 млрд теңгеге жуық инвестиция тартылды, бұл ауыл шаруашылығы, өнеркәсіптік жобалар, инфрақұрылым мен шағын өндіріс салаларын дамытуға бағытталуда. Жетісай ауданына инвестиция тарту 2030 жылға дейін 419,6 млрд теңгеге дейін жеткізіледі деп жоспарланып отыр. Аудандағы «Жетісай» индустриалды аймағы – инвестициялық саясаттың басты драйвері. Аумағы 59 гектар жерді қамтитын бұл аймақ кәсіпкерлер үшін қолайлы жағдай жасайды, яғни инфрақұрылым, жер бөлу және әкімшілік қолдау қамтамасыз етілген. 2025 жылы индустриалды аймақта 33 млрд теңгеге 11 жоба жүзеге асырылмақ, оның нәтижесінде 1 870 жаңа жұмыс орны ашылады деп күтілуде. Бұл жобалар әртүрлі өндірістік бағыттарды қамтиды. Мысалы материал өндіру, өңдеу, агроөнеркәсіптік өнімдерге қызмет көрсететін кәсіпорындар және басқа да өндірістер. Қазірдің өзінде бірнеше жоба мақұлданып, құрылыс жұмыстары басталған. Жетісай ауданының экономикалық өсімі өңірдегі жалпы өнім көлемінің артуымен байқалады. Өткен жылдың қорытындысы бойынша айтар болсақ, өңірлік өнім көлемі 184,1 млрд теңгеге жетті, бұл одан алдыңғы жылмен салыстырғанда өсу екенін көрсетеді. Инвестициялық жобалардың іске асуы нәтижесінде мыңдаған жаңа жұмыс орындары ашылады, жергілікті тұрғындар тұрақты табысқа ие болады, ауданның өндірістік қуаты артады, халықтың әлеуметтік жағдайы жақсарады. Сонымен қатар Ауыл – Ел бесігі мемлекеттік бағдарламасы аясында 15 елді мекенде газдандыру, жол жөндеу, мәдениет үйлерін жаңарту сияқты жобалар іске асырылып, тұрғындардың тұрмыс сапасы жақсаруда. Жетісай ауданы ауыл шаруашылығы бойынша да үлкен әлеуетке ие. Мұнда диқандар қауын, қарбыз және басқа да дақылдарды өндіріп, өнімнің басым бөлігін Ресей, Белоруссия, Қырғызстан елдеріне, сонымен қатар республиканың Алматы, Астана, Шымкент қалаларына экспорттайды. Аудан шаруалары 1,2 мың гектардан екі есе өнім алу жобаларын іске асырып, тұқым және өнім сапасын арттыру бойынша шаралар қолдануда. Жетісай аудан әкімдігі инвесторларға толық қолдау көрсетуде. Атап айтқанда жобаларды іске асыруға әкімшілік көмек көрсетіледі,бизнес бастау үшін қолайлы жағдайлар жасалған, сондай-ақ жер және инфрақұрылым бойынша жеңілдіктер беріледі. Бұл жағдайлар инвесторларды тартуға және жаңа кәсіпорындарды ашуға мүмкіндік береді.» – деді аудан басшысы Серік Мамытов өз сөзінде.
Жетісай ауданы бүгінгі таңда қарқынды экономикалық өзгерістерді бастан өткеріп отыр. Инвестициялық жобалардың жүзеге асуы, индустриалды аймақтың дамуы, ауыл шаруашылығының экспортқа бағдарлануы — барлығы да ауданның инвестициялық тартымдылығын арттырып, экономикалық өсімге серпін береді. Ауданның стратегиялық даму жоспары бойынша 2030 жылға дейін инвестиция көлемін едәуір ұлғайту көзделген. Бұл Жетісайды Түркістан облысының ғана емес, бүкіл Оңтүстік Қазақстан аймағының өндірістік және экономикалық әлеуеті жоғары өңіріне айналдырады.
Соңғы 30 жылда ешқандай өндіріс орны салынбаған ауданда алғаш рет іске қосылғалы тұрған зауыттар аудан экономикасының дамуына тың серпіліс беріп, мақталы өлкенің индустриялық әлеуетін арттыруға, жаңа кәсіпкерлердің пайда болуына мүмкіндік жасайды деп күтілуде. 2020 жылдан бері 90,2 млрд теңгенің инвестициясы тартылған ауданда бұл көрсеткіш 2030 жылы 419,6 млрд теңгеге жетеді деп жоспарланып отыр.
