Шымкент қаласының Тұран ауданына жақында тағайындалған Боранбай Булатбековтің тұрғындармен кездесуі «тойдан» кем түспеді. «Қазығұрт» шағын ауданының тұрғындары жаңа әкімді әнмен қарсы алып, «шашу» шашқан. Бұл туралы журналист Мақсұт Айтжанов өзінің фейсбук әлеуметтік желісіндегі жеке парақшасында жариялады.
Сондай-ақ, журналист бұған дейін тазаланбаған көше мен жаяу жүргіншілер жолының мәселесін айтқан. Әкім келеді деген соң, тазалық мамандары көшедегі мұдарды ойып, іске кіріскенін айтқан ол, «БАЛА ЖЫЛАСА ДА, ӘКІМ ЖЫҒЫЛМАСЫН»- деп жазба қалдырған.
Түркістан облысы, Төлеби ауданында қымыз құйғыш робот бар. Оның есімі — «Асылбек». Кез келген адам аталмыш роботқа арнайы пластикалық картаны жақындатса «Асылбек» сөйлей бастайды. Содан кейін робот қымыздың шипалы қасиеті туралы мағлұмат береді. Осыдан соң, ыдысқа шөлді басатын пайдалы сусынды құйып береді. Ұлттық сусынды насихаттайтын бұл роботты
Ш.Уәлиханов атындағы №2 жалпы орта мектебінің 9-сынып оқушысы Жансұлтан Төребек жасаған. Оған ұстазы, информатика пәнінің мұғалімі Лаура Жақсыбекова көмек берген екен.
Жансұлтанда мұндай идея мектепте өткен роботтар көрмесі кезінде туындаған. «Асылбек» қазір оқушылардың робототехникаға деген қызығушылығын арттырумен қатар, емдік қасиеті бар қымыз арқылы жастардың арасында салауатты өмір салтын дәріптейді.
«Ұлттық сусынымызды насихаттайтын болғандықтан, «Асылбектің» ұлттық киімде болғаны дұрыс деп шештік,» – дейді Жансұлтан Төребек.
Оның қымыз құйғыш робот жобасы ғылыми жобалар байқауының аудандық және облыстық кезеңдерінде жүлделі орындарды иеленген.
Енді журналистің сауалына міндетті түрде жауап беріледі. Жауап беру мерзімі қысқарады. Қазір 7 күн болса, енді ол 3-5 күн болып қысқарады.Бұл туралы Өңірлік мерзімді басылымдар форумында Ақпарат және қоғамдық даму министрі Дархан Қыдырәлі айтты.
Сонымен бірге, министр алдағы уақытта журналистерге жауап бермейтін мемлекеттік қызметшілер жауапкершілікке тартылатынын мәлім етті. «Мұның барлығы журналистің ақпаратқа қолжетімділігін арттыру мақсатында жасалып отыр», — деді Дархан Қыдырәлі.
«Масс медиа туралы» ҚР заң жобасы аясында журналистердің әлеуметтік жағдайын жақсарту жоспарланып отыр. Заң жобасында журналистердің жеңілдікпен пәтер алуы, ауруханаларда жеңілдіктер пайдалануы туралы нормалар бар.Бұл туралы Өңірлік мерзімді басылымдар форумында Ақпарат және қоғамдық даму министрі Дархан Қыдырәлі мәлімдеді. Министрдің сөзінше, «Pressa» деген жазуы бар көлікті кез-келген жерге қою немесе мекемелерге кіру сияқты көптеген жеңілдіктер қарастырылмақ.
Елімізде резервшілерді жұмысқа орналастыру барысында түрлі қиындықтар туындайды екен. Кейбір мемлекеттік органдарға 10 резервші тағайындалса, енді бір органда бірде-бір резервші тағайындалмаған.Ал, әлеуметтік маңызы бар денсаулық сақтау, энергетика, білім беру сынды салалардағы резервшілердің саны тым аз болып отыр. Бұл туралы Мемлекеттік қызмет істері агенттігінің төрағасы Дархан Жазықбаев мәлімдеді. Айта кетейік, биыл президенттік жастар кадрлық резервіне кезекті іріктеу жүргізіледі. Енді, кадр резервін іріктеу барысында салалық топтар нақты жіктелмек.
