Қоғам мен мемлекет арасындағы сенімді көпір – бұл азаматтардың дауысы, яғни олардың жолданымдары.
Қарапайым адамның мәселесін тыңдау, оны шынайы шешуге ұмтылу – кез келген мемлекеттік органның басты міндеті. Ал бұл жұмыс қалай жүріп жатыр? Өкінішке орай, кейде жолданымдар формальды түрде қаралып, нақты нәтиже болмай жатады. Ал шын мәнінде, әр жолданым – адам тағдыры, өмірлік маңызды сұрақ.
Мемлекет бұл бағытта нақты қадамдар жасап келеді. 2021 жылы күшіне енген Қазақстан Республикасының Әкімшілік рәсімдік-процестік кодексі (бұдан әрі – ӘРПК) осы мәселені жаңа деңгейге шығарды. ӘРПК тек рәсімдер жиынтығы емес – бұл азаматтардың құқықтарын қорғаудың жаңа құралы.
ӘРПК-ге сәйкес, әрбір мемлекеттік орган жолданымдарды тек уақтылы ғана емес, сонымен қатар сапалы қарауға міндетті. Бұл берілген фактілерді объективті талдауды, жағдайларды жан-жақты тексеруді және негізделген жауап беруді көздейді. Сонымен қатар, ӘРПК рәсімдік әділеттілік қағидаттарын енгізеді: азаматтың әкімшілік рәсімге қатысу құқығы, дәлелдемелер ұсыну және қабылданған шешімдерге шағымдану құқығы қамтамасыз етіледі.
Жолданымдарды сапалы қарау – бұл сондай-ақ мемлекеттік қызметкерлердің біліктілігі мен адалдығын талап ететін үрдіс.
Рәсімдердің бұзылуы немесе жолданымдарды елемеу әкімшілік әділет қағидаттарын бұзып қана қоймай, жауапты тұлғалардың тәртіптік немесе әкімшілік жауапкершілігіне әкеп соғуы мүмкін.
Айта кету керек, ӘРПК қабылданғаннан бері әкімшілік рәсімдердің азаматтың құқықтары мен мүдделеріне бағытталуы күшейді.
Осы орайда, Қазақстан Республикасы Бас прокуратурасының Құқықтық статистика және арнайы есепке алу жөніндегі комитетінің деректеріне сәйкес, Түркістан облысының мемлекеттік органдарында 2026 жылдың 2 айында «е-Өтініш» ақпараттық жүйесінде 42 мыңнан астам жолданым тіркелген (арыз – 33 347, шағым – 1 859, хабар – 1 729, сұрау салу – 3 686, үн қосу – 43, ұсыныс – 1 414), оның 27 мың жолданымы қаралса, 9 мың құзыреті бойынша уәкілетті органдарға жолданған.
Ал 2025 жылдың көрсетілген мерзімінде 30 мың жолданым тіркелген, яғни қазіргі таңда жолданым саны алдыңғы жылмен салыстырғанда 39,8%-ға көбейген.
Демек, халық арасында «е-Өтініш» АЖ-да өтініштердің қаралу сапасына деген сенімділік артып, қолдану жағдайы күннен күнге артып жатқандығын білдіреді.
Бұл құқықтық мәдениеттің артуына және мемлекет пен қоғам арасындағы тиімді өзара байланыс механизмін қалыптастыруға ықпал етеді. Әр өтініштің артында шынайы тағдыр, үміт, сенім бар. Сол сенімді ақтау – билік үшін тек міндет емес, абырой ісі.
Қазақстан Республикасы
Бас прокуратурасы
Құқықтық статистика және арнайы есепке алу жөніндегі комитетінің
Түркістан облысы бойынша
департаменті
Қасиетті Рамазан айында ізгі амал жасау түркістандық жастар арасында дәстүрге айналған. Жылдағы үрдіс бойынша Түркістан қаласындағы «Бекзат» мөлтек ауданының 1995 жылы туған ер азаматтары көпбалалы отбасыға баспана кілтін табыстады.
