Ақпарат, Ауыл шаруашылығы, Жаңа жоба, Қоғам, Құрылыс, Экология

ТҮРКІСТАН ОБЛЫСЫНДА БИЫЛ 2 СУ ҚОЙМА ПАЙДАЛАНУҒА БЕРІЛЕДІ

Оставить комментарий

Түркістан облысы әкімі аппаратының апталық мәжілісінде өңірді ағын сумен қамтамасыз ету мен су ресурстарын қорғау және су үнемдеу технологияларын енгізу бағытында атқарылып жатқан жұмыстар қаралды. Мәжіліске облыс әкімі Нұралхан Көшеров төрағалық етіп, жауапты басқармалар мен аудан, қала әкімдеріне нақты тапсырмалар жүктеді.

– Вегетациялық маусым басталғанға дейін тиісті жұмыстарды ұйымдастырып, су қоймаларға су көлемін толық жинауды, арық-атыздар мен каналдарды тазалау, дренаждарды жөндеу жұмыстарын уақтылы аяқтауды тапсырамын. Аудан, қала әкімдіктерімен бірлесіп, бекітілген егіс құрылымы бойынша шаруалармен ағын су бөлу келісім-шарттарға тұруды тапсырамын. Су үнемдеу технологияларын енгізу жұмыстарын жандандыру керек, – деді Нұралхан Көшеров.

Облыстық ауыл шаруашылығы басқармасының басшысы Файзулла Байдуллаевтың айтуынша, Облыста суармалы жердің жалпы көлемі – 575 мың гектар. 2025 жылға облысқа 4,6 млн м³ ағын су лимиті бекітілген. Алайда су көлемінің аз келу болжамына байланысты биылға лимит 3,8 млн м³ болып қайта қаралды. Өткен жылы нақты алынған су көлемі 3,5 млн текше метрді құрап, бекітілген лимиттің 76 пайызы орындалды.

Облыстың жылдық су пайдалану лимитінің 63 пайызы көрші мемлекеттердің аумағынан келетін трансшекаралық өзендерге тиесілі. Жаһандық жылынудың әсерінен трансшекаралық өзендерден келетін су көлемі жыл сайын азайып келеді. Өткен жылы бекітілген 3,2 млрд м³ лимиттің 2,8 млрд текше метрі немесе 88 пайызы ғана нақты босатылған. Қазіргі таңда облыстағы 42 су қоймасының жалпы сыйымдылығы 8,8 млрд текше метрді құрайды. Су қоймаларындағы су көлемі – 4,0 млрд м³ немесе 47 пайыз деңгейінде. Атап айтқанда, Шардара су қоймасына 3,3 млрд м³, Көксарай су реттегішіне 567 млн м³, Бөген су қоймасына 169 млн м³ су жиналған.

Су тапшылығының алдын алу мақсатында жаңа су қоймаларын салу жұмыстары жүргізілуде. Бәйдібек ауданында «Бәйдібек ата» су қоймасының құрылысы 75 пайызға аяқталып, нысанды осы жыл соңына дейін пайдалануға беру жоспарланып отыр. Нәтижесінде келер жылғы вегетациялық маусымда 9,7 мың гектар жаңа суармалы жер айналымға енгізіледі. Сонымен қатар Төлеби ауданындағы «Қарақуыс» су қоймасының құрылысы биыл аяқталып, 350 гектар жер сумен қамтамасыз етіледі.

Алдағы жылдары Ордабасы және Сауран аудандарында «Боралдай» және «Иқан су» су қоймаларын салу көзделген. Бұл жобалар толық іске асқан жағдайда Бөген су қоймасына қосымша 120 млн м³ ағын су жеткізіліп, Түркістан қаласы аумағындағы су мәселесін шешуге мүмкіндік туады. Биыл Ислам даму банкінің қаржысы есебінен су шаруашылығы инфрақұрылымын жаңғырту жұмыстары басталады. Бірінші кезеңде «Қазсушар» арқылы 63,2 млрд теңгеге 11 жоба, «Тұран су» кәсіпорны арқылы 73,6 млрд теңгеге 14 жоба іске асырылады. Нәтижесінде 296 шақырым канал бетонмен қапталып, 63 мың гектардан астам суармалы жердің сумен қамтамасыз етілуі жақсарады.

Су ресурстарын тиімді пайдалану мақсатында 2030 жылға дейін су үнемдеу технологияларын енгізу жоспары бекітілген. Жыл сайын 50 мың гектарға су үнемдеу технологияларын енгізу арқылы 2030 жылға қарай 622,8 млн м³ су үнемдеуге қол жеткізу көзделіп отыр. Биыл Мақтаарал, Шардара және Жетісай аудандарында 24 мың гектар алқапқа су үнемдеу технологияларын енгізу жоспарлануда. Қазіргі таңда 10,6 мың гектар жерге су үнемдеу технологиясын енгізу бойынша тауар өндірушілерден ұсыныстар түскен.