Түркістан облысында білім беру ұйымдарының бірінші басшыларын тағайындау конкурсының «Әңгімелесу» кезеңі өткізілді. Конкурстың шешуші кезеңі фейсбук әлеуметтік желісінде тікелей эфирде жүргізілді. Түркістан облысы әкімінің орынбасары Бейсенбай Тәжібаев жалпы ұстаздарға маңызды жауапкершілік жүктелгенін, басшыларды тағайындау әділ жүргізілуі тиіс екенін айтты.
Айта кетейік, «Әңгімелесу» кезеңіне 53 үміткер қатысуда. Олар 35 мекемеге басшы болудан үмітті. Үміткерді бағалау ашық дауыс беру арқылы жүргізіледі. Сонымен қатар бағалау парағы қоса тіркеледі.
Айта кетерлігі, талапқа сәйкес үміткерлер «Әңгімелесу» кезеңіне дейін конкурстың құжат тіркеу, тест, қамқоршылық кеңестен келісім алу кезеңдерінен өткен. Олардың арасында еңбек өтілі 30 жылдан асқан аса тәжірибелі ұстаздар бар.
Астанадағы «Балам-ай» дамыту орталығында балаларға жәбір көрсеткен тәрбиешілердің әрекеті көпшілікті ашындырды. Сұмдық жағдайға қатысты әлеуметтік желіде видео тарап, желі қолданушылары қорлық көрсеткендерді қатаң жазаға тарту керектігін айтқан болатын. Аталған жағдайға байланысты ҚР Бас прокуроры Берік Асылов өзінің Twitter-дегі парақшасында мүмкіндігі шектеулі балаларды қорлағандар қатысты пікірін білдірді.
«Елордадағы инклюзивті балабақшада болған жантүршігерлік оқиға қайталанбауы тиіс. Балаларды қорлауға, жәбір көрсетуге жол бермеуіміз қажет. Бұл дерек бойынша қозғалған қылмыстық істің тергеу барысы бақылауда. Қорлағандар заң алдында жауап береді,» — деді ҚР Бас прокуроры.
Бүгінде Шардара су қоймасының толуы 77 пайызды құрап отыр. Бұл көрсеткішті өткен жылғы судың көлемімен салыстырғанда 41 пайызға артып отыр. Алайда,«Қазсушар» РМК-ның Түркістан филиалының директоры Қазыбек Бедебаев Шардара мен Көксарай су қоймасынан келер қауіп жоқ екенін айтты.
– Сырдария өзенінің жоғарғы ағысынан келіп жатқан су деңгейі қазіргі кезде төмендеген. Ал бүгінгі мәлімет бойынша, Шардара су қоймасына келген су көлемі — 1114 м3/сек, нақты көлемі — 3997 млн м3, сондай-ақ, шыққан су 1111 м3/сек құрап отыр. Ал Көксарай су торабына келген су — 800 м3/сек, Көксарай су реттегішіне алынып жатқан су — 200 м3/сек, нақты көлемі — 1008,37 млн м3, ал Сырдария өзенінің төменгі ағысына тасталынып жатқан су — 600 м3/сек. Шардара су қоймасынан Қызылқұм магистралды каналына — 11 м3/сек, Арнасай су торабынан Айдаркөл ойпатына 300 м3/сек су тасталынуда. Бүгінгі таңда елдімекендерді су басу қаупі жоқ. Су ресурстар комитеті тарапынан осы жағдай бақыланып, реттеліп жатыр, — деді Қазыбек Қошқарбекұлы.