Бүгінде елімізде денсаулық сақтау саласына ерекше көңіл бөлініп, жоғарғы қарқынмен дамып келеді. Дәрігерлерге, медицина саласына деген мемлекеттің қамқорлығы нәтижесінде барлық елді мекендердегі денсаулық сақтау мекемелерінің базасы жаңғыртылып, заманауи құрал-жабдықтармен қамтылуда. Жылдан-жылға медицина саласы қызметкерлерінің жалақысы артуда.
Қазақстан Республикасының Тәуелсіздік күні мерекесінде Қазыбек би ауылдық округіне қарасты Алғабас елді мекенінің тұрғындары мемлекеттік қамқорлықтың тағы бір шарапатын көрді. Бұған дейін көрші ауылдардың медициналық бекеттеріне қатынаған тұрғындарға жаңа фельдшерлік-акушерлік пункт қолданысқа берілді. Алғабастағы 1607 тұрғынға енді 5 медицина мамандары дәрігерлік көмек көрсетеді.
Сондай-ақ, 34 жылдан бері ауыл тұрғынының ыңғайластырылған жеке тұрғын үйін жалдап жұмыс істеп келген Жаңа ауыл ауылдық округіндегі Қарой елді мекенінің дәрігерлері де жаңа ғимаратқа кірді. 1400-ге тарта тұрғыны бар аталмыш ауылда 4 ақ желеңді қызмет көрсететін болады. Аудан басшысымен өткен есептік кездесулерде айтылып жүрген өтініштерінің орындалып, медициналық бекет салынғанына тұрғындар дән риза.
Ағымдағы жылдың ІІ тоқсанында қазығы қағылып, құрылысы басталған қос ғимараттың ашылу салтанатына Жетісай ауданының әкімі Серік Үсенұлы Мамытов пен аудандық мәслихат депутаттары Мақсат Айнабеков, Хамит Дүйсебаев, «Жетісай» аудандық ауруханасының бас дәрігері Бағила Утеулиева қатысып, тұрғындарды құттықтады. Денсаулық сақтау нысандарындағы заманауи үлгідегі әйелдерді қарап-тексеру, екпе егу, профилактикалық қарау, дұрыс тамақтану мектебі, дені сау бала, стерилизация, қақырық жинау, тұрмыстық шаруашылық және дәріхана бөлмелерін аралап көрді.
Айта кетейік, өткен жылы ауданда «Ауылда денсаулық сақтауды жаңғырту» ұлттық пилоттық жобасы аясында жаңадан 5 фельдшерлік-акушерлік пункт қолданысқа берілген болса, биылғы жылдың соңына дейін пайдалануға берілуі жоспарланған 7 нысанның 5-і ел игілігіне тапсырылды. Алдағы күндері тағы 2 нысан тапсырылады деп жоспарланып отыр.
Экологиялық мәдениет пен ортақ жауапкершіліктің айқын көрінісіне айналған «Таза Қазақстан» республикалық акциясы – қоғамды тазалыққа, табиғатты қорғауға және ортақ жауапкершілікке үндейтін ауқымды бастамаға айналғаны бәрімізге белгілі. Яғни Мемлекет басшысы жүктеген біл міндет елді мекендерді қоқыстан тазалау ғана емес, экологиялық мәдениетті қалыптастыру, тұрғындардың туған жеріне деген жанашырлығын арттыруды мақсат етеді. Бұл бастама арқылы ауылдар мен қалалар көгалдандырылып, көшелер, саябақтар, қоғамдық орындар абаттандырылып, елді мекендердің санитарлық жағдайы да жақсарып келеді.
Акция аясында ағаш отырғызу, жасыл желекті көбейту, су көздерін тазалау жұмыстары жүйелі түрде жүргізілуде. Бұл шаралар табиғи тепе-теңдікті сақтауға, жердің құнарын арттыруға және климаттың қолайлы болуына ықпал етеді.
Осы бағытта, «Таза Қазақстан» республикалық акциясы аясында Бәйдібек ауданының орталығы – Шаян елді мекенінде көгалдандыру жұмыстары жүргізіліп, Рысқұлов көшесінің бойына жалпы 300 түп “Айланта” және жеміс ағаштары егілді. Іс-шараға Бәйдібек ауданы әкімінің міндетін атқарушы Бақыт Қырғызалиев, аудандық мәслихат төрағасы Имангелді Түймебаев, аудан әкімі аппаратының басшысы Фазылбек Әуен, сондай-ақ ауданға қарасты түрлі мекемелердің қызметкерлері мен ауыл жастары және жергілікті тұрғындар да қатысты.