Ақпарат

САЛЫҚ ТҮСІМІ – 1 ТРИЛЛИОН ТЕҢГЕ: ӨҢІР ЭКОНОМИКАСЫНЫҢ БЕТБҰРЫСЫ

Оставить комментарий
2025 жылғы салық түсімдері Түркістан облысының экономикалық моделіндегі сапалық өзгерісті айқын көрсетті. Өңір алғаш рет 1 триллион теңгеден астам салық түсімін жинады. Бұл көрсеткіш – жүйелі әрі ұзақмерзімді экономикалық саясаттың нақты жемісі. Осы арқылы өңір экономикасы көлеңкелі айналымнан нақты есепке, ашықтық пен институционалдық тұрақтылыққа бет бұрды. Соңғы жылдары іске қосылған жаңа өндіріс орындары мен кәсіпорындар облыста тұрақты салық базасын қалыптастыра бастады. Индустриялық және арнайы экономикалық аймақтарда жүзеге асырылып жатқан жобалар инвестициялық кезеңнен өтіп, нақты қаржылық қайтарым беретін фазаға көшті. Бұл Түркістан облысы үшін жүйелі реформалармен, өлшенетін нәтижелермен және айқын экономикалық серпінмен сипатталатын жаңа даму кезеңінің басталғанын білдіреді. Мемлекет басшысы Қасым-Жомарт Кемелұлы Тоқаевтың 2025 жылға арналған Жолдауында айқындалған басымдықтар өңір дамуының негізгі өзегіне айналып, нақты істермен бекітілді.
Президент тапсырмасына сәйкес облыста экономиканы әртараптандыру, инвестиция тарту, өңдеу өнеркәсібін дамыту, ауыл инфрақұрылымын жаңғырту және адами капиталды күшейту бағытында кешенді жұмыс жүргізілді. Нәтижесінде Түркістан облысы индустриялық даму кезеңіне нық қадам басты. Салық түсімдерінің құрылымында өнеркәсіп пен өңдеу секторлары үлесінің артуы экономиканы әртараптандыру саясатының тиімді іске асқанын көрсетеді. Инвестициялық жобалар нәтижесінде тұрақты жұмыс орындары құрылып, жергілікті бюджет кірістері ұлғайды. Бұл өңірдің дотациялық тәуелділігін кезең-кезеңімен төмендетуге мүмкіндік берді.
Отандық өндірісті кеңейту мақсатында облыстың барлық аудандарында «Шағын өндірістік парк» жобасы жүзеге асырылуда. Түркістан облысының әкімі Нұралхан Көшеров аталған жобалардың іске асу барысын тұрақты бақылауда ұстап, жаңа өндірістерді іске қосу бағытындағы жұмыстарды үйлестіріп келеді. Осы мақсатта бүгін ол ауқымды жұмыстардың барысын пысықтап, іске қосылатын жаңа зауыттардың жұмыстарын бақылады.
Облыс аумағында жалпы көлемі 238 гектарды құрайтын 21 шағын өндірістік алаң құрылды. Жоба аясында 248 өндірістік ғимарат салу жоспарланған, нәтижесінде 5 мыңға жуық жаңа жұмыс орны ашылады. Жалпы инвестиция көлемі 213 млрд теңгені құрайды. Бүгінгі таңда 40 ғимараттың құрылысы аяқталып, 32 жоба іске қосылды. Соның нәтижесінде 2 мыңға жуық адам тұрақты жұмыспен қамтылды, тартылған инвестиция көлемі 136 млрд теңгеге жетті. Өндірістік парктер аумағында жиһаз, жаңбырлатып суару жүйелері, мұздатқыш жабдықтар және құрылыс материалдарын шығаратын кәсіпорындар жұмыс істей бастады. Алдағы кезеңде бейнебақылау камералары, медициналық жиһаз және тұрмыстық химия өнімдерін өндіру жолға қойылып, ішкі нарықты қамту және экспортқа шығару көзделіп отыр.
2025 жылы облыста бірқатар заманауи өндіріс орындары іске қосылып, индустрия өңір экономикасының нақты драйверіне айналды. Бір ғана желтоқсан айында 7 зауыт пайдалануға беріліп, 2 өндіріс орны мен 1 электр станциясының құрылысы басталды. Жалпы алғанда, өңірде индустриялық аймақтар мен «Turan» арнайы экономикалық аймағы аясында ондаған жоба жүзеге асырылуда. Индустриялық аймақтарда 39 млрд теңге инвестиция тартылып, 50 жоба іске қосылды. Ал «Turan» арнайы экономикалық аймағында жалпы құны 223 млрд теңгені құрайтын 20 ірі жоба жүзеге асырылып жатыр.
11 айдың қорытындысы бойынша облыс экономикасына 1,4 трлн теңге инвестиция тартылып, өсім 123 пайызды құрады. Нәтижесінде шамамен 146 мың жаңа жұмыс орны құрылды. Бұл – инвестицияның нақты экономикаға, тұрақты табыс пен салық базасына айналғанын айқын көрсететін басты индикатор.
Ақпарат, Білім, Жаңа жоба, Қоғам, Экология

