Архив рубрики: Кәсіпкерлік

Ақпарат, Кәсіпкерлік, Қоғам

Кәсіпкер жергілікті тұрғындарды тұрақты жұмыспен қамтып отыр

Оставить комментарий
Сауран ауданына қарасты Оранғай ауылдық округінде жергілікті 25-30 адамды тұрақты жұмыспен қамтитын жаңа цех өз жұмысын бастады. «Әл-Береке» ауыл шаруашылығы өндірістік кооперативінің құрғақ құрылыс қоспаларын өндіретін цехтың ашылу салтанатына аудан әкімі Мақсат Таңғатаров, аудандық мәслихат депутаты Абдурашид Жусипов, Оранғай ауылдық округінің әкімі Берік Қуандық және ауыл ақсақалдары қатысты. Сонымен қатар, осындай игі іске қатысқан ел ағалары жаңа кәсіпорынның жұмысына сәттілік тілеп, шаруа иесінің мол табысқа кенелуіне ниеттес болды. Мұндай нысандардың ауылдық жерде ашылуы сол мекеннің азаматтарын еңбекке тартуға және ауыл әлеуеттін арттыруға мол септігін тигізеді.
 
Айта кетейік, «Әл-Береке» ауыл шаруашылығы өндірістік кооперативі бұған дейін де өз кәсібін дөңгелетіп, жемісті жұмыс атқарып келеді екен. Аталмыш нысанның төрағасы Аброр Рысқұловтың айтуынша, цехқа қажетті құрал жабдықтарды Қытай Халық Республикасынан алып келген. Бүгінгі таңда цехта 30-ға жуық адам тұрақты жұмыс істеп жатқан болса, алдағы уақытта өнім көлемін еселеп, өндіріс орнының өрісін өркендету жоспарға қойылған. Ал, жалпы цехтың көлемі 1 гектарды құрайды екен.
Қазіргі таңда онда 12 түрлі құрғақ құрылыс қоспалары дайындалып, нарыққа шығарылуда. Күніне 30 тонна құрғақ құрылыс қоспаларын өндіріп жатыр. Ондағы артықшылық нарық бағасынан әлдеқайда төмен, сапасы жоғары. Осылайша отандық тауарлар ішкі нарықта сұранысқа ие болып, өзінің өнім көлемін айтарлықтай арттырып отырған кәсіп иесінің мақсаты алдағы уақытта өнімнің көлемін 2 есеге ұлғайту және өндіріс орнын одан әрі дамыту. Айта кетейік, қазіргі таңда Түркістан облысының орталығы Түркістан қаласында және Кентау мен Сауран ауданында да құрылыс жұмыстары қарқында жүргізілуде. Жаңа ғимараттар бой көтеріп, құрылысқа қажетті өнімдерге де сұраныс арта түсуде. Ал, Оранғай ауылдық округіндегі «Әл-Береке» ауыл шаруашылығы өндірістік кооперативінің бастамасы дәл осы нарықтағы сұранысқа қажетті құрғақ құрылыс қоспалары дайындаумен айналысып, отандық өнімді шығару арқылы тиімді баға мен жоғарғы сапаны қамтамасыз етіп отыр.
Ақпарат, Ауыл шаруашылығы, Жұмыс, Кәсіпкерлік

Сауран: Кәсіпкер құс өсіріп, кәсібін өркендетуде

Оставить комментарий

Сауран ауданының әкімі Мақсат Таңғатаров ауылшаруашылығы өнімдерін өңдеуге бағытталып, жобаларды жүзеге асыру мақсатында құрылған «Сүлеймен ата» шаруа қожалығының жұмысымен танысты. Аталған өндіріс орны – азық-түлік қауіпсіздігін қамтамасыз ету және өңір тұрғындарын құс етімен қамтуды көздейді. Құс фабрикасында «Бройлер» тауығының балапандары өсірілуде. Алдағы уақытта жобаны кеңейту арқылы өнімді 120 тоннаға ұлғайту жоспарлануда. Тауарға сұраныс күн сайын артып, Түркістан қаласын толықтай қамтамасыз етіп отыр. Жобаның құны – 400 млн теңге. Сонымен қатар, фабрика жанында арнайы камбикорм бар. Онда күніне 8 тонна жылқы және құс азықтарын өндереді.