Жалғызбасты ана Айсұлу Көшербаева тағдыр тауқыметімен мүмкіндігі шектеулі әкесіне қамқорлық жасай жүріп, 4 перзентімен бірнеше жылдан бері пәтер жалдап күнелтіп келген. Қасиетті Рамазан айында қайырымды істің шарапатын көрген жанұя жақсылыққа жаны құмар жандарға алғысын білдірді.
5 бөлмелі баспананың лентасын қиып, кілтін табыстау ауыл ақсақалы Дәулеткерей Оспановқа, Олимпиада чемпионы Бекзат Саттархановтың анасы Сырлыкүл Адырбекқызына және мемлекет және қоғам қайраткері Өзбекәлі Жәнібековтің қарындасы Айғаным Серімге бұйырды.
Қалалық мәслихат депутаттары Жандос Арыстанов, Жанбота Тағайбаев, ел ағалары Базарбай Мұсабеков пен Нұрғали Шерімбетов құттықтауын жеткізіп, ізгі тілектерін арнады.
Айта кетейік, 1988 жылы туған азаматтардың бастамасымен Әз-Наурыз мерекесі қарсаңында бір отбасын баспанамен қамту шарасын 1995 жылы туған жігіттер жалғастырды. Игі дәстүрдің арқасында осы уақытқа дейін 20 отбасы баспаналы болып отыр.
Келесі кезекте 29 наурыз күні «Ынтымақ» саябағында Наурыз думан тойы ұйымдастырылып, қайырымдылық эстафетасы 1996 жылы туған азаматтарға ұсынылады.
Жалпы, аталған мөлтек ауданда жыл сайын аз қамтылған 2 отбасыға үй табысталады. 1982 жылы туған азаматтардың 20 жылдық түлектер кездесуінде сыныптастары үшін салынған үйді табыстау рәсімін жалғастыруға биыл 1988 жылғы азаматтар жұмылады.
Жаңа Конституция бойынша дауыс беру қорытындысы Мемлекет басшысы Қасым-Жомарт Кемелұлы Тоқаев қолға алған реформаларға деген қоғамның жан-жақты қолдауын растағанын көрсетті. Бұл туралы «AMANAT» партиясы Түркістан облыстық филиалы жанындағы Экономика, кәсіпкерлік және аграрлық сектор мәселелері жөніндегі кеңестің отырысында айтылды. Халқымыз жасаған тарихи таңдаудың мән-мазмұны жан-жақты айтылған жиынға «AMANAT» партиясы Түркістан облыстық филиалының төрағасы, облыстық мәслихаттағы фракция жетекшісі Алтынсары Үмбетәлиев, облыстық партия филиалы атқарушы хатшысының орынбасары, облыстық мәслихат депутаты Қалыйма Жантөреева, кеңес төрағасы, Түркістан облыстық мәслихатының депутаты Ғани Раймбеков, кеңес мүшелері, облыстық өнеркәсіп және индустриалды-инновациялық даму, ауыл шаруашылығы басқармаларының жауапты өкілдері қатысты.
Жұмыс отырысының ашылуында сөз алған облыстық партия филиалының төрағасы Алтынсары Үмбетәлиев, жаңа Конституция заман талабына сай келетініне, сондай-ақ мемлекеттің орнықты және жан-жақты дамуын қамтамасыз ететініне назар аударды. Жалпыхалықтық референдумға қатысқан азаматтар терең ауызбіршілік пен нағыз отаншылдықтың үлгісін көрсеткенін атап өтті. Ауқымы мен мән-маңызы тұрғысынан ел тағдырына қатысты шешуші сәтте қазақстандықтар жаңару мен жаңғыруға дауыс беріп, мемлекеттілігімізді нығайтуға өз үлестерін қосқанын айтты.