СОЗАҚ АУДАНЫНДА «ЖАСЫЛ МЕКТЕП» ЭКОЛОГИЯЛЫҚ БАҒДАРЛАМАСЫ ІСКЕ ҚОСЫЛУДА

Оставить комментарий

Түркістан облысында іске қосылып отырған «Жасыл мектеп» экологиялық бағдарламасы – жас ұрпақтың экологиялық мәдениетін қалыптастыруға бағытталған маңызды бастамалардың бірі. Бұл жоба тек табиғатты қорғауға ғана емес, оқушылардың саналы ойлауына, жауапкершілік сезімін арттыруға және тұрақты даму қағидаттарын өмірде қолдануға үйретеді. Ең алдымен, «Жасыл мектеп» бағдарламасының басты пайдасы – экологиялық білімді ерте жастан қалыптастыру. Оқушылар қоршаған ортаны қорғау, тұрмыстық қалдықтарды сұрыптау, суды және электр энергиясын үнемдеу сияқты қарапайым, бірақ маңызды дағдыларды меңгереді. Бұл дағдылар баланың мектеп қабырғасымен шектелмей, отбасында және күнделікті өмірінде де қолданылуына ықпал етеді.

Бағдарлама аясында мектептерде қалдықтарды бөлек жинау мәдениеті енгізіледі. Пластик, қағаз және басқа да қайта өңдеуге жарамды қалдықтарды сұрыптау арқылы оқушылар табиғи ресурстарды үнемдеудің нақты жолын көреді. Бұл өз кезегінде қоршаған ортаның ластануын азайтуға және экологиялық жауапкершілікті арттыруға мүмкіндік береді.

Бұл бағытта Созақ ауданындағы бірқатар білім беру ұйымдарында «Жасыл мектеп» экологиялық бағдарламасы іске қосылуда. Бағдарлама ECO Network жобасы арқылы «Таза Қазақстан» республикалық экологиялық акциясы аясында жүзеге асырылып жатыр. Аталған жобаға ауданның 5 жалпы білім беретін мектебі қатысады. Жобаны іске асыруға «КАТКО» бірлескен кәсіпорны ЖШС демеушілік көрсетіп отыр. «Жасыл мектеп» бағдарламасының негізгі мақсаты – оқушылардың экологиялық білімін арттыру, экологиялық мәдениетті қалыптастыру және қоршаған ортаға жауапты көзқарасты дамыту.

Аталған жоба аясында Асқар Сүлейменов, І. Кеңесбаев және Сүгір Әліұлы атындағы жалпы білім беретін мектептерде экология, қалдықтарды бөлек жинау, табиғи ресурстарды тиімді пайдалану және тұрақты даму қағидаттары бойынша ақпараттық-таныстыру шаралары өткізілді. Ал, 14 қаңтар күні бағдарлама Абай және Ж. Қалымбаев атындағы жалпы білім беретін мектептерде жалғасын табады. Жоба аясында әр мектепте ECO Network компаниясының эко-тренерлерінің сүйемелдеуімен барлық модульдерді іске асыратын «Эко-рейнджерлер» клубтары құрылады.

Бағдарламаның бірінші жылының қорытындысы бойынша мектептерде, сондай-ақ оқушылардың бастамасымен олардың отбасыларында қалдықтарды бөлек жинаудың тұрақты тәжірибесін қалыптастыру көзделіп отыр. Оқушылар жинаған сұрыпталған қалдықтардан түрлі бұйымдар дайындалып, қатысушыларға сыйлық ретінде табысталатын болады. Атап айтқанда, брелоктар мен телефонға арналған тұғырлар және шахмат тахтасы сынды заттар жасалады.

Сонымен қатар, «Жасыл мектеп» жобасы оқушылардың шығармашылық және практикалық қабілеттерін дамытуға жол ашады. Қайта өңделетін материалдардан экобұйымдар жасау арқылы балалар еңбекке баулынып, экологияның тек теория емес, нақты іс екенін түсінеді. Мұндай жұмыстар ұжымдық әрекетке, бір-біріне қолдау көрсетуге тәрбиелейді.