Жалпы, құс, соның ішінде тауық атаулыны өсіру қазақ халқы үшін жаңайшыл дүние емес екені анық. Бұл істі өз кәсібіне айналдырып, тауық өсірумен отбасының жағдайын жасап, оған қоса өзге азаматтардың еңбек етуіне септігін тигізіп отырған кәсіпкерлер жетерлік. Мамандардың айтуынша бройлер тауығын өсірген өте пайдалы және табысы мол кәсіп түрі.

Себебі, бройлер – тез өсіп жетіледі екен және еті жұмсақ әрі дәмді болып келеді. Бұл құстың түрі азықтандыру шығындары өсірушіге неғұрлым арзанға түсетіні де дәлелденген. Әдетте бройлер тауығын 6-9 аптаның ішінде, салмағы 1,5-2 килоға жеткен кезде сойып, пайдаланады екен. Бройлер еті диеталық тағам түріне жатады. Оның етінің құрамында 22,5 пайызға дейін белок болады. Бұл белоктардың 92 пайызы адам денсаулығы үшін өте пайдалы амин қышқылдарынан тұрады, дейді мамандар.

«Сүлеймен ата» шаруа қожалығының иесі бройлер тауығын күту үшін ең алды­мен оларды орналастыратын орын-жайларды дұрыс таңдап алу қажеттігін де атап өтті.

–” Ең алдымен қорада тауықтар еркін қозғала алатын кеңістік болуы керек. Өйткені, ауа райының қолайсыз жағдайында, әсіресе, қысқы маусым кездерінде тауықтар бұл қорада тәулік бойы ұсталады. Сонымен бірге тауық қора бройлерді сыртқы қолайсыз ауа райы жағдайынан қорғай алатындай жылы әрі жарық болуы тиіс. Сонымен қатар, мұнда ауаны тазартып отыруға мүмкіндік беретін желдеткіштер болып, тазартуға жеңіл болуын да ойластыру керек. Біздің фабрика бүгінде барлық стандарттарға сай жасақталған. Құстарға жем, су беру толық автоматтандырылған. Біз халыққа сапалы, жоғары сұрыпты құс өнімдерін ұсынып жатырмыз. Фабрикада құстар гармондық қоспаларсыз, өсу стимуляторлары қолданылмай, генетикалық түрлендіргіш заттарсыз өсіріледі. Яғни, бұл маңызды процестердің бірі”,– дейді кәсіп иесі

Балапандар алғашқы кезде тор ішінде өсіріледі екен. Мұндай жағ­дайда балапандар жедел салмақ қосады және қимыл-қозғалыстары шектеулі болғандықтан азықты да аз жейді. Балапандар өсіп жетілген кез­де оларды тауық қораларға жөнелтуге болады. Мұнда балапандар тез өсіп жетілу үшін тем­ператураның тұрақты болғаны жөн. Балапандарды жиі-жиі азықтандырып отырған жағдайда олар 48-70 күннің ішінде 1,5 кило салмаққа дейін жетеді. Кәсіпкер бройлер балапандарын азық­тандыру үшін құрамында қа­жетті витаминдер мен минералды қоспалары бар  арнаулы құрғақ құрамажем пайдаланылатынын және азық­тың бұл түрі тауық қорада тәулік бойы тұрақты түрде болатынын айтады.