« – Соңғы жылдары Түркістан өңірінде және еліміздің оңтүстігінде «Айланта» көшетін отырғызу жиі қолға алынып жатыр. Себебі бұл ағаш табиғатқа да, адамға да пайдалы. Айлантаны кейде «аспан ағашы» деп те атайды. Ол тез өсетін, ыстыққа да, құрғақшылыққа да шыдайтын өсімдік. Айлантаның ең үлкен артықшылығы тез өседі және көшеті отырғызылғаннан кейін көп күтімді талап етпейді. Алғашқы жылдары-ақ бой көтеріп, небәрі 3–4 жылдың ішінде үлкен ағаш болып өседі. 5–6 жылда көлеңке беретін деңгейге жетеді. Бұл – саябақ, көше, ауыл, елді мекендерді жасылдандыру үшін өте тиімді. Біздің өңірде жаз өте ыстық, су да үнемдеуді қажет етеді. Осындай жағдайда айланта өте қолайлы ағаш және 45–50 градусқа дейінгі ыстыққа шыдайды екен, құрғақ климатқа да бейімделген. Бұл ағаштың тамыры мықты. Сондықтан желден қорғаныш жасайды, құмның жылжуын тежейді, сай-жыралардың опырылуын азайтады. Ауыл шаруашылығы жерлерінде жел тосқауыл орман белдеулерін жасауға да өте ыңғайлы. Дұрыс отырғызылып, бақылаумен өсірілсе, айланта Түркістан өңірін көгалдандырудың ең қолайлы шешімдерінің бірі бола алады.» – дейді, аудандық мәслихат төрағасы Имангелді Түймебаев.
Көгалдандыру жұмыстарының мақсаты – елді мекеннің эстетикалық келбетін жақсарту, экологиялық тепе-теңдікті сақтау және тұрғындар үшін қолайлы ортаны қалыптастыру.Аудан аумағында абаттандыру мен көгалдандыру бағытындағы жұмыстар алдағы уақытта да жалғасын табатын болады.
«– Бүгін еліміз үшін аса қастерлі мерекенің бірі – Тәуелсіздік күні қарсаңында жаңа спорт нысанын ашып отырмыз. Жастардың бос уақытын тиімді өткізуіне, спортпен жүйелі айналысуына барлық мүмкіндік жасалуда. Аядай ауылдардан талай чемпиондар шығып, еліміздің атын әлемдік ареналарда асқақтатып жүр. Спортқа қолжетімділік арта түссе, ауданымыздан әлі де талай биіктерді бағындыратын спортшылар шығатынына сенім мол. Бүгін ашылған алаң ауыл жастарының үлкен жетістіктерге жетуіне жол ашады,» – деді аудан басшысы Мұхит Сексенбайұлы.
Сондай-ақ, шара барысында аудандық мәслихат төрағасы Ордабек Жәмиев пен аудандық ардагерлер кеңесінің төрағасы Қабылбек Еспенбетов құттықтау сөз сөйлеп, жаңа спорт нысанының ауыл жастары үшін маңыздылығын атап өтті. Ауыл ардагері, ауданның Құрметті азаматы Мадияр Бейсенбеков жаңа алаңның жас ұрпақ тәрбиесіндегі рөліне тоқталып, игі іске сәттілік тіледі. Шараға арнайы қатысқан Жартытөбе ауылынан шыққан спорт саңлақтары, бокстан әлем чемпионы Біржан Жақып пен белгілі футболшы, Қазақстанның үш дүркін чемпионы Таңат Нөсербаев ауыл жастарына жасалған жағдайға жоғары баға берді.
Сонымен қатар, ауыл тумасы, кәсіпкер Дәулет Дүйсебай ауыл жастарына футбол доптары мен жаттығуға қажетті спорттық жабдықтарды сыйға тартты.
Жаңа спорт алаңы барлық қажетті стандарттарға сай жабдықталған. Мұнда жасанды төсеніш төселген футбол алаңы, жарықтандыру жүйесі, қауіпсіздік қоршаулары, ойыншыларға арналған жылы киім ауыстыратын бөлмелер қарастырылған. Нысан аумағы толық асфальтталып, абаттандыру және көгалдандыру жұмыстары жүргізілді. Жабық үлгідегі кіші футбол алаңы ауыл тұрғындарының, әсіресе жастардың спортпен тұрақты айналысуына және салауатты өмір салтын қалыптастыруға мүмкіндік береді.