Бағдарламаның тағы бір маңызды пайдасы – мектеп пен қоғам арасындағы байланысты нығайтуы. Ата-аналар, мұғалімдер және оқушылар бірлесіп экологиялық іс-шараларға қатысады. Бұл ортақ жауапкершілікті күшейтіп, қоғамда экологиялық сана қалыптастыруға ықпал етеді.

Жалпы, «Жасыл мектеп» экологиялық бағдарламасы Түркістан облысы үшін үлкен маңызға ие. Ол жас ұрпақты табиғатты аялауға тәрбиелеп қана қоймай, болашақта экологиялық тұрғыдан жауапты, саналы азаматтарды қалыптастыруға негіз қалайды. Мұндай бастамалар өңірдің экологиялық жағдайын жақсартуға және еліміздің тұрақты дамуына өз үлесін қосатыны сөзсіз.

"AMANAT", Ақпарат

БАСПАНА – ӘЛЕУМЕТТІК ТҰРАҚТЫЛЫҚТЫҢ ТІРЕГІ

Оставить комментарий

«AMANAT» партиясы үшін тұрғын үй саясаты – әлеуметтік жауапкершіліктің өзегі болып табылады. Партиямыз азаматтардың тұрғын үй мәселесін әлеуметтік әділеттілік пен халықтың нақты сұранысына негіздей отырып қарастырады. Партияның Сайлауалды бағдарламасында халықты тұрғын үймен қамтамасыз ету, тозығы жеткен көпқабатты тұрғын үйлерді жаңғырту, әлеуметтік тұрғыда осал топтарға жататын азаматтардың баспаналы болуына жағдай жасау, жас отбасыларды қолдау міндеттемелері белгіленіп, олар ретімен жүйелі шешімдерін тауып келеді.

Партиямыз басымдық ретінде белгілеген тұрғын үй құрылысына қатысты мәселелер Қазақстан Республикасы Парламенті Мәжілісінің депутаты, «AMANAT» фракциясының мүшесі Қайрат Балабиевтің Шардара ауданына жасаған жұмыс сапары аясында қарастырылды. Азаматтардың өмір сүру жағдайын жақсартуды көздейтін тұрғын үй саясатының нақты орындалуын үйлестірген кездесуге партияның Түркістан облыстық филиалының төрағасы, облыстық мәслихаттағы фракция жетекшісі Алтынсары Үмбетәлиев, облыстық мәслихат депутаты Бақытжан Серманизов қатысты.

Мәжіліс депутаты мен партия өкілдері осы жұмыс сапары аясында Шардара қаласының 4-ші шағын ауданы аумағында салынып жатқан бес қабатты 60 пәтерлі тұрғын үйдің құрылыс алаңына барып, атқарылған жұмыстармен танысты. Құрылыс жұмыстары аяқталу сатысына жақындаған нысанда жылыту жүйелерін орналастыру, ауланы тегістеп, алаңшалар мен аяқжолдардың орнын белгілеу, абаттандыруға дайындау шаралары қарқын алған.

Тұрғын үйдің дайындық деңгейі жөнінде Шардара ауданының әкімі Арман Қарсыбаев мағлұмат берді. Аудан басшысы берген ақпаратқа сәйкес, бүгінгі таңда Шардара ауданы бойынша тұрғын үй кезегінде тұрған азаматтар саны 1747 адамды құрайды. Оның ішінде 1451 азамат – әлеуметтік тұрғыда осал топтарға және көпбалалы отбасыларға жатады. Аудан әкімі осы санаттағы азаматтарды баспанамен қамтуда 2023-2025 жылдар аралығында барлығы 236 пәтер сатып алынып, олар азаматтарға кезек ретімен берілгенін айтты. 2026 жылы осы мақсатта 60 пәтер сатып алынатын болады. Тұрғын үй биылғы мамыр айында пайдалануға беріледі.

Құрылыс алаңында сала жетекшілерімен және мердігер ұйым өкілдерімен кездесу барысында Қайрат Рахымұлы Мемлекет басшысының тапсырмасына сәйкес Парламент Мәжілісі тұрғын үй саласын заңнамалық тұрғыда жетілдіруге басымдық беріп отырғанын айтты. Оның ішінде ипотекалық бағдарламалардың қолжетімділігін арттыруға, жалдамалы тұрғын үй қорын кеңейтуге, апатты және тозған үйлерді жаңғырту мәселелеріне айрықша көңіл бөлінгенін жеткізді.