Кәсіпкер бұл іске кіріспес бұрын өнімді қай жерге өткізуге болатындығына дейін алдын-ала зерттеулер жүргізіп көрген. Сұраныс та өте жақсы болғандықтан, өз кәсібінің несібесін көріп отыр. Мәселен, құс етін кафе-ресторандарда және жекелей тұтынатын адамдар да аз емес. Көбірек тұтынатын сапалы, дәмді өнім түрін тұрақты түрде жеткізіп бере алатын сенімді серіктестің пайда болуы ең алдымен олардың өз бизнесін тұрақтандыруына қолайлы жағдай туғызады. Әдетте, бұл кәсіппен шұғыл­данған адам тек 30 балапанды сатып алып бағумен шектелмейтіні мәлім. Өйткені, бұл кәсіптен дұрыс пайда көру үшін ең кемінде жүздеген тауық өсіру қажет. Сонда ғана табыста еселеп арта түсетін болады. «Сүлеймен ата» шаруа қожалығы алдағы уақытта фабриканы үлкейтіп, бірнеше кезең бойынша өнім санын  арттыруды көздеп отыр. Қазіргі таңда аталған нысанда 12 жергілікті тұрғын тұрақты жұмыспен қамтылған. Сонымен қатар алдағы кезеңде азаматтарды көптеп еңбекке тарту бойынша да тиісті жұмыстар атқарылмақ.

Ақпарат, Жұмыс, Кәсіпкерлік, Қоғам

Сауран ауданында шағын және орта бизнес қарқынды дамуда

Оставить комментарий
Сауран ауданында шағын және орта бизнес қарқынды дамып келеді. Жеке кәсіпкерлерге мемлекет тарапынан түрлі қолдаулар көрсетіліп, өз кәсібін өркендету үшін тиімді мемлекеттік бағдарламаларда қарастырылған. Яғни,  қоғам үшін еңбектенемін дегенге азаматтарға мол мүмкіндіктер беріліп жатыр. Осындай мемлекеттік және өңірлік бағдарламаларға қатысып, шағын бизнесін шарықтатып отырған  кәсіпкерлерінің саны Сауран ауданында да күн санап көбейіп келеді. Тиісінше, жұмыссыздар саны азайып, жаңадан  шағын және орта кәсіпкерлік нысандар ашылып жатыр. Бұл бағытта аудан әкімі Мақсат Таңғатаров өз кәсібін жасаймын деген әрбір жеке кәсіпкерлерге ұдайы қолдау көрсететіндігін айтып келеді.
Сондай-ақ, өз қаражаты есебінен ісін дамытып жүрген кәсіпкерлер де жетерлік. Солардың бірі – Валид Хайдаров.  Сауран ауданы, Иассы ауылдық округінің тұрғыны бүгінде кәсіпкерлік ныснанын іске қосып отыр. Сапалы орындықтар шығаратын «Хайдаров Валид» цехының ашылу рәсіміне  аудан әкімі Мақсат Таңғатаров, кәсіпкерлік және туризм бөлімінің басшысы Сұлтанғали Шакиров, Иассы ауылдық округінің әкімі Сыздық Пірметов, ауыл ақсақалдары қатысты.
Аталмыш цехтың басшысы Валид Хайдаров өз қаражаты есебінен кәсібін дөңгелетіп отыр. Жоба құны 300 млн. теңгені құрайтын цехтың аумағы 0,85 гектар. Бүгінде өндіріс орнында 12 адам тұрақты жұмыспен қамтылған. Айына 400-ге жуық үстел шығартын цехтың өнімдері еліміздің түкпір-түкпіріне жөнелтіліп, сұраныс артуда. Жеке кәсіпкер алдағы уақытта цех өндірісінің көлемін ұлғайтып, жаңа жұмыс орындарын ашуды жоспарлап отыр.
Ақпарат, Бизнес, Кәсіпкерлік, Қоғам

Салық заңнамасына енгізілетін өзгерістер мен толықтырулар туралы талқыланды

Оставить комментарий

Түркістан облысының кәсіпкерлер палатасы алаңында «Салықтар. Салық Кодексі және жаңа мүмкіндіктер. Цифрландыру» тақырыбында келелі кездесу өтті. Басқосуға «Amanat» партиясы Түркістан облыстық филиалы атқарушы хатшысының орынбасары Полат Тұрсынбаев, Түркістан облысы бойынша мемлекеттік кірістер департаментінің өкілдері мен кәсіпкерлер қатысты.