Созақ ауданындағы игі істер мұнымен шектелген жоқ. Тәуелсіздік күні мерекесі қарсаңында Созақ ауданындағы Шолаққорған ауылында жаңа тұрғын үй ел игілігіне пайдалануға берілді. «Жеткіншек» шағын ауданында бой көтерген 2 қабатты тұрғын үйде 16 пәтер бар. Бұл пәтерлердің кілттері апатты жағдайдағы үйлердің тұрғындарына табысталды. Тұрғын үйдің құрылысы «Қазатомөнеркәсіп» ҰАК» АҚ-ның еншілес компаниялары – «КАTКО» БК ЖШС және «Қазатомпром-Сауран» тарапынан қаржыландырылды.
Салтанатты шараға арнайы қатысқан «Қазатомөнеркәсіп» ҰАК» АҚ басқарма төрағасы Мейіржан Юсупов әлеуметтік маңызы жоғары жобаның аудан дамуына қосар үлесін атап өтті. Ұлттық компания өңірдегі инфрақұрылымдық және әлеуметтік жобаларды қолдауды алдағы уақытта да жалғастыратынын айтты. Аудан әкімі Мұхит Тұрысбеков жаңа қоныс иелерін қуанышты сәтпен құттықтады.
«– Апатты үйлердің мәселесін шешу – басты міндеттеріміздің бірі. Облыс әкімінің тапсырмасына сәйкес, бұл жобаны жаңғырту бағдарламасына енгіздік. Қаржы көзін анықтау үшін Қазатомөнеркәсіп компанияларымен келіссөздер жүргіздік. Жобаның іске асуына қолдау көрсеткен «Қазатомөнеркәсіп» компаниясына, «КАТКО» және «Қазатомпром-Сауран» басшыларына аудан жұртшылығы атынан алғыс айтамын. Жаңа баспаналарыңыз құтты болсын!» – деді аудан басшысы.
Сонымен қатар «КАTКО» БК ЖШС-нің қаржы жөніндегі директоры Алмас Жанқабыл сөз алып, компанияның әлеуметтік жауапкершілік бағытындағы жұмыстары жалғасатынын жеткізді. Жаңа тұрғын үй аудандағы әлеуметтік инфрақұрылымды дамыту және тұрғындардың өмір сүру сапасын арттыру мақсатында салынды. Пәтерлер заманауи талаптарға сай жабдықталған. Инженерлік желілермен толық қамтылған. Ауласы қоршалып, балалар ойын алаңшасы орнатылған. Сыртқы қасбеті металлопанельмен қапталып, талаптарға сай әрленген.
Сонымен қатар, жеке демеушілер есебінен де тұрғындарды қуанышқа бөлеген жаңалықтар болды. Бабата елді мекенінде аз қамтылған отбасыға «Қазфосфат» ЖШС-нің демеушілігімен тұрғын үй пайдалануға берілді. Осы мақсатта ауылға арнайы барған аудан әкімінің орынбасары Серік Маманов жаңа баспананың кілтін табыстап, үй иесін қоныс тойымен құттықтады. Салтанатты шара барысында ауыл қариясы Садық Әбдірашұлы аталған игі іске ұйытқы болған азаматтарға алғысын білдірді. Ауыл ақсақалдары мен тұрғындар баспана иесінің қуанышын бөлісіп, ізгі тілектерін жеткізді.
Айта кетейік, Бабата елді мекенінде табысталған тұрғын үй барлық қажетті инфрақұрылыммен қамтылған. Атап айтқанда, су және жылу жүйелеріне арналған жеке бөлмелер қарастырылып, жылу жүйесі толық орнатылған. Сонымен қатар, 20 сотықтан астам жер телімі арнайы шарбақпен қоршалып, қора-жайы қосалқы шаруашылықты дамытуға мүмкіндік береді.
Қазақстан Республикасының Тәуелсіздік күні мерекесі қарсаңында Түркістан облысы Бәйдібек ауданындағы Ақбастау елді мекенінде жаңа спорт кешені ел игілігіне берілді. Нысанның ашылу салтанатына аудан әкімінің міндетін атқарушы Бақыт Қырғызалиев қатысып, ауыл тұрғындарын замануи спорт нысанының ашылуымен құттықтады. ҚР Президентінің салауатты өмір салтын қалыптастыру, бұқаралық спортты дамыту жөніндегі тапсырмалары аясында ауданда ауқымды жұмыстар жүргізіліп жатқанын атап өтті.
Нысанның құрылысын «Trendim KZ» ЖШС 2024 жылдың тамыз айында бастаған. 1 гектар аумақта орналасқан ғимараттың ауданы 939 шаршы метр. Мұнда воллейбол, баскетбол, кіші футбол, күрес, дзюдомен айналысуға барлық жағдай қарастылған. Бұл кешен ауыл жастарының бас қосып, кәсіби спортпен шұғылдануына мүмкіндік береді. Айта кетейік, бүгінде Бәйдібек ауданында 238 спорт нысаны жұмыс істейді.