«- Жаңа Конституцияның қабылдануын мемлекетіміздегі түбегейлі өзгерістердің бастамасы деп бағалауымызға толық негіз бар. Мемлекет басшысы Қасым-Жомарт Кемелұлы Тоқаев азаматтардың таңдауымен қабылданған Ата заңымызға бүкіл халық атынан қол қойды. Сонымен қатар Конституцияны іске асыру жөніндегі шаралар туралы Қазақстан Республикасы Президентінің Жарлығы жария етілді. Жаңа Конституция мемлекетіміздің ұзақ мерзімді мақсат-мұратын айқындайтын, ұлтымыздың келешек тағдырына тікелей әсер ететін тарихи құжат деп бағаланды. Ата заңымыз – табанды ұжымдық еңбектің нәтижесі деп танылып, шын мәніндегі Халықтық Конституцияға айналды. Азаматтар білдірген таңдаумен қабылданған жаңа Ата заңымыз 1 шілдеден бастап ресми түрде өз күшіне енеді. Ал Конституция күнін мемлекеттік мереке ретінде ұлттық деңгейде жыл сайын 15 наурызда атап өтетін боламыз. «AMANAT» партиясы Мемлекет басшысының қоғамдық және саяси тірегі ретінде, жаңа Конституцияның әрбір бабы маңызды нормаға айналып, адамдардың игілігі жолында қызмет етуі үшін қоғамның барлық санатымен мақсатты жұмысын жалғастыратын болады. Азаматтардың сенімін артырып, конституциялық реформалардың нақты нәтижесін көруінде және мемлекеттегі оң өзгерістер халықтың тұрмыс сапасының жақсаруына ықпал етуінде өздеріңізбен бірге нәтижелі жұмыстар жүргіземіз деген сенімдемін», – деп атап өтті Алтынсары Дүйсенбекұлы.
Облыстық партия филиалы жанындағы Экономика, кәсіпкерлік және аграрлық сектор мәселелері жөніндегі кеңестің төрағасы Ғани Раймбеков жалпыұлттық референдумда халқымыз әділетті, прогрессивті, білім мен ғылымға, инновацияға негізделген болашақ үшін дауыс бергенін айтты. Мемлекет дамуындағы жаңа кезеңді бастап берген жаңа референдум, азаматтар Президент реформаларына зор сенім артып отырғанын көрсетті деп бағалады.
Жалпыхалықтық референдум қоғамдағы берекелі бірлік пен ырысты ынтымақты көрсеткенін облыстық партия филиалы атқарушы хатшысының орынбасары Қалыйма Жантөреева да атап өтті. Түркістан облысындағы 947 референдум учаскелерінің барлығында азаматтар белсенді дауыс бергенін, халық арасында қуатты отаншылдық рухы сезілгенін жеткізді. Облыс тұрғындарының белсенділігіне Мемлекет басшысы жоғары баға бергенін айта отырып, бұл Жалпыұлттық коалиция мүшелері жүргізген ауқымды түсіндіру жұмыстарының нәтижесі екенін баяндады.
Жиында қаралған мәселе бойынша сөз алған Өңірлік даму кеңсесінің Түркістан облысы бойынша менеджері, кеңес мүшесі Жандос Әзімбай жаңа Конституция саяси жүйені жаңғыртуға арналған құжат болуымен қатар, ол ең алдымен әрбір азаматтың әл-ауқатын арттыруға бағытталған нақты әлеуметтік бағдар екенін айтты. Ата заңда айқындалған әділеттілік қағидаттары, заң үстемдігі, меншік құқығының қорғалуы мен тең мүмкіндіктердің қамтамасыз етілуі азаматтардың табысын арттыруға берік негіз қалайды деген сарапшылық пікірін жеткізді. Осы мәселе жөнінде ойымен бөліскен облыстық қоғамдық кеңестің мүшесі Зуппархан Чалданов жаңа Конституция қоғамдық келісімді нығайтып, қазақстандық қоғамның ұлттық бірлігі сияқты асыл құндылықтардың сақталуына құқықтық негіз қалайтынын айтты.
Кеңес жұмысының күн тәртібіне сәйкес, мәжілісте «AMANAT» партиясының Сайлауалды бағдарламасын Түркістан облысында іске асыру жөніндегі Жол картасының азаматтардың табысын арттыру бағытындағы индикаторлық көрсеткіштердің орындалуы қаралды. Партия бекіткен жоспардың нақты орындалу көрсеткіштері бойынша Түркістан облыстық өнеркәсіп және индустриалды-инновациялық даму басқармасы басшысының орынбасары Қанат Шонбасовтың және Түркістан облыстық ауыл шаруашылығы басқармасы басшысының орынбасары Әлібек Плаловтың хабарламалары тыңдалды.