Жиынға ҚР ҚМ МКК 1-санатты салық кеңесшісі Файзирахман Миянов пен «Салық төлеушілер және бухгалтерлер қауымдастығы» ҮЕҰ мүшесі Сара Жүнісова «Zoom» платформасы арқылы онлайн режимде қатысты. Дөңгелек үстел модераторы, облыстық кәсіпкерлер палатасы директорының орынбасары Зухра Амирова салық мәселесіндегі қандайда бір өзгерістерді кәсіпкерлерге құлақтандырудың маңыздылығына тоқталды.

– Ағымдағы жылдың 19 сәуірінде жаңа салық кодексі туралы қаржы вице-министрі Ержан Біржанов «Айыппұлға емес, көмекке бағытталатын болады» – деп атап өтті. Сондай-ақ, заңнама жобасында айыппұл санкцияларынан мемлекеттік қызметтер көрсетуге және проблемалардың алдын алуға баса назар аударылатынын, оның мақсаты – Қазақстанда салық төлеу ыңғайлы, жеңіл әрі жылдам болуын айтты. Оның ішінде өзекті тақырыптар – ҚҚС төлеушілерді тіркеу, ҚҚС қайтару, тексеру, камералдық бақылау, мәмілелерді жарамсыз деп тану, салық есептілігін тапсыру және бақылау іс-шаралары кезінде айыппұл санкциялары қайта қаралатын айтқан болатын», – деді Зухра Төлебайқызы.

«Бітімгер» медиаторлар қоғамдық бірлестігінің басшысы, кәсіби медиатор
Бақытжан Бейсембаевтың айтуынша, жаңа заңнамаға енгізілетін өзгерістер мен толықтырулар туралы ұсыныстар мақұлданса кәсіпкерлерге тиімділігі жоғары. Жиын соңында жаңа заңнамаға енгізілетін өзгерістер мен толықтырулар туралы ұсыныстар айтылып, сұрақ-жауап кезеңінде тұщымды ойлар айтылды.

Ақпарат, Бизнес, Жаңа жоба, Кәсіпкерлік, Қоғам

ТҮРКІСТАНДЫҚ КӘСІПКЕРЛЕР ҚЫТАЙЛЫҚ ИНВЕСТОРЛАРМЕН БІРЛЕСКЕН ЖОБАЛАРДЫ ҚОЛҒА АЛАДЫ

Оставить комментарий

Түркістан облысының кәсіпкерлері мен қытайлық инвесторлар арасында сауда-экономикалық ынтымақтастықты дамыту мақсатында кездесу ұйымдастырылды. Келелі жиында агроөнеркәсіптік кешені, жеңіл өнеркәсіп, медицина, жер қойнауын пайдалану, құрылыс, IT және т.б. салаларды дамыту жайы сөз болды.
Қытайдың Халықаралық сауданы ынталандыру жөніндегі комитетінің Қазақстандағы ресми өкілі Чэнь Хунцян екі мемлекет арасындағы кәсіпкерлік саласындағы байланыс жылдан-жылға нығайып келе жатқандығын атап өтті. Рухани астанаға инвестиция құюға ниетті шетелдік бизнес өкілдерімен іскерлік байланыс орнатудың маңыздылығына тоқталған кәсіпкерлер палатасының директоры Асылан Ибадуллаев жобаларды сүйемелдеуге көмек көрсетілетіндігін жеткізді.

«Түркістан облысында 200 мыңға жуық кәсіпкерлік субъектісі тіркелген. Өңірде негізінен агроөнеркәсіптік кешені қарқынды дамыған. Ет экспорттау бойынша да аймақ кәсіпкерлері республика бойынша 1-орында. Шағын және орта жалпы ірі кәсіпкерлік саласында айтарлықтай ілгерілеу бар»,- деді Асылан Сейілбекұлы.

Түркістан облысының кәсіпкерлер палатасы қос мемлекеттің кәсіпкерлері үшін B2B кездесу алаңына айналды. Кәсіпкерлер инвесторлармен келіссөздер жүргізіп, бірлескен жобаларды қолға алу мәселесін талқылады.