Оның ішінде 3 дене шынықтыру-сауықтыру кешені, 1 су спорт кешені, 1 жабық теннис корты, 3 спорттық манеж, 53 спорт залы және 177 спорт алаңы бар. Аудан спортшылары биыл түрлі деңгейдегі жарыстарда жоғары нәтижелерге қол жеткізіп, өңір намысын абыроймен қорғап келеді. Атап айтқанда, спортшылар тоғызқұмалақ, волейбол және еркін күрес түрлерінен жүлделі орындарға ие болды.
Сондай-ақ, Тәуелсіздік мерекесі қарсаңында Созақ ауданы, Созақ ауылында бұқаралық спортты дамытуға бағытталған заманауи үлгідегі «Созақ спорт кешенінің» салтанатты ашылу рәсімі өтті. Ауыл тұрғындары үшін үлкен қуанышқа айналған игі шараға аудан әкімі Мұхит Тұрысбеков, Түркістан облысының дене шынықтыру және спорт басқармасының басшысы Ғалымжан Худияров, аудандық мәслихат төрағасы Ордабек Жәмиев және ауыл ақсақалдары мен тұрғындар қатысты.
Салтанатты шарада аудан басшысы Мұхит Сексенбайұлы сөз сөйлеп, ауыл жұртшылығын жаңа спорт нысанының ашылуымен және ел үшін қастерлі Тәуелсіздік күні мерекесімен құттықтады.
«– Мемлекет басшысының бұқаралық спортты дамыту жөніндегі тапсырмасына сәйкес ауданда спорт инфрақұрылымын жаңғырту жұмыстары қарқын алуда. Жаңа нысан ауыл жастарының спортпен тұрақты айналысуына, салауатты өмір салтын қалыптастыруға және болашақ чемпиондарды тәрбиелеуге үлкен мүмкіндік береді,» – деген аудан басшысы спорт саласы бойынша атқарылып жатқан жұмыстарды да тілге тиек етті.
Сонымен қатар, Түркістан облысының дене шынықтыру және спорт басқармасының басшысы Ғалымжан Худияров құттықтау сөз сөйлеп, жаңа спорт кешенінен еліміздің көк Туын әлемдік ареналарда абыроймен желбірететін дарынды спортшылар өсіп шығарына сенім білдірді.
Шара барысында аудандық мәслихат төрағасы Ордабек Жәмиев пен аудандық ардагерлер кеңесінің төрағасы Қабылбек Еспенбетов ауыл тұрғындарын құттықтап, жаңа спорт нысаны ел игілігіне ұзақ жылдар қызмет ететініне тілектестік білдірді. Ауыл қариясы, ауданның Құрметті азаматы Биімбет Байғараев сөз сөйлеп, өскелең ұрпақтың болашағы үшін маңызды нысанның бой көтеруіне атсалысқан азаматтарға ризашылығын жеткізді.
Салтанатты рәсімнен кейін қатысушылар жаңа спорт кешенін аралап, ішкі құрылымы мен көрсетілетін қызмет түрлерімен танысты. Айта кетейік, спорт кешенінің жалпы жер аумағы 1,5 гектарды құрайды. Ғимараттың жалпы көлемі – 1356 шаршы метр. Екі қабатты нысанда футбол, волейбол және баскетбол алаңдары, бокс, күрес және жаттығу залдары орналасқан. Бұған қоса медициналық кабинет, киім ауыстыратын және жуынатын бөлмелер, қызметкерлерге арналған жеке кабинеттер қарастырылған. Кешен аумағы толық қоршалып, ғимараттың сыртқы фасады заманауи үлгідегі металпанельдермен қапталған.
Жаңа спорт кешені ауыл тұрғындарының, әсіресе жастардың спортпен жүйелі айналысуына және бұқаралық спорттың дамуына тың серпін береді.
Мерейлі мерекеде Созақ ауданында екі бірдей спорттық нысан пайдалануға беріліп, тұрғындар үшін үлкен қуанышқа айналды. Созақ ауылында заманауи спорт кешені іске қосылса, Жартытөбе ауылында жабық үлгідегі кіші футбол алаңы пайдалануға берілді.
Салтанатты ашылу рәсіміне Созақ ауданының әкімі Мұхит Тұрысбеков қатысып, ауыл тұрғындары мен жастарды жаңа спорт нысанының іске қосылуымен және Тәуелсіздік күні мерекесімен құттықтады. Бұқаралық спортты дамыту мен жастарға қолайлы жағдай жасау – мемлекет саясатының басым бағыттарының бірі екенін атап өтті.