«- Мемлекет басшысы Қасым-Жомарт Кемелұлы Тоқаев тұрғын үйдің қолжетімділігі мен сапасын арттыруды әлеуметтік саясаттың басты басымдығы ретінде айқындап отыр. Осы тапсырмаға сәйкес, Парламент Мәжілісіндегі «AMANAT» партиясының фракциясы тұрғын үй құрылысын күшейтіп, халықтың нақты қажеттілігіне сай шешімдердің қабылдануына ықпал ететін заң шығару ісін жалғастыра береді», – деді Қайрат Рахымұлы.

«AMANAT» партиясының Түркістан облыстық филиалы Сайлауалды бағдарламада көзделген тұрғын үй құрылысы міндеттерінің уақтылы және сапалы жүзеге асырылуын қамтамасыз ету бағытындағы үйлестіру жұмыстарын алдағы уақытта да жүйелі түрде жүргізе береді.

Ақпарат, Ауыл шаруашылығы, Экология

ТҮРКІСТАН ОБЛЫСЫНДА 10 ГЕКТАР АУМАҚҚА ЗАМАНАУИ ТҰҚЫМБАҚ САЛЫНЫП ЖАТЫР

Оставить комментарий
Түркістан облысында тұқымбақтардың көлемін ұлғайту, климаттық жағдайды жақсарту бағытында жұмыстар атқарылып жатыр. Осы бағытта Сауран ауданы Шаға ауылдық округінде орналасқан жаңа әуежай тасжолының бойында жалпы аумағы 10 гектарды құрайтын заманауи тұқымбақ салынуда. Жасыл белдеуде тұқымбақты құру жобасына тапсырыс беруші облыстық табиғи ресурстар және табиғат пайдалануды реттеу басқармасының «Жасыл аймақ» КММ, мердігер мекеме «Нинес» ЖШС.
Құрылыс барысымен танысу мақсатында облыс әкімі Нұралхан Көшеров тұқымбақты арнайы аралап, атқарылып жатқан жұмыстардың барысын бақылады. Облыс аумағын көгалдандыру мен абаттандыру жұмыстарын тиімді іске асыру бойынша нақты тапсырмалар берді. Сондай-ақ құрылыс жұмыстарын сапалы әрі уақытында аяқтауды тапсырды.
Заманауи орман тұқымбағының мақсаты – қала, аудан орталықтары мен елді мекендерді, сондай-ақ Түркістан қаласының айналасында құрылған жасыл белдеуді әртүрлі қылқан жапырақты, сәндік ағаш бұта көшеттерімен қамтамасыз ету.
Заманауи тұқымбақ жобасы 6 жылыжай, бассейн, көлеңкелеу және тамшылатып суғару жүйесі, жылыту қазандығы, орманшылар үйі, ұңғыма, бастырма, жертөледен тұрады. Қазіргі таңда газ, су, электрмен жабдықтау жұмыстары жүргізілген. Жобаның қуаттылығы 1 575 000 түп көшет өндіруге қауқарлы. Нысанның іске қосылу нәтижесінде 20-дан астам жаңа жұмыс орны құрылып, жергілікті тұрғындар тұрақты жұмыспен қамтылады. Сонымен қатар алдағы уақытта да облыстағы тұқымбақтардың аумағын кеңейту жоспарлануда. Аталған жұмыстар облыс әкімінің тікелей бақылауында.
Айта кетсек, 2026-2028 жылдар аралығында осы заманауи орман тұқымбағынан 1040,0 млн түп әртүрлі сәндік жапырақты және бұта тектес ағаш көшетін өсіру көзделіп отыр.
Ақпарат, Ауыл шаруашылығы