Ақпарат, Бизнес, Кәсіпкерлік

ТҮРКІСТАНДА «ЖАС КӘСІПКЕРЛЕР КЛУБЫ» ҚҰРЫЛДЫ

Оставить комментарий

Түркістанда жас кәсіпкерлерден құралған «Жас кәсіпкерлер клубы» атты ұйым өз жұмысын бастады. Клубтың алғашқы отырысына облыстық кәсіпкерлер палатасы директорының орынбасары Ербол Әуелбеков, Түркістан қаласы әкімінің орынбасары Мекенхан Қырықбаев және рухани астананың белсенді кәсіпкерлері қатысты.

Клубтың негізгі мақсаты – кәсіпкерлік бастамасы бар жастармен кездесу, жастар арасында кәсіпкерлікті насихаттау және қолдау, мемлекеттік және қоғамдық құрылымдардың өзара әрекетін үйлестіру. Кеңес мүшелеріне бір жағадан бас, бір жеңнен қол шығара отырып, алдағы уақытта көтерілетін мәселелердің оңтайлы шешілуіне және кәсіпкерлік саланы барынша дамытуға атсалысуға келісті.

«Өңірімізде 200 000-нан астам кәсіпкер бар болса, соның ішінде 70 000-ға жуығы 35 жасқа толмаған жас кәсіпкерлер. Яғни, кәсіпкерлердің үштен бір бөлігі жастар. Бұл дегеніміз жас кәсіпкерлердің үлесі көп, тиісінше мәселелері мен ұсыныстары да көп болады деген сөз. Осы және өзге де жағдайларды ескере отырып, «Жас кәсіпкерлер клубын» ашуды жөн көрдік», – деді Ербол Асфандиярұлы.

Жиында шаһар басшысының орынбасары Мекенхан Қозыханұлы Түркі әлемінің туристік астанасы атанған Түркістан қаласының атына лайық болуына кәсіпкерлердің орны мен рөлі айрықша маңызға ие екендігіне тоқталды. Сондай-ақ, жас кәсіпкерлердің еселі еңбегін насихаттау бағытында телеарна мен газет-журналдарға жариялау жұмыстарына да баса көңіл бөлу керектігін атап өтті.

Ақпарат, Бизнес, Кәсіпкерлік

Түркістандық кәсіпкерлер тексеріс көбейгеніне көңілі толмайды

Оставить комментарий

Түркістандық кәсіпкерлер тексеріс көбейгеніне көңілі толмайды

Кәсіпкерлердің құқығын қорғау және сыбайлас жемқорлыққа қарсы іс-қимыл кеңесінің кезекті отырысында мектепке дейінгі жеке меншік білім беру ұйымдарын тексерудің заңдылығы туралы талқыланды. Жиында балабақша құрылтайшылары мен меңгерушілері Түркістан облысы бойынша құзырлы орган өкілдері тарапынан жеке меншік балабақшаларды тексерулер көбейгендігін атап өтті.

3 жылға созылған мораторий аяқталған соң сала мамандары мекемеге тексеру жүргізу құқығына ие болды. Дегенмен бұл кез келген уақытта барып тексеру деген сөз емес, әрекет прокуратурадан арнайы рұқсат берілгеннен кейін барып жүзеге асырылады. Кеңес төрағасы Орынбасар Кабиштаев тексеруші комиссия тарапынан қандай да бір заңсыздық орын алған жағдайда кеңес көмегіне жүгінуге шақырды. Яғни, кәсіпкерлік субъектінің жұмысына кедергі келтіргендерге заң аясында тиісті органға шара қолдану туралы ұсыныс беріледі.

Жалпы Түркістан облысында 1421 балабақша бар. Оның ішінде 263-і мемлекеттік, 1109 жекеменшік балабақша. Мектепке дейінгі ұйымдардағы бала саны – 156 мыңнан астам бүлдіршінді құрайды.