Облыстық өнеркәсіп және индустриалды-инновациялық даму басқармасының өкілі берген мәліметке сәйкес, партия бекіткен жоспар шеңберінде, облыс тұрғындары үшін сапалы жұмыс орындарын құруда 2025 жылы 6 инвестициялық жобаны іске асыру көзделіп, тиісті жұмыстар атқарылған. Жыл қорытындысымен барлығы 12 инвестжоба жүзеге асып, 562 жұмыс орындары ашылған. Ал 2026 жылы бұл бағытта 8 жоба іске асырылып, 420 жұмыс орындары ашылады деген жоспар түзілген.
Облыстық ауыл шаруашылығы басқармасы партия бекіткен кешенді жоспар аясында 8 көрсеткіштің орындалуына жауапты екені айтылды. Хабарламада агроөнеркәсіп кешеніндегі өнім көлемін арттыру, су үнемдеу технологияларын енгізу, егістік құрылымын молайту салаларындағы жұмыстар баяндалды. Аграрлық секторды минералды тыңайтқыштармен және жеңілдетілген бағада жанар-жағармаймен қамту, жылыжай шаруашылықтарын жүргізу, ауыл шаруашылығы саласында ірі инвестициялық жобаларды іске асыру, «Ауыл аманаты» жобасының орындалуы сияқты маңызды салалардың жұмыс көрсеткіштері хабарланды.
Жиынды қорытындылаған кеңес мүшелері жаңа Конституция аясында жүзеге асырылып жатқан реформалардың нақты нәтижелері өңірдің әлеуметтік-экономикалық дамуына тың серпін беріп отырғанын атап өтті. Әсіресе, азаматтардың табысын арттыруға бағытталған бастамалардың жүйелі түрде іске асырылуы – халықтың әл-ауқатын жақсартудың басты тетігі екені айтылды. Жол картасында белгіленген индикаторлардың сапалы әрі уақытылы орындалуы облыстық партия филиалының тұрақты назарында болады.
Бүгін, 18 наурыз – Ұлттық киім күніне орай «Ауыл» партиясының Түркістан облысы бойынша өңірлік филиалы Шымкент университетінің ұжымымен бірлесіп тағылымы мол мерекелік іс-шара өткізді.
Жиынды өңірлік филиал төрағасы, облыстық мәслихат депутаты Қалмұратов Төрегелді Оразалыұлы мен университет ректоры Сейітқұлов Нұрлыбек Ақынұлы құттықтау сөзбен ашып, ұлттық құндылықтардың маңыздылығына тоқталды.
Іс-шара барысында ұлттық құндылықтарымыз дәріптелді. Студенттер ұлттық киім үлгілерін мен салт-дәстүрімізді кеңінен насихаттады. Сонымен қатар факультеттер арасында тартысты да қызықты жарыстар ұйымдастырылып, қатысушылар өз өнерлері мен креативтіліктерін көрсетті.
Жеңімпаздар арнайы дипломдармен және қаржылай сыйлықтармен марапатталды. Мереке соңы көтеріңкі көңіл күйдегі концерттік бағдарламаға ұласып, барша қатысушыларға ерекше әсер сыйлады.
Ұлттық құндылықтарымыз ұлықтала берсін!
Біздің еліміз Президент Қасым-Жомарт Кемелұлы Тоқаевтың басшылығымен сенімді түрде дамудың жаңа кезеңіне қадам басты.
Кеше жалпыхалықтық референдумда Қазақстан азаматтары ауызбіршілік пен нағыз отаншылдықтың үлгісін көрсетіп, Мемлекет басшысының ауқымды саяси және әлеуметтік-экономикалық реформаларына жаппай қолдауын білдірді.
Біз сіздермен бірге ауқымы мен мән-маңызы тұрғысынан ел тағдырына қатысты тарихи оқиғаның тікелей куәгері болдық.
Президентімізатап өткендей, қазақстандықтар жаңару мен жаңғыру үшін дауыс беріп, мемлекеттігімізді нығайтуға өз үлестерін қосты.