Жалпы, Сырдария өзені бойында 97,5 шақырымды құрайтын су тасқынына қарсы қорғаныс дамбалары тұрғызылыпты. Мамандардың айтуынша, олардың барлығы қалыпты жағдайда. Өткен жылы Шардара ауданы, Сүткент елдімекені тұсындағы қорғаныс дамбасы күрделі жөндеуден өткен. Сырдария өзенінен бастау алатын каналдардың тоспалары бекітіліп, топырақпен нығайтылған. Өзен бойындағы елдімекендерде орнатылған «Үлкен су» локалды құлақтандыру жүйесі дайындыққа келтірілген. Сондай-ақ, Шардара су қоймасына байланысты табиғи және техногендік сипаттағы төтенше жағдайлардан қорғау жоспары жасалған.
ZTB Qazaqstan сайты әлеуметтік желіде Атыраулық полиция қызметкерінің жол ережесін бұзған жүргізушіден пара ретінде «торт» алған видеосын жариялады.
Жол ережесін бұзған жүргізуші полиция қызметкеріне жағдайын айтып, әкімшілік хаттама толтырмауын өтінген. Ал полицей хаттама толтырмауға келісіп, бірақ «Алмагүл» шағын ауданындағы тәттілер дүкенінен торт алып келуін ұсынған. Тәртіп бұзған азамат полицей сұрағандай, тортты оның тапсырысы бойынша сатып алып, телефон арқылы тауар мен түбіртекті көрсетіп, қайда жеткізуін сұраған.
Видеода полицей қызметтік көлігімен «Бақдәулет» сауда орталығының артында тұрғанын айтып, сонда шақырған. Торт алған азамат олардың көлігіне отырып, қолындағы тортсыз түсіп бара жатқан сәті бейнебақылау камерасына түсіп қалған.
Атырау қалалық полиция басқармасы бұл оқиға 2022 жылдың 30-желтоқсанында болғанын хабарлады. Сондай-ақ, аталған фактіге қатысты қызметтік тексеру жүргізіліп, Атырау қалалық полиция басқармасы Патрульдік полиция батальонының 2 қызметкері жұмыстан шығарылғанын мәлімдеген.
Өткен жылдың қорытындысымен Түркістан облысы, Түлкібас ауданына 11339 турист келген. Оның ішінде 450 шет ел азаматы бар. Бұл туралы аудан әкімі Нұрлан Байғұттың төрағалығымен өткен кезекті лездемелік жиында аудандық кәсіпкерлік бөлімінің басшысы Ұ.Әлімбаев мәлімдеді.
Бөлім басшысы өткен жылдың қорытындысымен кәсіпкерлік саласында оның ішінде индустрияландыру мен инвестиция тарту бағытындағы атқарылған жұмыстарды баяндап, алдағы іске асатын жобалармен таныстырды.
Бұдан бөлек жиынның күн тәртібінде ауданның әлеуметтік-экономикалық даму көрсеткіштері және дипломмен ауылға мемлекеттік бағдарламасының іске асу барысы мен сыбайлас жемқорлыққа қарсы күрес жұмыстарының барысы қаралды.
Жалпы өткен жылы дипломмен ауылға бағдарламасы бойынша жәрдемақы алуға 80 жас маманнан өтініш түскен. Соның ішінде 62 маманға 100 АЕК көлемінде әлеуметтік қолдау шаралары көрсетілген. 2022 жылы 10 жас маманға үй салуға немесе сатып алуға 1500 АЕК көлемінде пайызсыз несие берілген.
Жиынды қорытындылаған Нұрлан Мархабатұлы сыбайлас жомқорлықпен күресу, оның алдын алу жұмыстарын барынша күшейту бойынша бөлім басшылары мен ауыл әкімдеріне бірнеше тапсырма жүктеді. Жауапты орынбасары мен тиісті бөлім басшысына коммуналдық қызметтердің үздіксіз жұмыс істеп тұруын бақылауда ұстауды тапсырды.