Талапқа сай балабақшаларда бейнебақылау камерасы орнатылып, бейнежазба 30 күн мерзімде сақталуы тиіс. Түркістан облысы полиция департаментінің экстремизмге қарсы іс-қимыл басқармасының бөлім басшысы Қуанышбай Жұмадилдаевтің айтуынша, балабақшаларда хабарлау жүйесі де міндетті түрде болуы шарт. Өз кезегінде кәсіпкерлер тексеру жұмыстарына қарсы еместігін жеткізіп, тек тексеру заң аясында болуын сұрайды.

Жиын соңында Түркістан облысы кәсіпкерлер палатасы директорының орынбасары Зухра Амирова аталған мәселе назардан тыс қалмайтындығын атап өтті. Кәсіпкерлердің құқығын қорғау бойынша атқарылып жатқан жұмыстар алдағы уақытта да өз жалғасын табады.

Нұртас КЕҢЕСБЕКОВ.

Депутат, Жастар саясаты, Кәсіпкерлік, Қоғам, Саясат

ДЕПУТАТ – ТУҒАН ЖЕРІНЕ ДЕМЕУШІ

Оставить комментарий

Түркістан облыстық мәслихаты депутаттарының аудан, қалалардағы халық алдында есеп беру кездесулері жалғасын табуда. Кезекті жиын Арыс қаласында өтті. Түркістан облыстық мәслихат төрағасы Нұралы Әбішов және облыстық мәслихат депутаты Ержан Қосмамбетов  тоғыз жолдың торабында орналасқан қаланың тұрғындарымен кездесті.

Кездесуге қалалық мәслихат депутаттары, ауылдық округ әкімдері, қала әкімдігінің салалық бөлім басшылары, қоғамдық ұйымдар басшылары, қала халқы және бұқаралық ақпарат құралдарының өкілдері қатысты. Кездесуді Арыс қаласының әкімі Г.Құрманбекова жүргізіп отырды. Алғашқы сөз депутат Е.Қосмамбетовке беріліп, ол 2023 жылдың қорытындысы бойынша облыстық мәслихатта атқарылған жұмыстар туралы баяндама жасады. Кейіннен халық қалаулылары арыстықтардың ауыз сумен, электр энергиясымен қамту сынды көкейкесті сұрақтарына жауап берді.

Кездесуді қорытындылаған облыстық мәслихат төрағасы Н.Әбішов Арыс қаласының экономикалық-әлеуметтік дамуына тоқталып, бүгінде облыс әкімі Дархан Амангелдіұлының басшылығымен облысқа инвестиция тарту, кәсіпорындар ашу, бизнес саласын дамыту бағытында қарқынды жұмыстар жүргізіліп жатқандығын айтты.

 

“Мемлекеттің қаражатына жасалған жұмыстарды тізбектеп ауылға газ, жарық, ауыз су, жол жеткіздік деп мақтанудың қажеті жоқ деп есептеймін. Бұл тірліктер онсыз да бюджеттен бөлінетін қаржымен шешімін табады. Депутаттың ең басты әрекеті өз ауылдарына инвестиция тарту, демеушілер табу және кәсіпорындар салып, халыққа пайдасын тигізетін жұмыс орындарын ашумен бағаланады. Егер осындай істерді жүзеге асырған азаматтар болса, міне сол нағыз халық қалаулысы деп ойлаймын. Мұндай жұмыстар тек әкімнің міндеті болмауы керек. Аудандық, қалалық мәслихаттың депутаттары да белсенді болуы қажет деп есептеймін”,- деді Түркістан облысы мәслихатының төрағасы Нұралы Әбішов Арыс қаласының халқымен кездесуде