ТҮРКІСТАН ОБЛЫСЫНДА ЖАНУАРЛАРҒА ЧИП САЛУ АРҚЫЛЫ ВЕТЕРИНАРИЯ САЛАСЫ ЦИФРЛАНДЫРЫЛУДА

Оставить комментарий
Түркістан облысының әкімі Нұралхан Көшеров Сауран ауданына жасаған жұмыс сапары аясында Шаға ауылдық округінде жүзеге асып жатқан «Ветеринария саласын цифрландыру» пилоттық жобасымен танысты. Аталған жоба жануарларды чиптендіру арқылы ауыл шаруашылығы жануарларын есепке алу және олардың қауіпсіздігін қамтамасыз ету мақсатында қолға алынған. Жоба құны – 4 млн теңге. Қуаттылығы – 5 мың дана лента. Қазіргі таңда 5 мың дана шағылысатын лента сатып алынып, аудан және қала деңгейіндегі жол бойында орналасқан шаруашылықтарға таратылуда. Бұл жұмыстар нәтижесінде жол-көлік оқиғаларын азайтып, жол бойындағы жануарлардың нақты есебінің жүргізіп және мал иелерінің жауапкершілігінің арттыру көзделген.
Чиптеу жүйесін енгізу нәтижесінде облыс көлеміндегі мал басының нақты есебі қалыптасады. Бұл өз кезегінде ветеринариялық іс-шараларды жоспарлауда, аурулардың алдын алу мен бақылауда, сондай-ақ мемлекеттік бағдарламаларды тиімді іске асыруда маңызды рөл атқарады. Сонымен қатар әрбір жануардың өмірлік тарихы – вакцинациясы, ем-шаралары, қозғалысы цифрлық форматта сақталып, бақылауға алынады. Осылайша, жануарларды чиптеу ветеринариялық қауіпсіздікті нығайтып, саланы цифрлық жүйеге көшіруге және мал шаруашылығын тиімді басқаруға кең мүмкіндік береді.
Жалпы чиптеу – цифрландыруға оң әсерін береді және өмірлік тарихы бақыланады. Үй жануарына 1 рет салынады. Жалған мал басын субсидиялауға жол берілмейді. Несиеге алынған жануарлардың көрсету фактілері жойылады. Жануарларға егілген вакциналық іс-шараларды сканер арқылы оқып дерекқорға жылдам енгізуге мүмкіндік береді.
Сонымен қатар 109 бірыңғай байланыс орталығы ветеринария саласында іске қосылып, ауыл тұрғындары ветеринар мамандардың қызметіне жүгіну, бағалау және кері байланыс беру мүмкіндігіне ие болды. Қазіргі күнге дейін 441 өтінім түскен. Жоба аясында ақылы қызметтерге автоматты төлем жасау үшін QR код орнатылған. 109 бірыңғай байланыс орталығын дамыту және ЖИ жүйесін енгізу бағытында мердігер компаниямен келісімшарт жасалды.
Сапар барысында облыс әкімі Нұралхан Көшеров жануарларды есепке алу, вакцинациялау мен ветеринариялық қызмет сапасын арттыру ауыл шаруашылығы саласындағы өзекті міндеттердің бірі екеніне тоқталып, салада цифрландыруды одан әрі жандандыру қажет екенін атап өтті. Сондай-ақ пилоттық жобаны зерделеп, осы бағыттағы жұмыстарды күшейтуді тапсырды.
Айта кетсек, соңғы жылдары ветеринария саласына ерекше көңіл бөлініп, материалдық-техникалық базасы кезең-кезеңімен нығайтылуда. Бұл бағытта жүйелі жұмыстар жүргізіліп, салаға нақты қолдау көрсетілуде. Мәселен, 2025 жылы жергілікті бюджеттен 1,7 млрд теңгеге 85 дезинфекциялық автокөлік сатып алынса, қосымша бюджеттен 34,4 млн теңгеге төл алу мен өнімділік көрсеткішін арттыру мақсатында 17 УДЗ сканер аппараты жеткізілді.
Ақпарат