Әділетті әрі Өркендеген Қазақстанның жаңа тарихы ұлттық дәстүрлеріміз бен мәдениетімізді ұлықтап, тек демократиялық құндылықтар негізінде қалыптасуда.
Жүргізіліп жатқан өзгерістердің сапасы мен даму қарқынын қамтамасыз ете отырып, бәріміз бірге алға қойылған мақсат-міндеттерге қол жеткізетінімізге сенімдімін.
Барша қазақстандықтарды Отанымыздың Бірлігі мен Тәуелсіздігінің және Егемендігінің символы болып табылатын жаңа Конституцияның қабылдануымен құттықтаймын!
Түркістан облыстық мәслихат төрағасы Нұралы Әбішов республикалық референдумға қатысып, өз таңдауын жасады. Нұралы Әлмаханұлы Қ.А.Ясауи атындағы ХҚТУ-да орналасқан №133 учаскесінде дауыс берді.
«Бұл жай ғана дауыс беру емес — бұл біздің ортақ болашағымызға, балаларымыздың ертеңіне деген жауапкершілік. Референдум – мемлекетіміздің даму бағытын айқындайды. Дауыс беру учаскесіндегі сайлаушылардың көптігінен бұқараның болашаққа деген сенімін көрдім. Ел тағдырына бей-жай қарамай, азаматтық белсенділік танытқан баршаңызға рақмет!» – деді облыстық мәслихат төрағасы.
Айта кетейік, Түркістан облысында 15 наурыз күні сағат таңғы 07:00-ден бастап 947 референдум учаскесі өз жұмысын бастады. Облыста 1 187 257 азамат дауыс беру құқығына ие. Қазіргі таңда облыс тұрғындары маңызды шараға белсенді қатысуда.
Түркістан қаласындағы №115 дауыс беру учаскесіне домбырашылар арнайы келіп, өз таңдауларын жасады. Бұл мәдениет өкілдерінің елдегі маңызды науқанға белсенді қатысуының көрінісі. Домбырашылардың қатысуы тұрғындарға азаматтық белсенділік үлгісін көрсетіп, референдумның маңызын насихаттауға септігін тигізді.
Айта кетейік, Түркістан қаласы бойынша республикалық референдум өткізу үшін 65 дауыс беру учаскесі ұйымдастырылған. Барлық учаскелер қажетті құрал-жабдықтармен, материалдық-техникалық жағынан толық қамтамасыз етілген. Қала тұрғындары референдумға белсенді қатысып, өз таңдауларын жасап жатыр.
Түркістан облысында 1 187 257 азамат референдумда дауыс беру құқығына ие. Бүгін 15 наурыз күні таңғы сағат 07:00-ден бастап өңір бойынша 947 референдум учаскесі өз жұмысын бастады. Референдум күні өңір тұрғындары әлеуметтік желілерде арнайы челленджді қолға алды. Азаматтар дауыс беру сәтінен фото және бейнежазбаларын #МенДауысБердім, #ЕлімҮшінТаңдау, #РеферендумғаБардым хештегтерімен әлеуметтік желіде жариялап жатыр.
Бұл бастама тұрғындарды маңызды саяси науқанға белсенді қатысуға шақырып, азаматтық жауапкершілікті арттыруды көздейді. Әлеуметтік желідегі челлендж арқылы көптеген тұрғындар референдумға қатысып, ел болашағына бей-жай қарамайтынын көрсетуде.
Түркістан облысы, Төлеби ауданындағы «Алма Тау» спорттық базасында бокстан Қазақстан Республикасының ұлттық құрамасы оқу-жаттығу жиындарын өткізуде. Дайындық барысында ұлттық құрама мүшелері ел өміріндегі маңызды саяси науқаннан да тыс қалған жоқ. Спортшылар Төлеби ауданына қарасты Ақбастау ауылындағы №760 учаскеге арнайы келіп, азаматтық борыштарын орындап, өз таңдауларын жасады.
Спортшылардың айтуынша, мемлекет тағдырына қатысты маңызды шешімдер қабылданатын сәтте әрбір азаматтың белсенділігі аса маңызды. Сондықтан олар халықпен бірге ел болашағына жауапкершілікпен қарап, референдумға қатысуды азаматтық парыз деп санайтындарын жеткізді.