Расында, Мемлекет басшысы елге, өңірлерге инвестиция тарту, сол арқылы әлеуметтің әлеуетін көтеруді міндеттеп отыр. Түркістан облысының әкімі Дархан Амангелдіұлының басшылығымен бұл бағытта қарқынды жұмыстар жүргізілуде.
“Сондықтан ескі әдістерді, өтірік есеп беретін жиындарды қысқартайық. Керісінше ел болып, теміржолшылар мекені, тоғыз жолдың торабында орналасқан Арыс қаласының мүмкіндіктерін дұрыс пайдаланайық”,- деді мәслихат төрағасы.
Жалпы Арыс қаласына 2023 жылы түрлі сала бойынша 50 нысанға 6 миллиард 588 миллион теңге бөлінген екен. Оның ішінде: республикалық бюджеттен – 920 миллион, ұлттық қордан – 2 миллиард 655 миллион, облыстық бюджеттен – 2 миллиард 997 миллион теңге қаралған. Осылай деп баяндаған облыстық мәслихаттың депутаты Ержан Қосмамбетов депутат өз туған жеріне демеуші бола білуі тиіс екенін атап өтті. Сондықтан, қаланың экономикасын көтеру үшін кәсіпкерлік саласын өркендетуге ерекше көңіл бөлу қажеттігін жеткізді.
Айта кетейік, Ержан Қосмамбетов Арыс қаласының өркендеуіне өз үлесін қосып жүрген азамат. Ол, тұрғындарға қажетті әлеуметтік нысандарды ел игілігіне беріп, тұрғындардың талап-тілегін орындауды да басты назарға алған. Жалпы, тұрғындар осындай есеп беру кездесуін өткізген депутаттарға алғыстарын білдіре отырып, жұмыстарына сәттілік тіледі.

Кездесуден соң, облыстық мәслихат төрағасы Н.Әбішов жеке қабылдау өткізіп, қала тұрғындарының мәселелерін тыңдады.Жеке қабылдауда қала тұрғындары көтерген барлық мәселелерді бақылауға алып, қала әкімдігіне тиісті ұсыныстар енгізді.

Ақпарат, Бизнес, Жастар саясаты, Кәсіпкерлік, Қоғам

ШАРДАРА АУДАНЫНДА 3474 АДАМ ТҰРАҚТЫ ЖҰМЫСҚА ОРНАЛАСҚАН

Оставить комментарий

2021-2025 жылдарға арналған кәсіпкерлікті дамыту жөніндегі ұлттық жоба аясында Шардара ауданында былтыр 3474 адам жұмысқа орналасқан. Аудандық «Мансап орталығы» ұсынған мәлімет бойынша өткен жылы 4408 тұрғын жұмыспен қамту жобаларына қатысыпты.

Нақтырақ айтқанда,  өткен жылы жастар кәсіпкерлігін дамытуға арналған 2,5 пайыздық шағын несиені 33 азаматқа беру жоспарланып, нәтижесінде 21 азамат комиссия отырысына қатысқан және олардың бизнес жобалары мақұлданып, қаржылары аударылды. Жаңа бизнес идеяларды іске асыруға арналған 400 АЕК көлемінде қайтарымсыз мемлекеттік грант 78 азаматқа берілді. Әлеуметтік жұмыс орындарына өткен жылы 29 жұмыс берушінің өтініміне сәйкес 198 азамат жолданды.

Ал, «Жастар практикасына» 2023 жылы 413 жас маман жолданды. Қоғамдық жұмыстарға 729 жұмыссыз азамат жіберілді. «Алғашқы жұмыс орны» бағдарламасына 27 жұмыс берушіге 76 адам қамтылса, «Күміс жас» жобасына 30 тұрғын жолданды. Халықты жұмыспен қамтуға жәрдемдесу бойынша 2028 адам жұмыспен қамтылды. Сонымен қатар жұмыс берушілердің өтініміне сәйкес 15 жұмыссыз тігінші мамандығы бойынша қысқа мерзімді оқуға жолданды. Жылдың қорытындысымен оқуды аяқтаған 15 азаматтың барлығы тұрақты жұмыспен қамтылған.

Жұмыссыздарды enbek.kz платформасында онлайн оқыту бойынша 130 адам оқып, сертификаттарын алды. Кәсіпкерлікті қолдау бойынша 690 адам кәсіпкерлік негіздеріне маманданды.

Айта кетейік, ҚР Президенті Қасым-Жомарт Тоқаевтың ҚР Үкіметінің кеңейтілген отырысында 10 мың тұрғынға 100 тұрақты жұмыс орнын құру бойынша берілген тапсырмасына сәйкес, ауданда биыл 898 жаңа жұмыс орнын құру жоспарланып, 1187 жұмыс орны ашылды.