ЖЕТІСАЙДА ШЕТЕЛДІК ИНВЕСТОРЛАР АГРОӨНДІРІСТІК КЕШЕНДІ ДАМЫТУ ЖОБАСЫН СӘТТІ ЖҮЗЕГЕ АСЫРУДА

Оставить комментарий
Түркістан облысында ірі жобаларды қолға алып, кәсіпорындар ашуға ниетті инвесторлардың қатары артуда. Осы мақсатта Түркістан облысының әкімі Нұралхан Көшеров шетелдік ірі компания өкілдерімен кездесіп, өңірде жүзеге асырылып жатқан және болашақта жоспарланған инвестициялық жобаларды талқылады.
Нұралхан Оралбайұлы өңірдің инвестициялық тартымдылығы жоғары екенін атап өтіп, Түркістан облысы шетелдік капитал үшін сенімді әріптес бола алатынын жеткізді.
– Екіжақты тиімді жобаларды әрқашан қолдауға дайынбыз. Шетел азаматтарына жер берілмейді. Дегенмен, мемлекетпен немесе жергілікті шаруалармен бірлескен жобаларды жүзеге асыруға мүмкіндік бар. Мәселелер болса, шешуге дайынбыз. Бастысы – жұмыс жүріп, нәтиже болуы керек, – деді облыс басшысы.
Түркістан облысында Қытай елінің үздік тәжірибесі негізінде су үнемдеу жабдықтарын өндіру қолға алынды. Осы мақсатта Жетісай ауданы Асықата кентіндегі индустриалдық аймақта «Altyn kun group» ЖШС бастамасымен агроөндірістік кешенді дамыту жобасы іске асырылуда. Компания Асықата кентіндегі индустриалды аймақта 8 гектар аумаққа 4 зауытты іске қоспақ. Бүгінде шетелдік инвестиция есебінен жобаның бірінші кезеңі бойынша 4 гектар жерге қуаттылығы 3000 тонна болатын ПВХ құбырын өндіру зауыты іске қосылды. Сондай-ақ жылына 3 млн/метр тамшылатып суару лентасын шығаратын зауыттың құрылысы аяқталуға жақын. Қалған 4 гектар жерге қуаттылығы 5000 тонна агрономикалық пленка өндірісі мен 5000 тонна гранула өндірісі іске қосылады. Инвесторлар жобаны іске асыру үшін 10,0 млн АҚШ долларын салмақ. Биыл жобаны толық іске асырып, 100 жаңа жұмыс орны ашу көзделген.
«Altyn kun group» ЖШС құрылтайшысы Лю Кесонг 3 ай көлемінде жобаның алғашқы өндірістік желісін іске қосқанын айтып, облыстық және аудандық әкімдікке қолдау білдіргені үшін алғысын жеткізді. Сонымен қатар смарт технология арқылы егін егуге ниетін білдіріп, қолдау сұрады. Қытайлық серіктестері қызығушылық танытып, Түркістан өңірінің инвестициялық мүмкіндіктерімен танысуға арнайы келгенін айтып, таныстырды. Құрылыс, сауда және агросала өкілдері жобаларын ұсынды.
Айта кетейік, 2025 жылдың 11 айының қорытындысымен Түркістан облысы экономикасына 1,4 трлн теңге инвестиция тартылып, өсім 123 пайызды құрады. Нәтижесінде 146 мыңға жуық жаңа жұмыс орны құрылды. Ал, Жетісай ауданына 2025 жылдың 11 айында 42,4 млрд. теңге инвестиция тартылып, нақты көлем индексі 110,6 пайызға жетті. Оның ішінде, жеке кәсіпорындардың инвестиция көлемі 26,3 млрд. теңгеге жетіп, НКИ 113,9 пайызды құрады.
Ақпарат, Жұмыс, Кәсіпкерлік, Қоғам

ТҮРКІСТАН ОБЛЫСЫНДА МАҢЫЗДЫ ЖОБАЛАРДЫ ЖҮЗЕГЕ АСЫРУ БОЙЫНША ИНВЕСТОРЛАРМЕН КЕЛІССӨЗДЕР ЖҮРГІЗІЛДІ

Оставить комментарий
Түркістан облысының әкімі Нұралхан Көшеров Қытай Халық Республикасынан келген инвесторлармен кездесті. Кездесуде облыста жаңа инвестициялық жобаларды жүзеге асыру, әріптестікті нығайту жолдары талқыланды. Облыс әкімі өңірді дамытудың негізгі бағыттарына тоқталып, бірлесе жұмыс істеуге шақырды.
– Түркістан облысының әлеуеті өте жоғары. Ауыл шаруашылығында терең өңдеу саласын дамыту, индустриалды аймақтарда өндірісті өркендетуге мүмкіндіктер мол. Жаңа зауыттар мен кәсіпорындар ашу арқылы жұмыс орындарын көбейтуге мүдделіміз, – деді Нұралхан Көшеров.
«Qingdao Wanlin» компаниясының басшысы Яньтао Ли инвесторларға қолайлы мүмкіндік жасаған облыс әкімдігіне ризашылығын білдіріп, жаңа жобаларымен таныстырды. Сонымен бірге арнайы келген инвесторлармен таныстырып, олар да Түркістан облысында өндірісті дамыту бағытындағы жобаларға атсалысатындарын жеткізді. Атап айтқанда, ауыл шаруашылығы өнімдерін терең өңдейтін кәсіпорындар салу, үй жануарларына арналған жем шығару кәсіпорнын ашу, өндіріс орындарын ашу, туризм бойынша Орталық Азиядағы ең үлкен аквапарктердің бірін салу және өзге де жобаларды ұсынды. Бұл бастамалар толық зерделеніп, тиімділігіне қарай жүзеге асырылады.
Айта кетейік, Түркістан облысында инвестиция тарту жұмыстары қарқынды жүріп жатыр. 11 ай нәтижесімен негізгі капиталға 1,4 трлн теңге инвестиция бағытталып, өсім 123%-ды құрады Жылдық жоспар мерзімінен бұрын орындалды. Былтыр 11 айда 44 жоба іске қосылып, 6 637 жұмыс орны ашылды.
Ақпарат, Қоғам, Қылмыс

ІІМ: Өткен жылы іздеуде жүрген 1600-ге жуық қылмыскер ұсталды

Оставить комментарий

2025 жылы халықаралық ынтымақтастық белсенді түрде дамыды. Қазақстан аумағынан тыс жерлерде соттан бой тасалап жүрген 156 қылмыскер ұсталды. Сонымен қатар ел аумағында ТМД елдері мен алыс шет мемлекеттердің сұрауы бойынша іздеуде болған 639 адам қолға түсті.

Бұл мемлекетаралық өзара іс-қимыл мен жедел ақпарат алмасудың тиімділігін айқын көрсетеді. Ішкі істер министрлігі заң мен тәртіпті қамтамасыз ету бағытындағы жүйелі жұмысты жалғастыруда.

Қылмыскерлерді іздестіру және ұстау — ведомство қызметінің негізгі басымдықтарының бірі. 2025 жылы түрлі қылмыс жасағаны үшін іздеуде жүрген 1 600-ден астам адам ұсталды.

Сондай-ақ хабар-ошарсыз кеткен адамдарды іздестіру саласында да елеулі нәтижелерге қол жеткізілді. 2025 жылы жоғалған деп есептелген 20 мыңнан астам адамның жүрген жері анықталды, олардың 6 мыңнан астамы — балалар.

Ақпарат, Ауыл шаруашылығы, Жаңа жоба, Жұмыс, Кәсіпкерлік, Қоғам, Құрылыс

ТҮРКІСТАН: ӨНДІРІСТІК ПАРКТЕ 30-ДАН АСТАМ ЗАУЫТ ЖҰМЫС ІСТЕП ТҰР

Оставить комментарий

Түркістан облысында инвестициялық жобаларды арттыру мақсатында Өндірістік парктің құрылысы жүргізіліп жатыр. Жалпы аумағы 100 гектарды қамтитын парк аумағында 152 ғимарат салу жоспарланған. Жалпы тартылатын инвестиция көлемі – 308 млрд теңге. Өндірістік парк толығымен іске қосылған соң 6 040 жаңа жұмыс орны құрылады. Аталған нысанның тыныс-тіршілігімен танысу мақсатында БАҚ өкілдеріне арнайы баспасөз туры ұйымдастырылды.

Жалпы Өндірістік парк құрылысы 2 кезеңмен жүзеге асырылуда. Бірінші кезеңде 3 қатардан тұратын 40 ғимарат салынған. Бүгінде оның 32-сі іске қосылған. Тартылған инвестиция көлемі – 30,7 млрд. теңге, ашылған жұмыс орын саны – 700. Бүгінде жұмыс істеп тұрған өндіріс орындарының қатарында жаңбырлатып және тамшылатып суару жүйелерін шығаратын, ауыл шаруашылығына қажетті тракторларды және сэндвич панелдерді өндіретін «BNK Group» ЖШС, сондай-ақ мектепке арналған және медициналық, кеңселік жиһаздарды өндіретін «Ақниет Holding» ЖШС, өнеркәсіптік тоңазытқыштарды өндіретін украиндық «JASYL SUYQ QAZAQSTAN» ЖШС, тамшылатып суару жүйелерін шығаратын «Тұран су» ЖШС, медициналық жабдықтар өндіретін «Отар құрылыс» ЖШС, кеңсе және медициналық жиһаздарын, газ қазандықтарын өндіретін «Ақниет Holding» ЖШС, бейнекамералар өндіретін «BIR BELDEU BIR ZHOL TECHNOLOGY» ЖШС сынды кәсіпорындар бар. Сондай-ақ, пластикалық пакеттер мен қоқыс қаптарын өндіретін «Tur-Sapa» ЖШС, дрон құрылғысын дайындайтын «Avatar Agricultural» ЖШС, кептірілген жемістер өндіретін «Талифа» ЖШС, дәмдеуіштер шығаратын «Onelee Food Technology Co» ЖШС жұмыс істеп тұр. Ал екінші кезеңде 2025-2026 жылдары 70 гектар аумақта 112 ғимарат соғу жоспарлануда.

БАҚ өкілдері баспасөз туры барысынды бірнеше өндіріс орындарының жұмысымен танысты. Соның бірі – өнеркәсіптік тоңазытқыштарды өндіретін украиндық «JASYL SUYQ QAZAQSTAN» ЖШС. Жобаның жалпы құны – 20 млн евро. Жоба 2 кезең бойынша жүзеге асады. Қазіргі таңда бірінші жобасы аяқталып, 350 жұмысшы айына 4 мың тоңазытқыш құрастырып отыр. Екінші кезеңде 1 мың жұмыс орны құрылып, айына 10 мың тоңазытқыш дайындалмақ.

№KZ89VPY00063999 Куәлік нөмірі

Lost your password? Please enter your email address. You will receive mail with link to set new password.

Exit mobile version