 

Ақпарат, Бизнес, Кәсіпкерлік, Қоғам

Жеке кәсіпкер түбіртек бермегенін анықтасаңыз телефон нөміріңізге 900 бірлік түседі

Оставить комментарий
Бұл туралы өңірлік коммуникациялар қызметінде өткен брифингте Түркістан облысы бойынша Мемлекеттік кірістер департаментінің басқарма басшысы Мейрамбек Көкенов мәлімдеді.
Спикердің сөзінше, жеке кәсіпкерге тіркеусіз қызмет жасағаны үшін 15-тен 100 АЕК-ке дейін айыппұл түрінде әкімшілік жауапкершілік қарастырылған. Сондай-ақ, кірістерін жасырғаны үшін – төленбеген салық сомасының 200% мөлшерінде, ал қайталанған жағдайда 300% мөлшерде айыппұл салынады. Түбіртек бермегені үшін – 15-тен 50 АЕК-ке дейін айыппұл қарастырылған. Осы ретте жеке тұлғалар түбіртек бермеген немесе төлемді банк карталары мен QR-код арқылы қабылдамаған салық төлеушілеріне «Wipoon» қосымшасы арқылы мемлекеттік кірістер органдарына шағымдана алады. Шағымдар анықталып расталған жағдайда, әр расталған факт бойынша жеке тұлғаның телефон нөміріне 900 бірлік түседі.
-Жеке тұлғалар өздерінің мақсаттары үшін, таныстарына мобильді аударымдарды жасап, қабылдай алады. Мұндай аударымдар бір реттік болғандықтан, оны декларациялаудың қажеті жоқ. Сондай-ақ, жеке тұлғаның жеке банк шотына қатарынан үш ай iшiнде 100 және одан да көп әр түрлi тұлғалардан ақшалай қаражат түсетін болса, бұл кәсіпкерлік санат болып саналады. Бұл шаралар жасырын кірістер мен тіркелмеген кәсіпкерлерді, әсіресе жеке шоттарына мобильді аударымдар арқылы төлем алатындарды анықтауға бағытталған. Кәсіпкерлер төлемдерді арнайы бизнес шоттарына қабылдау керек. Бүгінде бақылау шараларына жеке кәсіпкерлік ретінде тіркеу және кірістер бойынша толық есеп беру бақылауға алынып отыр. Жалпы камералдық бақылау салық төлеушілерге заң бұзушылықтарын өз бетінше жою мүмкіндігін беруге бағытталған. Осыған байланысты анықталған бұзушылықтар бойынша хабарлама жіберіледі. Салық төлеуші өзінің заң бұзушылықтарымен келісетін болса, ол жеке кәсіпкер ретінде тіркелу керек немесе табыстың декларацияланбаған сомасын қосымша декларацияға көрсетіп ұсыну тиіс. Ал егер салық төлеуші өзінің заң бұзушылықтарымен келіспеген жағдайда түсініктеме жазып және оны растайтын құжаттарды беруге құқылы. Хабарлама орындалмаған жағдайда салықтық тексеру тағайындалады. Одан бөлек, банктерден шот бойынша толық ақпарат сұратылады және бұзушылықтардың бар жоқтығы туралы нақты шешім қабылданады,- деді Мейрамбек Байқадамұлы.
Бұдан бөлек, брифингте басқарма басшысы декларацияның үшінші кезеңіне тоқталды. 2024 жылдан бастап 300 мыңға жуық заңды тұлғалардың басшылары, құрылтайшылары, дара кәсіпкерлер және олардың жұбайлары активтер мен міндеттемелер туралы 250.00 үлгідегі декларация тапсырады. Сонымен қатар, 2025 жылы қорытынды кезеңде азаматтардың қалған санаттары, яғни елдің барлық 18 жасқа толған ересек халқы тапсырады. Декларацияны тұрғылықты жері бойынша мемлекеттік кірістер органдарына 2024 жылдың 15 қыркүйегіне дейінгі мерзімде ұсынады.